Ni Lehi ken ti Liahona, ni Joseph Brickey

Enero 27–Pebrero 2

1 Nephi 16–22

“Isaganakto ti Dalan a Pagnaanyo”

Bayat ti panangadalmo iti 1 Nephi 16–22, sapulem dagiti binatog a makaawis iti imatangmo. Kayat ti sumagmamano a tao a marisan dagita a bersikulo iti nasantuan a kasuratan; suratan dagiti dadduma dagiti mardyin. Ibilangmo no kasano nga isuratmonto dagiti impresion a maawatmo.

Isuratmo Dagiti Impresionmo

Bayat ti panagdaliasat ti pamilia ni Lehi nga agturong iti naikari a daga, inaramid ti Apo kadakuada daytoy a kari: “Isaganak ti dalan a pagnaanyo no tungpalenyo dagiti bilinko” (1 Nephi 17:13). Nalawag a, di kaipapanan dayta a kari a nalaka ti panagdaliasat—simmuppiat latta dagiti miembro ti pamilia, natukkol dagiti bai, ken nagkarigatan ket natay dagiti tao, ket nasken a nagaramidda latta iti bapor manipud kadagiti ramit a pagbuangay. Nupay kasta, idi naipasango ti pamilia iti rigat wenno dagiti kasla imposible a trabaho, nabigbig ni Nephi a saan nga adayo ti Apo iti kaano man. Naammuanna a ti Dios “taraonanna [dagiti napudno], ken papigsaenna ida, ken mangisagana iti pamuspusan tapno matungpalda dagiti banag nga imbilinna kadakuada” (1 Nephi 17:3). No masdaawkayo no apay a mapasamak dagiti banag a dakes kadagiti nasayaat a tao a kas ken ni Nephi ken ti pamiliana, masarakam ti nalawag a pannakaammo ken pannakaawat [insights] kadagitoy a kapitulo. Ngem nalabit a napatpateg, makitamto no ania ti aramiden dagiti nasayaat a tao no mapasamak dagiti dakes a bambanag.

Dagiti Kapanunotan para iti Bukod a Panagadal iti Nasantuan a Kasuratan

1 Nephi 16–18

No tungpalek dagiti bilbilin, tulongannakto ti Dios a mangsango kadagiti karit.

Iladawan dagiti kapitulo 16–18 iti 1 Nephi ti sumagmamano a karit a sangsanguen ti pamilia ni Nephi, agraman ti panangtarimaan iti natukkol a bai (kitaen iti 1 Nephi 16:17–32), ti ipapatay ni Ismael (kitaen iti 1 Nephi 16:34–39), pangbangon iti bapor ( kitaen iti 1 Nephi 17:7–16; 18:1–4), ken ti riri iti pamilia (kitaen iti 1 Nephi 18:9–22). Kasano a naigiddiat dagiti sungbat ni Nephi kadagiti sungbat dagiti dadduma pay a miembro ti pamiliana? Ania dagiti bunga dagitoy a sungbat?

Mabalin a makatulong no isuratmo ti no ania ti matakuatam iti maysa a table nga addaan kadagitoy a paulo: “Karit,” “Sungbat ni Nephi,” “Dagiti Sungbat ti Dadduma,” ken “Dagiti Resulta.” Apay iti panagkunam a nakapagtalinaed ni Nephi a napudno idinto a saan dagiti dadduma? Panunotem no kasano a makatulong kenka dagiti pagwadan da Nephi ken ti pamiliana kadagiti karitmo.

1 Nephi 16:10–16, 23–31; 18:11–22

Tarabayennak ti Apo kadagiti babassit ken gagangay a pamuspusan.

Idi inturong ti Dios ti kaamaan ni Lehi iti langalang, dina inikkan ida iti detalyado a plano ti panagdaliasat a mapan iti naikari a daga. Ngem Isu ti nangted ken ni Lehi iti Liahona a mangidalan iti pamiliana iti inaldaw nga agturong iti papananda. Ania ti inted kenka ti Nailangitan nga Ama a mangted iti pannarabay ken panangiturong? Ania iti panagkunam ti kayatna a sawen ti “babaen ti bassit a pamuspusan makaipaay ti Apo iti dadakkel a banag”? (1 Nephi 16:29).

Bayat ti panangbasam iti 1 Nephi 16:10–16, 23–31 ken 18:11–22, ibilangmo ti panagaramid iti maysa a listaan dagiti pagbatayan a mangiladawan no kasano a tarabayen ti Dios dagiti annakna (kas pagarigan, ti 1 Nephi 16:10 ket makaisuro a ti Dios no dadduma tarabayennatayo kadagiti saan a ninamnama a wagas). Anian dagiti padas a napasaramon kadagitoy a pagbatayan?

Kitaen met iti Alma 37:7, 38–47; Doktrina ken Katulagan 64:33–34.

No Nakasaganakayo Saankayto nga Agbuteng, ni Clark Kelley Price

1 Nephi 19:23–24; 20–22

Mabalinko nga “aramaten wenno yarig ti amin a nasantuan a kasuratan” iti bagik.

Nagsurat ni Isaias iti amin nga annak ti Israel, ket nakita ni Nephi a naipangpangruna nga inraman daytoy ti bukodna a pamilia—ken iramannaka daytoy (kitaen iti 1 Nephi 19:23–24). Maipapan kadagiti adaw ni Nephi iti Isaias, kinuna ni Presidente Henry B. Eyring, “binasak dagiti balikas ni Isaias … iti panangipapanko a pinili ni Nephi dagiti paset ti Isaias a siak, nga awanan iti panagdandanag maipapan kadagiti isarita, direkta a maiturong dagitoy iti pusok a kasla makisasao kaniak ti Apo” (“The Book of Mormon Will Change Your Life,” Ensign, Peb. 2004, 10).

Sipapanunot kadagiti balikas ni Presidente Eyring, ibilangmo dagiti saludsod a kas iti sumaganad bayat ti panangbasam iti kapitulo 20–22:

1 Nephi 20:1–9.Ania dagiti ragup ti balikas kadagitoy a bersikulo a mangiladawan kadagiti annak ti Israel? Kasano ti panangiladawanda kada Laman ken Lemuel? Ania dagiti ballaag ken panangyaplikar a masarakam para iti bagim?

1 Nephi 20:17–22.Kasano nga inturong ti Apo dagiti annak ti Israel? Kasano nga inturongna ti pamilia ni Lehi? Kasano nga iturongnaka?

Ania pay ti masarakam iti 1 Nephi 20–22 a a mamagrikna kenka a kasla nakisasao ti Apo kenka? Kasano a matulongannaka ti masao ni Nephi iti kapitulo 22 tapno maawatam dagiti padto ni Isaias?

1 Nephi 21

Asino ti balay ti Israel ken dagiti Gentil?

Ti balay ti Israel ket dagiti an-annabo ti propeta a ni Jacob iti Daan a Tulag, a nangtedan ti Apo iti nagan nga Israel (kitaen iti Genesis 32:28; 35:10; kitaen met iti Pangiwanwan iti Nasantuan a Kasuratan, “Israel”). Nagaramid ti Apo iti sumagmamano a katulagan ken ni Israel, ket maibilang dagiti an-annabona a dagiti natulagan a tao ti Dios. Nupay kasta, dagiti kaputotan iti saan a nabayag, adu kadakuada ti kimmayakay manipud iti Apo ket idi agangay naiwaraswarasda iti sulsuli ti daga.

Kayat a sawen ti termino a Dagiti Gentil kadagitoy a binatog ket mangitudo kadagiti tao nga awan pay kadakuada ti ebanghelio (kitaen Pangiwanwan iti Pangiwanwan iti Nasantuan a Kasuratan, “Gentil”). Insuro ni Isaias a kadagiti ud-udina nga aldaw maitedto ti ebanghelio kadagiti Gentil ket agbalinda a ramit iti panangisuro ken panangummong iti balay ti Israel (kitaen iti 1 Nephi 21:22; 22:8–12; kitaen met iti Isaias 60; 66:18–20).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

1 Nephi 17:1–6, 17–22

Nalabit nga idasig ti pamiliam ti pakaammuan maipapan iti panagbaniaga ni Nephi iti langalang (kitaen iti 1 Nephi 17:1–6) ken ti pakaammuan dagiti kakabsatna a lallaki (kitaen iti 1 Nephi 17:17–22). Apay iti panagkunam nga aggidiat ti pannakakitada kadagiti agpada a pasamak? Ania ti masursurotayo manipud ken ni Nephi maipapan iti addaan iti napudno a pannirigan?

1 Nephi 5:17–22; 18:9–16

Ania dagiti bunga ti apal, sinnuppiat, ken panagdayamudom iti maysa a pamilia? Kasano a maparmektayo dagitoy a problema?

1 Nephi 19:22–24

Inaramat wenno inyarig ni Nephi ti nasantuan a kasuratan iti pamiliana “tapno agbalinda koma a pakairanudan ken pagadalan[da]” (1 Nephi 19:23). Adda dagiti sumagmamano nga estoria iti 1 Nephi 16–18 a mabalin nga usaren wenno yarig ti pamiliam iti bagbagiyo. Nalabit a mayakemyo ti maysa kadagitoy nga estoria ket paglilinnawagan no kasano a mayaplikar daytoy iti pamiliam.

1 Nephi 21:14–16

Kasano a makatulong ti mensahe kadagitoy a bersikulo iti maysa a tao a marikriknanan a nalipatanen?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Bukod a Panagadal

Agpatulongka iti Apo. Naited dagiti nasantuan a kasuratan babaen iti paltiing, ket kasapulantayo ti paltiing tapno sipupudno a maawatan dagitoy. Inkari ti Apo, “No … agsaludsodkayo kaniak a sipapammati, … sigurado a maipakaammo dagitoy a banag kadakayo” (1 Nephi 15:11).

Trinatodak iti Nalabes a Kinaulpit, ni Walter Rane