Saan a ti Pagayatak, No Di ti Pagayatam,ti Maaramid, ni Harry Anderson

Pebrero 10–16

2 Nephi 6–10

“O, Anian a Kinaindaklan ti Plano ti Diostayo!”

Bayat ti panangbasam iti 2 Nephi 6–10, utobem no ania ti padpadasen ti Apo nga isuro kenka. Bayat ti panangilasinmo kadagitoy a kinapudno, isuratmo dagitoy ket sikakararag nga ibilangmo no kasano a makapagtignayka iti no ania ti masursurom.

Isuratmo dagiti Impresionmo

Napalabasen ti 40  a tawen manipud ti ipapanaw ti pamilia ni Lehi iti Jerusalem. Addada iti ganggannaet a baro a daga, kagudua ti lubong ti kaadayoda manipud iti Jerusalem ken dagiti natulagan a tao ti Dios. Natay ni Lehi, ket inrugin dagiti an-annabona ti agbalinto a sinigsiglo ti kabayagna a panagsusupanget iti nagbaetan dagiti Nephite—“a mamati kadagiti ballaag ken paltiing ti Dios”—ken dagiti Lamanite, a saan a mamati (2 Nephi 5:6). Kadagitoy a kasasaad, ni Jacob, ti inaudi a kabsat ni Nephi a naordenanen kas maysa a mannursuro dagiti Nephite, ket nagtarigagay a maammuan dagiti natulagan a tao a saanto pulos malipatan ida ti Dios, isu a nasken a saanda a manglipat Kenkuana. Daytoy ti mensahe a sigurado a kasapulantayo iti bukodtayo a lubong, a natagibassit dagiti katulagan ken saan a naawat dagiti paltiing. “Laglagipentayo, … gapu ta saantayo a napagtalaw. … Nabileg dagiti kari Apo,” kinunana (2 Nephi 10:20–21). Kadagitoy a kari, awan ti nain-indaklan ngem ti kari ti “agnanayon a pannakasubbot” a mangparmek iti patay ken impierno (2 Nephi 9:7). “Ngarud,” inkeddeng ni Jacob, “paragsakenyo dagiti pusoyo”! (2 Nephi 10:23).

Dagiti Kapanunotan para iti Bukod a Panagadal iti Nasantuan a Kasuratan

2 Nephi 6–8

Manangngaasi ti Apo kadagiti taona ket ipatungpalnanto dagiti karina.

Tapno matulongan dagiti taona a maawatanda a pasetda ti balay ti Israel ket makapagtalekda iti Dios ken dagiti karina, inadaw ni Jacob ti padto ni Isaias, a naisurat iti 2 Nephi 6–8. Inladawan ni Isaias ti pannakasayyasayya ti Israel ken ti kari ti Mangisalakan a panaguummong ken pannakasubbot dagiti taona. Bayat ti panangbasam, utobem dagiti saludsod a kas iti sumaganad:

• Ania ti masursurok maipanggep iti panangsubbot nga ayat ni Jesucristo kaniak?

• Ania a liwliwa a kayat nga ipaay ti Mangisalakan kadagiti agkalikagum a mangsapul Kenkuana?

• Ania ti maaramidko tapno ad-adda a sipupudno nga “agurayak” para iti Mangisalakan ken dagiti naikari a bendisionna?

2 Nephi 9:1–26

Babaen ti Pannubbotna, isalakan ni Jesucristo ti amin a tao manipud iti pisikal ken naespirituan nga ipapatay.

Ania dagiti balikas wenno imahe a mausarmo a makisarita iti maysa a tao nga agkasapulan unay iti maysa a Mannubbot a mangarayat kadatayo manipud iti ipapatay ken basol? Inaramat ni Jacob dagiti balikas a “nakabutbuteng” ken “nakabutbuteng nga ayup.” Ania ti insuro ni Jacob maipapan iti “dayta nakabutbuteng nga ayup, patay ken impierno” ken ti “panaglibas” nga insagana ti Dios para kadatayo? (2 Nephi 9:10). Bayat ti panangbasam iti 2 Nephi 9:1–26, ibilangmo ti panangmarka iti maysa a maris no ania ti mapasamak kadatayo no awan ti Pannubbot ni Jesucristo. Kalpasanna, iti sabali pay a maris, mabalinmo a markaan no ania ti maawattayo babaen iti Pannubbot ti Mangisalakan. Ania dagiti kinapudno a masarakam maipapan iti Pannubbot ni Jesucristo a makaigapu kenka a mangdayaw iti “sirib ti Dios, ti asi ken paraburna”? (2 Nephi 9:8).

Kitaen met iti “Pannakasubbot, Subboten, Nasubbot,” Pangiwanwan iti Nasantuan a Kasuratan , panid 185.

2 Nephi 9:27–54

Makaasidegak ken ni Cristo ket awatek dagiti nagloriaan a bendision ti Pannubbotna.

Immay ni Jesucristo “ditoy lubong tapno isalakanna ti amin a tao no dumngegda iti timekna” (2 Nephi 9:21; nainayon dagiti nagiray a balikas). Iti sabali a pannao, nasken a natallugodtayo a mangawat kadagiti pangisalakan a bendision nga idiayana. Kalpasan ti panangiladawanna iti naindaklan a plano ti pannakasubbot, nangted ni Jacob iti napapateg a ballaag ken awis, a masarakan iti 2 Nephi 9:27–54, a makatulong kadatayo nga umawat kadagiti bendision ti Pannubbot. Ibilangmo ti panangisurat kadagitoy iti maysa a tsart a kas iti daytoy:

Dagiti Ballaag	Dagiti Awis
Dagiti Ballaag	Dagiti Awis
Dagiti Ballaag	Dagiti Awis

Ania ti mariknam a pakatignayan nga aramiden a kas sungbat kadagitoy a ballaag ken awis?

2 Nephi 10:20, 23–25

Gapu iti sakripisio ni Jesucristo, kabalinak a “liwliwaen” ti pusok.

Ti mensahe ni Jacob ket maysa a naragsak. “Sawek kadakayo dagitoy a banag,” kinunana, “tapno agrag-okayo, ket yangadyo ti uloyo iti agnanayon” (2 Nephi 9:3). Bayat ti panangbasam iti 2 Nephi 10:20, 23–25, ania dagiti masarakam a makaited kenka iti namnama? Ania pay ti nasarakam iti 2 Nephi 9–10 a nakaited kenka iti namnama? Ania iti maaramidmonto a makatulong a manglagip kadagitoy a bambanag no mariknam ti pannakaupay?

(Kitaen met iti Juan 16:33.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panangbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

2 Nephi 8:3–7

No basaem ti 2 Nephi 8:3, mabalinmo ti mangipakita kadagiti ladawan ti maysa a disierto ken maysa a minuyongan. Kasano a pagbalinen ti Apo dagiti disierto ti biagtayo a kas minuyongan? Kadagiti bersikulo 4–7, ania ti ibalakad ti Apo nga aramidentayo tapno maawatna ti rag-o a nailadawan iti bersikulo 3?

2 Nephi 8:24–25

Kasano a papigsaennatayo dagiti makaparegta a balikas ni Isaias kadagiti tattao ti Zion kadagiti panagkagumaantayo nga agbalin a napudpudno a disipulo ni Jesucristo? Kasano a mayarig ti panagriing ken panagkawes iti no ania ti kayat ti Dios nga aramidentayo a naespirituan?

2 Nephi 9:1–26

Ania ti mabalin nga aramiden ti pamiliam tapno nasaysayaat a maawatanda ti kadakkel ti “awan patinggana a pannubbot” ni Jesucristo? (bersikulo 7). Nalabit a makita wenno mapanunotda maipapan kadagiti banag a kasla awan patinggana ti bilangda—dagiti nginabras ti ruot iti maysa a talon, binukbukel ti darat iti igid ti baybay, wenno dagiti bituen iti tangatang. Kasano nga awan patinggana ti Pannubbot ti Mangisalakan? Ania dagiti ragup ti balikas iti 2 Nephi 9 a nangpauneg iti panagyamantayo iti inaramid ti Mangisalakan para kadatayo?

2 Nephi 9:27–44

Nalabit a maysa nga aldaw iti daytoy a lawas mabalin a sukisoken ti pamiliam ti 2 Nephi 9:27–38, nga agsapsapul kadagiti ballaag (a mangrugi iti “ay-ay”). Ania kadagitoy ti kasla naipangpangruna a napateg a paglilinnawagan ti pamiliam? Iti sabali pay nga aldaw, mabalinmo a sukisoken ti 2 Nephi 9:39–44, a mangsapsapul no ania ti inyawis ni Jacob a laglagipen dagiti tattaona.

2 Nephi 9:28–29, 50–51

Ania dagiti sumagmamano a pagarigan ti “ kinapasindayag, ken ti kinarukop, ken ti kinamaag ti tao”? (bersikulo 28). Ania ti maaramidtayo tapno maikkan iti ad-adu pay a pateg dagiti bambanag ti Dios ken basbassit a pateg kadagiti bambanag iti lubong?

2 Nephi 9:45

Mabalin a magustuan ti pamiliam ti panangaramid iti maysa a papel a kawar ken kalpasanna agsisinnublat iti panangikawes iti daytoy ken panangiwagwag iti daytoy. Kasano a mayarig dagiti basol kadagiti kawar? Kasano a tulongannatayo ti Mangisalakan a mangiwagwag kadagitoy?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Panangisurotayo

Agbalin a sidadaan a magun-od ken maasitgan. “Sumagmamano kadagiti kapintasan a kanito tapno makaisuro ket mangrugi iti maysa a saludsod wenno pakaseknan iti puso ti maysa a miembro ti [pamilia]. … Ipakaammom kadakuada babaen kadagiti balikas ken tignaymo a nagagarka a dumngeg kadakuada” ( Panangisuro iti Wagas ti Mangisalakan, 16.

Isalakan ti Mannubbot ti amin nga annak ti Dios “no dumngegda iti timekna” (2 Nephi 9:21. Inagasanna ti Adu a Nadumaduma a Sakit, ni J. Kirk Richards