“Pebrero 10–16. 2 Nephi 6–10: ‘O Anian a Kinaindaklan ti Plano ti Diostayo!’” Umaykayo, Sumurot Kaniak—Para iti Primary: Libro ni Mormon 2020 (2020)
“Pebrero 10–16. 2 Nephi 6–10,” Umaykayo, Sumurot Kaniak—Para iti Primary: 2020
Saan a ti Pagayatak, No Di ti Pagayatam, ti Maaramid, ni Harry Anderson
Pebrero 10–16
2 Nephi 6–10
“O, Anian a Kinaindaklan ti Plano ti Diostayo!”
Bayat ti panangbasam iti 2 Nephi 6–10, agkalikagum a manggun-od ti pannarabay manipud iti Espiritu maipanggep iti no ania ti isuro. Daytoy a balabala ken ti Umaykayo, Sumurot Kaniak—Para kadagiti Indibidual ken Pamilia ket mangparegta kadagiti nayon pay a kapanunotan.
Isuratmo Dagiti Impresionmo
Yawis ti Panagbibinninglay
Allukoyem dagiti ubbing nga agsisinnublatda a mangibinglay iti maysa a banag a nasursuroda maipapan ken ni Jesucristo ken ti Pannubbotna bayat ti panagadal iti 2 Nephi 6–10 nga agmaymaysa wenno kaduada dagiti pamiliada.
Isuro ti Doktrina: In-inaudi nga Ubbing
Isalakannak ni Jesuscristo manipud iti basol ken ipapatay.
Kasano a mausarmo ti 2 Nephi 9:7–13 ken 20–23 a mangtulong kadagiti ubbing a makaawat nga isalakan ni Jesucristo ti tunggal maysa manipud iti ipapatay ken mangaramid a posible ti panagbabawitayo manipud iti basol?
Dagiti Mabalin nga Aktibidad
-
Isaritam kadagiti ubbing ti estoria maipapan iti maysa a tao a natnag iti nauneg nga abut a saan a makaaon. Immay ti maysa a lalaki ket inyaonna daytoy a tao iti abut. Mabalin a kayatmo a mangidrowing iti maysa a ladawan ti daytoy nga estoria iti pisarra wenno yakem daytoy a kaduam dagiti ubbing. Ilawlawag a mayarig daytoy nga abut iti ipapatay ken mayarig ti lalaki a nangtulong iti tao ken ni Jesucristo, a nangisalakan iti amin a tao manipud iti ipapatay babaen iti pannangtedna kadatayo iti sagut ti panagungar. Ibagam kadagiti ubbing nga isu met laeng daytoy a tao ti natnag iti sabali pay nga abut. Iti daytoy a kanito nangted daytoy a nangarayat ti tao iti maysa nga agdan nga usarenna tapno makauli manipud iti abut. Ilawlawag a mayarig daytoy nga abut iti basol ket mayarig ti agdan iti Pannubbot ni Jesucristo, a mangpalugod kadatayo nga agbabawi ken mapakawan kadagiti basbasoltayo. Basaem ti 2 Nephi 9:22–23, ken ibinglaymo ti pammaneknekmo maipapan ken ni Jesucristo ken ti Pannubbotna.
-
Aggigiddan nga agkansion iti maysa a kanta maipapan iti ayat ni Jesucristo, kas iti “I Feel My Savior’s Love” (Children’s Songbook, 74–75). Awisem dagiti ubbing nga agdrowing kadagiti banag a makatulong kadakuada a mangammo nga ay-ayaten ida ti Mangisalakan.
“Pagragsakan ti pusok ti kinalinteg.”
Kasano a maallukoymo dagiti ubbing a sursuruam nga “[agragsak] iti kinalinteg,” wenno sirarag-o nga agtungpal iti Apo? (2 Nephi 9:49).
Dagiti Mabalin nga Aktibidad
-
Ibasam ti 2 Nephi 9:49 kadagiti ubbing, ken tulongam ida nga agsapul ken awaten no ania ti kinuna ni Jacob a mangayat ken manggura isuna. Ibinglaymo dagiti buya nga agar-aramid ti maysa nga ubing iti nasayaat a pili wenno dakes a pili, ket awisem dagiti ubbing nga agtakder no ti pili ket mangyeg iti ragsak ken agtugaw no ti pili ket mangyeg iti kinaliday. Apay a mangyeg kadatayo ti rag-o ti panagpili ti umno? Kaano idi a nariknam a naragsakka gapu ta nagaramidka iti umno a pili?
-
Aggigiddan nga agkansion ti maysa a kanta maipapan iti rag-o a sumangbay manipud iti panagtungpal, kas iti “When We’re Helping” (Children’s Songbook, 198), ken kiddawen kadagiti ubbing a dumngegda iti no ania ti makaparagsak kadatayo. Pagsisinublatem dagiti ubbing nga agpammarang a maysada a nagannak nga agkiddaw kadagiti dadduma nga ubbing nga agaramid iti maysa a banag. Pagpraktisem dagiti dadduma pay nga ubbing nga agtungpalda a sirarag-o.
Isuro ti Doktrina: In-inauna nga Ubbing
Kanayonto a tungpalen ti Apo ti karina.
Ti pannakaawat a tungpalen ti Apo ti karina ket makatulong kadagiti ubbing a mangpatibker iti pammatida Kenkuana ken ti panagtalekda iti panagtungpal kadagiti bilinna.
Dagiti Mabalin nga Aktibidad
-
Kiddawem kadagiti ubbing a mangisarita maipapan kadagiti sumagmamano a kari nga inaramidda, kas iti inkarida iti maysa a gayyem wenno dagiti katulagan nga inaramidda iti panagbuniag. Apay a no dadduma narigat a tungpalen dagiti karitayo? Apay a napateg a tungpalentayo dagiti karitayo? Basaem dagiti sumaganad a ragup ti balikas: “Tungpalento ti Apo a Dios ti katulagan nga inaramidna kadagiti annakna” (2 Nephi 6:12). Ibinglay ti maysa a pagarigan no kasano a tinungpal ti Dios dagiti karina, uray no saan a dimteng a dagus dagiti bendision.
-
Ipakitam ti ladawan ni Jesus iti abay ti ladawan ti maysa nga ubing. Basaem ti 2 Nephi 7:1, ket ilawlawagmo a no isardeng dagiti tao ti Dios ti panagtungpal iti ebangheliona, daytoy ket kasla “insinada” Isuna. Yadayom ti ladawan ti ubing iti ladawan ni Jesus tapno maipakitam a no ditayo tungpalen dagiti katulagantayo, a kas iti katulagan ti panagbuniag, isinatayo dagiti bagbagitayo manipud iti Nailangitan nga Ama ken ti Mangisalakan. (Tapno marebyu dagiti katulagan ti panagbuniag, kitaen iti D&K 20:37.) Kasano a palugodannatayo ti Pannubbot ti Mangisalakan nga ad-adda nga umasideg manen Kenkuana? Bayat ti panangilawlawagmo iti daytoy, awisem dagiti ubbing a pagaassidegen manen dagiti ladawan.
Isalakannak ni Jesucristo manipud iti basol ken ipapatay.
Kasano a mausarmo ti 2 Nephi 9:10–23 a mangtulong kadagiti ubbing a masursuruan a ni Jesucristo ti Mangisalakanda?
Dagiti Mabalin nga Aktibidad
-
Kiddawem kadagiti ubbing a tulongandaka a mangidrowing iti dana iti pisarra, ket awisem ida a mangnayon iti sumagmamano a tubeng wenno barikada iti dana. Aggigiddan a basaen ti 2 Nephi 9:10, ket awisem dagiti ubbing a mangisurat kadagiti tubeng iti dana kadagiti balikas manipud iti daytoy a bersikulo a mangiladawan kadagiti tubeng a mabalin a manglapped kadatayo iti panagsubli iti Dios. Kalpasanna isaritam no kasano a pinarmek ni Jesucristo dagitoy a tubeng para kadatayo (kitaen iti 2 Nephi 9:21–23), ken bayat ti panangisaritam iti daytoy, awisem dagiti ubbing a pugasenda dagiti tubeng.
-
Ipakitam ti ladawan da Adan ken Eva, kas iti Leaving the Garden of Eden (ChurchofJesusChrist.org). Ilawlawag nga idi kinnan da Adan ken Eva ti bunga nga imbaga ti Dios kadakuada a saanda a kanen iti Minuyongan ti Eden, nangyegda iti basol ken ipapatay iti lubong. Ipakita ti maysa a ladawan ni Jesucristo. Tapno matulongam dagiti ubbing a makaawat no kasano a pinarmek ni Jesus ti basol ken ipapatay, isaritam ti estoria maipapan iti tao a natnag iti abut, a masarakan iti umuna a kapanunotan iti panangisuro iti “In-inaudi nga Ubbing” iti daytoy a balabala. Kalpasanna kiddawen kadagiti ubbing a mangidrowing kadagiti ladawan iti daytoy nga estoria wenno mangyakem iti daytoy. Basaem ti 2 Nephi 9:21–23, ket ibinglaymo iti pammaneknekmo ken ni Jesucristo ken ti Pannubbotna.
-
Tulongam ti tunggal ubing a mangsapul iti maysa a kanta maipapan iti Pannubbot ti Mangisalakan iti hymnbook wenno iti Children’s Songbook (makatulong dagiti indeks kadagitoy a libro). Awisem dagiti ubbing a mangbirok ken mangibinglay kadagiti ragup ti balikas manipud iti kanta a mangiladawan no ania ti inaramid ni Jesus para kadatayo. Kiddawem kadagiti ubbing a mangibinglay kadagiti kapanunotan ken riknada maipapan iti Pannubbot ti Mangisalakan, wenno ibinglaymo iti pammaneknekmo.
Mabendisionannakto no surotek ti balakad ti Dios.
Tulongam dagiti ubbing a mangpatibker iti pundasion ti panagtalek iti Dios tapno dumakkel ti pannakaammo ken kabaelanda, agtultuloydanto nga agpannuray Kenkuana ken mangsurot kadagiti balakadna.
Dagiti Mabalin nga Aktibidad
-
Awisem dagiti ubbing a mangibaga kenka maipapan iti maysa a banag nga ammoda unay, kas iti maysa a paborito a libro wenno pagesman. Kiddawem ti maysa nga ubing a mangbasa iti 2 Nephi 9:20, ken mangipaneknek a ti Dios ket “[ammona] ti amin a banag.” Apay a napateg a maawatantayo nga ammo ti Dios ti amin a banag?
-
Kiddawem dagiti ubbing nga iladawan iti panunotda a nangngeganda ti maysa a gayyem nga agkuna a maag dagiti bilin wenno pannursuro ti Simbaan. Ania koma ti makunada iti gayyemda? Apay a napateg nga agtalek iti balakad ti Dios uray no saantayo a maawatan daytoy a naan-anay? Allukoyem dagiti ubbing a mangsapul iti 2 Nephi 9:20, 28–29, and 42–43 para iti tulong iti panagutob ken panangilawlawag kadagitoy a saludsod.
Yallukoy ti Panagsursuro iti Pagtaengan
Tulongam dagiti ubbing a mangpanunot ti maysa a wagas a mabalinda a pakaisuruan kadagiti pamiliada no ania ti nasursuroda maipapan ken ni Jesucristo ken ti Pannubbotna. Kas pagarigan, mabalinda nga usaren ti panid ti aktibidad iti daytoy a lawas tapno mangilawlawag no kasano a tulongannatayo ti Mangisalakan a mangparmek iti basol ken ipapatay.
Panangpadur-as iti Panangisurotayo
Usarem dagiti panid iti aktibidad. Bayat ti pannangaramid dagiti ubbing kadagiti panid ti aktibidad, usarem ti gundaway a pangtulongmo kadakuada a mangkita no kasano a mainaig ti aktibidad kadagiti pagbatayan manipud iti adalen ken no kasano a mayaplikar dagiti pagbatayan iti biagda.