Tijem̧ba 30–Jānwōde 5.

taitōļ peij ko jān Bok in Mormon eo

“Bar Juon Kallim̧ur Kōn Jisōs Kraist”

Ekkatak kōn Bok in Mormon eo taitōļ peij im kadkad in; naan in kam̧ool ko an Rikam̧ool ro Jilu, Rikam̧ool ro Ruwalitōk, im Rikanaan Josep Smith; im “Juon Kōmmeļeļe Ekadu kōn Bok in Mormon.” Ilo am̧ kōm̧m̧ane, pukōt im̧we ko jān Jetōb Kwojarjar eo kōn wāween am̧ maron̄ im̧we ro ilo kūlaaj eo am̧ im jino juon ekkatak eo eļap tokjān kōn Bok in Mormon eo.

Je Ļōmņak ko Rej Im̧we Eok

Kajjitōk bwe ren Kwaļo̧k

N̄an jinoe, komaron̄ kajjitōk ippān jejjo armej ro ilo kūlaaj eo bwe ren kwaļo̧k ippān aolep jet iaan men ko rekar ekkatak jān kadkadin peij ko jān Bok in Mormon eo ko me rej kōļapļo̧k naan in kam̧ool eo aer kōn bok in ekwojarjar.

Katakin Katak ko

taitōļ peij eo an Bok in Mormon eo

Bok in Mormon eo emaron̄ kōkajoorļo̧k tōmak eo ad ilo Jisōs Kraist.

• Riiti taitōļ peij eo an Bok in Mormon eo, kar jeje jān Moronai, emaron̄ kōpooje ro uwaan kūlaaj eo am̧ n̄an ekkatak kōn Bok in Mormon eo iiō in. Ewi wāween an ennaan kein ilo taitōļ peij eo kōkōm̧anm̧anļo̧k aer ekkatak? Bōlen komaron̄ in jeiki juon ak elōn̄ļo̧k kajjitōk ko ioon jo̧o̧k boot eo—ko āinwōt Etke ewōr ippād Bok in Mormon eo ak Ewi wāween an Bok in Mormon eo oktak jān bok ko jet?—im kajjitōk ippān ro uwaan kūlaaj eo n̄an pukōt uwaak ko ilo aer etale taitōļ peij eo kajjojo armej ak ruo armej ippān doon. Innām remaron̄ kwaļo̧k ļōmņak ko rekar im̧we er me rekar itok n̄an er. Komaron̄ barāinwōt rōjan̄ ro uwaan kūlaaj eo bwe ren kōnono kōn karōk ko aer kōn aer nej ekkatak kōn Bok in Mormon eo ilo iiō in. N̄an waanjon̄ak, ta eo renaaj kappukōte? Ewi wāween aer naaj ekkatak jān Jetōb Kwojarjar eo ilo aer ekkatak?

• Juon iaan jibadbad ko raorōktata kōn Bok in Mormon eo eo ej kwaļo̧k ilo taitōļ peij eo: n̄an kareel “riJew im riAelōn̄ ko bwe Jisōs ej RiKraist eo.” Komaron̄ karuwaineneik ro uwaan kūlaaj eo bwe ren kwaļo̧k eoon ko jān peij ko jān Bok in Mormon eo me rekar kōkajoorļo̧k tōmak eo aer ilo Jisōs Kraist (er remaron̄ barāinwōt riiti jejjo peij ko rej ellaajrak ilo “Kein Jipan̄ ko Jet”). Ro uwaan kūlaaj eo remaron̄ in riiti jet iaan eoon kein ippān ro rej jijet iturier im kwaļo̧k jān eoon ko ewi wāween an Bok in Mormon eo kar kōkajoor naan in kam̧ool eo aer kōn Rilo̧mo̧o̧r eo.

Kadkad in Bok in Mormon eo

Bok in Mormon eo emaron̄ jipan̄ kōj “epaakeļo̧k Anij.”

• Kadkad in Bok in Mormon eo ej letok meļeļe eo me eaorōk n̄an ro rej riiti n̄an meļeļe. Ro uwaan kūlaaj eo am̧ remaron̄ in jeraam̧m̧an jān etale im kile jilu n̄an ļalem men ko raorōk me renaaj lukkuun jipan̄ n̄an kwaļo̧k ippān juon armej im kein kajuon an riiti Bok in Mormon eo. Ro uwaan kūlaaj eo remaron̄ kwaļo̧k ippān armej eo ta ko rekar loi. Remaron̄ barāinwōt kōņaan in ikkure ak role play kwaļo̧k kadkad in Bok in Mormon eo n̄an juon armej. Pija kein rej litok ilo “Kein Jipan̄ ko Jet” remaron̄ barāinwōt jipan̄.

• Jet membōr in kūlaaj eo am̧ emaron̄ wōr aer en̄jake ko me rej kapen m̧ool eo an naan ko an Josep Smith: “Juon armej enaaj epaakeļo̧k Anij jān an mour ekkar n̄an katak ko jān [Bok in Mormon eo], jān jabdewōt bok ko jet.” Komaron̄ kajjitōk ippān ro uwaan kūlaaj eo bwe ren kwaļo̧k wāween aer mour kōn m̧ool ko rekar ekkatak ilo Bok in Mormon eo ekar jipan̄ er epaakeļo̧k Anij. Komaron̄ barāinwōt karuwaineneik ro uwaan kūlaaj eo bwe ren kwaļo̧k uwaak ko n̄an kajjitōk kein jilu im litok jān Būreejtōn Russell M. Nelson: “Kein kajuon, elmen nej kar mour eo am̧ eļan̄n̄e en kar ejjeļo̧k Bok in Mormon eo? Kein karuo, ta eo kwon kar jab jeļā? Im kein kajilu, ta eo en kar ejjeļo̧k ippem̧? (“Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?” (Ensign ak Liaona, Nob. 2017, 61).

• Elōn̄ ke jabdewōt armej ilo kūlaaj eo am̧ rekar riiti peij ko an Bok in Mormon eo me eoktak et ko ie kōn karōk in lo̧mo̧o̧r eo, āinwōt an kalikkare ilo Itok, Ļoor E—N̄an Kajjojo Armej im Baam̧le ko? Eļan̄n̄e elōn̄, karuwaineneik er n̄an kwaļo̧k ta eo rekar ekkatak.

“Naan in Kam̧ool eo an Rikam̧ool ro Jilu”; “Naan in Kam̧ool eo an Rikam̧ool ro Ruwalitōk”

Jemaron̄ aolep erom̧ rikam̧ool ro an Bok in Mormon eo.

• Ekkatak naan in kam̧ool ko an Rikam̧ool ro Jilu im Rikam̧ool ro Ruwalitōk remaron̄ kōkajoorļo̧k naan in kam̧ool ko an ro uwaan kūlaaj eo am̧ im emaron̄ jipan̄ er kejōkļo̧kjeņ kōn wāween eo im remaron̄ kwaļo̧k kam̧ool ko aer make. Komaron̄ kajjitōk ippān jimettan in kūlaaj eo bwe ren riiti “Naan in Kam̧ool eo an Rikam̧ool ro Jilu” im jimettan eo juon en riiti “Naan in Kam̧ool eo an Rikam̧ool ro Ruwalitōk” im kwaļo̧k im̧we ko ak meļeļe ko me rej alikkar aer loi. Ewi wāween an naan in kam̧ool kein ruo oktak jān doon? Ewi wāween aer āierļo̧k wōt juon? Ta eo jej katak jān kam̧ool kein kōn kwaļo̧k naan in kam̧ool ko ad? N̄an jino juon iien ekōnono etke Rikam̧ool ro Jilu raorōk, komaron̄ kwaļo̧k ennaan in an Būreejtōn Dallin H. Oaks ak naan in kam̧ool eo an John Whitmer ilo “Kein Jipan̄ ko Jet,” ak komaron̄ in kwaļo̧k pija in “Naan in Kam̧ool eo an Rikam̧ool ro Jilu” (ChurchofJesusChrist.org).

Rikam̧ool ro Jilu rekar kwaļo̧k naan in kam̧ool kōn Bok in Mormon eo.

“Naan in Kam̧ool eo an Rikanaan Josep Smith”

Josep Smith ekar juon kein jerbal ilo pein Anij n̄an bōktok Bok in Mormon eo.

• Ro uwaan kūlaaj eo remaron̄ in jeļā kadede kōn m̧akūtkūt ko kar kōmeļeļeiki ilo “Naan in Kam̧ool eo an Rikam̧ool ro Jilu,” ak bōlen komaron̄ jipan̄ er loe meļeļe ko rekāāl. N̄an waanjon̄ak, komaron̄ karuwaineneik er n̄an kōlaajrake m̧akūtkūt ko raorōk ilo bwebwenato eo an Josep Smith. Ta eo jemaron̄ bōke jān en̄jake in an kōn aorōk in Irooj ekar likūti ioon Bok in Mormon eo?

• Al eo “An Angel from on High” (Hymns, no. 13) eo ej kwaļo̧k kōn itok eo an Bok in Mormon eo. Ālkin al ak ron̄jake al in, ro uwaan kūlaaj eo remaron̄ pukōt ennaan kein ilo “Naan in Kam̧ool eo an Rikanaan Josep Smith” ko rej ekkar n̄an ak rej kapen ennaan ko ilo al in.

Kōketak Ekkatak ilo Mweo

N̄an im̧we ro uwaan kūlaaj eo bwe ren riiti 1 Nipai 1–7, karuwaineneik er n̄an kappukot ļōmņak ko ak m̧ool ko me rej jipan̄ er kōn jekjek ko kiiō ilo mour ko aer—n̄an waanjon̄ak, juon apan̄ an juon baam̧le ak juon kūr ilo Kabun̄ in.

Kein Jipan̄ ko Jet

Peij ko an Bok in Mormon eo me rej kam̧ool kōn Jisōs Kraist.

• Mosaia 3:5–8

• Alma 5:48; 7:10–13

• Hilamōn 5:12

• 3 Nipai 9:13–18; 11:6–14

• Moronai 10:32–33

Pija in alooj ko kōn Bok in Mormon eo ilo ChurchofJesusChrist.org.

• “Kadkad in Bok in Mormon eo”

• “Ta in Bok in Mormon eo? Juon Likio in Kōmeļeļe 60 Jōkōn Aitokan”

• “Juon Bwebwenato ilo Bok in Mormon eo”

N̄an eļapļo̧k, lale pija ko aini jān Bok in Mormon eo ilo ChurchofJesusChrist.org ak Gospel Library app eo.

Aorōk eo an Rikam̧ool ro Jilu.

Būreejtōn Dallin H. Oaks ekar kōmeļeļeiki etke naan in kam̧ool eo an Rikam̧ool ro Jilu ekajoor:

“Naan in kam̧ool eo an Rikam̧ool ro Jilu n̄an Bok in Mormon eo waļo̧ktok ilo kajoor eļap. Kajjojo iaan rein jilu eļap jeļā eo aer im iien n̄an kabōjrak naan in kam̧ool eo an eļan̄n̄e menin ekar riab, ak pok kōn meļeļe ko eļan̄n̄e jabdewōt rekar jab jim̧we. Barāinwōt āinwōt jeļā, kōnke jab errā ak ebanban ko rekar jelet ritōl ro an an Kabun̄ in, kajjojo iaan rikam̧ool rein jilu rekar bukweļo̧k etaer jān Kabun̄ eo an Jisōs Kraist im Armej ro Rekwojarjar ilo Raan-ko Āliktata enan̄in ruwalitōk iiō ko tokālik ālkin an kar jeje naan in kam̧ool ko aer. Aolepāer jilu rekar etal kajo aer iaļ jān doon, ilo an ejjeļo̧k aer itok limo in jutak likin juon jerbal in kijejeto im jipan̄ doon n̄an kariab menin. Aaet m̧ae n̄an jem̧ļo̧kin mour ko aer—kōtaan tōre ko jān 12 n̄an 50 iiō ko ālkin bukweļo̧k etaer—ejjeļo̧k juon iaan rikam̧ool rein ekar oktak jān naan in kam̧ool eo an ekar diwōjtok ilo jeje ak ba jabdewōt men ko rej kwaļo̧k jabdewōt pere kōn m̧ool ko an” (“Rikam̧ool Eo: Martin Harris,” Ensign, May 1999, 36).

Naan in kam̧ool eo an John Whitmer.

John Whitmer, juon iaan Rikam̧ool ro Ruwalitōk an Bok in Mormon eo, ekar ba: “Ij jan̄in kar ron̄ bwe jabdewōt iaan rikam̧ool ro jilu ak ruwalitōk ekar kariab naan in kam̧ool eo me rekar kwaļo̧ke. … Āt ko etam rekar etal n̄an aolep laļ ko, lo ko im armej ro āinwōt juon revelesōn ekwōjarjar jān Anij. Im enaaj bōk m̧aantak jon̄ak ko an Anij ekkar n̄an kōmlet eo ej pād ilo menin” (in Noel B. Reynolds, ed., Book of Mormon Authorship Revisited: The Evidence for Ancient Origins [1997], 55–56).

Kōkōm̧anm̧anļo̧k Ad Katakin

Pukot im̧we eo am̧ make. Ijjelo̧kin lale laajrak kein āinwōt kōmeļeļe ko kwoj aikuj in ļoori, kōjerbali n̄an bōk ļōmņak ko ak n̄an kabbōļ kejōkļo̧kjeņ eo am̧ make ilo am̧ kejōkļo̧kjeņ kōn aikuj ko an ro kwoj katakin.