“Ngaahi Maʻuʻanga Tokoni Makehe ki hono Akoʻi ʻo e Fānaú,” Haʻu, ʻo Muimui ʻIate Au—Maʻá e Palaimelí: Fuakava Motuʻá 2022(2021)
“Ngaahi Maʻuʻanga Tokoni Makehe ki hono Akoʻi ʻo e Fānaú,” Haʻu, ʻo Muimui ʻIate Au—Maʻá e Palaimelí: 2022
Ngaahi Maʻuʻanga Tokoni Makehe ki hono Akoʻi ʻo e Fānaú
ʻE ala maʻu ʻa e ngaahi maʻuʻanga tokoni ko ʻení ʻi he polokalama Gospel Library mo e ChurchofJesusChrist.org.
Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí
Te ke lava ʻo liliu ʻa e ngaahi ʻekitivitī mei he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke fakaʻaongaʻi ʻi hoʻo kalasi Palaimelí. ʻOua te ke hohaʻa kapau kuo ʻosi fai ʻe he fānaú ʻa e ngaahi ʻekitivitī ko ʻení mo honau ngaahi fāmilí ʻi ʻapi; ʻe tokoni hono toutou fakahokó ke ako ai e fānaú. ʻE ala fie maʻu ʻe he fānaú ke tala atu kiate koe fekauʻaki mo e founga ne nau fakahoko ʻaki e ngaahi ʻekitivitií mo honau ngaahi fāmilí pea mo e meʻa ne nau akó.
Ngaahi Himí mo e Tohi Hiva ʻa e Fānaú
ʻOku fakaafeʻi ʻe he hiva toputapú ʻa e Laumālié mo akoʻi e tokāteliné ʻi ha founga fakangalongataʻa. Makehe mei he ngaahi tatau kuo paaki ʻo e Ngaahi Himímo e Tohi Hiva ʻa e Fānaú, te ke lava ʻo maʻu e hiki tatau ʻo e ngaahi fasi mo e ngaahi vitiō ʻo ha ngaahi himi lahi mo ha ngaahi hiva maʻá e fānaú ʻi he music.ChurchofJesusChrist.org mo e Sacred Music pea mo e polokalama Gospel Media.
Ki ha ngaahi fakakaukau, vakai ki he ongo konga “Ko Hono Fakaʻaongaʻi ʻo e Hivá ke Akoʻi ʻa e Tokāteliné” mo e “Ko Hono Tokoniʻi e Fānaú ke Ako mo Manatuʻi ʻa e Ngaahi Hiva Palaimelí mo e Ngaahi Himí” ʻi he “Ngaahi Fakahinohino ki he Taimi Hivá mo e Polokalama ʻa e Fānaú ʻi he Houalotu Sākalamēnití” ʻi he tohi ko ʻení.
Vakai Ki Hoʻomou Fānau Īkí
Ko e lahi taha ʻo e ngaahi tefito ʻoku ʻasi ʻi he tohi lēsoní Vakai ki Hoʻomou Fānau Īkí: Tohi Lēsoni Nesilií ʻoku tatau ia mo e ngaahi tefito te ke akoʻi ʻi he Palaimelí. Tautautefito kapau ʻokú ke akoʻi e fānau iiki angé, fakakaukau ke fekumi ʻi he tohi lēsoni ʻa e nesilií ki ha ngaahi hiva, talanoa, ngaahi ʻekitivitī mo e ngāue fakameaʻa makehe.
Makasini Kaumeʻá
ʻOku ʻomi ʻi he makasini Kaumeʻá ha ngaahi talanoa mo e ʻekitivitī ʻe lava ʻo fakalahi ki he ngaahi tefitoʻi moʻoni ʻokú ke akoʻi mei he Haʻu, ʻo Muimui ʻIate Au—Maʻá e Palaimelí.
Ngaahi Talanoa ʻo e Fuakava Motuʻá
ʻE ala tokoni ʻa e Ngaahi Talanoa ʻo e Fuakava Motuʻá ki he fānaú ke nau ako ʻa e tokāteline mo e ngaahi talanoa ʻi he Fuakava Motuʻá. Te ke lava foki ʻo maʻu e ngaahi vitiō ʻo e ʻū talanoa ko ʻení ʻi he Gospel Library app mo e MediaLibrary.ChurchofJesusChrist.org.
Tohi Tā Valivali ʻo e Ngaahi Talanoa Fakafolofolá—Fuakava Motuʻá
ʻOku ʻi he maʻuʻanga tokoni ko ʻení ha ngaahi peesi ʻekitivitī valivali fakaoli naʻe faʻu ke fakatupulaki e ako ʻa e fānaú mei he Fuakava Motuʻá.
Ngaahi Vitioó mo e Tā Valivalí
ʻE lava e ʻū fakatātaá, ngaahi vitioó, mo e mītia kehé ʻo tokoni kiate kinautolu ʻokú ke akoʻí ke mahino ʻa e tokāteliné mo fakakaukauloto ki he ngaahi talanoa ʻoku fekauʻaki mo e ngaahi potufolofolá. ʻAlu ki he Gospel Media Library ʻi he MediaLibrary.ChurchofJesusChrist.org ke vakaiʻi e ngaahi maʻuʻanga tokoni fakamītia kuo tānaki ʻe he Siasí. ‘Oku toe maʻu atu foki ʻa e Gospel Media ko ha polokalama fakatelefoni toʻotoʻo. ʻOku lahi e ngaahi fakatātā ʻoku lava ke ke fakaʻaongaʻi ʻi he kalasí ʻoku maʻu ʻi heTohi Fakatātā ʻo e Ongoongoleleí.
Ko e Faiako ‘i he Founga ‘a e Fakamoʻuí
ʻE lava ke tokoni atu ʻa e Ko e Faiako ‘i he Founga ‘a e Fakamo‘uí ke ke ako mo ngāue ʻaki ʻa e ngaahi tefitoʻi moʻoni ʻo e faiako faka-Kalaisí. ʻOku aleaʻi mo akoako fakahoko ʻa e ngaahi tefitoʻi moʻoni ko ʻení ʻi he ngaahi fakataha alēlea fakafaiakó.