babaye nga nagluhod diha sa tiilan ni Jesus

Gipasaylo, ni Greg K. Olsen

Marso 9–15

Jacob 1–4

Pakig-uli ngadto sa Dios pinaagi sa Pag-ula ni Kristo

Ang Jacob 1–4 naglangkob og daghang pagtulun-an nga magamit sa atong panahon. Samtang magbasa ka niining mga kapitulo, ikonsiderar kon sa unsang paagi nimo matabangan kadtong imong gitudloan nga mosunod sa doktrina nga gitudlo ni Jacob.

Irekord ang Imong mga Impresyon

pagpaambit nga icon

Dapita ang Pagpaambit

Aron matabangan ang mga sakop sa klase nga mopaambit sa mga ideya gikan sa Jacob 1–4, mahimong mag-apud-apod ka og mga piraso sa papel ug dapiton ang mga sakop sa klase nga magsulat og usa ka pakisayran sa kasulatan gikan niining mga kapitulo nga ilang nakita nga makahuluganon. Ibutang ang mga piraso sa papel sa usa ka sudlanan, pagkuha og pipila, ug dapita ang mga tawo nga misulat sa mga pakisayran nga ipaambit ang ilang mga ideya.

pagtudlo nga icon

Itudlo ang Doktrina

Jacob 1:6–8, 15–19; 2:1–11; 4:18

Ang matarung nga mga lider makugihong naghago alang sa kaayohan sa mga kalag.

• Mahimong magsugod ka og panaghisgutan mahitungod sa makugihong mga paghago ni Jacob taliwala sa iyang katawhan pinaagi sa paghangyo sa mga sakop sa klase sa pagpaambit og mga kasinatian sa dihang napanalanginan sila pinaagi sa serbisyo sa usa ka lider sa Simbahan. O ikonsiderar ang paghangyo sa usa ka lokal nga lider sa Simbahan—kaniadto o karon—sa paghisgot mahitungod sa higayon sa dihang mibati siya nga nadasig nga moserbisyo sa usa ka tawo. Ang mga sakop sa klase mahimo dayong mangita sa mga pulong diha sa Jacob 1:6–8, 15–19; 2:1–11; ug 4:18 nga makatabang nga atong masabtan kon unsay gibati ni Jacob mahitungod sa iyang tawag ug sa katawhan nga iyang giserbisyuhan. Sa unsang paagi nga atong nakita ang atong mga lider nga nagpalambo sa ilang balaanong mga tawag [calling]? Unsay gisugyot niining mga bersikulo mahitungod sa paagi nga kinahanglan natong paluyohan ang atong mga lider?

duha ka lalaki naglamanuhay nga ang mga kamot anaa sa ibabaw sa lamesa

Sama kang Jacob, ang mga lider sa Simbahan karon “mipalambo sa [ilang] mga buluhaton ngadto sa Ginoo.”

Jacob 2:12–21

Kinahanglan natong likayan ang garbo ug motabang niadtong nanginahanglan.

• Ang Ginoo adunay kusganong mga pasidaan alang sa mga Nephite mahitungod sa garbo. Aron matabangan ang pagsugod og panaghisgutan bahin niining hilisgutan, mahimo nimong kontakon sa dili pa magklaseang pipila ka sakop sa klase ug hangyoa sila nga mosiksik sa mga paagi nga ang kaaway nag-awhag sa gugma alang sa katigayunan sa atong kalibutan karon. Dayon dapita sila nga ipaambit sa klase kon unsay ilang nabantayan. Ang mga sakop sa klase mahimong magtrabaho nga magpares sa pagbasa sa Jacob 2:12–21 ug mangita kon unsay gitudlo sa Ginoo mahitungod kon unsaon nato pagtan-aw ang materyal nga katigayunan. Mahimo dayon silang magbuhat ug mopaambit og usa ka poster nga nag-awhag niana nga baruganan. Hatagi og panahon ang mga sakop sa klase sa pagpamalandong sa tinagsa-tagsa kon unsay ilang mahimo aron magamit ang ilang nakat-unan gikan sa mensahe ni Jacob.

• Ang mga sakop sa imong klase mahimong moribyu sa Jacob 2:12–21 ug mosulat sa kaugalingon nilang mga pangutana nga idugang ngadto sa lista ni Elder Perry. Unsay madugang sa pamahayag ni Elder Perry diha sa “Dugang nga mga Kapanguhaan” sa atong panabut bahin sa mga pagtulun-an ni Jacob?

Jacob 2:23–35

Ang Ginoo magmaya sa kaputli.

• Si Elder David A. Bednar nagtudlo nga nagpuyo kita “sa kalibutan nga mibiay-biay sa kasagrado sa pagpasanay ug mipakaubos sa bili sa kinabuhi” (“Kita Nagtuo sa PagkaputliLiahona, Mayo 2013, 41–44). Unsaon man kaha nimo pagtabang ang mga sakop sa klase nga magamit ang Jacob 2:23–35 sa pagsupak sa mga mensahe sa kalibutan mahitungod sa kaputli? Usa ka paagi siguro mao ang pagsulat diha sa pisara og Unsay gibati sa Ginoo mahitungod sa kaputli? ug dapita ang mga sakop sa klase sa pagpangita sa mga tubag sa pangutana. Ang pipila kanila mahimong mosiksik sa Jacob 2:23–35, ug ang uban mahimong mosiksik sa pakigpulong ni Elder Bednar nga gipasabut diha sa ibabaw. Mahimo nilang ilista diha sa pisara ang mga tubag nga ilang makit-an. Sa paghisgot sa mga sumbanan ug mga panalangin nga may kalabutan sa pagsunod sa balaod sa kaputli, mahimo nimong ribyuhon ang “Sekswal nga Kaputli” (Alang sa Kalig-on sa mga Kabatan-onan, 35–37) o ipakita ang usa sa mga video nga gilista diha sa “Dugang nga mga Kapanguhaan.” Unsa ang mga panalangin sa pagpuyo og putli nga kinabuhi?

Jacob 4:4–11

Ang mga Nephite mituo kang Jesukristo.

• Gusto ni Jacob nga atong mahibaloan nga bisan kon siya ug ang iyang katawhan nagpuyo og mga gatusan ka tuig sa wala pa ang mortal nga pangalagad sa Manluluwas, nakaila sila Kaniya ug nagtan-aw Kaniya alang sa kaluwasan. Sumala sa Jacob 4:4–5, ngano nga ang mga Nephite nagsunod sa balaod ni Moises? Unsa man ang ania sa atong panahon nga nagpunting sa atong mga kalag ngadto sa Manluluwas? Unsa nga mga simbolo o mga pagkapareho ang gigamit ni Jacob sa pagtudlo mahitungod ni Jesukristo? (tan-awa usab sa Genesis 22:1–13).

Jacob 4:8–18

Malikayan nako ang espiritwal nga pagkabuta pinaagi sa pagtutok ngadto sa Manluluwas.

• Aduna ba sa imong klase ang bag-ohay lang nga nagpaeksamin sa iyang mata? Kon mao, mahimo nimong hangyuon kini nga tawo sa paghulagway kon giunsa sa doktor pagsusi ang iyang panan-aw. Ang mga sakop sa klase makapaambit kon unsa sa ilang hunahuna ang gipasabut sa mahimong buta sa espiritwal nga paagi. Sa unsang paagi nga ang espiritwal nga pagkabuta susama sa pisikal nga pagkabuta? Dapita ang mga sakop sa klase sa pagsugyot og mga paagi nga atong masusi kon kita buta ba sa espiritwal nga paagi. Mahimo usab nilang ribyuhon ang Jacob 4:8–18 ug mosugyot og pipila ka butang nga atong mabuhat aron molambo ang atong abilidad nga “makakita” og espiritwal nga mga butang.

• Si Elder Quentin L. Cook milatid og upat ka paagi nga ang mga tawo mahimong motan-aw “lapas sa tumong” sa atong panahon (tan-awa sa “Dugang nga mga Kapanguhaan”). Unsa ang ikadugang sa iyang mga pulong sa atong pagsabut sa Jacob 4:13–15? Unsay buot ipasabut sa pagtan-aw lapas sa tumong? Unsaon nato paglikay sa pagtan-aw lapas sa tumong?

pagkat-on nga icon

Awhaga ang Pagkat-on diha sa Panimalay

Aron madasig ang mga sakop sa klase nga mobasa sa Jacob 5–7, sultihi sila nga ilang makit-an ang tubag sa pangutana diha sa Jacob 4:17 samtang mainampuon silang magbasa sa sunod nga tulo ka kapitulo.

mga kapanguhaan nga icon

Dugang nga mga Kapanguhaan

Ang atong mga kinaiya ngadto sa materyal nga katigayunan

Nagpasabut sa Jacob 2:13–19, si Elder L. Tom Perry mitudlo: “Kinahanglan natong ibutang sa atong kasingkasing ang tambag ni Jacob. Kinahanglan natong basahon kining kasulatan ingon nga gisulat gayud kini alang kanato niining panahona, tungod kay alang gayud kini nato. Ang iyang mga pulong kinahanglang makapahimo kanato sa pagpangutana og makapahinuklog sa kalag nga mga pangutana bahin sa atong kaugalingon. Ato bang gihatagan og prayoridad ang labing mahinungdanong mga butang sa atong kaugalingong kinabuhi? Kita ba naggahin og panahon, una ug labaw sa tanan, diha sa mga butang nga adunay mahangturong bili? Kita aduna bay mahangturon nga panglantaw? O nakahimo ba kita og sayop sa paggahin og panahon sa mga butang niining kalibutan og una ug dayon nakalimot sa Ginoo?” (“United in Building the Kingdom of God,” Ensign, Mayo 1987, 34).

Pagtan-aw lapas sa tumong

Si Elder Quentin L. Cook nagtudlo kon unsaon nato sa pagtan-aw “lapas sa tumong”:

“Pagpuli sa mga pilosopiya sa mga tawo sa mga kamatuoran sa ebanghelyo”

“Ang ubang tawo morag dili komportable sa kayano sa mensahe sa Manluluwas. Gusto nilang modugang og pagkakomplikado ug gani pagkadili klaro ngadto sa kamatuoran aron mahimo kining mas mahagiton sa intelektwal nga paagi o mas mahiangay sa kasamtangang akademikanhong uso. … Motan-aw kita lapas sa tumong kon mobalibad kita sa pagdawat sa yano nga mga kamatuoran sa ebanghelyo kon unsa gayud kini.”

“Pagkapanatiko kalabut sa ebanghelyo”

“Motan-aw kita lapas sa tumong kon atong ipatigbabaw ang bisan usa ka baruganan, bisan unsa pa kini ka bililhon, ngadto sa kahimtang nga talagsaon nga makapaminus sa atong pasalig sa uban pang susama ka importante nga mga baruganan o kon mobarug kita nga supak sa mga pagtulun-an sa mga Kaigsoonan.”

“Ang bayanihong mga lihok isip puli alang sa inadlaw-adlaw nga pagpahinungod”

“Ang ubang mga miyembro moangkon nga mopasalig sila sa ilang kaugalingon uban sa kadasig kon hatagan og dagkong balaanong tawag [calling], apan sa ilang tan-aw ang home teaching o visiting teaching [nga gitawag karon og pagpangalagad] dili takus o igo sa kabayanihon sa ilang gipatunhay nga paningkamot.”

“Pagpatigbabaw sa mga lagda kay sa doktrina”

“Kadtong mapasaligon sa pagsunod sa mga lagda nga dili maghunahuna sa doktrina ug baruganan dali gayud nga makahimo sa pagtan-aw lapas sa tumong” (“Looking beyond the Mark,” Ensign, Mar. 2003, 42–44).