Pebrero 17–23

2 Nephi 11–25

“Agrag-otayo ken ni Cristo”

Mangrugi ti panagsaganam a mangisuro bayat ti panangbasam iti 2 Nephi 11–25. Umaykayo, Sumurot Kaniak—Para kadagiti Indibidual ken Pamilia ti makatulong kenka tapno maawatam dagitoy a kapitulo, ken daytoy a balabala ti makaited kenka kadagiti kapanunotan iti panangisuro.

Isuratmo dagiti Impresionmo

Yawis ti Panagbibinninglay

Irebyum kadagiti ubbing no ania ti nasursuroda maipapan iti Mangisalakan ken iti Pannubbotna itay napalabas a lawas. No imbinglayda ti nasursuroda kadagiti pamiliada, allukoyem ida nga agsarita maipapan iti dayta.

Isuro ti Doktrina: In-inaudi nga Ubbing

2 Nephi 12:2–3

Ti templo ti balay ti Apo.

Maysa a gundaway ti padto ni Isaias maipapan iti “ti bantay ti balay ti Apo” tapno mangisuro kadagiti ubbing maipapan iti templo ken mangtulong kadakuada nga agsagana iti papanda sadiay iti maysa nga aldaw.

Dagiti Mabalin nga Aktibidad

• Ipaiggem ti maysa nga ubing iti ladawan ti maysa a templo (adda maysa iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ), ket kiddawen kadagiti ubbing a mangibinglay no ania ti ammoda maipapan iti templo. Basaem ti 2 Nephi 12:3, ket ilawlawag nga iti daytoy a bersikulo impadto ti maysa a propeta nga agnagan iti Isaias nga addanto dagiti templo kadagiti maudi nga aldaw. Basaem manen dagiti bersikulo, ket yunay-unay a no mapantayo iti templo, ti Apo “isuronatayo kadagiti wagasna” ket tulongannatayo a “magna iti danana.”

• Agaramidka iti maysa a dana iti suelo, ket iti ungto ti dana, mangipanka iti maysa a ladawan ti templo nga adda kalubna iti rabaw ti ladawan. Papagnaem dagiti ubbing iti dana, ken bayat ti panangaramidda iti daytoy, tulongam ida a mangulit iti ragup ti balikas a “magna iti danana.” No makadanon dagiti ubbing iti unto ti dana, paikkatmo kadakuada ti kalub ti ladawan. Ania ti kayat a sawen ti magna kadagiti dana ti Dios?

• Agkansion a kaduam dagiti ubbing iti maysa a kanta maipapan iti templo kas iti “Inikkannak ti Apo iti Templo” (Pagbatayan ti Ebanghelio, 355). Tulongam ida a mangsarak kadagiti balikas ken ragup dagiti balikas a mangisuro no ania ti templo ken no ania ti aramidentayo sadiay.

2 Nephi 19:6; 25:26

“Agrag-otayo ken ni Cristo.”

Addaan da Nephi ken Isaias iti pammaneknek maipapan iti Mangisalakan, ken dagiti pammaneknekda namagrag-o kadakuada. Tulongam dagiti ubbing a makitada nga “agrag-o[ka] ken ni Cristo.”

Dagiti Mabalin nga Aktibidad

• Mangawis iti maysa nga ubing nga agiggem iti ladawan ti pannakayanak ni Jesucristo (kas iti Libro ti Arte ti Ebanghelio, num. 30), ket tulongam dagiti ubbing a mangsapul iti maladaga a ni Jesus iti ladawan. Basaem ti 2 Nephi 19:6 , ken kiddawen kadagiti ubbing a mangitudo ken ni Jesus no mangngeganda dagiti balikas a maladaga ken anak. Ilawlawag nga ammo ni propeta Isaias, a nagsurat kadagiti balikas iti 2 Nephi 19:6, maipapan iti pannakayanak ni Jesus ginasgasut a tawen sakbay ti pannakapasamakna.

• Isaritam ti estoria maipapan ken ni Jesucristo a mangmangyeg iti rag-o kadagiti dadduma. Ilawlawag ti maipapan kadagiti narag-o a kanito iti estoria. Basaen ti 2 Nephi 25:26 ken pagsasaritaan no apay nga “agrag-okayo ken ni Cristo.” Kiddawem kadakuada iti rag-o ni Jesusagiti ubbing nga agsarita maipapan iti no kasano a mangyeg kadakuada iti rag-o ni Jesus.

2 Nephi 21:6–9; 22

Ti Milenium ket maysanto a panawen ti kappia ken rag-o.

Kalpasan iti Maikadua a Yaayna, agnaedto ni Jesucristo kadagiti taona kabayatan iti panawen iti kappia a maawagan iti Milenium.

Dagiti Mabalin nga Aktibidad

• Ipakitam kadagiti ubbing dagiti ladawan dagiti ayup a nadakamat iti 2 Nephi 21:6–7, ket kiddawen kadagiti ubbing a manginaganda kadagiti ayup. Ilawlawag a gagangay nga agbibinnusor dagitoy nga ayup, ngem insuro ni Isaias a kalpasan ti yaay manen ni Jesucristo, addaanto maysa a panawen ti kappia, a maawagan iti Milenium, a saanto nga agdidinnangran dagiti ayup. Kasano a masurottayo ti pagwadan dagitoy nga ayup iti wagas a panangtratotayo iti tunggal maysa? Awisem dagiti ubbing a mangidrowing kadagiti ladawan dagiti ayup nga agkakadua nga agbibiag a sitatalna.

• Basaen ti 2 Nephi 22:5, ket kiddawen kadagiti ubbing a mangtulong kenka a mangsapul ti kanta a mangiladawan kadagiti “kasayaatan a bambanag” nga inaramid ti Apo. Mabalin nga iraman ti sumagmamano a pagarigan ti “My Heavenly Father Loves Me” (Children’s Songbook, 228–29) wenno “How Great Thou Art” (Hymns, no. 86). Aggigiddan a kansionen ti kanta.  Ilawlawag nga inton Milennium, maammuanto iti tunggal maysa maipapan kadagiti “kasayaatan a bambanag” nga inaramid ti Apo.

Isuro ti Doktrina: In-inauna nga Ubbing

2 Nephi 12:2–3

Ti templo ti balay ti Apo.

Kasano a mausarmo dagitoy a bersikulo a mangtulong kadagiti ubbing a mangpadpadaan iti aldaw a makapanda iti templo?

Dagiti Mabalin nga Aktibidad

• Ipakitam ti ladawan ti maysa a templo (addaan iti maysa ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Kiddawem iti maysa nga ubing a mangbasa iti 2 Nephi 12:2–3, ken awisem dagiti dadduma pay nga ubbing a dumngeg kadagiti rason no apay a kinuna ni Isaias a kasapulantayo dagiti templo. Mabalinmo nga ilawlawag nga inawagan ni Isaias ti templo a “ti bantay ti balay ti Apo.” Apay a nasayaat a simbolo ti maysa a bantay para iti templo?

• Awisem dagiti ubbing a mangidrowing iti ladawan ti bagbagida a mapmapan iti templo. No mabalin, kiddawem iti maysa kadagiti agtutubo a lallaki wenno agtutubo a babbai iti ward a mangisarita kadagiti ubbing no ania ti rikna a mangannong kadagiti panagbuniag para kadagiti pimmusayen iti templo. Daytoy nga agtutubo a tao wenno sabali a tao iti ward ket mabalin a mangisuro dagiti ubbing no kasano ti mangsapul iti nagnagan dagiti kapuonan nga agkasapulan kadagiti ordinansa ti templo.

2 Nephi 15:20

Padasen ni Satanas ti mangallilaw kaniak maipapan iti naimbag ken dakes.

Agnaedtayo iti maysa a lubong nga, kas impadto ni Isaias, awagan dagiti tao iti dakes ti nasayaat ken awaganda ti nasayaat iti dakes. Kasano a matulongam dagiti ubbing a mangilasin iti daytoy a pangallilaw?

Dagiti Mabalin nga Aktibidad

• Ipakitam kadagiti ubbing ti maysa a banag a napait wenno naalsem, kas iti atsara wenno lemon, iti uneg ti ukis ti kendi. Aggigiddan a mangbasa iti 2 Nephi 15:20, ket ilawlawag a padpadasen ni Satanas a pagbalinen dagiti banag a dakes nga aglanga a nasayaatda. Tulongam dagiti ubbing a mangpanunot kadagiti wagas a pangaramidan ni Satanas iti daytoy. Kasano a mailasintayo dagiti pangallilawna?

• Apay nga ilimlimo ni Satanas ti basol?

2 Nephi 17:14; 19:6; 25:23–26

“Agrag-otayo ken ni Cristo.”

Nasken a maammuan dagiti ubbing a narag-o ti ebanghelio ni Cristo. Kasano a matulongamto ida nga “agrag-o ken ni Cristo”?

Dagiti Mabalin nga Aktibidad

• Tulongam dagiti ubbing a mangsapul kadagiti nagan ni Jesucristo iti 2 Nephi 17:14 ken 19:6. Mabalin a kasapulam nga ilawlawag a ti “Immanuel” ket maysa kadagitoy a nagan, ken ti kayatna a sawen “adda kadatayo ti Dios.” Ania ti isuro dagitoy a nagnagan maipapan Kenkuana?

• Ipanmo ti maysa a ladawan ti Mangisalakan iti pisarra, ket aggigiddan a mangbasa iti 2 Nephi 25:26. Apay a nagsao ken nagsurat ni Nephi iti adu unay maipapan ken Jesucristo? Pagsuratem dagiti ubbing iti pisarra, iti asideg ti ladawan ni Jesus, iti maysa a banag maipapan iti Mangisalakan a mangyeg kadakuada iti rag-o.

• Awisem dagiti ubbing a mangpanunot iti maysa a tao a kayatda a, “magutugot … a mamati ken ni Cristo” (2 Nephi 25:23). Kasanotayo a maipakitatayo kadagiti dadduma ti rag-o nga isangbay ti Mangisalakan iti biagtayo? Paisurat wenno payakemmo kadagiti ubbing ti sumagmamano a banag a mabalinda nga aramiden a mangtulong iti tao a napanunotda a mamati ken ni Jesucristo.

Yallukoy ti Panagsursuro iti Pagtaengan

Awisem dagiti ubbing a mangidrowing kadagiti banag a mabalinda nga aramiden a mangipakita kadagiti pamiliada nga “agrag-oda ken ni Cristo.”

Panangpadur-as iti Panangisurotayo

Bay-am dagiti ubbing nga agbalin a managpartuat. “Kabayatan ti panangisurom kadagiti ubbing, palubosam ida nga agbukel, agdrowing, agkolor, agsurat, ken agpartuat. Ad-adda pay ngem pagraragsakan nga aktibidad dagitoy a banag—napateg dagitoy iti panagsursuro” (Panangisuro iti Wagas ti Mangisalakan, 25).