Si Haring Benjamin nagtudlo sa iyang katawhan

Minerva K. Teichert (1888–1976), King Benjamin’s Farewell Address, 1935, oil diha sa masonite, 36 x 48 ka pulgada. Brigham Young University of Art

Abril 13–19

Mosiah 1–3

“Mapuno uban sa Gugma ngadto sa Dios ug sa Tanan nga mga Tawo”

Adunay daghang baruganan diha sa Mosiah 1–3 nga mahimo nimong hisgutan sa imong klase. Pag-ampo alang sa giya aron masayud kon hain nga mga baruganan ang mas makahuluganon niadtong imong gitudloan.

Irekord ang Imong mga Impresyon

pagpaambit nga icon

Dapita ang Pagpaambit

Aron mahatagan ang mga sakop sa klase og kahigayunan nga maghisgot mahitungod sa ilang personal o pamilya nga pagtuon sa Mosiah 1–3, dapita sila nga mopaambit ngadto sa laing tawo og usa ka bersikulo nga ilang nabantayan nga makadasig.

pagtudlo nga icon

Itudlo ang Doktrina

Mosiah 2:1–9

Ang pagdawat sa pulong sa Dios nagkinahanglan og pagpangandam.

• Usa ka paagi sa pagsugod og panaghisgutan mahitungod sa pag-andam nga makadawat sa pulong sa Dios siguro mao ang paghisgot mahitungod sa mga sangputanan sa pag-andam—o dili pag-andam—alang sa ubang mga butang. Pananglitan, ang mga sakop sa klase mahimong mopaambit og mga kasinatian kon sa unsang paagi nga ang ilang pagpangandam o kakulang sa pagpangandam nakaapekto sa usa nila ka kasinatian sa eskwelahan o sa trabahoan o sa laing kalihokan. Human sa ilang pagpaambit, mahimo nimong dapiton ang katunga sa klase sa pagbasa sa Mosiah 2:1–9, nga mangita alang sa mga butang nga gibuhat sa katawhan ni Haring Benjamin aron maandam sa pagdawat sa pulong sa Dios. Ang laing katunga mahimong magsiksik sa samang mga bersikulo, nga mangita kon unsay gibuhat ni Haring Benjamin nga nagpakita kon unsay iyang gibati mahitungod sa pulong sa Dios ug sa panginahanglan sa pagpaambit niini. Dayon hangyoa ang matag grupo sa pagpaambit sa ilang mga ideya. Unsay atong makat-unan gikan niining mga bersikulo nga makatabang kanato sa pagdawat sa pulong sa Dios?

Mosiah 2:10–26

Kon moserbisyo kita sa uban, nagserbisyo usab kita sa Dios.

• Si Haring Benjamin usa ka talagsaong ehemplo nga sulugoon sa Dios ug niadtong naglibut kaniya. Unsay makat-unan sa mga sakop sa imong klase gikan kaniya aron sa pagtabang kanila diha sa ilang mga paningkamot nga moserbisyo sa uban? Ikonsiderar ang pagsugod sa panaghisgutan pinaagi sa pagpangutana sa mga sakop sa klase sa paglista sa mga babag nga gisagubang sa mga tawo sa paghatag og serbisyo ngadto sa uban—lakip na sa mga rason nga dili kita moserbisyo o mga rason nga ang atong serbisyo dili ingon ka makatabang sa unsa unta ang angay. Dayon mahimo silang magtuon sa Mosiah 2:10–26 ug maghimo og lista sa mga kamatuoran nga gitudlo ni Haring Benjamin mahitungod sa pagserbisyo sa uban nga makatabang kanila aron mabuntog ang mga babag nga ilang gilista. Unsa ang mabuhat sa mga indibidwal ug sa mga pamilya aron makatutok sa pagserbisyo diha sa ilang inadlaw-adlaw nga kinabuhi? Ikonsiderar ang pagpaambit sa sugilanon ni Presidente Thomas S. Monson diha sa “Dugang nga mga Kapanguhaan” isip usa ka sugyot.

• Usa ka himno sama sa “A Poor Wayfaring Man of Grief ” (Hymns, nu. 29) mahimong makasuporta sa mensahe nga makita diha sa Mosiah 2:17—kon moserbisyo kita sa uban, nagserbisyo kita sa Dios. Unsaon nimo paggamit sa maong mga kapanguhaan aron makasuporta sa mensahe ni Haring Benjamin? Tingali ang mga sakop sa klase mahimong mopaambit sa ilang mga kasinatian sa pagserbisyo sa uban o pagkadawat og sama kang Kristo nga pagserbisyo gikan sa usa ka tawo. Isip kabahin sa inyong panaghisgutan, ikonsiderar ang pagpaambit niining kinutlo gikan ni Presidente Henry B. Eyring: “Kon motabang kita ni bisan kinsa, bation kini sa Manluluwas nga sama ra nga Siya ang atong gitabangan” (“Dili Ba Mao Kini ang Pagpuasa nga Akong Napili?” Liahona, Mayo 2015, 22). Ngano kaha nga nagserbisyo kita sa Dios kon moserbisyo kita sa ubang tawo?

duha ka babaye nga nagginaksanay

Ang pagserbisyo sa uban makatabang aron atong mabati ang gugma sa Dios.

Mosiah 2:38–41

Ang kalipay nagagikan sa pagtuman sa mga sugo sa Dios.

• Aron matabangan ang mga sakop sa klase nga “maghunahuna sa bulahan ug sa malipayon nga kahimtang niadto nga naghupot sa mga sugo sa Dios,” mahimong makatabang ang pagsugod gamit ang kahulugan sa kalipay. Unsaon man paghulagway sa mga sakop sa klase ang kalipay nga magagikan sa pagkamasulundon ngadto sa Dios? Tingali mahimo silang maghunahuna nga sila adunay higala nga moingon nga siya malipayon bisan wala magsunod sa mga sugo. Dapita sila sa pagbasa sa Mosiah 2:38–41 ug hisguti kon unsaon nila pagtabang ang ilang higala nga makasabut sa kalainan tali sa kalibutanong kalipay ug mahangturong kalipay. Unsa nga mga kasinatian o mga ehemplo gikan sa kinabuhi sa mga tawo ang mapaambit sa mga sakop sa klase nga makapakita og mahangturong kalipay?

Mosiah 3:1–20

Ang kaluwasan moabut lamang “pinaagi sa ngalan ni Kristo, ang Ginoo.”

• Ang mensahe ni Haring Benjamin naglakip sa gamhanan ug mahulagwayon nga mga panagna mahitungod sa pagkatawo, pangalagad, ug maulaong sakripisyo ni Jesukristo. Mahimo nimong hangyuon ang mga sakop sa klase sa pagpaambit og mga bersikulo gikan sa Mosiah 3:1–20 nga nakapatandog gayud kanila ug nakatabang kanila nga masabtan ang Manluluwas ug ang Iyang misyon. Hangyoa sila nga ipaambit kon ngano nga kining mga bersikulo nakapatandog kanila.

• Ang pasiuna sa Basahon ni Mormon nagtudlo nga ang basahon “naglatid sa laraw sa kaluwasan.” Aron matabangan ang mga sakop sa klase nga makita kon sa unsang paagi nga ang wali ni Haring Benjamin nakatabang sa pagtuman niini nga katuyoan sa Basahon ni Mormon, mahimo nimong isulat diha sa pisara ang Si Jesukristo Mihimo sa Kaluwasan nga Posible. Mahimong ribyuhon sa mga sakop sa klase ang Mosiah 3:1–20, ug ilista dayon nimo o nila diha sa pisara ang mga kamatuoran nga ilang makat-unan mahitungod sa plano sa kaluwasan. Pangutan-a ang mga sakop sa klase kon unsay ilang nakat-unan mahitungod kon giunsa ni Jesukristo paghimo sa plano sa kaluwasan nga posible. Hatagi dayon og panahon ang mga sakop sa klase nga maribyu ang Mosiah 3:18–19 ug ipaambit kon unsay kinahanglan natong buhaton aron mahimong mga santos ug makadawat og kaluwasan. Sa unsang paagi nga ang Pag-ula ni Jesukristo nakatabang kanato sa pagtuman niini? Hangyoa ang mga sakop sa klase sa pagpaambit sa ilang mga pagbati mahitungod sa tahas sa Manluluwas diha sa plano sa kaluwasan.

pagkat-on nga icon

Awhaga ang Pagkat-on diha sa Panimalay

Ang mga sakop sa imong klase nakasinati ba sukad sa dihang ang usa ka doktrina nga gitudlo diha sa usa ka pakigpulong, leksyon, o kasulatan nakapausab kanila? Sultihi sila nga diha sa Mosiah 4–6 mabasahan nila ang mahitungod sa talagsaong epekto nga nahimo ngadto sa mga tawo sa mga kamatuoran nga gitudlo ni Haring Benjamin.

mga kapanguhaan nga icon

Dugang nga mga Kapanguhaan

Pagserbisyo sa uban.

Si Presidente Thomas S. Monson miingon:

“Pipila ka tuig na ang milabay ako nakabasa og usa ka artikulo nga gisulat ni Jack McConnell, MD. Nagdako siya sa kabungturan sa habagatang-kasadpan sa Virginia sa Estados Unidos isip usa sa pito ka mga anak sa usa ka ministro sa Methodist ug sa usa ka inahan nga anaa ra sa balay. Ang ilang mga kahimtang yano ra kaayo. Misaysay siya nga panahon sa iyang pagkabata, matag adlaw samtang ang pamilya manglingkod libut sa lamesang kan-anan, ang iyang amahan mangutana og puli-puli sa matag usa, ‘Ug unsa may imong nabuhat alang sa usa ka tawo karon?’ Ang mga bata determinado sa pagbuhat og maayong binuhatan matag adlaw aron maka-report ngadto sa ilang amahan nga sila nakatabang og usa ka tawo. Si Dr. McConnell mitawag niini nga pagbansay nga ang labing bililhon nga kabilin sa iyang amahan, kay kana nga gilauman ug kadtong mga pulong nakapadasig kaniya ug sa iyang mga igsoon sa pagtabang sa uban sa tibuok nilang kinabuhi. Sa ilang pagdako ug pagkahamtong, ang ilang kadasig sa paghatag og serbisyo nausab ngadto sa usa ka tinguha gikan sa kinahiladman aron sa pagtabang sa uban.

“Gawas sa naila nga medikal nga propesyon ni Dr. McConnell … mihimo siya og usa ka organisasyon nga iyang gitawag og Volunteers in Medicine, nga naghatag sa miretiro na nga mga trabahante sa medisina og usa ka kahigayunan sa pagboluntaryo sa mga libreng klinik nga nagserbisyo sa mga nagtrabaho nga wala ma-insured. Si Dr. McConnell miingon nga ang iyang libreng oras sukad siya miretiro ‘nausab ngadto sa 60 ka oras sa mga semana nga pagtrabaho nga walay bayad, apan ang [iyang] kusog misaka ug adunay katagbawan sa [iyang] kinabuhi nga wala diha kaniadto.’ [Jack McConnell, “And What Did You Do for Someone Today?” Newsweek, Hunyo 18, 2001, 13.] …

“Siyempre, dili kitang tanan mahimong mga Dr. McConnell, mag-establisar og mga medikal klinik aron sa pagtabang sa mga kabus; hinoon, ang mga panginahanglan sa uban kanunayng anaa, ug matag usa kanato makahimo og butang aron sa pagtabang og usa ka tawo. …

“Akong mga kaigsoonan, gilibutan kita niadtong nanginahanglan sa atong pagtagad, atong pagdasig, atong suporta, atong paghupay, atong kamabination—mga sakop man sila sa pamilya, mga higala, mga kaila, o mga estranghero. Kita ang mga kamot sa Ginoo dinhi sa yuta, uban sa mando nga moserbisyo ug motabang sa Iyang mga anak. Nagdepende Siya sa matag usa kanato. … Unta atong pangutan-on ang atong mga kaugalingon sa pangutana nga mangumusta kang Dr. Jack McConnell ug sa iyang mga igsoong lalaki ug babaye matag gabii sa tingpanihapon: ‘Unsa may akong nabuhat alang sa usa ka tawo karon?’” (“Unsa may Akong Nabuhat alang sa Usa ka Tawo Karon?” Liahona, Nob. 2009, 84–87).

Pagpalambo sa Atong Pagtudlo

Pagmahimong usa ka instrumento sa Espiritu. Ang imong katuyoan isip usa ka magtutudlo dili ang paghimo og presentasyon apan ang pagtabang sa uban nga modawat sa impluwensya sa Espiritu Santo—ang tinuod nga magtutudlo. (Tan-awa sa Pagtudlo sumala sa Pamaagi sa Manluluwas, 10.)