fānau ʻi ha loki ako ʻi he lotú

Ko ha Sīpinga ki hono Akoʻí

ʻI he maʻuʻanga tokoni ko ʻení, te ke maʻu ai e sīpinga sitepu ʻe tolu ʻoku toutou hoko ʻi he lēsoni takitaha: fakaafeʻi e vahevahé, akoʻi e tokāteliné, mo poupouʻi e ako ʻi ʻapí. ʻI he ngaahi meʻa lahi, ʻe ala femahulunaki pe hoko ʻa e ngaahi ʻelemēniti ʻo e sīpinga ko ʻení ʻi ha founga kehekehe lolotonga hoʻo faiakó. Hangē ko ʻení, fakakaukau ko e vahevahé ko ha faingamālie ke akoʻi e tokāteliné, pea ʻoku totonu ke kau ʻi hono akoʻi ʻo e tokāteliné ha ngaahi fakaafe ke vahevahe. Ko e meʻa tatau pē, ʻe lava ke poupouʻi ʻa e ako ʻi ʻapí ʻi ha fealēleaʻaki fakakalasi. Tuku e liliu ko ʻení ke hoko fakanatula pē, ʻaki e muimui ki he ngaahi ueʻi ʻa e Laumālié ke feau e ngaahi fiemaʻu ʻa e fānau ʻokú ke akoʻí.

Fakaafeʻi e Feʻinasiʻakí

Ke hoko ko ha konga ʻo e kalasi kotoa pē, fakaafeʻi e fānaú ke nau vahevahe ʻenau ngaahi ongó, fakakaukaú, mo e ngaahi aʻusia fekauʻaki mo e ngaahi tefitoʻi moʻoni ʻokú ke akoʻí. ʻE ala kau ʻi heʻenau ngaahi fakamatalá ha ngaahi aʻusia kuo nau maʻu ʻi heʻenau ako ʻi ʻapí. Te ke lava foki ʻo toe vakaiʻi ʻa e meʻa ne nau ako ʻi he uike kuo ʻosí pea ʻeke ange pe kuó ne tākiekina fēfē ʻenau moʻuí.

Akoʻi ʻa e Tokāteliné

ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino lelei ange e tokāteline te ke akoʻi ki he fānaú. Fakakaukau pe ko e hā e ngaahi veesi folofola, kupuʻi lea, aʻusia, fehuʻi, mo e ngaahi maʻuʻanga tokoni kehe te ke lava ʻo vahevahe ke tokoni ke ako mo fakahoko ai ʻe he fānaú ʻa e ngaahi tefitoʻi moʻoni ʻo e ongoongoleleí ʻoku nau akó. Tokoni ke nau fakatokangaʻi ʻa e ivi tākiekina ʻo e Laumālie Māʻoniʻoní ʻi Heʻene fakamoʻoniʻi ʻa e moʻoní. Fekumi ki ha ngaahi founga mohu fakakaukau mo ueʻi fakalaumālie ke tokoniʻi ai kinautolu ke nau loto vekeveke fekauʻaki mo e ngaahi meʻa ʻoku nau akó.

Ki ha ngaahi fakakaukau fekauʻaki mo e founga ke fakaʻaongaʻi ai ʻa e mūsiká ke akoʻi e tokāteliné, vakai ki he ongo konga “Ko Hono Fakaʻaongaʻi ʻo e Hivá ke Akoʻi ʻa e Tokāteliné” mo e “Ko Hono Tokoniʻi e Fānaú ke Ako mo Manatuʻi ʻa e Ngaahi Hiva Palaimelí mo e Ngaahi Himí” ʻi he “Ngaahi Fakahinohino ki he Taimi Hivá mo e Polokalama ʻa e Fānaú ʻi he Houalotu Sākalamēnití” ʻi he konga ki mui ʻo e tohi lēsoni ko ʻení.

Poupouʻi e Ako ʻi ʻApí

Koeʻuhí ko e ʻapí ko e uho ia ʻo hono ako ʻo e ongoongoleleí, ko ha taha ʻo hoʻo ngaahi kaveinga ngāue ʻi hoʻo hoko ko e faiako Palaimelí ke poupouʻi e ako ʻi ʻapí. Te ke tokoniʻi fēfē e fānaú ke vahevahe mo honau ngaahi fāmilí e meʻa ne nau ako he kalasí? Te ke poupouʻi fēfē nai e fānaú mo honau ngaahi fāmilí ke hokohoko atu ʻenau ako mei he Fuakava Motuʻá ʻi ʻapí?

Ki ha ngaahi fakakaukau fekauʻaki mo e founga ke fakaʻaongaʻi ai ʻa e mūsiká ke akoʻi e tokāteliné, vakai ki he ongo konga “Ko Hono Fakaʻaongaʻi ʻo e Hivá ke Akoʻi ʻa e Tokāteliné” mo e “Ko Hono Tokoniʻi e Fānaú ke Ako mo Manatuʻi ʻa e Ngaahi Hiva Palaimelí mo e Ngaahi Himí” ʻi he “Ngaahi Fakahinohino ki he Taimi Hivá mo e Polokalama ʻa e Fānaú ʻi he Houalotu Sākalamēnití” ʻi he konga ki mui ʻo e tohi lēsoni ko ʻení.