Laj Jeremias, xb’aan laj Walter Rane

10–16 octubre

Jeremias 1–3; 7; 16–18; 20

“Naq toj maji’ nakatsiyaak chaq rik’in laa na’, laa’in ak xinsik’ chaq aawu”

Li Elder David A. Bednar kixye: “Laa’in nawab’i xyaab’ xkux [li Qaawa’] sa’eb’ li loq’laj hu. Li loq’laj hu, a’an lix chapb’il yaab’ xkux li Qaawa’ ” (““Escúchalo” en tu corazón y en tu mente,” ChurchofJesusChrist.org).

Tz’iib’a li nakak’oxla

Sa’ xtiklajik, laj Jeremias ink’a’ kixpaab’ naq truuq taawanq jo’ profeet. “Ink’a’ ninnaw aatinak,” chan naq kib’oqe’ xb’aan li Qaawa’ (Jeremias 1:6). Li Qaawa’ kixk’ojob’ xch’ool, “Xink’e li waatin sa’ xtz’uumal aawe” (raqal 9). Laj Jeremias kireek’a naq “toj saaj chi us” (raqal 6), a’b’an li Qaawa’ kixch’olob’ naq ak xkawresiman us ta ink’a’ najultiko’ re—kik’ojob’aak sa’ xb’oqb’al naq maji’ yo’lajenaq (chi’ilmanq li raqal 5). Kikawu xch’ool laj Jeremias ut kixk’ulub’a xb’oqb’al. Kixtijeb’ li rey ut laj tij sa’ Jerusalen ut kixye reheb’ naq ink’a’ te’kole’q chiru li sachk xb’aan lix pak’b’il santilaleb’. Li winq li “toj saaj chi us” ut ink’a’ naxnaw aatinak ki’ok chireek’ankil li raatin li Dios “chanchan jun li xam lochlo sa’ lix ch’ool” ut ink’a’ kiru chi ch’anab’aak (Jeremias 20:9).

Lix seraq’ laj Jeremias, a’an ajwi’ li qaseraq’ laa’o. Li Dios kixnaw ajwi’ qu naq maji’ nokoyo’la, ut kooxkawresi re xb’aanunkil lix k’anjel sa’ ruchich’och’. Laj Jeremias kiril chi rub’elaj jun xraqalil li k’anjel a’in: xch’utub’ankil lix tenamit li Dios, chi junjunqil, re “xk’amb’aleb’ chaq sa’ li tenamit Sion” (Jeremias 3:14). Ut us ta ink’a’ nakanaw k’a’ru tz’aqal taaye ut taab’aanu, “matxuwak…; xb’aan naq wanqin aawochb’een, chan li Qaawa’ ” (Jeremias 1:8, 19).

Re xtzolb’al k’a’ru wan sa’ li hu Jeremias, chi’ilmanq “Jeremias” sa’ li K’utul Raqal reheb’ li Loq’laj Hu.

Li na’leb’ re xtzolb’aleb’ li loq’laj hu aajunes

Jeremias 1:4–19; 7:1–7; 20:8–10

Jun profeet b’oqb’il chixyaab’asinkil li raatin li Qaawa’.

Naq nakawil Jeremias 1:4–19 li na’aatiank chirix lix b’oqb’al laj Jeremias jo’ profeet, k’oxla lix k’anjeleb’ li profeet sa’ laa yu’am. K’a’ru nakatzol chirixeb’ li profeet sa’ li naxye li Qaawa’ re laj Jeremias? (chi’ilmanq ajwi’ Jeremias 7:1–7) Li raatin laj Jeremias kitz’eqtaanak chi kok’ aj xsa’ Jeremias 20:8, 20:8,10). K’a’ru nakatzol sa’ li raatin laj Jeremias sa’ Jeremias 20:9? Chiwanq sa’ aak’a’uxl li na’leb’ a’in naq yookat chixtzolb’al lix k’utum laj Jeremias. K’a’ru nakataw sa’ lix k’utum li nakatxmusiq’a chixtaaqenkil li profeet anajwan?

Jeremias 1:5

Li Dios kixnaw wu naq maji’ ninyo’la.

Naq maji’ nayo’la laj Jeremias, li Dios kixnaw ru ut kixsik’ ru, malaj kixk’ojob’ chi rub’elaj, re tixb’aanu jun k’anjel sa’ ruchich’och’ (chi’ilmanq Jeremias 1:5). K’a’ut naq nim xloq’al li nawom a’in choq’ re laj Jeremias?

Li Dios kixnaw ajwi’ aawu naq maji’ nakatyo’la ut xatxk’ojob’ re taab’aanu jun li k’anjel (chi’ilmanq Alma 13:1–4; Tzol’leb’ ut Sumwank 138:53–56; Abraham 3:22–23). Chan ru naq li nawom a’in taawanq xwankil sa’ laa yu’am? Wi ak xak’ul laa wosob’tesinkil xb’aan li yuwa’b’ejil aj k’anjel, maare taatz’il rix rik’in tijok, ut taapatz’ re li Dios chan ru taab’aanu li k’anjel kixk’e aawe.

Chi’ilmanq ajwi’ Temas del Evangelio, “Preordenación,” “Vida preterrenal,” topics.ChurchofJesusChrist.org.

Eb’ li kristiaan re li najter Israel ke’roskiheb’ li kumb’ re xk’uulankil li ha’.

Jeremias 2; 7

“Xine’xtz’eqtaana laa’in, li yu’am ha’.”

Sa’ li chaqi ch’och’ ke’wan wi’ laj Israelita, ke’xk’uula li ha’ rub’el li ch’och’ sa’eb’ li kumb’. K’a’ut naq jun yo’leb’aal ha’ chaab’il wi’chik chiru jun li kumb’? K’a’ru naraj naxye xtz’eqtaanankil lix yo’leb’aal “li yu’am ha’ ”? K’a’ru neke’reetali li kumb’ li “x’it’e’k chiruheb’ ” sa’ Jeremias 2:13? Naq nakawil Jeremias 2 ut 7, k’e reetal chan ru naq ke’xtz’eqtaana lix yu’am ha’ li Qaawa’, ut k’oxla chan ru naq yookat chixk’ulb’al li yu’am ha’ sa’ laa yu’am.

Jeremiah7 na’aatinak reheb’ li ani “neke’nume’ sa’ li okeb’aal … re xloq’oninkil ru li Qaawa’” (Jeremiah 7:2). Us ta neke’loq’onink chi k’utb’il, ke’wan xninqi maak (che’ilmanq li raqal 2–11). K’a’ru nakak’oxla naq li Qaawa’ naraj xk’utb’al chawu sa’eb’ li raqal 21–23?

Jeremias 3:14–18; 16:14–21

Li Qaawa’ tixch’utub’ lix tenamit.

Naq laj Jeremias ki’aatinak jo’ profeet chirix lix ch’utub’ankil Isreal li jek’inb’il, kixye naq nimaq wi’chik xwankil a’an chiru li relelikeb’ chaq sa’ Egipto (chi’ilmanq Jeremias 16:14–15). Li Awa’b’ej Russel M. Nelson kixye ajwi’: “Xattaqlaak sa’ ruchich’och’ sa’ li kutankil a’in … re tenq’ank chixch’utub’ankil Israel. Maak’a’ yoo chi uxmank sa’ li ruchich’och’ li nim wi’chik xwankil chiru li [ch’utub’ank] a’an. … Tento naq tz’aqal ajeelaq ru li k’anjel a’in choq’ aawe” (Russell M. Nelson ut Wendy W. Nelson, “Juventud de Israel” [ch’utam choq’ reheb’ li saaj sa’ chixjunil li ruchich’och’, 3 junio, 2018], aatin sa’ li New Era ut li Ensign, agosto 2018, 12, ChurchofJesusChrist.org).

Naq nakatzol Jeremias 3:14–18; 16:14–21, k’a’ru naxtoch’ aach’ool chirix lix ch’utub’ankil Israel sa’ roso’jikeb’ li kutan? K’a’ru neke’xye li raqal a’in chirix li ch’utub’ank a’an? K’a’ chik ru nakataw sa’ xtz’aqob’ li raatin li Awa’b’ej Nelson?`

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Jeremias 1:5.Naru taawoksi li raqal a’in re aatinak chirix li qayu’am rik’in li qaChoxahil Yuwa’ naq maji’ nokoyo’la. Li b’ich “Sa’ li choxa chaq kinwan” (B’ichleb’aal choq’ reheb’ li Kok’al, 139) ut li raqal “Introducción: El plan de nuestro Padre Celestial” (sa’ Relatos del Nuevo Testamento, 1–5) naru te’k’anjelaq eere. Chan ru najala li qayu’am naq naqanaw naq kiwan qayu’am naq maji’ nokoyo’la?

Jeremias 2:13; 17:13–14.Re xtenq’ankil laa junkab’al chixtawb’aleb’ ru li raqal a’in, naru taak’ut chiruheb’ k’a’ru na’ux naq nakahoy li ha’ sa’ jun sek’ li jorb’il. K’a’ru nareetali li yo’leb’aal re “yu’am ha’ ” ut li “kumb’ li x’it’e’k chiru”? (Jeremias 2:13). Chan ru naq noko’uk’ak sa’ xyu’am ha’ li Kolonel?

Jeremias 16:16.Li Awa’b’ej Russel M. Nelson kixjuntaq’eetaheb’ laj kar ut laj yohonel sa’ li raqal a’in rik’ineb’ li misioneer sa’ roso’jikeb’ li kutan (chi’ilmanq “El recogimiento del Israel disperso,” Liahona, noviembre 2006, 81). Jo’ junkab’al, naru teesik’ li k’a’aq re ru sa’ lee rochoch jo’ tixb’aanu raj “aj yo”, ut teeye chan ru tex’tenq’anq chixch’utub’ankil Israel jo’ “aj yo” ut “aj kar.”

Jeremias 18:1–6.Re xtz’ilb’aleb’ rix li raqal a’in, maare tex’aatinaq chirix li yiib’ank naxb’aanu jun aj pak’onel. K’a’ru naxye li Qaawa’ re Israel sa’ Jeremias 18:1–6? K’a’ru naraj naxye wank jo’ meelb’ sa’ ruq’ li Qaawa’? (chi’ilmanq ajwi’ Isaias 64:8). Re rilb’al jun chik li seraq’ li nokoxjuntaq’eeta rik’in xmeelb’ laj pak’onel, chi’ilmanq li raatin li Elder Richard J. Maynes “Li sahil ch’oolejil naq li Jesukristo wan xb’een wa sa’ qayu’am” (Jolomil ch’utub’aj-ib’ re octubre 2015).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Ex aj Israel, ab’ihomaq,” Eb’ li B’ich, 6.

Xkawresinkil qib’ jo’ aj k’utunel

Oksiheb’ li seraq’. Li Kolonel k’iila sut kik’utuk rik’ineb’ li seraq’. K’oxlaheb’ li seraq’ re laa yu’am li naru te’xk’ut jun na’leb’ re li evangelio. (Chi’ilmanq Li k’utuk jo’ li Kolonel, 22.)

“Ex aj Israel … sa’ wuq’ laa’in jo’kex li seb’ li nayoq’leek sa’ ruq’ laj pak’onel” (Jeremias 18:6).