Da Adan ken Eva, ni Douglas Fryer

Pebrero 3–9

2 Nephi 1–5

“Nagbiagkami iti Wagas a Naragsak”

Insuro ni Lehi ti tunggal maysa kadagiti annakna a mayannurot kadagiti bukodda a kasapulan ken kasasaad. Surotem ti pagwadanna bayat ti panangisaganam a mangisuro kadagiti ubbing iti klasem.

Isuratmo dagiti Impresionmo

Yawis ti Panagbibinninglay

Kalpasan ti pannangilawlawagmo nga insuro ni Lehi ti pamiliana maipapan iti wayawaya nga agpili iti bukodtayo, awisem dagiti ubbing a mangibinglay kadagiti padasda iti panangpilida iti umno. Kasano ti riknada kalpasan ti panangaramidda iti dayta a pili? Kasano a malagipda ti agpili iti rumbeng iti masakbayan?

Isuro ti Doktrina: In-inaudi nga Ubbing

2 Nephi 1:20

Mabendisionannak no agtungpallak.

Ti naisuro iti daytoy a bersikulo—ti panagtungpal ket mangisangbay kadagiti parabur—ket nailadawan a masansan iti intero a Libro ni Mormon. Ibilangmo no kasano a matulongam dagiti ubbing a mangilasin iti daytoy iti bukodda a biag.

Dagiti Mabalin nga Aktibidad

• Kiddawem kadagiti ubbing a tulongandaka a mangilawawag iti kaipapanan ti balikas a dagiti bilin ket agaramidka iti listaan dagiti bilin. Basaem ti 2 Nephi 1:20, ket yunay-unay a datayonto ket “rumang-ay,” wenno mabendisionan, no tungpalentayo dagiti bilin. Ania ti mariknatayo no tungpalentayo dagitoy a bilin?

• Ipakitam kadagiti ubbing dagiti banag a mangted iti salaknib, a kas kadagiti sapatos, kallugong, ken guantes. Papadasmo dagitoy kadakuada. Kasano a masalaknibannatayo dagitoy a banag? Ibagam kadakuada a masalaknibannatayo dagiti bilin ti Nailangitan nga Ama manipud iti naespirituan a pagpeggadan. Ibinglaymo ti maysa a padas idi nasalaknibanka babaen ti panangsurotmo kadagiti bilin.

2 Nephi 2:11, 16, 27

Inikkannak ti Dios ti wayawaya a pumili.

Gapu kadagiti pilida, nasken a panawan da Adan ken Eva ti Minuyongan ti Eden. Kasano a maisurom dagiti ubbing a ti pili da Adan ken Eva ti mangpalugod kadatayo a mangusar iti wayawayatayo a pumili tapno pilientayo ti Nailangitan nga Ama ita nga agdama?

Dagiti Mabalin nga Aktibidad

• Agdrowing iti ladawan ti maysa a nawaya a tao ken ladawan ti maysa a naibalud a tao (nalabit a maysa a tao iti pagbaludan), ket awisem dagiti ubbing a mangitudo iti umisu a ladawan no basaem dagiti balikas a siwayawaya ken pannakaadipen iti 2 Nephi 2:27. Yunay-unay ti ragup dagiti balikas a “siwayawaya nga agpili,” ket awisem ti tunggal ubing nga ulitenna daytoy.

• Irebyum kadagiti ubbing ti estoria maipapan kada Adan ken Eva (kitaen iti 2 Nephi 2:17–19; kitaen met iti “Kapitulo 3: Da Adan ken Eva,” Dagiti Estoria iti Daan a Tulag, 15–18, ) ken ti panagpili nga inaramidda iti Minuyongan ti Eden. Tulongam dagiti ubbing a mangilista iti sumagmamano a pili nga aramidenda iti inaldaw. Paneknekam a nangted kadatayo ti Nailangitan nga Ama iti wayawaya a pumili iti nagbaetan ti nasayaat ken dakes, ket awisem dagiti ubbing nga aglagtolagto wenno agpalakpak tapno rambakan ti panagbalin a nawaya nga agpili.

• Agay-ayam ti maysa nga ay-ayam a pangisaw-am iti maysa a balikas (a kas iti silaw) ket isao dagiti ubbing ti kasupadina (sipnget). Uliten daytoy nga aktibidad iti sumagmamano a daras. Tapno matulongan dagiti ubbing a maawatanda no kasano a makatulong kadatayo ti kaadda dagiti kasupadi iti panagaramidtayo kadagiti pili, basaen ti umuna a kagudua ti 2 Nephi 2:11 ken 2 Nephi 2:16. Isaritam kadagiti ubbing dagiti estoria maipapan iti maysa nga ubing a nasulisog nga agaramid iti biddut a pili. Tulongam dagiti ubbing nga agpanunot iti no ania ti kasupadi dayta a pili, ket awisem ida a mangyakem iti daytoy. Paneknekam a bendisionannatayo ti Nailangitan nga Ama no pilientayo ti umno.

• Aggigiddan a mangkansion iti maysa a kanta maipapan iti panagaramid kadagiti pili, kas iti “Aramidem Koma’t Rumbeng” (Dagiti Himno ken Kanta dagiti Ubbing, 64), ket saludsoden kadagiti ubbing no ania ti masursuroda manipud iti kanta maipapan iti panagaramid kadagiti pili.

Isuro ti Doktrina: In-inauna nga Ubbing

2 Nephi 1:20

Mabendisionannak no agtungpallak.

No addaan iti pammati dagiti ubbing a bendisionanto ida ti Dios para iti panagtungpalda kadagiti bilin—uray pay no dagita a bendision ket saan nga umay a madagdagus—nalaklaka para kadakuada nga agaramid kadagiti nalinteg a pili.

Dagiti Mabalin nga Aktibidad

• Tulongam dagiti ubbing nga agrebyu iti sumagmamano a pili nga inaramid ni Nephi ken dagiti lallaki a kabsatna. Para iti sumagmamano a pagarigan, kitaen iti 1 Nephi 2:11–16; 3:5–7; ken 18:9–11. Awisem ida nga aggigiddan a magbasa iti 2 Nephi 1:20 ken ibinglayda no apay iti panagkunada nga ited koma ni Lehi daytoy a mensahe kadagiti annakna.

• Isurat dagiti ragup ti balikas manipud iti 2 Nephi 1:20 kadagiti pedaso ti papel, ket paglilinnawagan no ania ti kaipapanan ti ragup dagiti balikas. Awisem dagiti ubbing nga ikabilda dagiti pedaso iti umno nga urnos babaen iti panangusar iti bersikulo. Tapno mailadawan ti pagdumaan ti panagrang-ay ken pannakaisina, ipakita kadagiti ubbing ti maysa a nasalun-at a mula ken ti maysa a bulong wenno sanga a naisina manipud iti mula. Ania ti pagdumaan ti bulong nga adda iti mula ken ti maysa a naisina? Kasano a maipadatayo iti bulong nga adda iti mula no agtungpaltayo kadagiti bilin ti Dios? Awisem dagiti ubbing a mangisurat iti maysa a diurnal kadagiti wagas a pangbendisionan kadakuada ti Dios no pilienda ti rumbeng.

2 Nephi 2:22–28

Inikkannak ti Dios iti wayawaya a pumili.

Insalakannatayo ni Jesucristo manipud iti pisikal nga ipapatay ken naespirituan nga ipapatay (pannakaisina manipud iti Dios gapu iti basol) babaen ti Pannubbot ken Panagungarna. Tapno makipagnaed manen iti Nailangitan nga Ama, nasken nga usarentayo ti kinawayatayo nga agpili iti panagtultuloy nga agbabawi ken panangikarigatan nga agbiag a sililinteg.

Dagiti Mabalin nga Aktibidad

• Ipakita ti ladawan da Adan ken Eva (kitaen iti Libro ti Arte ti Ebanghelio, num. 4), ket awisem dagiti ubbing a mangibinglayno ania ti ammoda maipapan iti no ania ti napasamak kada Adan ken Eva iti Minuyongan ti Eden. Tulongam dagiti ubbing a mangsapul kadagiti sungbat iti 2 Nephi 2:22–27. Ilawlawag a gapu iti pili da Adan ken Eva, nabendisionantayo nga umay iti daga ken mangusar iti kinawayatayo nga agaramid kadagiti nasayaat a pili ken agbabawi babaen ti Pannubbot ni Cristo no agaramidtayo kadagiti biddut a pili.

• Isurat dagiti balikas ti 2 Nephi 2:27 iti pisarra. Tulongam dagiti ubbing a mangikabesa iti bersikulo babaen ti panangulit iti daytoy ken panagsisinnublat iti panangpugas kadagiti balikas iti tunggal kanito nga ulitenda daytoy. Tulongam dagiti ubbing a mangiladawan no ania ti biag nga awan ti pagpilian. Apay nga agyamanda iti kinawaya nga agpili?

• Awisem dagiti ubbing a mangibinglay iti maysa a padas idi nagaramida iti nasayaat a pili. Kasano ti riknada kalpasan ti panangaramidda iti dayta a pili? Ania ti maaramidtayo a makatulong iti bagbagitayo a pumili iti umno no masulisogtayo nga agaramid iti maysa a banag a biddut? Ibilang ti panangkansion iti maysa a kanta maipapan iti panagaramid kadagiti pili kas iti “Choose the Right” (Hymns, num. 239), ken awisem dagiti ubbing a mangibinglay no ania ti masursuroda manipud ti kanta.

2 Nephi 3:6–24

Maysa a “napili a mammadto” ni Joseph Smith.

Iti 2 Nephi 3 imbasar ni Lehi iti maysa a padto maipapan ken ni Propeta Joseph Smith. Mabalinmo nga usaren daytoy kas maysa a gundaway a mangisuro kadagiti ubbing maipapan iti misionna kadagiti ud-udina nga aldaw.

Dagiti Mabalin nga Aktibidad

• Awisem dagiti ubbing a mangsapul iti 2 Nephi 3:6–24 kadagiti pamugtuan [clue] maipapan iti no siasino a propeta ti maisarsarita. Ilistam dagiti pamugtuan iti pisarra. Apay a maawagan ni Joseph Smith iti maysa a “napili a mammadto”? Ania ti inaramid ni Joseph Smith a “dakkel a kaipapanan kadagiti [kabsatna]”? (bersikulo 7).

• Kantaen ti maysa a himno maipapan ken ni Joseph Smith, kas iti “Panagdayaw iti Daydi Tao” (Pagbatayan ti Ebanghelio, p. 344), . Saludsodem kadagiti ubbing no apay a agyamyamanda para ken ni Propeta Joseph Smith.

Yallukoy ti Panagsursuro iti Pagtaengan

Allukoyem dagiti ubbing a mangkita kadagiti gundaway a nasken a pilienda iti daytoy a lawas. Awisem ida a nakasagana a mangibinglay iti sumaruno a lawas kadagiti napilida nga aramiden ken dagiti nagbanagan dagiti pilida.

Panangpadur-as iti Panangisurotayo

Mabigbig dagiti ubbing ti impluensia ti Espiritu. Isurom kadagiti ubbing a dagiti mariknada a talna, ayat, ken nabara a puso no agsarita wenno agkantada maipapan ken ni Jesucristo ken ti ebangheliona ket naggapu iti Espiritu Santo. Makapatibker dagitoy a rikna kadagiti pammaneknekda.