Ettōņak eo an Liai, jān Steven Lloyd Neal

Jānwōde 13–19

1 Nipai 8–10

“Itok im Mōn̄ā Leen Wōjke eo.”

Mokta jān riiti ļōmņak ko ilo laajrak in, riiti 1 Nipai 8–10 im ļōmņak kōn apan̄ ko im iien ko rem̧m̧an rej jelm̧ae armej ro kwoj katakin. Je Ļōmņak ko rej Im̧we eok kōn pedped ta ko jān jebta kein kwoj aikuj in lukkuun pedped wōt ioer ilo kūlaaj eo.

Je Ļōmņak ko Rej Im̧we Eok

Kajjitōk bwe ren Kwaļo̧k

Ettōņak eo an Liai ebooļ jerbal ko an n̄an raan kein ad. Ilo jinoin kūlaaj eo, komaron̄ kōņaan kajjitōk ippān ro uwaan kūlaaj eo bwe ren kwaļo̧k ļōmņak ko aer ilo aer riit jān ettōņak in. Rōjan̄ er bwe ren kwaļo̧k kajjojo eoon ko im meļeļe ko aer rej loi n̄an mour ko aer.

Katakin Katak ko

1 Nipai 8:10–16

N̄e jej en̄jake iakwe eo an Anij, jej kōņaan jipan̄ ro jet bōk en̄jake in.

• Ej būnjen armej n̄an kwaļo̧k men ko jej iakwe ippān armej ro jej iakwe er, ak jet iien jej loe an pen n̄an kwaļo̧k gospel eo. Juon ekōnono kōn ettōņak eo an Liai emaron̄ jipan̄ ro uwaan kūlaaj eo loe iien ko rem̧m̧an n̄an kwaļo̧k kōn gospel eo. Komaron̄ leļo̧k n̄an juon uwaan kūlaaj eo juon m̧ōttan leen wōjke im kajjitōk ippān bwe en kareel ro jet uwaan kūlaaj eo n̄an m̧ōn̄ā leen wōjke eo aolep iien. Ewi wāween an kein katak in āinļo̧k wōt en̄jake eo an Liai ilo 1 Nipai 8:10–16? Ta eo jej ekkatak jān en̄jake eo an Liai me enaaj jipan̄ kōj ilo ad kwaļo̧k gospel eo? Āinwōt m̧ōtttan ekōnono in, komaron̄ in kwaļo̧k pija in alooj eo “Good Things to Share” (ChurchofJesusChrist.org).

• Elder David A. Bednar ekar katakin, “Leen eo ioon wōjke eo ej juon kōkkaļļe kōn kōjeraam̧m̧an ko an Pinmuur eo” (“Lehi’s Dream: Holding Fast to the Rod,” Ensign ak Liahona, Oct. 2011, 34). Ļōmņak im kepaak jet iaan ro uwaan kūlaaj eo m̧okta im kajjitōk ippāer bwe ren kejōkļo̧kjeņ kōn 1 Nipai 8:11–16 im ļōmņak kōn kajjitōk ko āinwōt kein: Ewi wāween aō naaj kōmeļeļeiki tōņaļ eo me Pinmuur eo an Jisōs Kraist. ekar bōktok n̄an mour eo aō? Ewi wāween aō kareel ro jet bwe ren nemake an tōn̄aļ? (lale eoon 15). Ewi wāween an ro jet kar kajjitōk ippa bwe in kappukot kōjeraam̧m̧an ko an Pinmuur eo an Rilo̧mo̧o̧r eo? Ta eo ej im̧we eō n̄an kōm̧m̧ane ilo aō riiti 1 Nipai 8:11–16? Kajjitōk ippān membōr rein bwe ren kwaļo̧k uwaak ko aer ilo iien kūlaaj eo, im kajjitōk ippān aolep ro uwaan kūlaaj eo bwe ren kwaļo̧k ļōmņak ko aer ilo iien ekōnono eo.

Minerva K. Teichert (1888–1976), The House of the World, 1954, oil on board, 36 x 48 inches. Brigham Young University Museum of Art

1 Nipai 8:19–38

Naan eo an Anij ej tōlļo̧k kōj n̄an Rilo̧mo̧o̧r eo im ej jipan̄ kōj en̄jake iakwe eo An.

• Juon wāween n̄an jino juon ekōnono kōn ettōņak eo an Liai ej ilo kajjitōk ippān ro uwaan kūlaaj eo n̄an jin̄aiki juon men ej bōk jikin ettōņak eo ioon boot eo, kōjerbal 1 Nipai 8:19–38 āinwōt juon kein tōl. Ak komaron̄ in kwaļo̧k pija in ettōņak eo an Liai jān unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko. Innām komaron̄ in kajjitōk ippān kajjojo ro uwaan kūlaaj eo bwe ren pukot eoon ko me rej leļo̧k juon ukook in juon iaan kōkkaļļe ko ilo jin̄a eo ak pija eo—ukook kein maron̄ loi ilo 1 Nipai 11:4–25, 35–36; 12:16–18; im 15:21–33, 36. Ilo an ro uwaan kūlaaj eo kwaļo̧k ta ko rekar loi, kajjitōk ippāer n̄an kōnono kōn ta eo kōkkaļļe kein rej katakin kōj. N̄an waanjon̄ak, ta eo m̧weo ekilep im ļap ej katakin kōj kōn utiej bōro? Ta eo aen in dāpdep eo ej katakin kōj kōn naan eo an Anij? Remaron̄ barāinwōt kōnono kōn ewi wāween an ettōņak eo an Liai kar jipan̄ er itok n̄an Kraist. Ewi wāween an lo kōj make ilo ettōņak in?

• Juon ennaan eaorōk ilo ettōņak eo an Liai ej aorōk eo an naan eo an Anij, ej kōkkaļļe eo jān aen in dāpdep eo. N̄an jipan̄ kōmejajaik ennaan in, komaron̄ ajeje kūlaaj eo n̄an emān kūrub ko im leļo̧k n̄an kajjojo n̄an ekkatak kōn emān kūrub in armej ro me Liai ekar loe er, āinwōt an kōmeļeļe ilo “Kein Jipan̄ ko jet” im ilo 1 Nipai 8:21–23, 24–28, 30, im 31–33. Innām kōm̧m̧an bwe ro uwaan kūlaaj eo ren kwaļo̧k ippān doon ta eo rekar ekkatak. Komaron̄ barāinwōt leļo̧k jejjo minit n̄an an ro uwaan kūlaaj eo n̄an kejōkļo̧kjeņ kōn ta eo rej ļo̧kjen aer kake n̄an lale bwe ren “jirok likatōttōt wōt ilo aen in dāpdep eo” (1 Nipai 8:30).

1 Nipai 10:17–19

Anij enaaj kwaļo̧k m̧ool eo n̄an kōj eļan̄n̄e jej tiljek kappukot e.

• Tab in marok eo ej kōtab iaļ eo ad im ainikien kajirere ko jān m̧weo ekilep im ļap maron̄ kōm̧m̧an bwe en pen ad lo m̧ool eo. Riit ippān doon kōn waanjon̄ak eo an Nipai āinwōt juon rikappukōt m̧ool eo emaron̄ jipan̄. Komaron̄ jino ekōnono in ilo am̧ kajjitōk ippān ro uwaan kūlaaj eo n̄an kallikar jet iaan ennaan ko rekapokpok laļ in ej jilkintok. Ium̧win juon tōre, ta ļōmņak ko an laļ in im rikanaan ro im rijjilōk ro rej kakkōl kōj kōn ilo kweilo̧k eo eļap ej kab jem̧ļo̧kļo̧k? Ļom̧ņak im kōm̧m̧ane juon laajrak ioon boot eo kōn bun̄tōn ko me Nipai ekar būki n̄an an bōk kam̧ool eo an make kōn m̧ool eo an ettōņak eo an Jemān (lale 1 Nipai 10:17–19; 11:1). Ewi wāween ad maron̄ ļoore waanjon̄ak eo an ilo ad kappukot m̧ool eo?

Kōketak Ekkatak ilo M̧weo

N̄an im̧we ro uwaan kūlaaj eo n̄an riiti 1 Nipai 11–15, kajjitōk ippāer n̄an pukōt ta eo jin̄a kein rej aikuj in kōm̧m̧ane ippān ettōņak eo an Liai: nin̄nin̄ Jisōs, juon dōbwāāl, jinen kōrā ro rekijon̄, jarlepju ro rekar aiin doon n̄an tariņae, im bok ko.

Kein Jipan̄ ko Jet

Pija in alooj ko jān Bok in Mormon.

Ļōmņak in kwaļo̧k juon pija in alooj me ej bōk jikin bwebwenato ko jān jebta kein (lale Pija in alooj ko kobaiki jān Bok in Mormon eo ilo ChurchofJesusChrist.org ak Gospel Library app eo.

Emān kūrub in armej ro ilo ettōņak eo an Liai.

Kūrub 1.“Ilo 1 Nipai 8:21–23 jej ekkatak kōn kūrub in armej eo kein kajuon ro me rekar bun̄ m̧aanļo̧k im kar ijjino ilo iaļ eo me ej tōlļo̧k n̄an wōjke in mour eo. Ijoke, ilo an armej ro ioon tab in marok eo, eo ej bōk jikin kapo ko an devil eo” (1 Nipai 12:17), rekar wōtlo̧k jān iaļ eo aer, jōbwābwe, im kar jako. Jeļā bwe ejjab kwaļo̧k ilo eoon kein kōn aen in dābdeb in. Ro rej kōjekdo̧o̧n ak jab kaorōk naan an Anij rejjab maron̄ bōk kam̧bōj in ekwojarjar eo ej jitōn̄ļo̧k iaļ eo n̄an Rilo̧mo̧o̧r eo.”

Kūrub 2.“Ilo 1 Nipai 8:24–28 jej riit kōn kūrub in armej eo kein karuo ro me rekar bōk iaļ in erānin̄ im eaidik eo ej tōlļo̧k n̄an wōjke in mour. Kūrub in ‘rekar iuunm̧aanļo̧k ibuļōn tab in marok eo, kabbōjrak wōt ilo aen in dāpdep eo, m̧ae iien raar wōnm̧aantak im m̧ōn̄ā jān leen wōjke eo’ (eoon 24). Ijoke, ilo an armej ro im balle ko ballier rem̧m̧an jān em̧ ekilep im ļap eo kar kajjirere kōn kūrub in armej in kein karuo, ‘rekar jook’ im ‘wōtlo̧kļo̧k ilo iaļ ko remo̧ im raar jebwābwe’ (eoon 28). … Men̄e kōn tōmak, kalim̧m̧ur, im naan an Anij, kūrub in āliktata raar jōbwābwe—bōlen kōnke raar jakutkut kar riit ak kar ekkatak ak kar etali jeje ko rekwojarjar.

Kūrub 3.“Ilo eoon 30 jej riit kōn kūrub in armej eo kein kajilu ro rekar iuunm̧aanļo̧k ‘jirok likatōttōt wōt ilo aen in dāpdep eo, m̧ae iien raar tōprak im raar wōtlo̧k im m̧ōn̄ā leen wōjke eo.’ Naan eo eaorōk ilo eoon in ej jirok likatōttōt wōt n̄an aen in dāpdep eo. Kūrub in armej in kein kajilu rekar iuunm̧aanļo̧k doon kōn tōmak im lōke ekajoor; kōn menin, ekar ejjeļo̧k kakkōļļe ekar kwaļo̧k ke rekar jōbwābwe, wōtlo̧kļo̧k ilo iaļ ko remo̧, ak kar jako. Bōlen kūrub in armej in kein kajilu rej aolep iien riit im ekkatak im lin̄ūri jeje ko rekwojarjar. … Kūrub in kwe im n̄a aikuj in kajjieon̄ in koba ippāer.”

Kūrub 4.“Kūrub in armej eo kein kāmen rekar jab kappukot wōjke eo, ijjello̧kin rekar kōņaan m̧weo ekilep im eļap āinwōt mejān kajjik eo aer eļaptata (lale 1 Nipai 8:31–33).”

(David A. Bednar, “Lehi’s Dream: Holding Fast to the Rod,” Ensign ak Liahona, Oct. 2011, 34–36.)

Kōkōm̧anm̧anļo̧k Ad Katakin

Kwaļo̧k am̧ lōke kōn kōtmāne ko routiej. Jet rikkatak ro ejjeļo̧k aer lōke maron̄ eo aer n̄an katak gospel eo ippāer make. Kallim̧uri ro uwaan kūlaaj eo bwe ilo aer kajjieon̄ ekkatak ippāer make, Jetōb Kwojarjar eo enaaj katakin er. Komaron̄ ļōm̧akeļo̧k jet wāween ko n̄an jipan̄ er jinoe. (Lale Teaching in the Savior’s Way, 29–30.)