Mapakawan, ni Greg K. Olsen

Marso 9–15

Jacob 1–4

Makitunostayo iti Dios babaen ti Pannubbot ni Cristo

Bayat ti panangbasam iti Jacob 1–4, utobem no ania kadagiti pagbatayan manipud kadagitoy a kapitulo ti kapatgan a sursuruen dagiti ubbing. Kalikagumam a gun-oden ti naespirituan a pannarabay tapno maammuam no kasano ti kasayaatan a panangisuro kadagitoy a pagbatayan, ken isuratmo dagiti impresionmo.

Isuratmo dagiti Impresionmo

Yawis ti Panagbibinninglay

Awisem dagiti ubbing a mangibinglay iti maysa a banag nga inaramidda wenno dagiti pamiliada itoy a lawas a masursuro manipud iti Jacob 1–4. Mabalinmo met a kiddawen kadakuada a mangibinglay iti maysa a banag a malagipda manipud iti adalen itay napalabas a lawas. Ania dagiti saludsod a mabalinmo a damagen tapno matulongam ida a manglagip?

Isuro ti Doktrina: In-inaudi nga Ubbing

Jacob 1:6–8, 18; 2:1–11

Awagan ti Dios dagiti lider ti Simbaan tapno tulongandak a mangsurot ken ni Jesucristo.

Tulongam dagiti ubbing a makaawat a mabendesionandanto babaen ti panangsurot iti balakad dagiti lider ti Simbaan.

Dagiti Mabalin nga Aktibidad

• Agaramid kadagiti simple a puppet a mangibagi kada Jacob ken Jose, dagiti in-inaudi a kabsat ni Nephi, a lider ti Simbaan. Ibinglay dagiti sumagmamano a bersikulo manipud iti Jacob 1 ken 2 tapno mailawlawag no ania ti nakaawagan nga aramiden dagiti daulo ti Simbaan. Kas pagarigan, allukoyennatayo dagiti lider a “mamati ken ni Cristo” (Jacob 1:8), awisennatayo nga agbabawi (kitaen iti Jacob 2:5–6, 9–10), ken “mangipakdaar iti balikas ti Dios” (Jacob 2:2, 11). Pausar kadagiti ubbing dagiti puppet tapno agpammarangda a mangaramid iti sumagmamano kadagitoy a banag.

• Awisem dagiti ubbing a manginagan iti sumagmamano a lider iti Simbaan nga am-ammoda, a kas dagiti daulo ti Primary, miembro ti bishopric, ken dagiti propeta ken apostol. Tulongam dagiti ubbing a mangpanunot kadagiti wagas a pangbendisionan dagitoy a lider kadatayo.

Tulongannatayo dagiti lider ti Simbaan a mangsurot ken ni Jesucristo.

Jacob 2:12–14, 17–21

Makatulongak kadagiti dadduma nga agkasapulan no mangibinglayak kadakuada.

Maawatan kadi dagiti ubbing a sursuruam dagiti bendision a sumangbay no mangibinglayda kadagiti tao nga agkasapulan? Kasano a matulongam ida a maammuan a kayat ti Nailangitan nga Ama ken ni Jesus a tumulongda kadagiti dadduma?

Dagiti Mabalin nga Aktibidad

• Ilawlawag a nakabakbaknang dagiti sumagmamano a tao iti panawen ti Jacob, ngem saanda a kinayat nga ibinglay ti adda kadakuada kadagiti napanglaw a tao. Basaem ti Jacob 2:17–19 a mangtulong kadagiti ubbing a makaawat kadagiti pannursuro ni Jacob kadagitoy a tao. Bayat ti panangaramidmo iti daytoy, ikkam dagiti ubbing kadagiti ladawan wenno banag a maiggaman a maikanunong kadagiti balikas wenno ragup dagiti balikas kadagitoy a bersikulo.

• Awisem dagiti ubbing nga agtignay kadagiti wagas a mabalinda nga ibinglay no ania ti adda kadakuada iti maysa a tao nga agkasapulan. Pinaneknekan a mabendisionnantayo bayat ti panangibinglaytayo kadagiti dadduma.

• Mangitugot iti maysa a banag iti klase a mabalinmo nga ibinglay kadagiti ubbing. Mangted ti sumagmamano kadagitoy ti tunggal ubing, ken ilawlawag a mangibinglayka. Saludsodem ida no kasano ti nariknada idi nangibinglayka kadakuada. Ania ti mariknada no mangibinglayda kadagiti dadduma? Tulongam dagiti ubbing nga agpanunot iti maysa a banag a mabalinda nga ibinglay tapno makatulong a mangparagsak iti maysa a tao.

Jacob 4:6

Mapapigsak ti pammatik ken ni Jesucristo.

Bayat ti nalinteg a panagbiag ni Jacob iti baet ti kinadangkes ti aglawlawna, ad-adda pay a pimmigsa ti pammatina a saan pulos a maisin. Utobem no kasano a makatulongka kadagiti ubbing a makaawat no ania ti kayat a sawen ti saan a maisin.

Dagiti Mabalin nga Aktibidad

• Tulongam dagiti ubbing nga agpanunot kadagiti banag nga aramidenda tapno agbalin a napigpigsa dagiti bagida. Ania ti mabalin nga aramidentayo tapno agbalin a napigpigsa ti pammatitayo? Lukibem dagiti nasantuan a kasuratan iti Jacob 4:6, ken tulongam dagiti ubbing a mangtakuat no ania ti inaramid ni Jacob ken dagiti taona tapno agbalin a “saan a maisin” dagiti pammatida.

• Kantaen ti “The Wise Man and The Foolish Man” (Children’s Songbook, 281) a kadua dagiti ubbing. Iti maysa a bangir iti pisarra, mangidrowing iti maysa a balay a naipatakder iti kadaratan. Iti sabali a bangir ti pisarra, mangidrowing iti balay a naipatakder iti bato. No mabalin, mangitugot iti darat ken bato iti klase. Ania ti nalaklaka a maisin wenno magunay? Ania kadagitoy, darat wenno bato, ti kayattayo a kapada ti pammatitayo?

Isuro ti Doktrina: In-inauna nga Ubbing

Jacob 1:6–8, 18; 2:1–6, 11

Awagan ti Dios dagiti lider ti Simbaan tapno tulongandak a mangsurot ken ni Jesucristo.

Mabendisionanto dagiti ubbing a sursuruam bayat ti panagtalekda ken panangsurotda ti balakad dagiti lider ti Simbaan.

Dagiti Mabalin nga Aktibidad

• Basaem a kadua dagiti ubbing ti Jacob 1:6–8 ken 2:1–6, 11, a mangtultulong kadakuada a mangsapul kadagiti ragup ti balikas a mangiladawan no kasano a mangidaulo dagiti katulongan ti Dios iti Simbaan. Kiddawem kadakuada a mangisurat kadagitoy a ragup ti balikas kadagiti papel ken kalpasanna ipakita dagiti papel iti pisarra. Apay nga awagan ti Dios dagiti dadaulo ti Simbaan a mangiwanwan kadatayo? Kiddawen kadagiti ubbing a mangibinglay kadagiti padasda iti panagsursuro wenno panangawat iti pannarabay manipud iti maysa a lider ti Simbaan wenno manursuro ken dagiti bendision a naawatda.

• Kiddawen kadagiti ubbing a mangidrowing iti ladawan ti maysa a lider ti Simbaan nga am-ammoda, ken papugtuam iti dadduma pay nga ubbing iti klase a no siasino ti indrowingda. Ania ti aramiden dagitoy a lider tapno matulongandatayo a mangsurot ken ni Jesucristo? Awisem dagiti ubbing nga agsurat kadagiti lider ti Simbaan, nga agyamyamanda kadakuada iti serbisioda.

• Awisem ti maysa a lokal a lider iti Simbaan a mangibaga kadagiti ubbing no ania ti aramidenna tapno mangipatungpal iti akem wenno pagrebbenganna. Kiddawen kadagiti ubbing a manginagan iti sumagmamano a banag a mabalinda nga aramiden tapno mangkanunong kadagiti liderda.

Jacob 2:12–14, 17–21

Matulongak dagiti dadduma a makarikna iti ragsak babaen iti panangibinglayko kadakuada.

Situtulok dagiti pudno a pasurot ni Jesucristo a mangibinglay no ania ti adda kadakuada kadagiti dadduma. Allukoyem dagiti ubbing a mangyeg iti rag-o kadagiti agkasapulan babaen iti panangibinglayda kadakuada.

Dagiti Mabalin nga Aktibidad

• Ibagam kadagiti ubbing nga adu a tao iti panawen ni Jacob ti nagbalin a napalangguad ken natangsit gapu ta inayatda ti kinabaknang (kitaen iti Jacob 2:12–14, 17–21). Awisem ti sumagmamano nga ubbing a mangbasa iti Jacob 2:17–19 iti napigsa, ket tulongam ida a makaawat kadagiti ania man a narigat a balikas. Ania ti nasken a sapulentayo sakbay nga agsapultayo iti kinabaknang? Ania ti nasken a kalikagumantayo nga aramiden kadagiti ania man a kinabaknang nga awatentayo?

• Ibasam ti Jacob 2:17 kadagiti ubbing. Ania dagiti bendision nga imbinglay ti Nailangitan nga Ama kadatayo? Apay a kayat ti Dios nga agbibininglaytayo iti tunggal maysa? Awisem dagiti ubbing a mangibinglay kadagiti panawen idi nangibinglayda iti maysa a banag iti sabali a tao, agraman ti nariknada ken ti narikna ti sabali a tao.

Jacob 4:4–13, 17

Mapapigsak ti pammatik ken ni Jesucristo.

Nagbalin a saan a maisin ti pammati ni Jacob bayat ti panagsukisokna kadagiti balikas dagiti propeta ket nakaawat iti bukodna a saksi (kitaen iti Jacob 4:6). Kasano a matulongam dagiti ubbing nga agtarigagay a mangpatibker iti pammati a saan a maisin?

Dagiti Mabalin nga Aktibidad

• Awisem dagiti ubbing a mangpanunot kadagiti banag nga agbalin a napigsa ken natalged iti panaglabas ti panawen, kas iti maysa a dakkel a kayo. Kasano a mayarig ti pammati kadagiti banag a nalagipda? Ania kadagiti ragup ti balikas iti Jacob 4:6, 10–11 ti mangiladawam no ania ti maaramidtayo tapno mapagbalintayo ti pammatitayo a saan a maisin? Kiddawen kadagiti ubbing a mangisurat iti pisarra kadagiti wagas a pakapapigsaanda iti pammatida ken ni Jesucristo.

• Isaritam ti analohia ni Elder Neil L. Andersen maipapan iti kayo a dimmakkel iti naangin nga aglawlaw, a masarakan iti mensahena nga “Spiritual Whirlwinds” (Ensign wenno Liahona, Mayo 2014, 18–21). Apay a napateg ti agbalin a saan a maisin ti pammatitayo a kas iti puon ti kayo? Ania ti mangibagi iti alipugpog? Ania ti mabalin nga aramidentayo a mangpapigsa kadagiti pammaneknektayo? Tulongam dagiti ubbing a mangpanunot kadagiti sabali nga analohiA a mangisuro maipapan iti kaadda ti pammati a saan a maisin.

Yallukoy ti Panagsursuro iti Pagtaengan

Awisem dagiti ubbing a mangpanunot iti maysa a banag a mabalinda nga ibinglay kadagiti pamiliada—agraman iti panangibinglay iti maysa a banag a nasursuroda iti klase ita nga aldaw. Ikkam ida kadagiti gundaway iti masakbayan nga adalen tapno isarita maipapan iti no ania ti imbinglayda.

Panangpadur-as iti Panangisurotayo

Yallukoy ti panagraem. Tulongam dagiti ubbing a makaawat a ti napateg nga aspekto ti panagraem isu ti panangpanunot maipapan iti Nailangitan nga Ama ken ni Jesucristo. Mabalin nga ipalagipmo kadakuada nga agbalinda a managraem babaen ti siuulimek a panangkansion wenno panangdayyeng iti maysa a kanta wenno panangipakita iti ladawan ni Jesus.