Ni Cristo ken dagiti Apostol, ni Del Parson

Marso 30–Abril 12

Paskua ti Panagungar

“Agungarto … nga Addaan iti Pagpaimbag kadagiti Payakna”

Kabayatan dagiti aldaw nga agturong iti Paskua ti Panagungar, ibilang ti panangipamaysa kadagiti bukod ken sangapamiliaan a panagadal iti nabileg a pammaneknek iti Libro ni Mormon maipapan iti biag, ipapatay, Panagungar, ken pangsubbot a bileg ni Jesucristo.

Isuratmo dagiti Impresionmo

Natured dagiti nagkauna nga Apostol kadagiti pammaneknekda ken ni Jesucristo ken ti Panagungarna. Linaklaksa dagiti mamati ken ni Jesucristo ket ikarigatanda ti sumurot Kenkuana gapu kadagiti balikasda a naisurat iti Biblia. Ngem nalabit nga adda dagiti masdaaw, no ni Jesucristo ti Mangisalakan iti intero a lubong, apay ngarud a dagiti nakaimatang ket limitado iti bassit a bilang dagiti tattao iti maysa a bassit a rehion?

Ti Libro ni Mormon ket agtakder a kas nayon, mangal-allukoy a saksi a ni Jesucristo ket ti Mangisalakan iti lubong, “a mangiparparangarang iti bagina kadagiti amin a pagilian” (panid ti paulo ti Libro ni Mormon) ken mangidiaydiaya iti pannakaisalakan iti amin nga umasideg Kenkuana. Mainayon pay, ilawlawag pay daytoy maikadua a saksi no ania ti kaipapanan ti pannakaisalakan. Daytoy ti gapu no apay a da Nephi, Jacob, Mormon, ken amin dagiti propeta ket nagtrabahoda a “sireregta iti panangikitikit[da] kadagitoy a balikas kadagiti pinanid—tapno maipakdaar kadagiti masakbayan a kaputotan nga isuda met ket “ammo[da] ni Cristo, ken adda namnama[da] iti dayagna” (Jacob 4:3–4). Daytoy a panawen ti Paskua ti Panagungar, panunotenyo maipapan kadagiti pammaneknek iti Libro ni Mormon a ti bileg ti Pannubbot ni Cristo ket agpada a sangalubongan ken personal—panangsubbot iti intero a lubong ket panangsubbot kadakayo.

Dagiti Kapanunotan para iti Bukod a Panagadal iti Nasantuan a Kasuratan

2 Nephi 9:6–15, 22; Alma 11:41–45; 40:21–23; 3 Nephi 26:4–5

Gapu iti Panagungar ni Jesucristo, agungarto ti amin a tattao.

Naipakadawyanen iti Paskua ti Panagungar nga utobentayo ti Panagungar ni Jesucristo, ngem ania kadi ti umisu a kayat a sawen ti agungar? Ania dagiti nauneg a pannakaammo ken pannakaawat [insights] nga ited ti Libro ni Mormon maipapan iti panagungar? Nalabit kas paset ti panangrambakmo iti Paskua ti Panagungar mabalinmo nga ilista dagiti kinapudno maipapan iti panagungar a masarakam iti 2 Nephi 9:6–15, 22; Alma 11:41–45; 40:21–23; ken 3 Nephi 26:4–5. Mabalin pay nga isuratmo no apay iti panagkunam a napateg a maammuan ti tunggal maysa dagitoy a kinapudno.

Mabalin a madlawmo a dagiti kinapudno maipapan iti Panagungar ket masansan a maisuro a kagiddan dagiti kinapudno maipapan iti Maudi a Panangukom. Utobem no ania ti isurona kenka maipapan iti kinapateg ti Panagungar iti plano ti pannakaisalakan.

Kitaen met iti Lucas 24:36–43; Dagiti Aramid 24:15; 1 Taga Corinto 15:12–23.

Mosiah 3:7; 15:5–9; Alma 7:11–13

Inawat ni Jesucristo iti Bagina dagiti basol, saem, ken saksakitko.

Nalawag nga isuro ti Biblia a sinubbot ni Jesucristo dagiti basbasoltayo. Nupay kasta, ti Libro ni Mormon ti mangpadakkel iti pannakaawattayo iti sakripisio ken panagsagaba ni Cristo kadagiti napateg a wagas. Masarakam ti sumagmamano kadagitoy a pannursuro iti Mosiah 3:7; 15:5–9; ken Alma 7:11–13. Kalpasan a nabasam dagitoy a binatog, ibilangmo ti panangisurat iti no ania ti natakuatam iti maysa a tsart a kas iti daytoy:

Ania ti sinagaba ti Mangisalakan?	Apay a nagsagaba Isuna?	Ania ti kayat a sawen daytoy kaniak?
Ania ti sinagaba ti Mangisalakan?	Apay a nagsagaba Isuna?	Ania ti kayat a sawen daytoy kaniak?

Kitaen met iti Isaiah 53; Hebreo 4:14–16.

Getsemani, ni Michael T. Malm

Mosiah 5:1–2; 27:8–28; Alma 15:3–12; 24:7–19

Dalusan ken tulongannak ti Pannubbot ni Jesucristo tapno agbalinak a perpekto.

Mabalin a naisao a ti Libro ni Mormon ti atiddog a pakaammuan dagiti tattao a nagbalbaliw gapu iti Pannubbot ni Jesucristo. Kinapudnona, sumagmamano kadagita a tattao ti nakaaramid kadagiti nadagsen a basol ket isuda pay ti kabusor dagiti tattao ti Dios sakbay ti bileg ti Mangisalakan a nagtrabaho kadakuada ti maysa a naindaklan a panagbalbaliw a maibatay iti pammatida Kenkuana. Mabalinmo a basaen ti sumagmamano kadagitoy a padas iti Mosiah 5:1–2; 27:8–28; ken Alma 15:3–12; 24:7–19; mabalin a panunotem dagiti dadduma pay a pagarigan nga adalem pay. Ania ti madlawmo a pagpapadaan ti tunggal maysa kadagitoy a padas? Ania ti madlawmo a pagdudumaan? Ania ti isuro dagitoy a pakaammuan kenka maipanggep iti no kasano a mabalbaliwannaka ti Pannubbot ti Mangisalakan?

Kitaen met iti Alma 5:6–14; 13:11–12; 18; 19:1–16; 22:1–26; 36:16–21; Ether 12:27; Moroni 10:32–33.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panangrambakyo iti Paskua ti Panagungar a sangapamiliaan, agsapulka kadagiti wagas a pagsursuruan a sangkamaysa maipapan iti Mangisalakan ken ti Pannubbotna, agraman ti Panagungar. Dagitoy ti sumagmamano a kapanunotan.

3 Nephi 11; 17

Naammuan ti sumagmamano a pamilia a ti panagad-adal iti pakaammuan maipapan iti isasarungkar ti nagungar a Mangisalakan kadagiti kontinente ti America ket nangnangruna a napateg kabayatan ti panawen ti Paskua ti Panagungar. Allukoyem dagiti miembro ti pamilia a mangipapan no ania koma ti rikna no riknaenda dagiti sugatna (kitaen iti 3 Nephi 11:14–15) wenno ipapanda a maysada kadagiti ubbing a binendisionanna (kitaen iti 3 Nephi 17:21). Kasano a paunegen daytoy a pakaammuan ti panagyamantayo iti Panagungar ti Mangisalakan? Ti naipinta a ladawan a mangipakita iti daytoy a pakaammuan ket mainayon iti daytoy a balabala; masarakan dagiti dadduma pay iti ChurchofJesusChrist.org. Kasta met a mabalin a magustuan dagiti miembro ti pamiliam ti panagdrowing kadagiti bukodda a ladawan ti nabasada.

Dagiti mensahe manipud iti sapasap a komperensia

Iti adu a paset ti lubong, maangay ti sapasap a komperensia ti Abril itoy a tawen sakbay ti Paskua ti Panagungar. Nalabit a ti panagdengngeg kadagiti mensahe ti komperensia ket makatulong iti pamiliam a mangipamaysa iti Mangisalakan iti daytoy a Paskua ti Panagungar. Kas pagarigan, mabalinmo nga awisen dagiti miembro ti pamilia a dumngegda iti mensahe ti komperensia a mangipaneknek ken ni Jesucristo ken ti Panagungarna—nangnangruna manipud kadagiti Apostol, nga isuda dagiti naisangsangayan a saksi ni Jesucristo. Kalpasanna mabalinmo nga irebyu dagitoy a mensahe a sangkamaysa ken mangilasin kadagiti pannursuro a mangpapigsa kadagiti pammaneknekmo maipapan iti Mangisalakan.

“Ti Sibibiag a Cristo: Ti Pammaneknek dagiti Apostol”

Kas maysa a pamilia, basaen ti “Ti Sibibiag a Cristo: Ti Pammaneknek dagiti Apostol” (Ensign wenno Liahona, Mayo 2017, uneg ti akin-sango nga akkub ; kitaen met iti ChurchofJesusChrist.org) ken mangawis iti tunggal miembro ti pamilia a mangala iti maysa a mensahe ti Paskua ti Panagungar manipud iti daytoy a pammaneknek tapno iburay kadagiti dadduma. Kas pagarigan, mabalinmo ti agaramid kadagiti poster tapno ipakita iti social media, iti sango ti ridawyo, wenno iti tawayo.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Panangisurotayo

Agbiag a mayannurot iti ebanghelio ni Jesucristo. Ti kapatgan a banag a mabalinmo nga aramiden kas maysa a naganak ket agbiagka a mayannurot iti ebanghelio iti amin a pusom. Daytoy ti kasayaatan a wagas tapno maikari iti panangkadkadua ti Espiritu Santo. Saanmo a kasapulan ti agbalin a perpekto, sipapasnek laeng nga ikarigatam iti amin a kabaelam ken agkalikagum a manggun-od iti pammakawan babaen ti Pannubbot ti Mangisalakan. (Kitaen iti Panangisuro iti Wagas ti Mangisalakan, 13–14

Ladawan ni Cristo a kaduana dagiti Nephite ni Ben Sowards