Da Jacob ken Enos, ni Scott Snow

Marso 23–29

Enos–Dagiti Balikas ni Mormon

Agtrabaho Kaniak a Mangaramid iti Pagayatanna

Bayat ti panangbasam iti Enos agingga iti Dagiti Balikas ni Mormon, sapulem dagiti mensahe nga agbalinto a napateg kenka wenno iti pamiliam.

Isuratmo dagiti Impresionmo

Napan ni Enos iti kabakiran tapno aganup kadagiti dadakkel nga ayup iti kabakiran, ngem nagpatingga a nagtalinaed sadiay nga agkararag “iti unos dayta nga aldaw … ket idi dimteng ti rabii” (Enos 1:3–4). Gapu ta pudno a mabisin ti kararuana nga umawat iti pannakapakawan dagiti basolna, natallugod ni Enos nga agkararag iti napaut kas kasapulan ken uray pay iti “pannakisupangetko” iti sanguanan ti Dios (Enos 1:2). Dayta ti napudno a kararag: saan unay nga agdawat iti ania man a banag a tarigagayantayo ngem maysa a napudno a panagkagumaan a makisarita iti Dios ket manginugot iti pagayatantayo iti pagayatanna. No agkararagka iti kastoy a wagas, idi ti timekmo ket “dimmanon kadagiti langit,” matakuatam a kas idi inaramid ni Enos a sungbatannaka ti Dios, ket pudno a maseknan kenka, dagiti ipatpategmo, ken uray pay dagiti kabusormo (kitaen iti Enos 1:4–17). Kadagita a kanito, maipakaammo ti Dios ti pagayatanna kenka, ket agbalinkanto a nataltallugod ken ad-adda a makabael nga agaramid iti pagayatanna gapu ta maitunoska Kenkuana. Kas ken ni Mormon, mabalin a “di[mo] ammo amin a banag; ngem ammo ti Apo ti amin a banag … [ken] intedna nga aramid[em] a maibatay iti pagayatanna” (Dagiti Balikas ni Mormon 1:7).

Dagiti Kapanunotan para iti Bukod a Panagadal iti Nasantuan a Kasuratan

Enos 1:1–3

Addaan iti manayon nga impluensia dagiti balikas ti maysa a nagannak.

Ania dagiti mensahe nga adda kadagitoy a bersikulo para kadagiti nagannak ken para kadagiti annak?

Enos 1:4–27

Masungbatanto dagiti naimpusuan a kararagko.

Ti padas ni Enos iti kararag ket maysa kadagiti kangrunaan a nakallalagip iti nasantuan a kasuratan. Dagiti padasmo ket mabalin a saan a makaawis iti rikna, ngem saan a nasken nga agbalinda nga awan kaes-eskanna. Mabalin nga ipalgak dagiti padas ni Enos dagiti wagas a mangpasayaat kadagiti kararagmo. Dagitoy dagiti sumagmamano a saludsod nga utoben:

• Ania dagiti balikas a mangiladawan kadagiti panagkagumaan ni Enos bayat ti panagkararagna?

• Ania ti immuna nga inkararaganna? (kitaen iti Enos 1:4). Ania ti masursurom manipud iti panagresponde ni Enos kalpasan a nakaawat iti maysa a sungbat? (kitaen ti Enos 1:5–7).

• Kasano a nagtignay ni Enos kadagiti sungbat a naawatna?

• Ania ti masursurom manipud ken ni Enos maipapan iti no kasano a maaddaan iti “timmibker”a pammati iti Apo? (Enos 1:11).

Jarom–Omni

Bendisionannakto ti Apo no tungpalek dagiti bilbilin.

Maysa kadagiti kasansanan ti pannakaulitna a kari ti Dios iti Libro ni Mormon isu dayta a no tinungpal dagiti Nephite dagiti bilin, agrang-ayda (kitaen iti 2 Nephi 1:20; Jarom 1:9–12; Omni 1:6). Dagiti libro ni Jarom ken Omni ket mangipakita iti sumagmamano a wagas a nakaipatungpalan daytoy a kari. Ania ti masursurom manipud kadagitoy a pakasaritaan a makatulong kenka nga “agrang-ay iti daga”?

Omni 1:14, 21

Asino dagiti tao iti Zarahemla?

Kalpasan a pimmanaw dagiti Nephite iti daga ti Nephi, natakuatanda ti adu a tattao nga agnanaed iti maysa a lugar a maawagan iti Zarahemla. Dagiti tao ni Zarahemla ti an-annabo ti maysa a grupo dagiti Israelita a, kas iti pamilia ni Lehi, pimmanaw iti Jerusalem ket inturong ida ti Dios iti naikari a daga. Maibilang iti dayta a grupo ni Mulek, maysa kadagiti lallaki nga annak ni Sedekias, ti ari ti Juda a tiniliw dagiti taga Babilonia iti agarup 587 SC (kitaen iti Jeremias 52:1–11; Mosiah 25:2; Helaman 8:21).

Kalpasan a nakadanon dagiti tao iti Zarahemla iti naikari a daga, naam-ammoda ni Coriantumr (kitaen iti Omni 1:21), ti maudi a naipakaammo a nakalasat kadagiti Jaredite, a ti pakasaritaanna ket naisalaysay iti libro ni Ether.

Dagiti Balikas ni Mormon

Ania ti Dagiti Balikas ni Mormon?

Dagiti Balikas ni Mormon ket agserbi a kas rangtay a nagbaetan ti dua nga asmang dagiti pinanid a mangbukel iti Libro ni Mormon. Mangted ditoy ni Mormon iti pannakailawlawag dagitoy dua a kasuratan, ken mangisuro dagiti balikasna iti napateg a mensahe maipapan iti panagtalek iti Apo, uray no ditayo naan-anay a maawatan ti panangiturongna.

Bayat nga agsursurat ni Nephi iti kasuratan dagiti taona, imbaon ti Dios nga agaramid iti dua nga asmang iti dua nga asmang a pinanid, a maawagan iti babassit a pinanid ken dadakkel a pinanid ni Nephi. Saan nga ammo ni Nephi no apay a nabilin a mangaramid iti dua nga asmang ti pinanid, ngem nagtalek nga addaan ti Apo “iti nainsiriban a panggepna … , iti panggep a diak ammo” (1 Nephi 9:5; kitaen met iti “A Brief Explanation about the Book of Mormon”).

Kalpasan ti adu a siglo, kabayatan ti panangyababa ni Mormon kadagiti dadakkel a pinanid ni Nephi, nakitana dagiti babassit a pinanid. Naglaon dagiti babassit a pinanid iti adu kadagiti isu met laeng a pasamak a nailadawan kadagiti dadakkel a pinanid a nalpasen nga inyababa ni Mormon, ngem ad-adda a nakapamaysa dagiti babassit a pinanid kadag iti naespirituan a bambanag ken iti panagministro ken pannursuro dagiti propeta. Pinaregta ti Dios ni Mormon nga iraman dagiti babassit a pinanid ni Nephi iti kasuratanna a mainayon kadagiti dadakkel a pinanid. Kas ken ni Nephi, di naawatan ni Mormon ti panggep ti Dios iti kaadda ti agpada nga asmang dagiti pinanid, ngem nagtalek a dayta ket para “iti nainsiriban a gagem” (Dagiti Balikas ni Mormon 1:7).

Ita ammotayon no ania idi ti panggep ti Dios. Idi 1828, kalpasan a naipatarus ni Joseph Smith ti paset ti pannakayababa ni Mormon kadagiti dadakkel a pinanid ni Nephi (116 a panid ti manuskrito), napukaw ni Martin Harris dagitoy a panid. Binilin ti Dios ni Joseph a dinan uliten nga ipatarus daytoy a paset gapu ta mabalin a baliwan dagiti dakes a tattao dagiti balikas ket padasenda a padaksen ni Joseph (kitaen iti DkK 10, benneg ti paulo; DK 10:14–19, 30–45). Siyayaman, nakita idin ti Dios daytoy ket nangipaay iti babassit a pinanid, a naglaon iti isu met la a pakasaritaan a napukaw kadua ti 116 a panid. Buklen dagiti babassit a pinanid dagiti libro sakbay dagiti Balikas ni Mormon, ken mangrugi ti panangyababa ni Mormon kadagiti dadakkel a pinanid kalpasan dagiti Balikas ni Mormon.

Ni Mormon a Mangur-urnong ken Mangur-urnos kadagiti Pinanid, ni Jorge Cocco

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

Enos 1:1–17

Mabalin a kitaen ti pamiliam ti maysa a ladawan ni Enos nga agkarkararag ket agsukisok iti Enos 1:1–17 para iti ragup dagiti balikas a mabalin a mausar a kas maysa a paulo para iti ladawan. Mabalin met a paidrowing kadagiti miembro ti pamilia dagiti ladawan dagiti padas ni Enos. Ania ti masursurotayo manipud ken ni Enos maipanggep iti panagkalikagum a manggun-od iti pannakapakawan?

Jarom 1:2

Kasano a ti panagadaltayo iti Libro ni Mormon ket “ipalgakna ti plano ti pannakaisalakan” kadatayo?

Omni 1:12–22

Ania ti isuro dagitoy a bersikulo maipanggep iti kinapateg ti kaadda ti balikas ti Dios iti biagtayo?

Dagiti Balikas ni Mormon 1:3–9

Kasano a mabendisionantayonto babaen iti panangitalimeng kadagiti bukod ken sangapamiliaan a kasuratan? Kasano nga ad-adda a nakapamaysa ken ni Cristo dagiti kasuratantayo?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Panangisurotayo

Aguummongtayo a masansan. Insuro ni President Henry B. Eyring: “Saanyo iti kaano man a libtawan ti maysa a gundaway a mangummong a sangkamaysa kadagiti annakyo tapno agsursuro iti doktrina ni Jesucristo. Manmano laeng dagiti kakasta a kanito no maidasig kadagiti panagkagumaan ti kabusor” (The Power of Teaching Doctrine,” Ensign, Mayo 1999, 74).

Ni Enos nga Agkarkararag, ni Robert T. Barret