Si Enos sa bata pa uban sa iyang amahan, nga si Jacob, ug inahan

Jacob ug Enos, ni Scott Snow

Marso 23–29

Enos–Mga Pulong ni Mormon

Siya Naglihok diri Kanako aron sa Pagbuhat sa Iyang Kabubut-on

Pangandam sa pagtudlo pinaagi sa pagbasa sa Enos–Mga Pulong ni Mormon ug paghimo og usa ka plano sa pagtudlo (tan-awa sa Pagtudlo sumala sa Pamaagi sa Manluluwas, 19). Ang mga sugyot ug mga doktrina niining outline makatabang usab sa paghatag kanimo og mga ideya.

Irekord ang Imong mga Impresyon

pagpaambit nga icon

Dapita ang Pagpaambit

Aron mahatagan ang mga sakop sa klase og mga oportunidad nga mapaambit kon unsay ilang nakat-unan sa panimalay, mahimo nimo silang bahinon ngadto sa mga grupo ug i-assign ang matag grupo sa pagbasa sa usa sa mga kapitulo gikan sa Enos–Mga Pulong ni Mormon. Hangyoa sila sa pagsugyot og mga bersikulo gikan niana nga kapitulo nga ilang gibati nga kinahanglang hisgutan sa klase. Ilista kining mga bersikulo diha sa pisara, ug pagpili og pipila aron hisgutan.

pagtudlo nga icon

Itudlo ang Doktrina

Enos 1:1–17

Makadawat kita og kapasayloan sa atong mga sala samtang nagpakita kita og hugot nga pagtuo diha ni Jesukristo.

• Ania ang pipila ka pangutana nga mahimo nimong dapiton nga pamalandungan sa mga sakop sa klase ug hisgutan samtang nagtuon kamo sa Enos 1:1–17: Unsay atong makat-unan gikan sa mga kasinatian ni Enos mahitungod sa pagdawat og kapasayloan sa atong mga sala? Giunsa pagpakita ni Enos ang iyang hugot nga pagtuo kang Jesukristo? Sa unsang paagi nga kining kasinatian nakaapekto ni Enos ug unsay iyang pagtan-aw sa iyang kaugalingon ug sa uban?

Enos 1:4–17

Ang atong kinasingkasing nga mga pag-ampo pagatubagon.

• Aron matabangan ang mga sakop sa klase nga mapalambo ang ilang pagsabut bahin sa pag-ampo, mahimo nimo silang bahinon ngadto sa ginagmay nga mga grupo ug dapiton ang matag grupo sa pagtuon sa usa sa mosunod nga mga tudling gikan sa Enos 1: mga bersikulo 2–8, 9–11, o 12–17. Dayon hangyoa ang matag grupo sa pagtudlo sa nahabilin sa klase og butang nga ilang nakat-unan mahitungod sa pag-ampo gikan sa na-assign ngadto nila nga mga bersikulo. Pananglitan, mahimo nimo silang dapiton sa pagpaambit og mga pulong nga naghulagway kon giunsa ni Enos sa pag-ampo.

• Agig dugang sa pagkat-on mahitungod kon giunsa ni Enos sa pag-ampo, makakat-on usab kita og daghan gikan sa unsa ang giampo ni Enos. Tingali ang mga sakop sa klase mahimong motino kon alang kang kinsa o unsa ang giampo ni Enos diha sa Enos 1:4–17. Sumala niining mga bersikulo, nganong nagtinguha man si Enos nga mag-ampo alang sa uban? Unsa ang ubang mga kamatuoran mahitungod sa pag-ampo ang atong makat-unan gikan kang Enos?

Jarom–Omni

Kon mosunod kita sa mga sugo, kita mouswag.

• Si Jarom ug ang mga nagsulat sa Omni misulat mahitungod sa nasud sa mga Nephite, apan ang ilang mga mensahe magamit usab sa mga indibidwal. Unsa ang atong makat-unan gikan sa mga basahon sa Jarom ug Omni kon sa unsang paagi nga ang pagkamatarung moresulta sa kauswagan? (pananglitan, tan-awa sa Jarom 1:7–12 ug Omni 1:5–7, 12–18). Mahimong makatabang sa mga sakop sa klase ang pagtino sa kauswagan gamit ang usa ka diksyonaryo ug mga kasulatan (pananglitan, tan-awa sa Alma 37:13; 48:15). Sa unsang paagi nga ang kahulugan nga gihatag sa kalibutan matandi ngadto sa kahulugan nga gihatag sa Ginoo? Giunsa pagtabang sa Ginoo ang Iyang katawhan aron mouswag?

• Ingon nga ang mga propeta nga mga Nephite makugihong naghago sa pagtudlo sa mga sugo ngadto sa katawhan, ang atong mga propeta sa ulahing mga adlaw nagtudlo usab kanato mahitungod sa mga sugo. Human mabasa ang Jarom 1:9–12, ang mga sakop sa klase mahimong maghisgot sa bag-ong mga patulun-an sa mga lider sa Simbahan nga nakapadasig kanila nga mosunod sa mga sugo. Mahimong makatabang alang sa mga sakop sa klase ang pagribyu sa bag-ong mga mensahe sa komperensya diha sa magasin sa Simbahan o sa Gospel Library app. O mahimo nilang ribyuhon ang mga sumbanan nga nahisgutan diha sa Alang sa Kalig-on sa mga Kabatan-onan. Kon gikinahanglan, mahimong mo-refer ka ngadto sa lista sa mga mensahe diha sa “Dugang nga mga Kapanguhaan.” Sa unsang paagi nga ang pagkamasulundon ngadto sa mga sugo makatabang kanato nga “mouswag” sa atong kinabuhi?

Omni

Gidala sa Ginoo ang daghang tawo ngadto sa gisaad nga yuta.

• Ang Basahon ni Mormon naglangkob og usa ka komplikado nga kasaysayan, ug ang pagsubay sa lain-laing mga grupo sa katawhan nga gihulagway niini mahimong lisud. Usa ka paagi aron mahibalo mahitungod sa matag usa sa katawhan diha sa Basahon ni Mormon mao ang paghimo og tsart diha sa pisara ug pagdapit sa klase nga sulatan kini og impormasyon mahitungod sa matag grupo sa katawhan (sama sa mga Nephite, mga Lamanite, ug ang katawhan sa Zarahemla). Pananglitan, ang tsart mahimong aduna sa mosunod nga mga ulohan: Ngalan sa grupo, Kanus-a ug giunsa nila sa pag-abut, ug Unsay nahitabo kanila. Dungan nga maghisgot kon nganong makatabang ang pagsabut sa mga butang nga inyong makat-unan mahitungod sa matag grupo. Kining mga gisulat diha sa Giya ngadto sa mga Kasulatan (ChurchofJesusChrist.org) makatabang: “Coriantumr,” “Jaredite, Mga,” “Lamanite, Mga,” “Mulek,” “Nephite, Mga,” ug “Zarahemla.”

Mga Pulong ni Mormon 1:1–8

Ang Dios mobuhat pinaagi nato kon mosunod kita sa Iyang paggiya.

• Isip kabahin sa usa ka panaghisgutan sa Mga Pulong ni Mormon, mahimo nimong dapiton ang usa ka sakop sa klase nga motungha nga andam nga mopaambit nganong nadasig si Mormon nga ilakip ang gagmay nga mga palid (1 Nephi–Omni) diha sa Basahon ni Mormon. Kining sakop sa klase mahimong mag-andam pinaagi sa pagbasa sa Mga Pulong ni Mormon ug sa ubang kapanguhaan, sama sa Doktrina ug mga Pakigsaad 10:8–19, 39–45; outline karong semanaha diha sa Dali, Sunod Kanako—Alang sa mga Indibidwal ug mga Pamilya; ug kapitulo 5 sa Saints, volume 1. Awhaga ang sakop sa klase sa paglakip sa mga detalye nga may kalabutan sa pagkawala sa 116 ka pahina nga manuskrito sa Basahon ni Mormon ug nganong ang gagmay nga mga palid gikinahanglan nga mohulip sa nawala nga mga pahina. Unsa nga mga kamatuoran ang makat-unan sa mga sakop sa klase gikan niini kon sa unsang paagi nga ang Ginoo mobuhat pinaagi sa tawo? Unsa ang makita sa mga sakop sa klase diha sa Mga Pulong ni Mormon 1:1–8 nga makapadasig kanila sa pagsunod sa direksyon gikan sa Dios bisan kon sila walay tibuok nga kasayuran bahin sa mga rason?

  Si Mormon nga naghugpong sa bulawan nga mga palid

  Si Mormon nga Naghugpong sa Bulawan nga mga Palid, ni Jorge Cocco

• Napanalanginan ni Mormon ang minilyon ka kinabuhi tungod kay misunod siya sa mga pag-aghat sa Espiritu mahitungod sa gagmay nga mga palid (tan-awa sa Mga Pulong ni Mormon 1:7). Paghunahuna og mga paagi nga makatabang ka sa mga sakop sa imong klase nga masabtan nga mahimo usab silang makapanalangin sa uban samtang magtinguha sila nga mahimong mga instrumento sa mga kamot sa Dios ug mosunod sa mga pag-aghat sa Espiritu Santo. Giunsa sa Dios sa pagbuhat pinaagi kang Mormon? Unsay nakita sa mga sakop sa klase nga gibuhat sa Ginoo pinaagi kanila o sa uban samtang mipatalinghug sila sa Espiritu ug nagtinguha sa pagbuhat sa kabubut-on sa Dios? Ang istorya mahitungod ni Presidente Thomas S. Monson diha sa “Dugang nga mga Kapanguhaan” makahatag og ehemplo nga mahimong makatabang sa mga sakop sa klase nga maghunahuna og mga ehemplo gikan sa ilang kaugalingong kinabuhi.

pagkat-on nga icon

Awhaga ang Pagkat-on diha sa Panimalay

Tungod kay ang kinatibuk-ang komperensya ug ang Pasko sa Pagkabanhaw moabut na sa pipila ka semana, awhaga ang mga sakop sa klase nga maminaw sa mga mensahe diin ang mga sakop sa Unang Kapangulohan ug ang Korum sa Napulog Duha ka mga Apostoles mopaambit sa ilang linain nga pagsaksi bahin ni Jesukristo.

mga kapanguhaan nga icon

Dugang nga mga Kapanguhaan

Mga video sa Basahon ni Mormon mahitungod kang Enos.

Pangita og mga video nga nagpakita sa mga istorya gikan sa basahon ni Enos diha sa Book of Mormon Videos collection sa ChurchofJesusChrist.org o sa Gospel Library app.

Mga mensahe sa kinatibuk-ang komperensya mahitungod sa pagsunod sa mga sugo.

• Thomas S. Monson, “Sunda ang Kasugoan,” Liahona, Nob. 2015, 83–85

• Dieter F. Uchtdorf, “Pagsunod sa Ebanghelyo nga Malipayon,” Liahona, Nob. 2014, 120–23

• Dallin H. Oaks, “Dili Magbaton og Laing mga Dios,” Liahona, Nob. 2013, 72–75

“Lamanuha ang kamot sa matag bata.”

Samtang nagserbisyo si Presidente Thomas S. Monson isip sakop sa Korum sa Napulog Duha ka mga Apostoles, namulong siya sa nagpundok nga mga bata sa Primary sa usa ka balangay sa Samoa. Human niana, giaghat siya nga personal nga mangumusta sa matag usa sa 247 ka bata kinsa mitambong. Hinoon, nakaamgo siya nga siya wala nay panahon; misulay siya sa pagwagtang sa hunahuna nga kumustahon ang mga bata apan dili makahimo.

Sa katapusan milingi siya sa magtutudlo sa mga bata ug miingon, “Ganahan kaayo kong molamano sa kamot sa matag batang lalaki ug babaye. Posible ba kini?”

Mipahiyum ang magtutudlo ug miistorya sa Samoan nga sinultihan ngadto sa mga bata. Madasigon silang miyango-yango sa ilang ulo agig tubag. Misulti dayon ang magtutudlo kang Elder Monson nga sa dihang iyang nahibaloan nga usa sa Napulog Duha ka mga Apostoles ang mobisita sa Samoa, iyang gisaaran ang mga bata nga kon sinsero silang mag-ampo ug magbaton og hugot nga pagtuo, mobisita si Elder Monson sa ilang balangay ug pagaaghaton sa Espiritu Santo nga molamano sa kamot sa matag bata (tan-awa sa Thomas S. Monson, “Friend to Friend: Talofa Lava,” Friend, Mayo 1972, 12–13).