“Pebrero 3–9. 2 Nephi 1–5: ‘Kami Mipuyo subay sa Matang sa Pagkamalipayon,’” Dali, Sunod Kanako—Alang sa Sunday School: Basahon ni Mormon 2020 (2020)
“Pebrero 3–9. 2 Nephi 1–5,” Dali, Sunod Kanako—Alang sa Sunday School: 2020
Adan ug Eva, ni Douglas Fryer
Pebrero 3–9
2 Nephi 1–5
“Kami Mipuyo subay sa Matang sa Pagkamalipayon”
Sugdi ang imong espiritwal nga pagpangandam pinaagi sa pagbasa sa 2 Nephi 1–5 ug sa pagrekord sa imong mga impresyon. Adunay mas daghang baruganan niining mga kapitulo kay sa panahon nimo sa paghisgot sa usa ka klase, busa sunda ang Espiritu sa imong pagpangandam ug hatagi og pagtagad ang mga ideya nga gipaambit sa mga sakop sa klase aron matabangan ka sa pagtino kon hain nga mga baruganan ang i-focus ug unsaon paggiya sa panaghisgutan.
Irekord ang Imong mga Impresyon
Dapita ang Pagpaambit
Siguro ang mga sakop sa imong klase mimarka o naghimo og pahinumdom mahitungod sa dili mominus sa usa ka bersikulo diha sa 2 Nephi 1–5. Sa pagsugod sa klase, mahimo nimong dapiton ang mga sakop sa klase sa pagpaambit og mga bersikulo nga makahuluganon ngadto kanila. Dapita ang klase sa pag-summarize og usa ka doktrinal nga baruganan nga ilang makat-unan gikan sa mga bersikulo nga gipaambit.
Itudlo ang Doktrina
Gawasnon kita sa paglihok alang sa atong kaugalingon.
-
Kasagaran gayud, gamiton sa mga tawo ang ilang kabubut-on aron magpaantus og maayo sa uban. Busa nganong importante man kaayo ang kabubut-on ngadto sa Langitnong Amahan? Tingali mahimo nimong isulat kini nga pangutana diha sa pisara, ug ang mga sakop sa klase mahimong mosiksik alang sa mga tubag diha sa 2 Nephi 2:11–30 ug mosulat sa ilang mga tubag diha sa pisara. Sa unsang paagi nga ang kaaway mosulay sa pagpaminus sa atong kabubut-on? Sa unsang paagi nga ang Manluluwas motabang kanato sa “pagpili sa kalingkawasan ug sa kinabuhi nga dayon”? (2 Nephi 2:27). Ikonsiderar ang pagkanta og dungan sa usa ka himno mahitungod sa kabubut-on, sama sa “Know This, That Every Soul Is Free [Hibaloi, Nga ang Kalag May Kagawasan]” (Hymns, nu. 240), ug ang pagdapit sa mga sakop sa klase nga idugang ngadto sa ilang lista ang ubang mga ideya nga ilang naangkon gikan sa himno.
-
Ang outline karong semanaha sa Dali, Sunod Kanako—Alang sa mga Indibidwal ug mga Pamilya nagtino sa upat ka gikinahanglan nga mga kahimtang nga mopahimong posible sa kabubut-on. Ania ang usa ka paagi nga imong mahatagan og gibug-aton ang unsay nakat-unan sa mga sakop sa klase diha sa panimalay: Isulat ang upat ka kondisyon diha sa pisara. Dapita dayon ang mga sakop sa klase sa pagpaambit sa mga pamahayag gikan sa 2 Nephi 2 nga nagtudlo nganong kini nga mga kahimtang gikinahanglan sa pagkab-ot sa atong balaanong potensyal.
Ang Pagkapukan ug ang Pag-ula ni Jesukristo gikinahanglan nga mga bahin sa plano sa Langitnong Amahan.
-
Daghang Kristiyano ang nagtuo nga ang Pagkapukan usa ka trahedya ug nga si Eva nakahimo og bug-at kaayo nga sayop. Kining mga bersikulo diha sa 2 Nephi 2 miklaro sa mga kamatuoran mahitungod sa Pagkapukan ni Adan ug ni Eva, ug nagpamatuod kini nga si Jesukristo mitubos kanato gikan sa Pagkapukan. Usa ka paagi sa paghisgot niining mga ideya mao ang pagdapit sa mga sakop sa klase sa pagsiksik sa 2 Nephi 2:15–25 ug sa paghimo og lista sa mga kamatuoran nga ilang nahibaloan kon unsay nahitabo didto sa Tanaman sa Eden. Unsay lain pang mga ideya nga ilang nakit-an diha sa kinutlo gikan ni Presidente Dallin H. Oaks sa “Dugang nga mga Kapanguhaan”? Giunsa pagtubos ni Jesukristo kanato gikan sa Pagkapukan? (tan-awa sa 2 Nephi 2:6–8, 26–29).
-
Human makahimo og kalihokan sama sa miagi, mahimo nimong i-display ang pipila ka pangutana sama sa mosunod ug dapita ang mga sakop sa klase sa pagpaambit sa ilang mga ideya:
-
Sa unsang paagi nga ang mga pagtulun-an ni Lehi niining mga bersikulo mikorihir sa pipila ka komon nga mga sayop nga pagsabut mahitungod sa Pagkapukan?
-
Sa unsang mga paagi nga ang Pagkapukan nahimong usa ka panalangin?
-
Sa unsang paagi nga ang hustong pagsabut sa Pagkapukan makatabang nato nga mas masabtan ang atong panginahanglan kang Jesukristo ug sa Iyang Pag-ula?
-
Unsa ang usa ka rason nga mapasalamaton kamo alang sa pagpili nila ni Adan ug ni Eva didto sa Tanaman sa Eden?
-
Sa unsang paagi nga ang inyong pagpili nga moanhi sa yuta susama sa pagpili ni Adan ug ni Eva nga mokaon sa bunga sa kahoy sa kahibalo sa maayo ug dautan?
-
Unsa ang katuyoan sa kinabuhi? Nganong gikinahanglan man ang Pagkapukan aron matuman kini nga katuyoan?
-
Makadangup kita sa Dios diha sa atong kahuyang.
-
Ang mga sinulat ni Nephi diha sa 2 Nephi 4:15–35 makahatag kanato og paglaum ug kahupayan kon mobati kita nga nabug-atan sa atong mga panglimbasug ug mga kahuyang. Tingali ang mga sakop sa klase mahimong moribyu niining mga bersikulo nga magpares ug mangita sa mga tudling nga ilang magamit sa paghupay sa usa ka tawo kinsa mibati nga nabug-atan sa iyang mga kalisdanan. Dayon ang matag parisan mahimong mopaambit niining mga tudling ngadto sa klase. Siguro ang usa ka tawo diha sa klase mahimong mopaambit og kasinatian diin siya nakakita og kahupayan pinaagi sa pagdangup ngadto sa Dios, sama sa gibuhat ni Nephi.
-
Usa ka paagi sa pagribyu sa 2 Nephi 4 mao ang pagdapit daan sa pipila ka sakop sa klase nga motungha nga andam sa pagpaambit og mga bersikulo ug mga pulong gikan niining kapitulo nga makahuluganon ngadto kanila. Hangyoa sila sa pagpaambit sa unsay ilang buhaton kon mobati sila nga nabug-atan sa ilang mga kahuyang. Usa ka himno mahitungod sa kahupayan ug paglaum, sama sa “Where Can I Turn for Peace [Ang Kalinaw Asa Ko Pangitaa]?” (Hymns, nu. 129), mahimong madugang ngadto niining panaghisgutan. Pananglitan, ang mga sakop sa klase mahimong mopaambit kon sa unsang paagi nga ang himno misuporta sa ehemplo ni Nephi nga mosalig sa Ginoo sa mga panahon nga nawad-an og kadasig.
Ang kalipay makita diha sa pagsunod sa ebanghelyo.
-
Bisan pa man sa mga hagit nga giatubang ni Nephi ug sa iyang katawhan, nakahimo sila sa pag-ugmad og katilingban nga gibase sa mga baruganan nga moresulta ngadto sa kalipay. Unsa nga mga baruganan ang nakit-an sa mga sakop sa klase sa ilang pagtuon sa 2 Nephi 5 nga nakatampo sa kalipay nga nasinati sa mga Nephite? Mahimo nimong hatagan og usa ka piraso sa papel ang mga sakop sa klase ug modapit kanila sa pagsiksik sa 2 Nephi 5 alang sa mga baruganan nga moresulta sa kalipay ug ipasulat kini. Sa unsang paagi nga ang mga pamaagi sa pagtinguha sa kalibutan og kalipay lahi sa unsay atong makita diha sa 2 Nephi 5? Unsa nga mga tumong ang matakda sa mga sakop sa klase aron magamit ang usa niining mga baruganan?
Awhaga ang Pagkat-on diha sa Panimalay
Sultihi ang mga sakop sa klase nga ang 2 Nephi 6–10 adunay usa sa labing maayo nga mga wali mahitungod sa Pag-ula ni Jesukristo sa tibuok kasulatan. Mahimo usab nimong ipaambit ang usa ka bersikulo nga imong makita dinhi niining mga kapitulo nga nakapahinam nimo nga mobasa niini.
Dugang nga mga Kapanguhaan
Ang Pagkapukan usa ka bahin sa plano sa Dios.
Si Presidente Dallin H. Oaks nagtudlo:
“Sa dihang si Adan ug si Eva nakadawat sa unang sugo, anaa sila sa usa ka transisyonal nga kahimtang, wala na sa kalibutan sa mga espiritu apan adunay pisikal nga mga lawas nga wala pa mapaubos sa kamatayon ug dili pa makahimo sa pagsanay. Dili sila makatuman sa unang sugo sa Amahan nga dili molapas sa babag tali sa kalipay didto sa Tanaman sa Eden ug sa grabe kaayo nga mga pagsulay ug talagsaong mga oportunidad sa mortal nga kinabuhi. …
“… Si Propeta Lehi mipasabut nga ‘kon si Adan wala pa unta makalapas siya dili unta mapukan’ (2 Ne. 2:22), apan magpabilin unta sa samang kahimtang diin siya gilalang.
“… Ang Pagkapukan giplano, gitapos ni Lehi, tungod kay ‘ang tanan nga mga butang nahimo diha sa kaalam kaniya kinsa nasayud sa tanan nga mga butang’ (2 Ne. 2:24).
“Si Eva ang unang nakalapas sa mga gidili sa Eden aron mapasiugdahan ang mga kahimtang sa pagkamortal. Ang iyang nahimo, bisan unsa man nga matang kini, lahi nga pamaagi sa paglapas apan sa mahangturong paagi usa ka mahimayaong panginahanglan nga maabli ang ganghaan sa kinabuhing dayon. Gipakita ni Adan ang iyang kaalam pinaagi sa paghimo sa samang butang. Ug sa ingon si Eva ug ‘si Adan napukan aron ang mga tawo mahimo’ (2 Ne. 2:25).
“Ang ubang mga Kristiyanos mihimaraot ni Eva sa iyang gihimo, mihukom nga siya ug ang iyang mga anak nga babaye mga huyang bahin niini. Apan dili ang mga Santos sa Ulahing mga Adlaw! Napahibalo pinaagi sa pagpadayag, atong gikalipay ang gihimo ni Eva ug gitahud ang iyang kaalam ug kaisug nianang talagsaong yugto nga gitawag og Pagkapukan. …
“Ang moderno nga pagpadayag nagpakita nga ang atong unang mga ginikanan nakasabut sa panginahanglan sa Pagkapukan. Si Adan namahayag, ‘Daygon ang ngalan sa Dios, kay tungod sa akong kalapasan ang akong mga mata nabuka, ug niini nga kinabuhi ako adunay kalipay, ug usab sa unod ako makakita sa Dios’ (Moises 5:10)” (“The Great Plan of Happiness,” Ensign, Nob. 1993, 72–73).
Pagpalambo sa Atong Pagtudlo
Tabangi kadtong kinsa wala na motambong. Ang pagtudlo mas labaw pa kay sa paggiya sa panaghisgutan inigka-Dominggo; naglangkob kini sa pagpangalagad pinaagi sa gugma ug pagpanalangin sa uban pinaagi sa ebanghelyo. Siguro makahunahuna kamo og usa ka tawo kinsa wala na motambong ug hatagi siya og usa ka piho nga pagdapit nga moapil sa usa ka umaabut nga leksyon. (Tan-awa sa Pagtudlo sumala sa Pamaagi sa Manluluwas, 8–9.)