“Marso 23–29. Enos–Dagiti Balikas ni Mormon: Agtrabaho Kaniak a Mangaramid iti Pagayatanna,” Umaykayo, Sumurot Kaniak—Para iti Primary: Libro ni Mormon 2020 (2020)
“Marso 23–29. Enos–Dagiti Balikas ni Mormon,” Umaykayo, Sumurot Kaniak— Para iti Primary: 2020
Da Jacob ken Enos, ni Scott Snow
Marso 23–29
Enos–Dagiti Balikas ni Mormon
Agtrabaho Kaniak a Mangaramid iti Pagayatanna
Enos, Jarom, Omni, ken Dagiti Balikas ni Mormon dagiti ababa a libro nga addaan kadagiti napapateg nga adalen para kadagiti ubbing a sursuruam. Sapulem dagitoy nga adalen, ket utobem dagiti wagas a pakatulongam kadagiti ubbing a masursuruan kadagitoy. Mabalin a makatulong dagiti kapanunotan iti daytoy a balabala.
Isuratmo Dagiti Impresionmo
Yawis ti Panagbibinninglay
Tulongam dagiti ubbing a manglagip iti no ania ti nasursuroda manipud iti adalen iti napalabas a lawas. Naibinglayda kadi no ania ti nasursuroda iti pamiliada wenno iti dadduma?
Isuro ti Doktrina: In-inaudi nga Ubbing
Makaasaritak ti Nailangitan nga Ama babaen iti kararag.
Isuro ti padas ni Enos dagiti sumagmamano a kinapudno maipapan iti kararag. Kasano a maparegtam dagiti ubbing a mangsurot iti pagwadan ni Enos no agkararagda?
Dagiti Mabalin nga Aktibidad
-
Ipakitam ti ladawan ni Enos; kas pagarigan, kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, wenno usarem ti ladawan a Ni Enos nga Agkarkararag (Libro ti Arte ti Ebanghelio, num. 72). Kiddawen kadagiti ubbing a mangisarita maipapan iti no ania ti mapaspasamak iti ladawan, ket kalpasanna ibinglay iti padas ni Enos kadakuada. Mabalinmo nga usaren ti“Kapitulo 11: Enos” (Dagiti Estoria iti Libro ni Mormon, 30–31 ).
-
Kiddawem kadagiti ubbing a mangibinglay kadagiti banag a kayatda a pagsasaritaan kadagiti nagannak kadakuada. Ilawlawag a ti panagkararag iti Nailangitan nga Ama i ti mabalin a pannakisaritada Kenkuana. Bayat ti panangibasam iti Enos 1:1–4 kadagiti ubbing, awisem ida nga agpammarang nga isuda ni Enos babaen iti panagtignayda nga aganup, agparintumeng nga agkararag, ken dadduma pay. Ilawlawag a nangngeg ti Nailangitan nga Ama ti kararag ni Enos ket pinakawanna dagiti basolna.
-
Aggigiddan nga agkansion iti kanta a maipapan iti kararag, kas iti “A Child’s Prayer” (Children’s Songbook, 12–13). Awisem dagiti ubbing a mangingato kadagiti im-imada iti tunggal kanito a manggegda ti balikas a “kararag” wenno sabali pay a naulit a balikas. Paneknekam ti bileg ti kararag iti biagmo.
Kas annak ti Dios, makapagkararagtayo iti Nailangitan nga Amatayo.
Dagiti Balikas ni Mormon 1:3–8
Mabendisionak dagiti dadduma no dengngek ti Espiritu Santo.
Idi ur-urnosenna ti Libro ni Mormon, naiparikna ken ni Mormon nga iramanna dagiti babassit a pinanid ni Nephi. Dina ammo no apay a kasapulan dagiti babassit a pinanid, ngem ita nabendisionantayo gapu ta sinurotna daytoy a parikna. Mabalin a makaparegta kadagiti ubbing daytoy a pagarigan a mangsurot iti Espiritu.
Dagiti Mabalin nga Aktibidad
-
Awisem dagiti ubbing a mangibinglay kadagiti estoria a nasursuroda manipud iti Libro ni Mormon agingga iti daytoy a tawen (dagiti ladawan manipud iti Umaykayo, Sumurot Kaniak—Para kadagiti Indibidual ken Pamilia wenno ti Libro ti Arte ti Ebanghelio ket makatulong kadakuada a manglagip). Ilawlawag nga addaantayo kadagitoy nga estoria iti Libro ni Mormon agsipud ta dimngeg ni Mormon idi imbaga ti Espiritu Santo kenkuana nga iramanna dagitoy. Apay a kayat ti Nailangitan nga Ama nga adda kadatayo dagitoy nga estoria?
-
Ibinglaymo iti maysa nga estoria manipud kadagiti magasin ti Simbaan wenno manipud kadagiti mensahe ti sapasap a komperensia maipapan iti maysa a tao a nangsurot kadagiti parikna ti Espiritu Santo. Wenno ibinglaymo iti maysa kadagiti bukodmo a padas. Awisem dagiti ubbing a mangidrowing kadagiti ladawan iti estoria. Kasano a nabendisionan dagiti tao kadagitoy nga estoria a gapu ta sinurotda ti Espiritu Santo?
-
Kiddawem iti maysa a miembro ti ward a sumarungkar iti klase ken ibinglayna dagiti padasna idi sinurotna ti parikna manipud iti Espiritu Santo. Kasano a nabendisionan dagiti dadduma gapu kadagiti tignayna? Ilawlawag a kayat ti Nailangitan nga Ama ti tumulong ken mangbendision kadagiti dadduma, isu nga ibaonna ti Espiritu Santo a mangtarabay kadatayo.
-
Aggigiddan nga agkansion iti kanta maipapan iti Espiritu Santo, kas iti “The Still Small Voice” (Children’s Songbook, 106–7). Kantaen daytoy iti sumagmamano a daras iti nadumaduma a wagas, a kas iti nadaras, nabayag, wenno iti arasaas. No inyarasaasmo ti kanta, lukibem iti Dagiti Balikas ni Mormon 1:7, ken ituldom nga inladawan ni Mormon ti Espiritu Santo a kas arasaas.
Isuro ti Doktrina: In-inauna nga Ubbing
Denggen ken sungbatan ti Nailangitan nga Ama dagiti napasnek a kararagko.
Mabalin a nalaka laeng dagiti kararagtayo nga agbalin a gagangayen wenno saan a napasnek. Maysa a palagip ti padas ni Enos a ti panangawat kadagiti sungbat dagiti kararagtayo no dadduma ket kasapulan ti “pannakisinnupanget” ken “napnuan pakaasi” (Enos 1:2, 11).
Dagiti Mabalin nga Aktibidad
-
Awisem dagiti ubbing nga agkidem ket ipapanda a makisarsaritada iti Nailangitan nga Ama iti sangunsango. Ania ti kayatda koma nga ibaga Kenkuana? Awisem dagiti ubbing a mangpanunota makisarsaritada iti Nailangitan nga Ama iti sangunsango iti tunggal kanito nga agkararagda.
-
Awisem dagiti ubbing a sagpaparis nga agtrabaho ken basaenda ti Enos 1:1–5. Kiddawem kadakuada nga agsapul kadagitoy a bersikulo iti maysa a balikas wenno ragup dagiti balikas a mangiladawan kadagiti kararag ni Enos ket kalpasanna ibinglayda no ania ti nasarakanda iti klase. Ania ti isingasing dagitoy a balikas maipapan ken ni Enos ken iti padasna? Paibinglay kadagiti ubbing ti ania man a banag a makaawis iti riknada maipapan kadagiti kararag ni Enos. Ibinglaymo ti maysa a padas idi “nabisinan” ti kararuam ken “immararawka” iti Apo (Enos 1:4). Pagutobem dagiti ubbing maipanggep iti maysa a banag a mabalinda nga aramiden tapno mapagbalinda a napatpateg dagiti kararagda.
-
Kiddawem kadagiti ubbing a mangilista kadagiti sumagmamano a banag a gagangay nga ikarkararaganda, iti pisarra man wenno iti panid ti aktibidad iti daytoy a lawas. Kalpasanna awisem ida a mangsapul iti Enos 1:2, 9, 13–14, ken 16 kadagiti banag nga inkararagan ni Enos, ket inayon dagita a banag iti listaan. Paglilinnawagan no kasano a masurot dagiti ubbing ti pagwadan ni Enos kadagiti kararagda, kas pagarigan, mabalinmo nga isarita maipapan iti no apay a natallugod nga agkararag ni Enos para kadagiti Lamanite—a kabusorna—ket awisem dagiti ubbing nga agkararag iti daytoy a lawas para iti maysa a tao a saan a nasayaat kadakuada.
Dagiti Balikas ni Mormon 1:3–8
Mabendisionak dagiti dadduma no dengngek ti Espiritu Santo.
Ammo idi ti Apo a mapukaw dagiti umuna a 116 a naipatarus a panid ti Libro ni Mormon (kitaen iti DkK 10; Saints, volume 1, kapitulo 5). Tapno masukatan daytoy a napukaw, pinaregtana ni Mormon babaen ti Espiritu a mangiraman kadagiti babassit a pinanid ni Nephi iti Libro ni Mormon. Kasano a maparegtam dagiti ubbing a sumurot iti pagwadan ni Mormon ken dumngeg iti Espiritu?
Dagiti Mabalin nga Aktibidad
-
Kiddawen kadagiti ubbing nga agsisinnublatda nga agbasa kadagiti bersikulo manipud iti Dagiti Balikas ni Mormon 1:3–8 a saggaysa iti maminsan, ket kalpasanna tulongam ida a manggupgop no ania ti masursuroda manipud iti tunggal bersikulo. Ilawlawag a sinurot ni Mormon ti Espiritu babaen iti panangiramanna kadagiti babassit a pinanid ni Nephi (nga addan kadatayo ita manipud iti 1 ni Nephi agingga iti Omni) iti Libro ni Mormon. Kasano a bendisionannatayo gapu ta dimngeg ni Mormon iti Espiritu? Kasano ti mabalin a pagdumaan ti Libro ni Mormon no saan a dimngeg isuna? Ibinglaymo ti maysa a padas a nangipariknaan kenka ti Espiritu Santo nga agaramid iti maysa a banag a mangbendision iti maysa a tao. Awisem dagiti ubbing a mangibinglay kadagiti ania man nga agpada a padas a mabalin a napadasanda.
-
Awisem ti maysa nga ubing a mangbasa iti Libro ni Mormon 1:7 ken ti maysa pay a mangbasa iti Doktrina ken Katulagan 8:2–3. Ania ti isuro dagitoy a bersikulo maipapan iti no kasano a makisao kadatayo ti Espiritu Santo? Tulongam dagiti ubbing a mangilasin kadagiti panawen idi nariknada ti dagiti pannignay [promtings] manipud iti Espiritu Santo. Usarem ti Moroni 7:12 a mangilawlawag a no nasayaat ti panunot ken mangparegta kadatayo nga agaramid kadagiti nasayaat a banag, naggapu daytoy iti Nailangitan nga Ama. Awisem dagiti ubbing a dumngeg kadagiti pannignay nga agaramid iti nasayaat ket mangsurot kadagitoy.
Yallukoy ti Panagsursuro iti Pagtaengan
Allukoyen dagiti ubbing nga agdamag kadagiti miembro ti pamiliada a mangibinglay kadagiti padasda iti panagkararag wenno ti Espiritu Santo.
Panangpadur-as iti Panangisurotayo
Usarem ti musika. Makatulong dagiti kanta ti Primary ken himno kadagiti ubbing iti amin nga edad tapno maawatan ken malagipda dagiti kinapudno ti ebanghelio. Ti panagkanta ti mabalin pay a mangpatalinaed iti naregta a pannakiraman dagiti ubbing iti maysa a padas iti panagsursuro. (Kitaen iti Panangisuro iti Wagas ti Mangisalakan, 22.)