Si Isaias nagsulat diha sa mga linukot nga mga papel [scrolls]

Pebrero 17–23

2 Nephi 11–25

“Kami Nalipay diha kang Kristo”

Agig dugang sa pagpahisama sa 2 Nephi 11–25 nganha sa imong kaugalingon, ikonsiderar kon unsaon kaha nimo pagtabang ang mga tawo sa pagpahisama niining mga kapitulo ngadto sa ilang kaugalingon (tan-awa sa 2 Nephi 11:8). Sa higayon nga ang Espiritu moaghat kanimo pinaagi sa mga hunahuna ug mga ideya, isulat dayon kini.

Irekord ang Imong mga Impresyon

pagpaambit nga icon

Dapita ang Pagpaambit

Sa dili pa maghisgot og piho nga mga tudling gikan sa 2 Nephi 11–25, mahimong makatabang ang paghangyo sa mga sakop sa klase sa paghunahuna nga sila adunay higala kinsa nanglimbasug nga makakita og bisan unsang butang nga makahuluganon o makapadasig diha sa mga sinulat ni Isaias. Unsa nga mga bersikulo ang ilang ipaambit ngadto niini nga higala?

pagtudlo nga icon

Itudlo ang Doktrina

2 Nephi 11–24

Si Isaias nagpamatuod bahin ni Jesukristo.

• Mas sayon sabton ang mga panagna ni Isaias kon nasayud kita nganong gisulat kini. Sa pagsugod og panaghisgutan bahin sa mga panagna ni Isaias diha sa 2 Nephi, mahimo nimong dapiton ang mga sakop sa klase sa pagsiksik sa kapitulo 11 ug sa paglista sa pipila ka katuyoan ni Nephi sa hilabihan nga pagkutlo kang Isaias. Mahimo usab sila nga mopaambit sa mga tudling nga ilang nakit-an diha sa ilang personal o pamilya nga pagtuon sa 2 Nephi 12–24 nga ilang gibati nga nakatuman niadtong mga katuyoan. Sa unsang paagi nga ang pagsabut bahin sa mga katuyoan ni Nephi nakatabang sa mga sakop sa klase nga mas nakakat-on sa mga sinulat ni Isaias? Awhaga sila nga hinumduman kining mga katuyoan samtang maghisgot sila sa mga sinulat ni Isaias diha sa klase.

• Tungod kay migamit si Isaias og daghan kaayong simbolikanhong pinulongan, mas dali nga mataligam-an ang iyang gamhanang pagsaksi bahin ni Jesukristo. Ania ang usa ka kalihokan nga makatabang sa imong klase nga makatutok niini nga pagsaksi. Mahimong mag-andam ka og pipila ka papel nga adunay mga pakisayran sa kasulatan nga nakasulat diha niini gikan sa 2 Nephi 12–24 nga nagtudlo mahitungod sa Manluluwas (pananglitan, 2 Nephi 13:13; 14:4–6; 15:1–7; 16:1–7; 17:14; 18:14–15; 19:6–7; 21:1–5; 22:2). Ang matag sakop sa klase mahimong mopili og usa sa mga papel, magtuon sa mga bersikulo nga nasulat diha niini, ug magsulat diha sa papel sa unsay iyang nakat-unan mahitungod ni Jesukristo. Dayon ang mga sakop sa klase mahimong magbinayloay sa mga papel ngadto sa laing tawo ug modugang og mga hunahuna o mga ideya nga ilang nakat-unan mahitungod sa Manluluwas gikan sa samang mga bersikulo. Mahimo dayon nimong hatagan ang mga sakop sa klase og kahigayunan nga mopaambit sa unsay ilang nakat-unan gikan ni Isaias ug gikan sa usag usa nga nakapalambo sa ilang pagdayeg kang Jesukristo.

• Ang panagna diha sa 2 Nephi 19:6 naglista sa pipila ka tawag ni Jesukristo. Ikonsiderar ang paghangyo og usa ka tawo sa paglista niini diha sa pisara ug sa pagdapit sa mga sakop sa klase sa paghisgot nganong ang matag usa niining mga tawag nahaum sa paghulagway bahin sa Manluluwas. Sa unsang paagi nga natuman Niya kining mga tahas diha sa atong kinabuhi? Aron mahibalo og dugang pa mahitungod sa pipila niining mga tawag, siguro makatabang ang pagtan-aw sa mga pakisayran diha sa mga footnote alang sa 2 Nephi 19:6.

2 Nephi 12:2–5; 21:10–12; 22

Sa ulahing mga adlaw, ang katawhan sa Dios pagapundukon ug makatagamtam og kalinaw.

• Ang piho nga mga bahin sa mga panagna ni Isaias aduna gayuy kalabutan ngari kanato tungod kay naghulagway kini sa mga aspeto sa buhat sa Dios sa ulahing mga adlaw. Pananglitan, mahimo nimong susihon ang 2 Nephi 21:10–12, nga naghulagway sa usa ka “bandila” (sumbanan o bandera) nga ipataas aron sa pagpundok sa katawhan sa Dios. Sa unsang paagi nato nakita ang Ginoo nga mipundok sa Iyang katawhan sa espirituhanong paagi? Siguro ang ubang mga sakop sa klase mahimong maghisgot mahitungod sa unsay hinungdan nga ganahan silang makigpundok o makighiusa sa katawhan sa Dios diha sa Simbahan. Siguro malingaw pa gani sila sa paghimo sa ilang kaugalingong mga bandera nga naglista o nagpakita sa pipila ka kamatuoran sa ebanghelyo nga ilang gibati nga “mangita” ang mga tawo ug motabang nga “mopundok” (mga bersikulo 10 ug 12) sa mga anak sa Dios sa atong panahon. Unsaon nato pagtabang sa pagpundok?

• Ang laing paagi sa paghisgot niining doktrina mao ang pagsulat sa mosunod nga mga tema diha sa pisara: Pagkatibulaag sa Israel, Pagpundok sa Israel, ug Mga Panagna bahin ni Kristo. Mahimo nimong i-assign ang mga kapitulo gikan sa 2 Nephi 12–24 ngadto sa mga grupo sa mga sakop sa klase ug dapita sila sa pagpangita sa mga bersikulo nga nagtudlo mahitungod niining mga butang ug sa pagsulat niining mga bersikulo ubos sa tukma nga ulohan diha sa pisara. Unsa nga mga mensahe ang ania niining mga bersikulo alang kanato? (Mahimong makatabang ang pagsulti ngadto sa mga sakop sa klase nga ang Doktrina ug mga Pakigsaad 113:1–6 makatabang nila nga masabtan ang 2 Nephi 21:1–5, 10.)

• Ang mga himno sama sa “Taas Ibabaw sa Bukid” (Mga Himno ug mga Awit sa mga Bata, nu. 30), nga ang usa ka bahin niini gibase sa mga panagna diha sa 2 Nephi 12:2–5 ug 2 Nephi 22, makasuporta sa mga mensahe ug sa katuyoan sa mga pulong ni Isaias.

2 Nephi 14:4–6

Ang atong mga panimalay ug ang “mga katiguman” sa Zion mahimong mga dapit sa kasiguroan ug kapasilongan.

• Diha sa 2 Nephi 14:4–6 nanagna si Isaias mahitungod sa kasiguroan ug kalinaw nga matagamtaman sa mga matarung human ang Ginoo “mohugas” ug “molimpyo” sa ilang mga sala. Bisan tuod kining mga bersikulo naghulagway sa mga kahimtang nga mahitabo sa Milenyum, makatabang kini sa mga sakop sa klase samtang mangita sila og espiritwal nga kasiguroan taliwala sa pagkadautan sa ulahing mga adlaw. Dapita sila sa pagpamalandong ug paghisgot kon unsay gipasabut sa makabaton og “usa ka panganod ug aso” ug “nagsiga nga kalayo” diha sa ilang “pinuy-anan” ug “mga katiguman” (bersikulo 5; tan-awa usab sa Exodo 13:21–22). Unsa ang ubang mga butang nga siguro matandi sa kainit, unos, ug ulan nga gihisgutan diha sa bersikulo 6? Unsaon nato sa pagkakaplag og kapasilongan? (tan-awa usab sa D&&P 115:6). Tingali ang mga sakop sa klase makasugyot og mga paagi aron masiguro nga ang atong mga panimalay ug mga panagtigum sa Simbahan mahimong mga dapit sa espiritwal nga panalipud.

2 Nephi 25:19–29

“Ang matarung nga paagi mao ang pagtuo diha kang Kristo.”

• Ang mga sakop sa imong klase siguro makasabut sa tinguha ni Nephi “aron sa pagdasig sa among mga anak, ug usab sa among mga kaigsoonan, sa pagtuo kang Kristo.” Sa unsang paagi nga si Nephi “nagkugi” sa pagtuman niini nga tumong? (2 Nephi 25:23). Siguro ang mga sakop sa klase mahimong mosiksik sa 2 Nephi 25:19–29 sa pagpangita og mga kamatuoran mahitungod sa Manluluwas ug sa Iyang ebanghelyo nga gusto ni Nephi nga mahibaloan sa iyang katawhan. Dayon mahimo silang mopaambit kon unsay ilang gibuhat sa pagtudlo niining mga kamatuoran ngadto sa ilang pamilya o mga higala. Pananglitan, giunsa nila pagtudlo ang kamatuoran nga “pinaagi sa grasya kami maluwas, human sa tanan nga atong mabuhat”? Ang pamahayag ni Presidente Dieter F. Uchtdorf diha sa “Dugang nga mga Kapanguhaan” makahatag og pipila ka ideya kabahin niini nga kamatuoran.) Sa unsang paagi nga kini nakatabang sa uban nga “[mag]lipay diha kang Kristo”?

pagkat-on nga icon

Awhaga ang Pagkat-on diha sa Panimalay

Ang mga sakop sa klase siguro mainteresado nga masayud nga ang 2 Nephi 26–30 makatabang kanila sa pagtubag sa mga tawo kinsa moingon, “Wala kami magkinahanglan sa Basahon ni Mormon.”

mga kapanguhaan nga icon

Dugang nga mga Kapanguhaan

“Pinaagi sa grasya kami maluwas, human sa tanan nga atong mabuhat.”

Nagkomento bahin sa mga pulong ni Nephi diha sa 2 Nephi 25:23si Presidente Dieter F. Uchtdorf miingon:

“Ako naghunahuna kon usahay sayop ba ang atong pagsabut sa hugpong sa mga pulong ‘human sa tanan nga atong mabuhat.’ Kinahanglan nga atong sabton nga ang ‘human’ dili makatupong sa ‘tungod.’

“Kita wala maluwas ‘tungod’ sa tanan nga atong mabuhat. Aduna bay usa kanato nga nakabuhat sa tanan nga atong mabuhat? Maghulat ba ang Dios hangtud atong nahatag ang tanang paningkamot sa dili pa Siya mopatunga diha sa atong mga kinabuhi uban sa Iyang makaluwas nga grasya? …

“Ako nakasiguro nga si Nephi nahibalo nga ang grasya sa Manluluwas nagtugot ug naghimo kanato sa pagbuntog sa sala [tan-awa sa 2 Nephi 4:19–35; Alma 34:31]. Maoy hinungdan nga si Nephi naghago nga makugihon aron sa pagdasig sa iyang mga anak ug mga kaigsoonan ‘sa pagtuo kang Kristo, ug aron makig-uli sa Dios’ [2 Nephi 25:23].

“Total, mao kana ang unsay atong mahimo! Ug kana angatong tahas dinhi sa mortalidad!” (“Ang Gasa sa Grasya,” Liahona, Mayo 2015, 110).

Pagpalambo sa Atong Pagtudlo

Ipangutana ang mga pangutana nga makadapit og pagpamatuod. “Ang pagpangutana og mga pangutana nga makaawhag sa mga tigkat-on sa pagpamatuod kabahin sa mga baruganan nga gitudlo mahimong usa ka gamhanan nga paagi sa pagdapit sa Espiritu. … Ang ilang mga pagpamatuod—ug ang pagpamatuod sa uban diha sa klase—motubo samtang ang Espiritu mohatag og pagsaksi sa kamatuoran” (Pagtudlo sumala sa Pamaagi sa Manluluwas, 32).