Iti Serbisio ti Diosmo, ni Walter Rane

Abril 20–26

Mosiah 4–6

“Naindaklan a Panagbalbaliw”

Basaem ti Mosiah 4–6 ken isuratmo dagiti naespirituan nga impresionmo. Bayat ti panangawatmo kadagiti impresion, mabalin a saludsodem, kas insingasing ni Elder Richard G. Scott, “Adda kadi pay nasken a maammuak?” (“To Acquire Spiritual Guidance,” Ensign wenno Liahona, Nob. 2009, 8).

Isuratmo Dagiti Impresionmo

Yawis ti Panagbibinninglay

Mabalin a kayatmo ti mangirugi iti panaglilinnawag iti klase babaen ti panangidawat kadagiti miembro ti klase a mangibinglay iti maysa kadagiti pannursuro ni Ari Benjamin manipud iti Mosiah 4–5 a kayatda a nasaysayaat a mayaplikar iti biagda.

Isuro ti Doktrina

Mosiah 4:1–12

Babaen ken ni Jesucristo, mabalintayo ti umawat ken mangpagtalinaed iti pannakaugas dagiti basoltayo.

• Sumagmamano a tao ti addaan iti biddut a kapanunotan a ti panagbabawi ket agkasapulan iti babassit a panagkagumaan; mamati dagiti dadduma a kasapulan daytoy ti adu unay a panagkagumaan. Tapno matulongan dagiti miembro ti klase a nasaysayaat a maawatanda no ania ti kasapulan tapno maawattayo ti pannakaugas dagiti basbasol, mabalinmo nga awisen ida a mangsapul kadagiti pannursuro ni Ari Benjamin iti Mosiah 4:1–12, a mangsapsapul kadagiti kasasaad iti babaen ti panangpatgan ti Nailangitan nga Ama iti pannakapakawan dagiti basbasoltayo. Mabalin nga ilista dagiti miembro ti klase iti pisarra no ania ti masarakanda. Idawatmo kadakuada a mangpanunot kadagiti analohia tapno makatulong a mangilawlawag no ania ti nasursuroda. Kas pagarigan, mabalinda nga idilig pannakaugas ti basbasol iti maysa a nakautang a “mangbaybayad” wenno mangikankansela iti maysa nga utang. Wenno mabalinda nga idilig ti panangpatalinaed iti pannakaugas dagiti basoltayo iti panangipateg iti maysa a banag nga agkasapulan iti kanayon a pannakamentiner, a kas iti maysa a minuyongan wenno maysa a pagtaengan.

• Ibilangmo ti panangidawat kadagiti miembro ti klase no ania koma ti kunada iti maysa a tao nga agpampanunot no napateg met laeng a panagkagumaan ti panagbabawi. Kasano a matulonganda ti maysa a tao a naawanan iti namnama ken makarikna nga imposible ti panangparmek iti basol ken pagkapsutan? Mabalin a matulongam nga agsagana dagiti miembro ti klase iti kakasta a pannakisarsarita babaen ti panangkiddawmo kadakuada a mangbubos iti sumagmamano a minuto iti panagsukisok kadagiti balikas ni Ari Benjamin iti Mosiah 4:1–12 para kadagiti kinapudno a makatulong iti maysa a tao kadagitoy a kasasaad. Kalpasanna mabalin nga ibinglay dagiti miembro ti klase dagiti kinapudno a nasarakanda iti maysa a tao a nakatugaw iti asideg.

Mosiah 4:11–27

No agbabawitayo, mapnotayonto iti ayat ti Dios.

• Kasano nga ammotayo no inawattayon ti pannakaugas dagiti basbasoltayo? Inladawan ni Ari Benjamin ti sumagmamano a resulta ti pudno a panagbabawi—awisem dagiti miembro ti klasem a mangsapul kadagitoy iti Mosiah 4:13–16. Mabalinmo pay nga awisen ida a mangutob iti bukodda a biag ken mangamiris no kasano nga agbibiagda a mayannurot kadagiti pannursuro kadagitoy a bersikulo. Ania dagiti pagilasinan a makita dagiti miembro ti klase a napasurot wenno na-convert-dan? Kasano nga agbalbaliw dagiti relasiontayo iti dadduma no umasidegtayo ken ni Cristo babaen ti panagbabawi? Nalabit a mabalin nga ibinglay dagiti miembro ti klase no kasano a nakitadan a napasamak daytoy iti biagda?

• Mosiah 4:11–12 ken 14–16 ketmabalin a mangiparikna iti panaglilinnawag maipapan no ania ti mangparegta iti panagbalin a nalinteg a nagannak. Ania ti isuro dagitoy a bersikulo maipapan no kasano ti agbalin a nasaysayaat a nagannak?

• No mariknam a naparegtaka a maaddaan iti maysa a panaglilinnawag maipapan kadagiti pannursuro ni Ari Benjamin maipapan iti panangaywan kadagiti napanglaw ken agkasapulan, mabalinmo nga awisen dagiti miembro ti klase nga agsisinnublatda itipanangbasa kadagiti bersikulo manipud iti Mosiah 4:16–27. Kalpasan a nabasa ti tunggal bersikulo, mabalin a gupgopen ti tao a nangbasa iti bukodna a balikas no ania ti insuro ni Ari Benjamin. Ti mensahe ni Elder Jeffrey R. Holland nga “Are We Not All Beggars?” (Ensign wenno Liahona, Nob. 2014, 40–42) ket mabalin nga usaren a pangsuplemento iti daytoy a panaglilinnawag. Kasano a masurottayo ti balakad ni Ari Benjamin a saantayo nga “agtaray iti naparpardas ngem iti kabaelan[tayo]? (Mosiah 4:26–27). Kasano a mainaig ti bilin a “mangted iti sanikua[tayo] kadagiti napanglaw” iti pannakaugas dagiti basbasoltayo?

Mosiah 4:29–30

Nasken nga annadantayo dagiti pampanunot, sasao, ken aramidtayo.

• No dadduma kasla nalaklaka koma no inted ti Apo kadatayo ti detaliado a listaan ti tunggal mabalin a basol. Ketdi, ibagana kadatayo, “Annadan ti bagbagiyo … ken panagtultuloyyo iti pammati a nangngeganyo maipapan iti yaay ti Apotayo” (Mosiah 4:30). Tapno makatulong iti klasem a mangilawlawag iti daytoy a pagbatayan, mabalinmo ti agdamag kadakuada kadagiti saludsod kas kadagitoy: Kasano nga aringan dagiti pampanunot, sasao, ken ar-aramidtayo dagiti bagbagitayo ken dagiti dadduma? Ania ti kaipapanan ti “panagtultuloy iti pammati”? Ania ti balakad a maibinglaytayo iti tunggal maysa a makatulong kadatayo nga “annadan” ti bagbagitayo?

Mosiah 5:1–7

Ti Espiritu ti Apo ti mabalin a makaigapu iti naindaklan a panagbalbaliw iti puspusotayo.

• Tapno mangirugi iti panaglilinnawag maipapan kadagiti awan pakayaspinganna a panagbalbaliw a mangisangbay iti biagtayo ti ebanghelio ni Jesucristo, mabalinmo nga awisen dagiti miembro ti klase a mangibinglay iti sumagmamano a gapu no apay a masansan a narigat dagiti manayon a panagbalbaliw iti biagtayo. Kalpasanna awisem ida a mangbasa iti Mosiah 5:1–5, a mangsapsapul iti “naindaklan a panagbalbaliw” a napadasan dagiti tao ni Ari Benjamin. Ania dagiti kinapudno maipapan iti panagbalbaliw iti puso a masursurotayo manipud kadagiti padasda? Ibilangmo ti panangkiddaw iti sumagmamano a miembro ti klase a mangibinglay no kasano a nakatulong ti Espiritu Santo kadakuada a mangbalbaliw iti puspusoda.  

  

  Mabalin a mapagbalbaliw ti Mangisalakan ti puspusotayo ken ti panagbiagtayo. Dagiti Mangngagas nga Ima, ni Adam Abram

• Kalpasan ti panangilawlawag kadagiti kinapudno iti Mosiah 5:1–7, mabalin a masdaaw ti sumagmamano a miembro ti klase no apay a kasla saan a makatukay wenno madagdagus ti panagbalbaliw ti pusoda a kas iti padas dagiti tao ni Ari Benjamin. Ti palawag manipud ken ni Elder D. Todd Christofferson iti “Dagiti Nainayon a Resources” ti mangsungbat iti daytoy a saludsod. Ania ti masursurotayo manipud ken ni Elder Christofferson maipapan iti kumbersion?

Mosiah 5:5–15

Awisennak ti Dios nga agaramid kadagiti katulagan Kenkuana.

• Mosiah 5:5–15 ket mabalin a makatulong kadagiti miembro ti klase a makaawat kadagiti bendision nga awatenda no agaramid ken agtungpadal kadagiti katulagan iti Dios. Mabalinmo nga awisen ida a mangrebyu kadagitoy a bersikulo iti katulagan iti panagbuniag ken ti ordinansa ti sakramento iti panunotda ket ibinglayda no ania ti masursuroda. (Kitaen met iti DkK 20:77, 79.)

Yallukoy ti Panagsursuro iti Pagtaengan

Mabalin a mapaspasaran ti adu a miembro ti klasem wenno napadasanda itay nabiit ti bukod a panagkarigatan wenno pannubok. Ibagam kadakuada nga iti Mosiah 7–10 mabasadanto maipapan iti maysa a grupo dagiti tao a nakasursuro no kasano ti agtalek iti Apo iti panawen ti pannubokda.

Dagiti Mainayon a Resources 

Masansan a maysa a proseso ti panagbalbaliw.

Insarita ni Elder D. Todd Christofferson maipapan iti naindaklan a panagbalbaliw iti puso a nailadawan kadagiti nasantuan a kasuratan:

“Mabalin a saludsodem, Apay a saan a nadardaras a mapasamak kaniak daytoy naindaklan a panagbalbaliw? Nasken a laglagipem a kasta dagiti nakaskasdaaw a pagwadan dagiti tao ni Ari Benjamin, ni Alma, ken ti sumagmamano a dadduma pay iti nasantuan a kasuratan—nakaskasdaaw ken saan a gagangay. Para iti kaaduan kadatayo, in-inut dagiti panagbalbaliw ken mapasamak iti panaglabas ti panawen. Ti pannakayanak a mabaliwan, saan a kas iti pisikal a pannakayanaktayo, ket ad-adda pay a maysa a proseso ngem iti maysa a pasamak. Ket ti pannakiraman iti dayta a proseso ti kangrunaan a panggep ti mortalidad.

“Ti isu met la a gundaway, ditayo koma ikalintegan ti bagbagitayo iti gagangay a panagkagumaan. Saantayo koma a kontento a mangpatalinaed iti sumagmamano nga ugali tapno agaramid iti dakes. Maikaritayo koma a makiranud iti sakramento iti linawas ken agtultuloytayo nga umasideg iti Nasantuan nga Espiritu tapno maikkat dagiti maudi a nabati pay a kinarugit iti kaunggantayo. Paneknekak a bayat ti panagtultuloyyo iti dalan ti naespirituan a pannakayanak manen, ti pangsubbot a parabur ni Jesucristo ti mangikkatto kadagiti basolyo ket ti mulit dagiti nagbasol kadakayo, dagiti sulisog ti mangpukawto iti pananggargarida, ken babaen ken ni Cristo agbalinkayto a nasantuan, a kas Isu ken ti Amatayo ket nasantuan” (“Born Again,” Ensign wenno Liahona, Mayo 2008, 78).

Panangpadur-as iti Panangisurotayo

Sapulem dagiti napipintas a pagarigan kadagiti nasantuan a kasuratan. Bayat ti panangbasam iti bitla ni Ari Benjamin kadagiti taona, sapulem dagiti adalen iti pagwadanna a makatulong kenka nga agbalin a nalalaing a mannursuro. Kas pagarigan, ania ti inaramid ni Ari Benjamin tapno ammuen no maawatan met laeng dagiti taona no ania ti maisursuro?