Pebrero 17–23

2 Nephi 11–25

“Agrag-otayo ken ni Cristo”

Insuro ni Nephi a dagiti balikas ni Isaias “a nalawagda kadagiti amin a napno iti espiritu ti pammadto” (2 Nephi 25:4). Bayat ti panagbasam, kalikagumam a gun-oden ti espiritu ti pammadto babaen ti naespirituan a panangisaganam iti bagim, panangdengngeg iti Espiritu, ken panangisurat kadagiti impresion.

Isuratmo dagiti Impresionmo

Ti panagikitikit kadagiti pinanid a metal ket saan a nalaka, ken bassit ti espasio iti babassit a pinanid ni Nephi. No apay a narigatan ni Nephi a nangikagumaan a mangkopia iti maysa a dakkel a kadagupan dagiti sinurat ni Isaias iti kasuratanna? Inaramidna daytoy “ta siasino man … ti makabasa kadagitoy a balikas mabalin a maitag-ay dagiti pusoda ket agrag-oda” (2 Nephi 11:8). Iti maysa a kaipapanan, ti panangawis a mangbasa kadagiti sinurat ni Isaias ket maysa nga awis nga agrag-o. Makapagragsakka, kas iti inaramid ni Nephi, kadagiti padto ni Isaias maipapan iti pannakaummong ti Israel, ti idadateng ti Mesias, ken ti sangaribu a tawen ti kappia kadagiti nalinteg. Makapagrag-oka nga uray iti aldaw ti “riribuk, ken sipnget,” “nakakita[kayo] iti bagnos” (2 Nephi 18:22; 19:2). Makapagrag-oka ta mabalinmo ti “mangpapusuak iti danum iti bubon ti panangisalakan” (2 Nephi 22:3). Iti sabali a pannao, mabalinmo ti “agrag-o ken ni Cristo” (2 Nephi 25:26).

Dagiti Kapanunotan para iti Bukod a Panagadal iti Nasantuan a Kasuratan

2 Nephi 11–25

Kasano a nasaysayaat a maawatak dagiti pannursuro ni Isaias?

Nabigbig ni Nephi a para iti dadduma, “saan a nalawag dagiti balikas ni Isaias” (2 Nephi 25:4). Awan duadua a mabalin a pudno daytoy para kadagiti saan a pamiliar iti nagkauna a kultura ken heograpia ti Judio kas ken ni Nephi(kitaen iti 2 Nephi 25:6). Ngem nangted met ni Nephi iti balakad a makatulong kadatayo a mangsapul iti kaipapanan dagiti sinurat ni Isaias:

“Yarigmo dagiti balikasna iti”bagim (2 Nephi 11:2).Adu dagiti pannursuro ni Isaias ti aduan kadagiti mabalin a kaipapanan ken pakayaplikaran. Kas pagarigan, dagiti sinuratna maipapan iti pannakasayyasayya ken panagkaykaysa ti Israel ket mabalin a patignayennaka a mangpanunot maipapan iti panagkasapulam a “maummong” nga agsubli iti Mangisalakan.

Ikalikagum a “mapno iti espiritu ti pammadto” (2 Nephi 25:4).Ti kasayaatan a wagas tapno maawatan dagiti padto ni Isaias ket ti panangkalikagum a manggun-od iti pammaregta manipud iti Espiritu. Agkararag para iti naespirituan a pannarabay. Mabalin a dimo maawatan ti amin a banag iti mamimpinsan, ngem makatulong kenka ti Espiritu nga agsursuro iti no ania ti nasken a maammuam para iti biagmo iti agdama.

Mabalin a matakuatam pay a makatulong ti agibasar kadagiti tulong iti panagadal kadagiti nasantuan a kasuratan, agraman dagiti listababa [footnote], dagiti paulo ti kapitulo, Pangiwanwan iti Nasantuan a Kasuratan, ken dadduma pay.

2 Nephi 11:2–8; 25:19–29

“Ti umno a dalan ket mamati ken ni Jesucristo.”

Agpada nga inyam-ammo ken inleppas ni Nephi ti adaw ni Isaias babaen ti panangyebkasna iti pammaneknekna maipapan ken ni Jesucristo (kitaen iti 2 Nephi 11:2–8; 25:19–29). Ania ti makaawis iti imatangmo maipapan iti pammaneknekna? Bayat ti panagadalmo iti daytoy a lawas, panunotem ti maipapan kadagiti tarigagay ni Nephi tapno “magutugot dagiti annak[na] … a mamati ken ni Cristo, ken makikinnaawatan iti Dios” (2 Nephi 25:23), ket isuratmo dagiti binatog a manggutugot kenka a mamati ken mangsurot ken ni Jesucristo.

Mabalin a makatulong a manglagip nga adu dagiti pannursuro ni Isaias maipapan iti Mangisalakan ti nangted iti kaipapanan babaen kadagiti simbolo. Kas pagarigan, mabalin a makitam ti Mangisalakan kadagiti simbolo kas ti apo ti bangkag (kitaen iti 2 Nephi 15:1–7), maysa a bato (kitaen iti 2 Nephi 18:14), ken maysa a lawag (kitaen iti 2 Nephi 19:2). Ania dagiti dadduma pay a simbolo ni Jesucristo a masarakam kadagitoy a kapitulo? Ania ti isuro dagitoy a simbolo kenka maipapan Kenkuana?

2 Nephi 12–13

Dagiti natangig ken nainlubongan ket mapakumbabanto.

Nakita ni Nephi idin a ti kinatangig ti makaigapu ti pannakatnag dagiti taona (kitaen iti 1 Nephi 12:19). Isu a saan a makapasiddaaw nga ibinglay ni Nephi kadagiti taona dagiti naulit a ballaag ni Isaias a maibusor iti kinatangig. Kadagiti kapitulo 12 ken 13, sapulem dagiti balikas nga inusar ni Isaias a pangiladawan iti kinatangig, a kas iti napannakkel ken napalangguad. Kalpasanna mabalinmo a padasen nga isao dagitoy a pammallaag iti bukodmo a balikas, a kasla agsursuratka iti mensahe iti bagim a mangballaag maipapan iti kinatangig.

Kitaen met iti “Chapter 18: Beware of Pride” (Teachings ti Presidents of the Church: Ezra Taft Benson [2014], 229–40).

2 Nephi 12:2–5; 21:9–12; 22; 24:1–3

Iti Milennium, mananamto ti talna dagiti tao ti Dios.

Matakuatamto a makatulong daytoy iti panangiladawanmo iti bagim iti lugar ni Nephi ken dagiti taona. Ipapanmo a pimmanawka iti Jerusalem kasakbayan laeng ti pannakadadaelna (kitaen iti 2 Nephi 25:10), ken ita pasetnaka ti pannakasayyasayya ti Israel. Kasano ti rikna koma ti mangbasa kadagiti pannursuro ni Isaias maipapan iti masakbayan a panakaummong ti Israel ken natalna a Milennium? Kas Santo iti Ud-udina nga Aldaw, naawagantayo a mangtulong nga agummong kadagiti tao ti Dios iti ud-udina nga aldaw kas panagsagana para iti sangaribu a tawen a panagturay.ni Cristo. Bayat ti panangbasam kadagitoy a bersikulo, utobem no kasano a tumultulongka a mangipatungpal kadagiti padto nga iladawanda. Ania ti mariknam a makaparegta nga aramiden a tumulong a mangummong kadagiti tao ti Dios?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

2 Nephi 12:1–3

No napankan iti templo—“ti bantay ti balay ti Apo”—mabalinmo nga iburay iti pamiliam no kasano a tultulongannaka dagiti katulagan iti templo a “magna kadagiti dana [ti Apo].” No saanka pay a nakapan iti templo, ti panangbasa kadagitoy a bersikulo a sangkamaysa ket mabalin a mangparegta iti maysa a panaglilinnawag maipapan iti no kasano a makapagsaganaka para kadagiti bendision ti templo.

2 Nephi 15:18–23

Mapanunot kadi ti pamiliam dagiti kabaruanan a pagarigan dagiti saan a nalinteg a kapanunotan nga iladawan dagitoy a bersikulo? Kasano a maliklikantayo ti pannakaallilaw babaen kadagiti palso a kapanunotan maipapan iti naimbag ken dakes?

2 Nephi 21

No agkasapulan ti pamiliam iti tulong ti pannakaawat iti daytoy a kapitulo (a maipada iti Isaias 11), mabalin a masarakam dagiti nalawag a pannakaammo ken pannakaawat [insights] iti Doktrina ken Katulagan 113:1–6, a nangsungbatan ni Propeta Joseph Smith iti sumagmamano a saludsod maipapan iti Isaias 11. Ania ti masursurotayo maipapan ken ni Jesucristo manipud kadagitoy a bersikulo?

2 Nephi 21:9

Ania dagiti sumagmamano a nalawag a banag a mabalintayo nga aramiden a tumulong a mangpunno iti daga iti “pannakaammo maipapan iti Apo”?

2 Nephi 25:23–26

Kasano a matulongam dagiti miembro ti pamiliam nga “agrag-o ken ni Cristo”? Nalabit a mabalinmo nga awisen ida nga isurat kadagiti papel dagiti banag maipapan iti Mangisalakan a mangyeg kadakuada iti rag-o. Kalpasanna, bayat dagiti masungad a family home evening wenno sangapamiliaan a panagadal iti nasantuan a kasuratan, mabalin a basaen ti maysa a tao ti naisurat iti papel. Mabalin a nayonan dagiti miembro ti pamilia dagiti papel iti unos ti makatawen.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Bukod a Panagadal

Agsapul kadagiti pagtuladan [pattern]. Masarakantayo dagiti pagtuladan kadagiti nasantuan a kasuratan a mangipakita kadatayo no kasano nga agtrabaho ti Apo. Kas pagarigan, iti 2 Nephi 11–25, mabalin a makasapulka kadagiti pagtuladan [pattern] a mangipakita no kasano nga agballaag ken mamakawan ti Apo.

Templo iti Panama City Panama. “Maipasdekto ti balay ti Apo iti tuktok dagiti bantay, … ket pagdudupudopanto dagiti amin a pagilian” (2 Nephi 12:2).