Kibinen nga Iturongnakanto, ni Sandra Rast

Pebrero 24–Marso 1

2 Nephi 26–30

“Datdatlag nga Aramid ken Pagsidsiddaawan”

Sakbay nga irugim ti panagplanom iti aktibidad iti panagsursuro para kadagiti ubbing iti klasem, adalem ti 2 Nephi 26–30. Daytoyto ti mangyawis iti Espiritu iti panagplanom.

Isuratmo Dagiti Impresionmo

Yawis ti Panagbibinninglay

Ingatom ti maysa a kopia ti Libro ni Mormon, ket ilawlawagmo a nasirmata ni Nephi a napateg ti Libro ni Mormon iti aldawtayo. Kiddawen kadagiti ubbing nga mangibinglay iti maysa a banag a nasursuroda maipapan iti Libro ni Mormon iti daytoy a tawen.

Isuro ti Doktrina: In-inaudi nga Ubbing

2 Nephi 26:33

Kayat ni Jesucristo nga umasideg ti tunggal maysa Kenkuana.

Pinaneknekan ni Nephi nga ay-ayaten ti Mangisalakan ti tunggal maysa, ania man ti kinataoda, ket awisenna amin ida a “makiranud iti kinaimbagna.”

Dagiti Mabalin nga Aktibidad

• Mangipakita kadagiti ladawan dagiti tao manipud iti nadumaduma nga etniko ken nagtaudan iti kultura (mabalin nga adda masarakam iti magasin ti Simbaan). Pailadawam kadagiti ubbing ti sumagmamano a detalye a makitada iti ladawan. Lukibem dagiti nasantuan a kasuratan iti 2 Nephi 26:33 ket basaem ti, “Awisen ni [Jesucristo] amin ida nga umasideg Kenkuana.” Ulitem daytoy a ragup ti balikas kadagiti ubbingbayat ti panangitudom iti tunggal ladawan. Kalpasanna itudom ti tunggal ubing ket sawem ti, “Awisennaka ni Jesucristo nga umasideg Kenkuana.” Ania ti maaramidtayo tapno umasidegtayo iti Mangisalakan?

• Agkansion iti maysa a kanta a kagiddan dagiti ubbing maipapan iti panagayat iti amin a tao.  Itudom dagiti balikas wenno ragup dagiti balikas iti kanta a mariknam a mangpatibker iti mensahe ti 2 Nephi 26: 33.

2 Nephi 28:2; 30:6

Ti Libro ni Mormon ket maysa a bendision.

Ibilangmo no kasano a matulongamto dagiti ubbing iti klasem a makarikna a ti Libro ni Mormon ket “bendision kadakuada a naggapu iti ima ti Dios” (2 Nephi 30:6).

Dagiti Mabalin nga Aktibidad

• Ipakitam kadagiti ubbing ti maysa a Libro ni Mormon a nabungon a kas sagut, ket ibagam kadakuada nga adda maysa a banag a napateg iti unegna. Paigganam kadakuada ti sagut, ken mangted kadagiti pamugtuan [clue] a makatulong kadakuada no ania daytoy; kas pagarigan, daytoy ti maysa a banag nga inted kadatayo ti Apo, a makatulong kadatayo a mamati ken ni Jesucristo, ken dadduma pay. Basaem manipud iti 2 Nephi 30:6: “Daytoy ti bendision kadakuada a naggapu iti ima ti Dios.” Paluktan kadagiti ubbing ti sagut, ket kalpasanna ilawlawagmo a nasken lukibentayo ti Libro ni Mormon ket basaentayo daytoy tapno umawat kadagiti bendision a linaonna.

• Ibasam ti 2 Nephi 28:2 kadagiti ubbing. Ilawlawag a nakita ni Nephi a ti Libro ni Mormon ket “napateg unay” kadatayo, a kayatna a sawen a tulongan ken bendisionannatayonto. Ibagam kadagiti ubbing no apay a napateg ti Libro ni Mormon kenka. Ibinglaymo ti paggugustom a bersikulo wenno estoria manipud iti Libro ni Mormon, ket awisem dagiti ubbing a mangibinglay kadagiti pammaneknekda. Ipakitam dagiti ladawan manipud iti Libro ti Arte ti Ebanghelio tapno mangted kadakuada kadagiti kapanunotan.

2 Nephi 28:30

Sursuruannak ti Nailangitan nga Ama nga in-inut.

Nalabit a makapagpanunotka iti maysa a banag nga adalen wenno aktibidad a mangtulongto kadagiti ubbing a makitada no ania ti kaipapanan ti agsursuro iti “tunggal binatog.” Dagitoy a singasing iti baba ti mangtediti sumagmamano a kapanunotan.

Dagiti Mabalin nga Aktibidad

• Tulongam dagiti ubbing a mangbukel a sangkamaysa iti simple a puzzle wenno mangbukelda iti maysa a banag nga usarenda dagiti bloke [blocks]. Ikkam ida iti maysa a pedaso ti puzzle wenno maysa a bloke iti maminsan, ket bayat ti panagbukelda ilawlawagmo a daytoy ti wagas a pangisuruan kadatayo ti Nailangitan nga Amatayo—maysa a kinapudno iti maminsan. Ania ti mapasamak no pinadastayo a buklen a sangkamaysa dagiti pedaso ti puzzle a madagdagus?

• Mangisuro kadagiti ubbing iti maysa a paglaingan iti tunggal addang, kas panangbedbed iti panangisiglot iti laso wenno panagdrowing iti maysa a ladawan. Basaem manipud iti 2 Nephi 28:30: “itedko kadagiti annak ti tattao iti tunggal binatog, … bassit ditoy ken bassit idiay.” Apay a sursuruannatayo ti Dios a saggabassit?

Isuro ti Doktrina: In-inauna nga Ubbing

2 Nephi 26:23–28 33

Kayat ni Jesucristo nga umasideg ti tunggal maysa Kenkuana.

Tulongam dagiti ubbing a makarikna a naiturong ti awis nga umasideg ken ni Cristo kadakuada ken iti amin a tao.

Dagiti Mabalin nga Aktibidad

• Pagsasaritaan ti maipapan kadagiti panawen idi inawisda dagiti gagayyem wenno pamiliada nga umay iti naisangsangayan a pasken, kas iti maysa a kasangay wenno parambak. Ania ti inaramidda a nangallukoy kadagiti tao a dumar-ay? Basaem a kaduam dagiti ubbing ti 2 Nephi 26:23–28, 33, ken tulongam ida a mangsapul iti no ania ti yaw-awis ti Apo nga aramidentayo. Awisem dagiti ubbing a mangaramid iti kard wenno surat a mangaw-awis iti maysa a tao nga umasideg ken ni Jesucristo. Allukoyem ida a mangusar iti ragup dagiti balikas manipud kadagitoy a bersikulo iti awisda (no kasapulan, isurat ti sumagmamano a ragup dagiti balikas iti pisarra tapno makatulong).

• Basaen ti 2 Nephi 26:33 a kaduam dagiti ubbing, ken tulongam ida nga agaramid iti listaan ti naawis a “makiranud iti kinasayaat ti Apo.” (Mabalin a kasapulam ti mangilawlawag a “dagiti pagano” ket saan a mamati iti Dios.) Awisem ida a manginayon iti bukodda a nagan iti listaan. Kasano a makiranudtayo iti kinaimbag ti Apo?

• Isaritam biit kadagiti ubbing ti imaipapan no kasano nga agduduma dagiti ubbing iti intero a lubong, ken paneknekam nga ay-ayaten ti Apo amin ida (kitaen iti 2 Nephi 26:24, 33). Kiddawem kadagiti ubbing a mangidrowing iti maysa a ladawan ni Jesus a kaduam ti adu a nadumaduma nga ubbing.

2 Nephi 28:27–30

Ipalgak ti Nailangitan nga Ama ti kinapudno iti “tunggal binatog.”

Binallaagan ni Nephi a maibusor iti ugali a ditay kasapulan ti ania man nga ad-adu pay a kinapudno manipud iti Dios. Tulongam dagiti ubbing a maawatan nga ti panagsursuro iti ebanghelio ket kas maysa nga in-inut, tungpal biag a panangikagumaan.

Dagiti Mabalin nga Aktibidad

• Pumilika iti maysa a ragup dagiti balikas manipud iti 2 Nephi 28: 30, ket kiddawem ti maysa nga ubing a mangisurat iti umuna a balikas iti pisarra. Kalpasanna kiddawem ti sabali pay nga ubing a mangisurat iti sumaruno a balikas, ken agtultuloy agingga a naisurat ti sibubukel a ragup dagiti balikas [phrase]. Kasano maipada daytoy nga aktibidad iti wagas a panangted ti Dios kadatayo iti kinapudno?

• Tulongam dagiti ubbing a mangbasa ken maawatan ti 2 Nephi 28:27–30, nga agsapsapul kadagiti sungbat iti saludsod a kas iti daytoy: Ania kadagitoy a bersikulo ti mangisuro maipapan kadagiti tao a mamati nga addaandan iti umdas a kinapudno ket saandan a kasapulan ti ad-adu pay? Kiddawen kadakuada a mangisingasing kadagiti wagas a pangipakitaantayo iti Apo a kayattayo ti umawat iti ad-adu pay a kinapudno manipud Kenkuana.

2 Nephi 29:7–11

Agtintinnulong ti Libro ni Mormon ken ti Biblia.

Gapu ta addaantayo iti Biblia, sumagmamano a tao ti mamati a saan a kasapulan ti Libro ni Mormon. Makatulong dagitoy a bersikulo a mangipaawat kadagiti ubbing, ken mangilawlawag kadagiti dadduma, no apay nga agyamantayo para iti agpada a libro ti nasantuan a kasuratan.

Dagiti Mabalin nga Aktibidad

• Ikkam ti maysa nga ubing iti kopia ti Libro ni Mormon ken ikkam ti sabali pay nga ubing iti kopia ti Biblia. Saludsodem kadakuada no kasano nga agpada dagitoy a libro ken no kasano nga aggiddiatda. Ipakitam kadagiti ubbing ti maysa a mapa ti lubong, ken tulongam ida a mangiparis iti tunggal libro iti paset ti lubong a naggapuan daytoy. Basaen ken paglilinnawagan ti 2 Nephi 29:8. Apay nga ikkannatayo ti Dios iti dua a “pammaneknek” wenno pagbasaan ti nasantuan a kasuratan a mangisuro kadatayo maipapan Kenkuana?

• Kiddawen kadagiti ubbing a mangipapan nga imbaga kadakuada ti maysa a gayyem, “Diak kasapulan a basaen ti Libro ni Mormon. Nalpaskon a binasa ti Biblia.” Aggigiddan a mangbasa iti 2 Nephi 29:7–11, nga ilawlawag dagiti ragup ti balikas ken konsepto no kasapulan. Kalpasanna saludsodem ida a mangiburay kadagiti kapanunotan maipapan iti no ania ti mabalin a sawen ti gayyemda.

Yallukoy ti Panagsursuro iti Pagtaengan

Awisem dagiti ubbing a mangsaludsod kadagiti pamiliada no kasano nga agtintinnulong ti Biblia ken ti Libro ni Mormon a mangpaneknek ti maipapan ken ni Jesucristo.

Panangpadur-as iti Panangisurotayo

Ipamaysam ti pasnekmo kadagiti tao, saan a kadagiti adalen. Singasing laeng dagiti kapanunotan iti daytoy a balabala. Nawayaka a mangibagay kadagitoy kadagiti kasapulan ken kabaelan dagiti ubbing a sursuruam.