Si Jesus nag-ampo sa Getsemani

Dili Ang Akong Pagbuot Maoy Matuman, Kondili Ang Imo, ni Harry Anderson

Pebrero 10–16

2 Nephi 6–10

“O Unsa Kamahinungdanon sa Laraw sa Atong Dios!”

Ang usa ka paagi sa pag-andam sa imong kaugalingon sa pagtudlo mao ang pagbasa og una sa 2 Nephi 6–10 alang sa imong kaugalingon. I-rekord ang bisan unsang mga impresyon nga imong madawat, ug gamita kini nga outline sa pagpangita og dugang nga mga panabut ug mga ideya sa pagtudlo.

Irekord ang Imong mga Impresyon

pagpaambit nga icon

Dapita ang Pagpaambit

Gitudloan ni Jacob ang iyang katawhan nga ang mga pagtulun-an ni Isaias “ipahisama nganha kaninyo” (2 Nephi 6:5). Mahimo nimong sugdan pinaagi sa paghangyo sa mga sakop sa klase sa pagpaambit sa bisan unsa nga mga pagtulun-an ni Jacob diha sa 2 Nephi 6–10 nga ilang gibati nga ilang mapahisama sa ilang kinabuhi. Mahimo nilang ipasabut nganong nakita nila nga makahuluganon ang pagtulun-an.

pagtudlo nga icon

Itudlo ang Doktrina

2 Nephi 6–8

Ang Ginoo malooy sa Iyang katawhan ug motuman sa Iyang mga saad.

• Sa paghatag og konteksto sa mga mensahe sa 2 Nephi 6–8, siguro makatabang nga ang imong klase maghimo og yano nga time line sa mga panghitabo nga gihulagway diha sa 2 Nephi 6:8–15. Unsa may gisugyot niining mga panghitabo mahitungod sa Ginoo ug sa Iyang mga pagbati alang sa Iyang katawhan? (tan-awa usab sa 2 Nephi 7:1–3; 8:3). Mahimo nimong ipasabut nga isip mga miyembro sa Simbahan, mga katawhan kita sa pakigsaad sa Dios karon, ug gipundok kita gikan sa kalibutan ngadto sa kasiguroan sa ebanghelyo. Unsa nga mga mensahe ang ania niining mga kapitulo alang kanato karon?

2 Nephi 9

Pinaagi sa Iyang Pag-ula, si Jesukristo mipalingkawas sa tanang tawo gikan sa pisikal ug espirituhanon nga kamatayon.

• Usa ka paagi aron mapalambo ang atong pagdayeg alang sa Pag-ula ni Jesukristo mao ang paghunahuna kon unsa kaha unta ang nahitabo kanato kon wala pa ang Pag-ula. Mahimong mamalandong ang mga sakop sa klase niining mga butang samtang magtuon sila sa 2 Nephi 9. Mahimo nimong dapiton ang mga sakop sa klase nga magsugod pinaagi sa pagtuon sa mga bersikulo 4–9 ug dayon sa paglista diha sa pisara kon unsa kaha unta ang nahitabo kon wala pa ang Pag-ula ni Kristo. Sumala sa mga bersikulo 10–14, giunsa kita pagluwas sa Manluluwas gikan niini nga kapalaran? Ang mensahe ni Elder Jeffrey R. Holland diha sa “Dugang nga mga Kapanguhaan” makatabang nga masabtan sa imong klase ang atong panginahanglan alang sa Pag-ula ni Jesukristo. Ang mga sakop sa klase mahimong mopaambit og bisan unsa nga mga hunahuna o mga pagbati nga nadasig sa mensahe ni Elder Holland mahitungod sa Manluluwas.

• Hangyoa ang mga sakop sa klase sa pagkonsiderar kon unsaon nila sa pagpasabut ang Pag-ula ni Jesukristo ngadto sa usa ka tawo kinsa wala mahibalo kon unsa kini o nganong gikinahanglan kini. Ang mga kamatuoran nga makita diha sa 2 Nephi 9 makatabang sa pag-andam sa mga sakop sa klase alang sa maong panag-istoryahanay. Tingali mahimo silang mosiksik sa mga bersikulo 4–12, nga mangita kon giunsa pagbuntog sa Pag-ula sa Manluluwas ang pisikal ug espirituhanon nga kamatayon. Base sa unsay atong nakat-unan gikan niining mga kasulatan, nganong ang sakripisyo sa Manluluwas gitawag man og “usa ka walay kinutuban nga pag-ula”? (2 Nephi 9:7).

• Nahingangha kaayo si Jacob sa plano sa Dios kalabut sa katubsanan nga nakatuaw siya og “O pagkawalay katapusan” ug “O ang pagkagamhanan” samtang gihulagway niya ang plano. Aron matabangan ang mga sakop sa klase nga mas masabtan kining mga pagbati alang sa Manluluwas ug sa Iyang Pag-ula, ikonsiderar ang pagdapit kanila sa pagsiksik sa 2 Nephi 9 alang sa mga pagtuaw ni Jacob (kasagaran niini makita diha sa mga bersikulo 8–20). Unsa ang gitudlo kanato niining mga bersikulo mahitungod sa Dios ug sa Iyang plano? Unsa nga mga kasinatian ang nakatabang kanato nga mobati kon unsay gibati ni Jacob mahitungod sa plano sa Dios alang sa Iyang mga anak? Mahimo usab nga manganta kamo og awit mahitungod sa kahalangdon sa Dios, sama sa “How Great Thou Art [Gamhanan Ka]” (Hymns, nu. 86), sa pagsuporta niining panaghisgutan.

2 Nephi 9:27–54

Mahimo kitang moduol ngadto kang Kristo ug modawat sa mahimayaong mga panalangin sa Iyang Pag-ula.

• Mahimong magsugod ka og panaghisgutan bahin sa mga pagtulun-an ni Jacob diha niining mga bersikulo pinaagi sa paghangyo sa mga sakop sa klase sa paghunahuna kon unsaon nila sa pagdapit ang usa ka tawo nga maghinulsol ug moduol ngadto kang Kristo. Giunsa kini pagbuhat ni Jacob diha sa 2 Nephi 9:50–53? Unsa nga mga panalangin ang iyang giingon nga moabut sa atong kinabuhi kon atong dawaton kining mga pagdapit?

• Diha sa 2 Nephi 9, naggamit si Jacob og duha ka gamhanan ug managlahi nga mga pulong: “[ang] maloloy-on nga laraw sa makagagahum nga Tiglalang” ug “kanang maliputon nga laraw sa usa ka dautan” (2 Nephi 9:6, 28). Aron matabangan ang mga sakop sa klase nga makakat-on gikan niining panaglahi, mahimong magdrowing ka og usa ka dalan diha sa pisara ug sulati kini og Plano sa Langitnong Amahan. Dapita ang mga sakop sa klase sa pagsiksik sa 2 Nephi 9:27–52, nga mangita sa tambag nga gihatag ni Jacob aron matabangan kita nga makasunod sa plano sa Langitnong Amahan. Hangyoa sila sa pagsulat sa unsay ilang makit-an tupad sa dalan. Unsay gitudlo ni Jacob kon giunsa kita pagtintal ni Satanas palayo sa plano sa atong Langitnong Amahan? Unsa ang atong makat-unan gikan niining mga bersikulo mahitungod kon asa ang atong padulngan sa pagsunod sa plano sa Langitnong Amahan ug asa ang padulngan sa pagsunod kang Satanas? (tan-awa sa 2 Nephi 9:9, 18). Sumala niining mga bersikulo, unsay atong mabuhat aron mas hingpit nga makasunod sa plano sa Langitnong Amahan?

• Diha sa 2 Nephi 9:28–38, mipasidaan si Jacob batok sa pipila ka kinaiya ug mga pamatasan nga makapugong kanato sa pagsunod sa plano sa Dios alang kanato. Ikonsiderar ang pagdapit sa mga sakop sa klase sa pagpangita niini. Hain niining mga kinaiya ug mga pamatasan ang morag komon gayud kaayo karon? Unsa ang nakapahimo niini nga peligro kaayo? Unsay atong makat-unan gikan sa 2 Nephi 9:50–53 kon unsaon sa paglikay niining mga peligro?

pagkat-on nga icon

Awhaga ang Pagkat-on diha sa Panimalay

Aron matabangan ang mga sakop sa klase nga mobati nga masaligon mahitungod sa pagbasa sa mga sinulat ni Isaias nga gikutlo ni Nephi diha sa 2 Nephi 11–24, mahimo nimong ipasabut nga gilakip ni Nephi kining mga sinulat aron mapalig-on ang pagtuo sa iyang katawhan diha kang Jesukristo. Dapita ang mga sakop sa klase sa pagtan-aw sa sunod semana nga pagbasa isip usa ka oportunidad sa pag-ugmad sa ilang kaugalingong pagtuo diha Kaniya.

mga kapanguhaan nga icon

Dugang nga mga Kapanguhaan

Ang Atong Panginahanglan alang sa usa ka Manluluwas

Si Elder Jeffrey R. Holland misaysay sa istorya bahin sa usa ka tigkatkat og dagkong bato nga sa peligro nga kahimtang nagbitay sa usa ka tiptip nga pangpang, nga walay makapugong kaniya sa pagkahulog ngadto sa iyang kamatayon. Samtang ang iyang kamot nagsugod sa pagdailos sa balason nga pangpang, iyang nabati ang mga kamot sa iyang manghud nga mikupot sa iyang mga pulso ug mibitad kaniya paingon sa luwas nga dapit. Gitandi ni Elder Holland ang kasinatian sa tigkatkat nganhi sa atong kahimtang niining napukan nga kalibutan:

“Adunay tinuod nga Adan ug Eva nga napukan gikan sa Eden lakip na ang tanang sangputanan niana nga pagkapukan. … Tungod kay natawo kita sa napukan nga kalibutan ug tungod kay kita usab molapas sa mga balaod sa Dios, kita usab gihukman og sama nga silot nga giatubang ni Adan ug Eva.

“Pagkapait nga kahimtang! Ang tibuok kaliwatan sa tawo—matag lalaki, babaye, ug bata nagpadulong ngadto sa permanenteng pagkamatay sa lawas, ngadto sa mahangturong kasakit sa espiritu. Mao ba kana ang angayng mahitabo sa kinabuhi? Kini ba ang katapusang resulta sa tawhanong kasinatian? Kitang tanan nagbitay lang ba sa tugnaw nga pangpang diha sa walay pagpakabana nga uniberso, ang matag usa nangitag suporta, ang matag usa nangita og kakuptan—walay bisan unsa gawas sa balas nga midailos ilawom sa atong mga tudlo, walay makaluwas kanato, walay makuptan, ni mokupot kanato? …

“Ang tubag niadtong mga pangutana mao ang usa ka klaro ug mahangturong dili! … [Ang] Pag-ula hingpit nga mobuntog sa pisikal nga kamatayon, walay kondisyon nga naghatag sa pagkabanhaw ngadto sa matag tawo kinsa natawo o matawo pa dinhi sa kalibutan. Sa kalooy kini mohatag usab og kapasayloan sa personal nga mga sala sa tanan, gikan ni Adan hangtud sa katapusan sa kalibutan, sumala sa paghinulsol ug pagkamasulundon sa balaan nga mga sugo” (“Asa ang Hustisya, Gugma, ug Kalooy Mag-abut,” Liahona, Mayo 2015, 105–6).

Pagpalambo sa Atong Pagtudlo

Ihatag ang imong pagpamatuod kanunay. Ang imong yano, kinasingkasing nga pagsaksi sa kamatuoran mahimong adunay gamhanang impluwensya sa imong mga gitudloan. Dili kini kinahanglan nga maayo pagkasulti o taas. Ikonsiderar ang pagpaambit sa imong personal nga pagsaksi bahin sa Manluluwas samtang maghisgot ka sa 2 Nephi 9.