“Pebrero 24–Marso 1. 2 Nephi 26–30: ‘Usa ka Kahibulongan nga Buhat ug usa ka Katingalahan,’” Dali, Sunod Kanako—Alang sa Sunday School: Basahon ni Mormon 2020 (2020)
“Pebrero 24–Marso 1. 2 Nephi 26–30,” Dali, Sunod Kanako—Alang sa Sunday School: 2020
Siya Moagak Kanimo pinaagi sa Kamot, ni Sandra Rast
Pebrero 24–Marso 1
2 Nephi 26–30
“Usa ka Kahibulongan nga Buhat ug usa ka Katingalahan”
Hinumdumi nga ang panimalay kinahanglang mao ang sentro sa pagkat-on sa ebanghelyo. Ang imong personal ug pamilya nga pagtuon sa 2 Nephi 26–30 kinahanglan nga mao ang mahimong basihan sa imong pagpangandam sa pagtudlo. Pagplano og mga paagi sa pag-ugmad, pagsuporta, ug pag-awhag sa personal ug pamilya nga pagtuon diha sa mga tawo sa imong klase.
Irekord ang Imong mga Impresyon
Dapita ang Pagpaambit
Sa pagsugod sa leksyon, hatagi ang mga sakop sa klase og kahigayunan sa pagpaambit og butang gikan sa 2 Nephi 26–30 nga ilang nakita nga makahuluganon samtang nagtuon sila diha sa panimalay. Pananglitan, mahimo nimo silang hangyuon nga mopaambit sa daklit og usa ka bersikulo nga nakatabang kanila nga masabtan ang atong panahon ug ang mga hagit nga atong giatubang.
Itudlo ang Doktrina
Ang tanang gibuhat sa Ginoo naaghat tungod sa Iyang gugma alang kanato.
-
Kon nadasig ka nga hisgutan ang mga pagtulun-an ni Nephi mahitungod sa gugma sa Ginoo, mahimo nimo kining buhaton: Human mabasa ang 2 Nephi 26:24 og dungan, dapita ang mga sakop sa klase sa paghimo og mga lista sa mga butang nga gibuhat ni Jesukristo alang kanila nga naaghat tungod sa gugma. Sa unsang paagi nga Siya “makadani sa tanan nga mga tawo ngadto kaniya”? Unsay atong gibati nga madasigon nga buhaton agig tubag sa Iyang mga pagpahayag sa gugma?
-
Ang mga pagdapit sa Ginoo diha sa 2 Nephi 26:24–28, 33 mga gamhanang ebidensya sa Iyang gugma. Usa ka paagi nga mahimo nimong matabangan ang mga sakop sa klase nga madiskubrihan kining mga pagdapit mao ang paghangyo kanila sa paghugpong sa mensahe sa Ginoo niining mga bersikulo ngadto sa usa ka sentence nga summary. Tingali ang pipila ka sakop sa klase andam nga mopaambit sa ilang mga summary. Sa unsa kaha nga paagi nga kining mga bersikulo makaimpluwensya sa paagi sa atong pagdapit sa uban sa pagduol ngadto ni Kristo? Awhaga ang klase sa pagrekord sa pipila sa ilang mga hunahuna ug mga pagbati. Aron makatabang sa pagdapit sa Espiritu, ikonsiderar ang pagpatukar sa usa ka girekord nga himno mahitungod sa gugma sa Manluluwas samtang ang mga sakop sa klase namalandong.
Ang Basahon ni Mormon mahinungdanon sa buhat sa Dios sa ulahing mga adlaw.
-
Ang mga tawo sa imong klase mahimong magkinahanglan og gamayng tabang aron makasabut sa panagna diha sa 2 Nephi 27 mahitungod sa usa ka basahon nga sinilyohan ug usa ka maalamon nga tawo. Ang istorya sa kasaysayan diha sa “Dugang nga mga Kapanguhaan” mahimong makatabang. Mosalir ba kini sa imong klase kon i-drama sa daklit sa pipila ka sakop sa klase ang mga panghitabo nga gihulagway niini nga istorya ug diha sa2 Nephi 27:15–22? Ngano kaha nga gipakita man daan si Nephi niining mga panghitabo sa daghang katuigan una pa kini mahitabo? Unsay gitudlo kanato sa panagna ni Nephi mahitungod sa kaimportante sa Basahon ni Mormon? Awhaga ang mga sakop sa klase sa pagpaambit sa usag usa kon giunsa nila pag-angkon sa kaugalingon nilang mga pagpamatuod bahin sa Basahon ni Mormon.
-
Aduna ba sa imong klase nga nakasinati sa pagdapit og usa ka tawo nga mobasa sa Basahon ni Mormon nga ilang mapaambit? Unsa man ang pipila ka rason nga ang usa ka tawo siguro dili modawat sa pagdapit nga mobasa sa Basahon ni Mormon? Ang tubag sa Ginoo sa usa niana nga rason makita diha sa 2 Nephi 29:6–11. Mahimo nimong dapiton ang mga sakop sa klase sa pagbasa niining mga bersikulo ug dayon i-role-play kon unsaon nila pagtubag sa mahigugmaong paagi ang usa ka tawo nga moingon nga wala na kinahanglana ang Basahon ni Mormon. Unsa ang laing mga ideya nga aduna ang mga sakop sa klase kon unsaon nila pagtabang sa uban nga “masayud nga [ang Basahon ni Mormon] usa ka panalangin ngadto kanila gikan sa kamot sa Dios”? (2 Nephi 30:6).
Si Satanas nagtinguha sa pagpanglingla.
-
Ang outline karong semanaha sa Dali, Sunod Kanako—Alang sa mga Indibidwal ug mga Pamilya nagsugyot sa pagpangita sa mga bakak ni Satanas nga gihulagway diha sa 2 Nephi 28. Tingali ang mga sakop sa klase mahimong mopaambit sa unsay ilang nakit-an, o mahimo nilang basahon sa daklit ang 2 Nephi 28 diha sa klase ug ilista ang mga bakak ni Satanas nga ilang matino. Mahimong makatabang usab ang pagpatrabaho nila diha sa ginagmay nga mga grupo sa pagpangita og mga kasulatan nga mosupak niining mga pagpanglingla (kon nagkinahanglan sila og tabang, mahimo nimong ipaambit ang mga sugyot diha sa “Dugang nga mga Kapanguhaan”). Dayon ang grupo mahimong mopaambit sa usag usa sa unsay ilang nakit-an ug maghisgot kon sa unsang paagi nila mabantayan ang “sayop ug kawang ug binuang nga mga doktrina” (2 Nephi 28:9).
Awhaga ang Pagkat-on diha sa Panimalay
Ang mga sakop sa klase mahimong madasig sa pagbasa sa 2 Nephi 31–33 kon masayud sila nga kining mga kapitulo naglangkob sa katapusang narekord nga mga pulong ni Nephi, lakip na ang usa sa labing yano apan labing komprehensibong paghulagway sa doktrina ni Kristo.
Dugang nga mga Kapanguhaan
“Unya ang maalamon moingon: Dili ako makabasa niana” (2 Nephi 27:18).
Niadtong Pebrero 1828, si Martin Harris, usa ka higala ni Joseph Smith, “mibiyahe ngadto sa Siyudad sa New York nga nagdala og usa ka transkripsyon sa pipila ka titik [characters] diha sa [bulawan] nga mga palid aron sa pagpakita niini ngadto sa mga iskolar. Tingali gusto niya og dugang nga pasalig nga ang mga palid tinuod, o naghunahuna siguro siya nga ang usa ka pagpamatuod makatabang kanila aron makahulam og kwarta sa pagmantala sa gihubad. Sa bisan unsang panghitabo, miinsister siya nga ang Ginoo miaghat kaniya sa pagbiyahe.
“Nianang higayuna, wala nila ni Joseph o Martin ang nasayud og daghan mahitungod sa pinulongan diha sa mga palid. Ang ila lamang nasayran mao ang gisulti ni anghel Moroni ngadto kang Joseph: nga usa kini ka rekord sa karaang Amerika. Sa ingon, imbis nga mangita og usa ka iskolar nga adunay kahibalo sa Ehiptohanon (nahibaloan ni Joseph sa kaulahian nga ang pinulongan diha sa mga palid gitawag og ‘inusab nga Ehiptohanon’), mibisita si Martin sa pipila ka iskolar nga adunay interes sa karaang mga panahon, ilabi na sa karaang mga panahon sa Amerika.
“… [Apil sa mga iskolar nga gibisitahan ni Martin] mao si Charles Anthon, usa ka batan-ong propesor sa grammar ug linguistics sa Columbia College. Nangolekta si Anthon og mga istorya ug mga pakigpulong sa mga American Indian aron imantala ug madasigon nga misusi sa dokumento nga gidala ni Martin ngadto kaniya.
“Giangkon ni Martin nga si Anthon namahayag nga ang mga titik tinuod hangtud nga iyang nahibaloan kon giunsa ni Joseph Smith pagbaton niini. Misugyot siya nga dad-on ni Martin ngadto kaniya ang mga palid. Mibalibad si Martin, ug mitubag si Anthon, nga misubli sa mga pulong sa usa ka bersikulo diha sa Isaias, ‘Dili ko makabasa sa usa ka sinilyohan nga basahon.’ Bisan kon sa wala madugay milimud si Anthon sa mga detalye sa istorya ni Martin bahin sa ilang panaghimamat, kini atong nasayran: miabut si Martin gikan sa iyang mga pagbisita sa mga iskolar sa silangan nga mas nakumbinser kay sa kaniadto nga si Joseph Smith gitawag sa Dios ug nga ang mga palid ug mga titik kinaraan. Nakita niya ug ni Joseph nga ang pagbisita kang Anthon usa ka katumanan sa panagna ni Isaias (nga nahisgutan mismo diha sa Basahon ni Mormon) bahin sa ‘usa ka basahon nga pinatikan, nga igahatag sa mga tawo niadtong usa nga maalam, nga magaingon, Basaha kini, nangaliyupo ako kanimo: ug siya magaingon, Ako dili makahimo; kay kini pinatikan’ [Isaias 29:11; tan-awa usab sa 2 Nephi 27:15–18]” (“The Contributions of Martin Harris,” Revelations in Context [2016], 3–4, history.ChurchofJesusChrist.org).
Mga kasulatan nga misupak sa mga pagpanglingla ni Satanas.
|
Sayop nga doktrina |
Tinuod nga doktrina |
|---|---|
|
“Karong adlawa siya dili usa ka Dios sa mga milagro; siya nakahimo na sa iyang buhat” (2 Nephi 28:6). | |
|
“Ang Dios … mohatag og kaangayan diha sa pagbuhat og usa ka gamay nga sala” (2 Nephi 28:8). | |
|
“Ang tanan maayo sa Zion” (2 Nephi 28:21). | |
|
“Ako dili yawa, kay walay yawa” (2 Nephi 28:22). | |
|
“Kami wala na magkinahanglan og dugang pa nga pulong sa Dios, kay kami adunay igo na” (2 Nephi 28:29). |
Pagpalambo sa Atong Pagtudlo
Ayaw og kahadlok sa kahilum. “Ang maayo nga mga pangutana nagkinahanglan og panahon sa pagtubag. Nagkinahanglan kini og pagpamalandong, pagsiksik, ug inspirasyon. Ang panahon nga imong gigahin sa paghulat og mga tubag sa usa ka pangutana mahimong usa ka sagrado nga panahon sa pagpamalandong. Likayi ang tintasyon nga hunungon dayon kini nga panahon pinaagi sa pagtubag sa imong kaugalingong pangutana o pagbalhin ngadto sa laing butang” (Pagtudlo sumala sa Pamaagi sa Manluluwas, 31).