nabanhaw nga Kristo uban ang Iyang mga Apostoles

Si Kristo ug ang mga Apostoles, ni Del Parson

Marso 30–Abril 12

Pasko sa Pagkabanhaw

“Siya Mobangon … uban ang Pagpang-ayo diha sa Iyang mga Pako”

Ang Dominggo sa Pasko sa Pagkabanhaw usa ka nindot kaayo nga oportunidad alang sa imong mga sakop sa klase aron mapalig-on ang ilang mga pagpamatuod kang Jesukristo ug sa Iyang Pagkabanhaw—ug aron malig-on ang mga pagpamatuod sa usag usa. Hinumdumi kini samtang magtuon ka sa mga kasulatan agig pagpangandam alang niining leksyon. Tinguhaa ang espiritwal nga giya kon unsay makapatandog sa kasingkasing sa mga tawo diha sa imong klase.

Irekord ang Imong mga Impresyon

pagpaambit nga icon

Dapita ang Pagpaambit

Ang mga sakop sa imong klase mahimong adunay makahuluganong mga kasinatian sa miaging duha ka semana sa pagbasa sa unsay gitudlo sa Basahon ni Mormon mahitungod sa Pagkabanhaw ug sa Pag-ula ni Jesukristo. Hatagi sila og pipila ka minuto aron makakita og usa ka tudling nga nakapatandog kanila, ug dapita dayon sila sa pagpaambit kon unsa ang ilang nakit-an.

pagtudlo nga icon

Itudlo ang Doktrina

2 Nephi 9:7–15; Alma 11:41–45; 40:21–23

Ang pagkabanhaw mao ang permanente nga panaghiusa sa lawas ug sa espiritu.

• Ang mga pagtandi mahimong usa ka epektibong paagi sa pagtudlo sa mga baruganan sa ebanghelyo. Siguro mahimo nimong dapiton ang mga sakop sa klase nga mobasa sa 2 Nephi 9:7–15 ug Alma 11:41–45 ug motino sa mga pulong diha niining mga bersikulo nga nagtudlo mahitungod sa pagkabanhaw. Unsa ang gitandi sa kamatayon? Giunsa paghulagway ang pagkabanhaw? Nganong nagkinahanglan man kita og usa ka nabanhaw nga lawas? (tan-awa usab sa D&P 93:33–34). Ang mga sakop sa klase mahimong maghisgot kon unsaon nila paggamit kining mga pagtandi sa pagtudlo sa usa ka tawo mahitungod sa pagkabanhaw. Samtang mopaambit sila sa ilang mga ideya ngadto sa klase, mahimo nimong hisgutan uban nila kon nganong ilang gihatagan og bili kining mga kamatuoran mahitungod sa Pagkabanhaw.

• Ikonsiderar ang pagdapit sa mga sakop sa klase sa pagpaambit sa mga panahon sa dihang mibati sila nga mapasalamaton alang sa ilang kahibalo mahitungod sa Pagkabanhaw. Sa unsang paagi nga kana nga kahibalo nakaimpluwensya sa atong kinabuhi sa mas regular nga paagi? Mahimo nimong matabangan ang mga sakop sa imong klase sa pagtubag niining pangutana pinaagi sa pagdapit sa matag usa kanila sa pagsiksik sa 2 Nephi 9:7–15; Alma 11:41–45; o Alma 40:21–23 ug sa paglista diha sa pisara sa mga kamatuoran nga ilang makit-an mahitungod sa Pagkabanhaw. Dayon mahimo nimong isulat diha sa pisara ang mosunod nga duha ka kapahayag [sentence] ug hangyoa ang mga sakop sa klase sa pagpamalandong sulod sa pipila ka minuto sa dili pa mopaambit kon unsaon nila sa pagkompleto niini: Kon wala pa ko masayud niining mga butanga… ug Tungod kay nasayud ko niining mga butanga….

Si Kristo nga nag-ampo didto sa Tanaman sa Getsemani

Getsemani, ni Michael T. Malm

Mosiah 3:5–7; 15:5–9; Alma 7:11–13

Gidala ni Jesukristo sa Iyang kaugalingon Mismo ang atong mga sala, mga kasakit, ug mga kahuyang.

• Ang pagpamalandong ug paghisgot sa pag-antus sa Manluluwas alang kanato makadapit sa Espiritu ug makadasig og mga pagbati sa paghigugma ug pasalamat ngadto sa Manluluwas. Sa pag-awhag og ingon nga pagpamalandong ug panaghisgutan, mahimong magdrowing ka og usa ka tsart diha sa pisara nga susama sa gisugyot sa outline karong semanaha diha sa Dali, Sunod Kanako—Alang sa mga Indibidwal ug mga Pamilya ug dapita ang mga sakop sa klase sa pagkompleto niini gamit ang Mosiah 3:5–7; 15:5–9; ug Alma 7:11–13 ug ang kaugalingon nilang mga kasinatian. Sigun sa itudlo sa Espiritu, mahimo usab nimong dapiton ang mga sakop sa klase sa pagpaambit sa ilang mga gibati mahitungod sa unsay nahimo ni Jesukristo alang kanila.

• Ang sagradong musika makadapit sa Espiritu ug makasuporta sa doktrina nga imong itudlo. Tingali ang mga sakop sa klase makaribyu sa Mosiah 3:5–7; 15:5–9; ug Alma 7:11–13 ug mangita ug manganta og mga himno nga ilang gibati nga mohaum sa mga mensahe niining mga bersikulo (mahimo usab nimong dapiton ang usa ka tawo sa pagkanta o pagtugtog sa mga himno). Ang indeks sa kasulatan diha sa luyo sa hymnbook makatabang, ug ang ubang mga himno nga gisugyot diha sa “Dugang nga mga Kapanguhaan.” Awhaga ang mga sakop sa klase sa pagpaambit sa mga pulong gikan sa mga himno ug mga kasulatan nga makatabang nga mas mapasalamatan pa gayud nila ang sakripisyo sa Manluluwas.

Enos 1:1–19; Mosiah 5:1–2; 27:8–28:4; Alma 24:7–19

Ang Pag-ula ni Jesukristo naglimpyo kanato ug nagtabang sa paghingpit kanato.

• Usa ka epektibong paagi nga makat-on mahitungod sa gahum sa Manluluwas sa pag-usab sa atong kinabuhi mao ang pagtuon sa mga ehemplo kon giunsa Niya pag-usab ang kinabuhi sa uban samtang naghinulsol sila ug miduol ngadto Kaniya. Ang Basahon ni Mormon adunay daghan sa maong mga ehemplo. Tingali mahimo nimong sangunan ang matag sakop sa klase sa pagbasa mahitungod sa usa niining mga ehemplo, sama ni Enos (tan-awa sa Enos 1:1–19), ang katawhan ni Haring Benjamin (tan-awa sa Mosiah 5:1–2), Alma nga Batan-on (tan-awa sa Mosiah 27:8–28:4), o ang mga Anti-Nephi-Lehi (tan-awa sa Alma 24:7–19), o mahimo silang maghunahuna og laing mga ehemplo gikan sa mga kasulatan. Dayon ang pipila ka sakop sa klase mahimong mo-summarize sa mga kasinatian nga ilang nabasahan. Tingali ang imong klase malingaw sa pagbuhat niini pinaagi sa paghatag og mga timailhan [clue] aron matabangan ang tibuok klase nga makatag-an kon si kinsa ang ilang gihulagway. Mahimo usab nilang hisgutan ang mga pangutana nga susama niini: Sa unsang paagi nga ang mga tawo niining mga ehemplo nausab? Unsa ang tahas sa Manluluwas diha sa ilang kausaban? Tingali ang pipila ka sakop sa klase mahimong maghisgot kon giunsa sa Manluluwas pagpahinabo ang “dako nga kausaban … sa [ilang] mga kasingkasing” (Mosiah 5:2). Aron makakat-on pa og dugang kon unsaon sa Manluluwas pag-usab kanato—ug nganong importante kaayo kana nga kausaban—mahimo nimong ipaambit ngadto sa klase ang analohiya nga gihatag ni Presidente Dallin H. Oaks diha sa “Dugang nga mga Kapanguhaan.”

pagkat-on nga icon

Awhaga ang Pagkat-on diha sa Panimalay

Aron madasig ang mga sakop sa klase nga magbasa sa Mosiah 1–3, mahimo nimo silang dapiton sa pagpamalandong og panahon sa dihang mibati sila og tinguha nga magmaya human makabasa o makadungog og mensahe sa ebanghelyo. Dapita sila sa pagpangita og mga kamatuoran nga mahimo silang magmaya samtang magbasa sila sa Mosiah 1–3.

mga kapanguhaan nga icon

Dugang nga mga Kapanguhaan

Mga himno mahitungod sa Pag-ula sa Manluluwas.

• “Ako Nasayud Akong Manunubos Buhi,” Mga Himno ug mga Awit sa mga Bata, nu. 38

Ang mga video sa Mormon Tabernacle Choir sa Temple Square nga nanganta sa pipila niining mga himno makita diha sa ChurchofJesusChrist.org.

Analohiya: Kinahanglan nga kita mas labaw pa sa limpyo.

Si Presidente Dallin H. Oaks mipaambit og usa ka analohiya sa pagpasabut kon giunsa sa Manluluwas pag-andam aron makabalik kita ngadto sa presensya sa Dios:

“Morag mohunahuna kita sa mga resulta sa paghinulsol ingon nga paglimpyo lamang kanato sa sala, apan dili kana hingpit nga panan-aw. … Ang usa ka tawo nga makasala sama sa usa ka kahoy nga mopaling-paling ra dayon sa hangin. Sa hanginon ug ulanon nga adlaw, ang kahoy mobawog pag-ayo ngadto sa yuta nga ang mga dahon magkalapok, sama sa sala. Kon kita motutok lamang sa paglimpyo sa mga dahon, ang kahuyang sa kahoy nga mitugot niini nga mabawog ug mahugawan ang mga dahon mahimong magpabilin. Sa samang paagi, ang usa ka tawo nga nagsubo lamang nga nahugawan sa sala makasala pag-usab sa sunod nga kusog nga tayhop sa hangin. Ang purohan nga kini magbalik-balik magpadayon hangtud nga ang kahoy napalig-on na.

“Kon ang usa ka tawo miagi na sa proseso nga miresulta sa unsay gitawag sa mga kasulatan nga “‘usa ka masulub-on nga kasingkasing ug usa ka mahinulsulon nga espiritu,”’ ang Manluluwas naghimo labaw pa sa paglimpyo niana nga tawo gikan sa sala. Siya naghatag kaniya og bag-ong kusog. Kana nga pagpalig-on mahinungdanon kanato sa pagsabut sa katuyoan sa paglimpyo, nga mao ang pagbalik ngadto sa atong Langitnong Amahan. Aron makasulod sa Iyang presenysa, kinahanglan nga kita mas labaw pa sa limpyo. Kinahanglan usab nga kita mausab gikan sa usa ka tawo nga huyang sa moral nga paagi nga nakasala ngadto sa usa ka tawo nga lig-on nga may espirituhanong kusog nga makapuyo sa presensya sa Dios” (“Ang Pag-ula ug Hugot nga Pagtuo,” Liahona, Abr. 2008, 12–14).

Pagpalambo sa Atong Pagtudlo

Pagpakabuhi nga takus sa giya sa Espiritu. Kon imong sundon ang ebanghelyo, ikaw takus sa pagpakig-uban sa Espiritu, kinsa mao ang tinuod nga magtutudlo. Samtang magtinguha ka sa Iyang giya, ang Espiritu Santo mohatag kanimo og mga hunahuna ug mga impresyon kon unsaon pagtubag ang mga panginahanglan niadtong imong tudloan. (Tan-awa sa Pagtudlo sumala sa Pamaagi sa Manluluwas, 5.)