ti nagungar a Cristo a kaduana dagiti Apostolna

Ni Cristo ken dagiti Apostol, ni Del Parson

Marso 30–Abril 12

Paskua ti Panagungar

“Agungarto … nga Addaan iti Pangpaimbag kadagiti Payakna”

Ti Domingo iti Paskua ti Panagungar ti napintas a gundaway para kadagiti miembro ti klasem a mangpapigsa kadagiti pammaneknekda maipapan ken ni Jesucristo ken ti Panagungarna—ken mangpapigsa iti pammaneknek ti tunggal maysa. Laglagipem dagitoy bayat ti panagadalmo kadagiti nasantuan a kasuratan kas panagsagana para iti daytoy nga adalen. Gun-odem ti naespirituan a pannarabay maipapan iti no anianto ti mangsagid iti puspuso dagiti tao iti klasem.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Mabalin nga addaan dagiti miembro ti klasem kadagiti napateg a padpadas kadagiti iti napalabas a dua a lawas a panangbasa no ania ti isuro ti Libro ni Mormon maipapan iti Panagungar ken ti Pannubbot ni Jesucristo. Ikkam ida iti sumagmamano a minuto a mangsarak iti maysa a binatog a nakaawis iti imatangda, ket kalpasanna awisem ida a mangibinglay no ania ti nasarakanda.

icon iti panangisuro

Isuro ti Doktrina

2 Nephi 9:7–15; Alma 11:41–45; 40:21–23

Ti panagungar ket manayon a panagtipon manen ti bagi ken ti espiritu.

• Mabalin nga epektibo a wagas dagiti panangidilig a mangisuro kadagiti pagbatayan ti ebanghelio. Nalabit a mabalinmo nga awisen dagiti miembro ti klase a mangbasa iti 2 Nephi 9:7–15 ken Alma 11:41–45 ken mangilasin kadagiti balikas ken ragup ti balikas kadagitoy a bersikulo a mangisuro maipapan iti panagungar. Ania ti pangidiligan iti ipapatay? Kasano a mailadawan ti panagungar? Apay a kasapulantayo ti nagungar a bagi? (Kitaen met iti D&K 93:33–34). Mabalin a paglilinnawagan dagiti miembro ti klase no kasano a mabalinda nga usaren dagitoy a panangidilig a mangisuro iti maysa a tao maipapan iti panagungar. Bayat ti panangibinglayda kadagiti kapanunotan iti klase, mabalinmo nga ilawlawag kadakuada no apay nga ipategda dagitoy a kinapudno maipapan iti Panagungar.

• Ibilangmo ti panangawis kadagiti miembro ti klase a mangibinglay kadagiti kanito idi nariknada ti panangyaman iti pannakaammoda maipapan iti Panagungar. Kasano a makaimpluensia dayta a pannakaammo iti biagtayo nga ad-adda a masansan? Mabalinmo a tulongan dagiti miembro ti klasem a mangsungbat itoy a saludsod babaen ti panangawis iti tunggal maysa kadakuada a mangsukisok iti 2 Nephi 9:7–15; Alma 11:41–45; wenno Alma 40:21–23 ket ilistam iti pisarra dagiti kinapudno a masarakanda maipapan iti Panagungar. Kalpasanna mabalinmo nga isurat iti pisarra ti sumaganad a dua a binatog ket idawat kadagiti miembro ti klase nga agutob iti sumagmamano a minuto sakbay ti panangibinglay iti no kasano a leppasenda dagitoy: No diak ammo dagitoy a banag… ken Gapu ta ammok dagitoy a banag….

Ni Jesus nga agkarkararag iti Minuyongan ti Getsemani

Getsemani, ni Michael T. Malm

Mosiah 3:5–7; 15:5–9; Alma 7:11–13

Inawat ni Jesucristo iti Bagina dagiti basol, saem, ken pagrigatantayo.

• Ti panagutob ken panangilawlawag iti panagsagaba ti Mangisalakan para kadatayo ket mangawis iti Espiritu ken mangparegta kadagiti rikna ti ayat ken panagyaman iti Mangisalakan. Tapno mayallukoy ti kasta a panagutob ken panaglilinnawag, mabalinmo ti mangidrowing iti tsart iti pisarra a maipada iti maysa a naisingasing iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket awisem dagiti miembro ti klase a mangileppas iti daytoy nga usaren ti Mosiah 3:5–7; 15:5–9; ken Alma 7:11–13 ken dagiti bukodda a padas. Kas iturong ti Espiritu, mabalinmo pay nga awisen dagiti miembro ti klase a mangibinglay kadagiti riknada maipapan iti no ania ti naaramid ken ni Cristo para kadakuada.

• Ti sagrado a musika ket mabalin a mangawis iti Espiritu ken mangpapigsa iti doktrina nga isursurom. Nalabit a mabalin nga irebyu dagiti miembro ti klase ti Mosiah 3:5–7; 15:5–9; ken Alma 7:11–13 ken agsapul ken agkanta kadagiti himno a mariknada a maiparis kadagiti mensahe kadagitoy a bersikulo (mabalinmo pay nga awisen ti maysa a tao a mangkanta wenno mangtokar kadagiti himno). Naisingasing ti sumagmamano a himno iti “Dagiti Nainayon a Resources.” Allukoyem dagiti miembro ti klase a mangibinglay iti ragup dagiti balikas manipud kadagiti himno ken nasantuan a kasuratan a makatulong kadakuada a mangbigbig nga ad-adda pay iti sakripisio ti Mangisalakan.

Enos 1:1–19; Mosiah 5:1–2; 27:8–28:4; Alma 24:7–19

Ti Pannubbot ni Jesucristo ti mangdalus kadatayo ken tumulong a mangan-anay kadatayo.

• Ti maysa nga epektibo a wagas tapno masursuro maipapan iti bileg ti Mangisalakan a mangbalbaliw iti panagbiagtayo ket ti panangadal kadagiti pagarigan ti no kasano a nagbalbaliw ti biag dagiti dadduma kabayatan ti panagbabawi ken yaasidegda Kenkuana. Addaan ti Libro ni Mormon iti adu a kasta a pagarigan. Nalabit a mabalinmo a dutokan ti tunggal miembro ti klase a mangbasa maipapan iti maysa kadagitoy a pagarigan, kas ken ni Enos (kitaen iti Enos 1:1–19), dagiti tao ni Ari Benjamin (kitaen iti Mosiah 5:1–2), ni Alma nga Ub-ubing (kitaen iti Mosiah 27:8–28:4), wenno dagiti Anti-Nephi-Lehi (kitaen iti Alma 24:7–19), wenno mabalinmo ti agpanunot kadagiti dadduma pay a pagarigan manipud kadagiti nasantuan a kasuratan. Kalpasanna mabalin ti manggupgop ti sumagmamano a miembro ti klase maipapan kadagiti padas a nabasada. Nalabit a paggugusto ti klasem nga aramiden daytoy babaen ti panangted kadagiti pamugtuan a makatulong iti dadduma pay iti klase a mangpugto no asino ti iladladawanda. Mabalinda pay a paglilinnawagan dagiti saludsod kas kadagitoy: Kasano a nagbalbaliw dagiti tao kadagitoy a pagarigan? Ania ti iti akem ti Mangisalakan iti panagbalbaliwda? Nalabit nga isarita ti sumagmamano a miembro ti klase maipapan ti no kasano nga inaramid ti Mangisalakan “ti naindaklan a panagbalbaliw … iti puso[da]” (Mosiah 5:2). Tapno masursuro ti ad-adu pay maipapan no kasano a mapagbalbaliwnatayo ti Mangisalakan—ken no apay a napateg unay dayta a panagbalbaliw—mabalinmo nga ibinglay iti klase ti analohiap nga inted ni Presidente Dallin H. Oaks iti “Dagiti Nainayon a Resources.”

icon iti panagsursuro

Yallukoy ti Panagsursuro iti Pagtaengan

Tapno maparegta dagiti miembro ti klase a mangbasa iti Mosiah 1–3, mabalinmo nga awisen ida a mangutob iti maysa a kanito idi nariknada ti tarigagay nga agrag-o kalpasan ti panangbasa wenno panagdengngeg kadagiti mensahe ti ebanghelio. Awisem ida a mangsapul kadagiti kinapudno a pakapagrag-oanda bayat ti panangbasada iti Mosiah 1–3.

resources icon

Dagiti Nainayon a Resources 

Dagiti himno maipapan iti Pannubbot ti Mangisalakan.

• “I Believe in Christ,” Hymns, no. 134

• Ammok a Nabiag ti Mannubbotko,” Dagiti Himno ken Kanta dagiti Ubbing, blng. 136

• “Thy Will, O Lord, Be Done,” Hymns, no. 188

• “That Easter Morn,” Hymns, no. 198

Dagiti video ti Tabernacle Choir nga agkankanta iti sumagmamano kadagitoy a himno ket masarakan iti ChurchofJesusChrist.orgChurchofJesusChrist.org.

Analohia: Nasken nga agbalintayo nga ad-adda pay ngem iti nadalus.

Imbinglay ni Presidente Dallin H. Oaks ti analohia a mangilawlawag no kasano nga isagananatayo ti Mangisalakan nga agsubli iti sidong ti Dios:

“Ayotayo a mangipapan kadagiti bunga ti panagbabawi a kas gagangay a panangdalus kadatayo manipud iti basol, ngem dayta ket saan a naan-anay a pannirigan. … Ti maysa a tao nga agbasol ket kas iti kayo a saan a nalaka a makillo iti tulong ti angin. Iti naangin ken natudo nga aldaw, napalalo ti panagiray ti kayo nga agdisso iti daga ket mapitakan dagiti bulong, a kas iti basol. No ipamaysatayo laeng iti panangdalus kadagiti bulong, mabalin nga agtalinaed ti kinakapuy iti kayo a nangpalugod iti panagiray daytoy ken panagpitak kadagiti bulong daytoy. Maipada met, iti maysa a tao nga agladingit bassit no mamulitan iti basol ket agbasolto manen iti sumaruno a panagangin iti napigsa. Agtultuloy ti pannakadagdagullit agingga a napapigsa ti kayo.

“No napadasan ti maysa a tao ti proseso nga agbanag iti awag dagiti nasantuan a kasuratan a ‘nasneban a puso ken agbabbabawi nga espiritu,’ aramiden ti Mangisalakan ti ad-adda pay ngem iti pannakadalus dayta a tao manipud iti basol. Itedna kenkuana ti baro a pigsa. Kasapulan dayta a panangpapigsa tapno maamiristayo ti panggep ti panangdalus, a daytoy ti panagsubli iti Nailangitan nga Amatayo. Tapno maawat iti sidongna, nasken nga agbalintayo a nalablabes ngem iti nadalus. Nasken pay nga agbalbaliwtayo manipud iti maysa a managbasol a tao a nakapuy no mainaig iti kinadalus ti dayaw tapno agbalin a maysa a napigsa a tao no mainaig iti kinaespirituan tapno makapagnaedtayo iti sidong ti Dios” (“The Atonement of Faith,” Ensign, Abr. 2010, 33–34).

Panangpadur-as iti Panangisurotayo

Agbiag a maikari iti pannarabay ti Espiritu. No agbiagka a mayannurot iti ebanghelio, maikarika iti panangkadkadua ti Espiritu, nga isu ti pudno a mannursuro. No kalikagumam a gun-oden ti pannarabayna, ikkannakanto ti Espiritu Santo kadagiti kapanunotan ken impresion maipapan ti no kasano a maipaaymo ti kasapulan dagiti sursuruam. (Kitaen iti Panangisuro iti Wagas ti Mangisalakan, 5.)