“Marso 2–8. 2 Nephi 31–33: ‘Daytoy ti Dalan,’” Umaykayo, Sumurot Kaniak—Para iti Primary: Baro a Tulag 2020 (2020)
“Marso 2–8. 2 Nephi 31–33,” Umaykayo, Sumurot Kaniak—Para iti Primary: 2020
Ni Cristo a Mangisursuro kadagiti Disipulona, ni Justin Kunz
Marso 2–8
2 Nephi 31–33
“Daytoy ti Dalan”
Irugim ti panagsaganam babaen ti panangbasam iti 2 Nephi 31–33. Agkalikagumka a manggun-od iti pannarabay ti Espiritu maipapan iti no ania ti isuro kadagiti ubbing. Mabalin a mangted kenka daytoy a balabala kadagitikapanunotan.
Isuratmo dagiti Impresionmo
Yawis ti Panagbibinninglay
Gapu ta insuro ni Nephi maipapan iti panagbuniag ni Cristo, kiddawen kadagiti ubbing a mangibinglay iti maysa a banag a nasursuroda maipapan iti panagbuniag. Mabalinda met nga ibinglay dagiti pampanunot ken panagriknada maipapan kadagiti bukodda a panagbuniag wenno ti panagbuniag dagiti gayyemda wenno dagiti miembro ti pamilia.
Isuro ti Doktrina: In-inaudi nga Ubbing
Insuronak ni Jesuscristo no kasano ti agsubli iti Nailangitan nga Ama.
Insuro ni Nephi a ti panangsurot iti pagwadan ken pannursuro ti Mangisalakan isu laeng ti wagas a “pakaisalakanan ti tao iti pagarian ti Dios” (2 Nephi 31:21).
Dagiti Mabalin nga Aktibidad
-
Ipakita ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia bayat ti panaggupgopmo iti pakaammuan maipapan iti panagbuniag ni Jesus (kitaen iti 2 Nephi 31:4–13). Ilawlawag a ti panagbuniag ket maysa nga addang iti dana nga agsubli iti pannakipagnaed iti Nailangitan nga Ama. Awisem ti maysa a tao a kabumbuniag nga agsarita kadagiti ubbing no kasano ti riknana maipapan iti panagbuniag.
-
Ilawlawag nga insuronatayo ni Jesucristo no ania ti kasapulantayo nga aramiden tapno agsubli Kenkuana kalpasan ti ipapataytayo. Agdrowing iti maysa a dana iti pisarra, ken ikabil ti maysa a ladawan ni Cristo iti ungto daytoy. Mangted kadagiti ubbing kadagiti ladawan a mangibagi kadagiti elemento ti doktrina ni Cristo (pammati ken ni Cristo, panagbabawi, panagbuniag, panangawat iti sagut ti Espiritu Santo, ken panagibtur agingga iti panungpalan). Tulongam ida a mangikabil kadagiti ladawan iti dana.
-
Tulongam dagiti ubbing a masursuruan iti maikapat a Pagannurotan ti Pammati. Aggigiddan nga agkansion iti kanta maipapan iti maysa kadagiti umuna a pagbatayan ti ebanghelio, kas iti “Faith,” “When I Am Baptized,” or “Choose the Right Way” (Children’s Songbook, 96–97, 103, 160–61).
Makapagpennekak kadagiti balikas ni Cristo.
Kasano a makatulong kadagiti ubbing tapno maawatanda daytoy a ragup dagiti balikas ti padpadasmo a “[panag]pennek kadagiti balikas ni Cristo” (2 Nephi 32: 3)?
Dagiti Mabalin nga Aktibidad
-
Kiddawen kadagiti ubbing a manginagan iti sumagmamano kadagiti paggugustoda a taraon, ken awisem ida nga agtignay no kasano nga agpennekda kadagitoy. Basaem ti 2 Nephi 32:3, ken kiddawen kadagiti ubbing a dumngeg iti no ania ti kuna ni Nephi a nasken a pagpennekkantayo. Ania ti kayat a sawen ti agpennek kadagiti nasantuan a kasuratan? Ilawlawag a dagiti nasantuan a kasuratan ti maysa a pakasarakantayo kadagiti balikas ni Cristo.
-
Isurat dagiti balikas a Dios ken Apo iti pisarra. Awisem dagiti ubbing a manglukib iti maysa a panid ti nasantuan a kasuratan ken sapulenda dagitoy a balikas. Tulongam ida no kasapulan. Paneknekam a bayat ti panagbasatayo kadagiti nasantuan a kasuratan, makasursurotayo maipapan iti Dios.
Kayat ti Nailangitan nga Ama nga agkararagak a kanayon.
Makaparegta dagitoy a bersikulo kadagiti ubbing nga aramidenda ti panagkararag kas paset iti inaldaw a panagbiagda.
Dagiti Mabalin nga Aktibidad
-
Saludsodem kadagiti ubbing no agkararagda. Agkararagda kadi iti bigat? iti rabii? sakbay ti pannangan? Tulongam dagiti ubbing a mangpanunot kadagiti tignay a mangipakita no kaano a makapagkararagtayo, kas iti no makariingtayo, no maturogtayo, ken no mangantayo—wenno iti sabali a gundaway. Ibasam kadakuada ti umuna a linia wenno dua manipud iti 2 Nephi 32:9, ken yunay-unay ti ragup dagiti balikas a “agkararagkayo a kanayon.”
-
Saludsodem kadagiti ubbing no kasano nga agkararagda. Ania ti aramidenda iti uloda, imada, ken dadduma pay? Ania dagiti bambanag nga ibagada? Kiddawem kadakuada a mangipapan a dimo ammo ti agkararag, ket agpaisurka kadakuada. Apay a kayat ti Nailangitan nga Ama nga agkararagtayo?
Mabalin a makisaritatayo ti Dios babaen iti kararag.
Isuro ti Doktrina: In-inauna nga Ubbing
Insuronak ni Jesuscristo no kasano ti agsubli iti Nailangitan nga Ama.
Mabalintayo ti agsubli iti Dios kalpasan daytoy a biag babaen iti panangsurottayo iti doktrina nga insuro ni Jesucristo: pammati ken ni Cristo, panagbabawi, panagbuniag, panangawat iti sagut ti Espiritu Santo, ken panagibtur agingga iti panungpalan.
Dagiti Mabalin nga Aktibidad
-
Ipakitam ti ladawan manipud iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ket awisem dagiti ubbing a mangibinglay no ania ti ammoda maipapan iti panagbuniag ni Jesus (kitaen iti Mateo 3:13–17). Ikabil a saanmo a pilpilien dagiti sumaganad a balikas iti pisarra: Nagsaksi ni Jesus iti Ama nga Isu ket agtungpalto Kenkuana. Awisem dagiti ubbing a mangbasa iti 2 Nephi 31:7 kas maysa a klase ken urnosenda dagiti balikas iti husto nga urnos.
-
Saludsodem kadagiti ubbing no ania koma ti ibagada iti maysa a tao nga agsagsagana a mabuniagan, ken tulongam ida a mangisuratiti balakadda kadagiti simple a kard a mabalinda nga ited iti maysa a tao. Kasano a maitultuloytayo ti mangsurot iti pagwadan ni Jesus kalpasan a nabuniagantayo?
-
Ilawlawag nga iraman ti doktrina ni Cristo dagiti banag nga insuro ni Jesucristo a nasken nga aramidentayo tapno makapagsubli iti Nailangitan nga Ama. Isurat kadagiti nadumaduma a panid ti papel ti pammati ken ni Cristo, panagbabawi, panagbuniag, ti sagut ti Espiritu Santo, ken panagibtur agingga iti panungpalan, ken iwarawara dagitoy iti lawlaw ti siled. Ibasam kadagiti ubbing ti 2 Nephi 31:11–19, ken awisem dagiti ubbing nga agsisinublatda iti panaglagtomanipud iti maysa a papel iti sabali pay a papel bayat ti pannakangngegda kadagitoy a pagbatayan a nadakamat. Tulongam ida a mangpanunot iti maysa a padasda iti tunggal pagbatayan.
Makapagpennekak kadagiti balikas ni Cristo.
Apay a kasapulan a maawatan dagiti ubbing ti kinapateg ti agpennek kadagiti balikas ni Cristo?
Dagiti Mabalin nga Aktibidad
-
Kiddawem kadagiti ubbing a mangipapan nga adda maysa a pasken. Ania dagiti taraon a kayatda sadiay? Ania koma ti kanenda nga umuna? Kalpasanna awisem ida a mangipapan no ania ti mabalin a kaipapanan kadakayo ti agpennek kadagiti nasantuan a kasuratan bayat ti panangbasam iti 2 Nephi 32:3. Apay nga inusar ni Nephi ti balikas nga agpennek mangisuro kadatayo no kasano a nasken nga adalentayo ti balikas ti Dios? Apay saanna nga inusarna laeng ti basaen? Ania ti kayat a sawen ti agpennek kadagiti nasantuan a kasuratan? Ibinglay kadagiti ubbing dagiti bendision a naawatmo bayat iti panagpennekmo kadagiti nasantuan a kasuratan.
-
Kumpletuen ti panid ti aktibidad kadagiti ubbing, ken awisem ida a mangaramid iti maysa a panggep a tun-oyen nga aramiden uray maysa laeng a banag tapno agpennek kadagiti nasantuan a kasuratan iti daytoy a lawas.
Kayat ti Nailangitan nga Ama nga agkararagak a kanayon.
Sulisogennatayo ti kabusor a saan nga agkararag. Ibilang no kasano a matulongam dagiti ubbing a mangsaranget kadagiti sulisog ken “agkararag a kanayon” (2 Nephi 32:9).
Dagiti Mabalin nga Aktibidad
-
Pumilika iti maysa a ragup dagiti balikas maipapan iti kararag manipud iti 2 Nephi 32:8–9, isurat daytoy iti pisarra, ken kalubam ti tunggal balikas iti pedaso ti papel. Awisem dagiti ubbing nga agsisinnublatda a mangikkat iti maysa a papel iti maminsan agginga a mapatanganda no ania ti ragup dagiti balikas [phrase].
-
Aggigiddan a basaen ti 2 Nephi 32:8–9 , ken kiddawen kadagiti ubbing nga ibinglayda no ania ti masursuroda maipapan iti kararag manipud kadagitoy a bersikulo. Ania ti kayat a sawen ti “agkararag a kanayon”? (bersikulo 9). Kasano a maaramidtayo daytoy?
-
Ania ti mabalin a gapu no apay a saan a kayat ti maysa a tao ti agkararag? Ibinglay ti maysa a padas idi nagkararagka uray pay no saanmo a narikna a kayatmo ti agkararag? Kasano ti nariknam idi kalpasanna? Awisem iti maysa nga ubing a mangbasa iti maikadua a kagudua ti 2 Nephi 32:8, ken mangted kadagiti ubbing iti panawen nga agutob iti daytoy. Apay a saan a kayat ni Satanas nga agkararagtayo? Kasano a mapalagipantayo ti bagitayo nga agkararagtayo uray pay a saantayo marikna daytoy?
Yallukoy ti Panagsursuro iti Pagtaengan
Allukoyem dagiti ubbing a mangsarak iti maysa a tao—maysa a gayyem, kabsat, wenno sabali pay a miembro ti pamilia—a mabalinda a suruan no kasano ti agkararag.
Panangpadur-as iti Panangisurotayo
Aktibo dagiti ubbing. Awisem dagiti ubbing nga agtignay kadagiti estoria iti nasantuan a kasuratan ken dagiti kanta. Usarem dagiti aktibo a kababalinda tapno mangpadur-as iti panagsursuro. (Kitaen iti Panangisuro iti Wagas ti Mangisalakan, 25–26.)