“Marso 16–22. Jacob 5–7: ‘Makipagtrabaho ti Apo Kadatayo,’” Umaykayo, Sumurot Kaniak—Para iti Primary: Libro ni Mormon 2020 (2020)
“Marso 16–22. Jacob 5–7,” Umaykayo, Sumurot Kaniak—Para iti Primary: 2020
Pangngarig maipapan iti Kayo ti Olibo, ni Brad Teare
Marso 16–22
Jacob 5–7
Makipagtrabaho ti Apo Kadatayo
Agadal, agutob, ken agkararagka tapno maammuan no kasano ti kasayaatan a panangisuro kadagiti ubbing kadagiti kinapudno a masarakan iti Jacob 5–7. Isuratmo dagiti impresion a maawatmo.
Isuratmo dagiti Impresionmo
Yawis ti Panagbibinninglay
Tapno mairugi ti panaglilinnawag maipapan kadagiti mensahe a masarakan iti Jacob 5–7, awisem dagiti ubbing nga agsarita maipapan kadagiti banag a makatulong kadakuada a mangrikna iti ayat ti Nailangitan nga Ama ken ni Jesucristo. Kasano nga ipakitatayo ti ayattayo kadagiti dadduma?
Isuro ti Doktrina: In-inaudi nga Ubbing
Agserbi dagiti misionario kadagiti annak ti Nailangitan nga Ama.
Utobem no kasano a maibinglaymo ti pangngarig maipapan kadagiti kayo ti olibo iti wagas a maawatan dagiti ubbing.
Dagiti Mabalin nga Aktibidad
-
Ipakitam ti maysa a ladawan ti maysa a kayo, wenno magnaka iti ruar a mangkita iti maysa a kayo, ken irebyum biit dagiti kangrunaan a punto ti pangngarig maipapan iti kayo ti olibo iti Jacob 5. Kas pagarigan: ti Apo ti bangkag (a mabalin a mangibagi ken ni Jesus) a nagtrabaho a nasayaat tapno mangaywan kadagiti kayo ti olibo (a mabalin a mangibagi kadagiti tao iti daga) gapu ta maseknan unay Isuna kadakuada. Inawaganna dagiti trabahodor (a mabalin a mangibagi kadagiti misionario) a mangtulong a mangaywan kadagiti kayo. Piliem ti maysa wenno dua kadagiti bersikulo manipud iti Jacob 5 tapno ibasam kadagiti ubbing (kas kadagiti bersikulo 71–72).
-
Saludsodem kadagiti ubbing no adda am-ammoda a maysa a tao a nagserbi iti mision, wenno isaritam ti maipapan iti maysa a tao nga am-ammom. Tulongam dagiti ubbing a mangbirok iti maysa a mapa dagiti lugar a pagserserbian dagita a misionario. Ilawlawag nga indilig ni Jacob ti lubong iti maysa a grupo dagiti kayo ti olibo. Mayarig dagiti kayo kadagiti tao iti daga, ken ti panangaywan kadagiti kayo mayarig iti ar-aramiden dagiti misionario para kadagiti annak ti Dios. Ania ti ar-aramiden dagiti misionario a mangbendision kadagiti annak ti Nailangitan nga Ama? Aggigiddan a sapulenyo ti sumagmamano a sungbal iti daytoy a saludsod iti maysa a kanta kas iti “Called to Serve” (Children’s Songbook, 174–75). Kasano a makapagbalintayo a kas misionario?
Ti aramid ti misionario ket maysa a wagas a pakatulongantayo kadagiti annak ti Dios nga agsubli Kenkuana.
Ay-ayatennak ti Nailangitan nga Ama.
Kasano a maisurom iti klasem nga ay-ayaten ti Dios dagiti amin nga annakna ken dumanon ti “takiag ti kaasina” kadakuada?
Dagiti Mabalin nga Aktibidad
-
Awisem dagiti ubbing a mangarakup kadagiti bagida. Ania ti mariknatayo no arakupennatayo ti maysa nga ay-ayatentayo? Ibasam ti Jacob 6:5 kadagiti ubbing, ken ilawlawagmo a ti ragup dagiti balikas a “pannakikaysa ti [Dios] kadakayo” ken “pannakaitanggaya ti naasi a takiagna kadakayo” ket mangisuro nga ay-ayatennatayo ti Nailangitan nga Ama ken kayatna nga agsublitayo Kenkuana iti maysa nga aldaw.
-
Aggigiddan nga agkansion iti maysa a kanta maipapan iti ayat, kas iti “I Feel My Savior’s Love” (Children’s Songbook, 74–75). Awisem dagiti ubbing a manginagan kadagiti banag a makatulong kadakuada a makarikna iti ayat ti Mangisalakan.
Maitakderak no ania ti ammok a pudno.
Maysa a nasayaat a pagwadan ni Jacob iti maysa a tao a nakatulong ti natibker a pammaneknekna kenkuana a mangsaluad iti kinapudno no maipasango iti pagsusupadian.
Dagiti Mabalin nga Aktibidad
-
Isaritam ti estoria da Jacob ken Sherem iti (Jacob 7:1–23) iti maysa a wagas a maawatan dagiti ubbing. Mabalinmo nga usaren ti “Kapitulo 10: Da Jacob ken Sherem” (Dagiti Estoria iti Libro ni Mormon, 27–29 ). Kalpasanna isaritam manen ti estoria, ngem iti daytoy a gundaway palubosam dagiti ubbing a mangkompleto kadagiti detalye a malagipda. Saludsodem kadakuada no ania ti masursuroda manipud ken ni Jacob. Kasano a masurottayo ti pagwadanna?
-
Awisem dagiti ubbing a mangkansion iti kanta maipapan iti panagpili iti umno, kas iti “Dare to Do Right” wenno “Stand for the Right” (Children’s Songbook, 158, 159). Kiddawem nga agtakderda no kantaenda dagiti balikas a kas iti umno [right] wenno pudno [true].
Isuro ti Doktrina: In-inauna nga Ubbing
Maseknan ti Apo kadagiti taona.
Imbinglay ni Jacob ti pangngarig maipapan iti kayo ti olibo a mangtulong a mangawis kadagiti taona nga umay ken ni Cristo. Daytoy ti makaipatungpal iti isu met la a panggep para kadagiti ubbing a sursuruam.
Dagiti Mabalin nga Aktibidad
-
Basaen ken ilawlawagmo kadagiti ubbing dagiti kangrunaan a bersikulo a manggupgop iti pangngarig maipapan iti kayo ti olibo, kas iti Jacob 5:3–4, 28–29, 47, and 70–72, ken awisem dagiti ubbing a mangidrowing kadagiti ladawan ti no ania ti iladawan dagitoy a bersikulo. Ania ti masursurotayo manipud kadagitoy a bersikulo maipanggep iti no kasano ti rikna ti Apo maipapan kadagiti taona? Kiddawem kadagiti ubbing nga agpammarang nga agay-ayawanda iti maysa a kayo ti olibo bayat ti pananggupgopmo iti apagbiit kadagiti bersikulo 61–71 (mabalinda a yakemda ti agkalkali, agsibsibug, ken dadduma pay). Awisem ti sumagmamano nga ubbing a mangbasa iti Jacob 5:11, 41, 47, ken 72, nga agsapsapul kadagiti banag a mangipakita no kasano ti kaadu ti panawen a panangaywan ti Apo ti bangkag (Jesucristo) kadagiti kayo. Ania ti aramiden ti Mangisalakan a mangipakita nga ay-aywanannatayo?
-
Ilistam dagiti sumagmamano a simbolo iti Jacob 5 iti pisarra, kas iti bangkag, ti apo ti bangkag, ti katulongan, ken dagiti kayo ti olibo. Kalpasanna mangaramid iti sabali pay a listaan, iti naiparna nga urnos, dagiti banag a mabalin a mangibagi kadagitoy a simbolo, a kas iti lubong, ti Mangisalakan, dagiti lider ti Simbaan wenno dagiti misionario, ken dagiti tao ti Dios. Aggigiddan a mangbasa kadagiti bersikulo manipud iti Jacob 5 a mangdakamat kadagitoy a simbolo, ken tulongam dagiti ubbing a mangidrowing kadagiti linia iti pisarra a mangikonekta kadagiti simbolo kadagiti mabalin a kaipapanan dagitoy (kitaen, kas pagarigan, kadagiti bersikulo 3–4, 28–29, 47, 70–72).
Ay-ayatennak ti Nailangitan nga Ama ken pakawanennakto no agbabawiak.
Napateg a tulongam a maawatan dagiti ubbing a sursuruam nga ay-ayaten ti Dios ida ken kanayon a pakawanennanto ida no sipupudno nga agbabawida.
Dagiti Mabalin nga Aktibidad
-
Mangaramid iti maysa a tsart iti pisarra nga addaan iti dua a kolum, a nasuratan iti Nailangitan nga Ama ken Datayo. Aggigiddankayo a mangbasa iti Jacob 6:4–5, ket kiddawem iti kagudua ti klase a mangsapul kadagiti ragup ti balikas a mayaplikar iti Dios ken kiddawam iti dadduma pay a kagudua ti klase a mangsapul kadagiti ragup ti balikas a mayaplikar kadatayo. Isuratmo no ania ti matakuatanda iti maikanatad a kolum. Tulongam ida a mangilawlawag iti kaipapanan dagiti balikas a saanda a maawatan.
-
Ibinglaymo ti estoria ni Elder Allen D. Haynie maipapan iti panagbalin a narugit iti napitak nga abut iti mensahena a “Remembering in Whom We Have Trusted” (Ensign wenno Liahona, Nob. 2015, 121–22). Ania ti isuro kadatayo daytoy nga estoria maipapan iti no ania ti nasken nga aramidentayo tapno maisalakan iti pagarian ti Dios? Ania pay ti masursurotayo manipud iti Jacob 6:4–5?
Maitakderak no ania ti ammok a pudno.
Kasano a maparegtam dagiti ubbing a mangitakder iti kinapudno kas iti inaramid ni Jacob?
Dagiti Mabalin nga Aktibidad
-
Awisem dagiti ubbing a mangyakem iti panagbinnalubal da Jacob ken Sherem, babaen iti panangusar iti Jacob 7:1–23 kas maysa a pangiwanwan. Kiddawem kadagiti ubbing nga agsarita maipapan kadagiti paggugustoda a paset iti estoria. Kasano nga intakderan ni Jacob no ania ti ammona nga umno? Awisem dagiti ubbing a mangibinglay kadagiti padasda idi intakderanda ti umno, wenno ibinglaymo ti bukodmo a padas.
-
Awisem dagiti ubbing a mangkansion iti kanta maipapan iti panagpili iti umno, kas iti “Dare to Do Right” wenno “Stand for the Right” (Children’s Songbook, 158, 159). Bingaybingayem ida iti grupo, ken awisem ida a mangaramid iti maysa a makaparegta a wagayway wenno poster a mangibagi iti maysa a banag nga itaktakderanda wenno patpatienda.
Yallukoy ti Panagsursuro iti Pagtaengan
Awisem dagiti ubbing a mangpanunot iti maysa a wagas a pakatulonganda kadagiti pamiliada a mangrikna iti ayat ti Mangisalakan—kas pagarigan, babaen iti panangilawlawag no ania ti nasursuroda maipapan iti no kasano ti panangaywan ti Apo ti bangkag kadagiti kayo ti olibona.
Panangpadur-as iti Panangisurotayo
Kayat dagiti ubbing ti mangibinglay iti no ania ti nasursuroda. Nupay ubbingda pay laeng, mapapigsa dagiti ubbing dagiti miembro ti pamiliada. Allukoyem ida a mangibinglay kadagiti pamiliada kadagiti banag a nasursuroda iti Primary. (Kitaen iti Panangisuro iti Wagas ti Mangisalakan, 30.)