Da Adan ken Eva, ni Douglas Fryer

Pebrero 3–9

2 Nephi 1–5

“Nagbiagkami iti Wagas a Naragsak”

Dagiti nasantuan a kasuratan ti makalukat iti ruangan iti bukod a paltiing. Bayat ti panangbasam iti 2 Nephi 1–5, matakuatam nga adda nalawag a banag a kayat ti Apo nga isuro kenka.

Isuratmo dagiti Impresionmo

No naammuam nga aggibusen ti biagmo, ania dagiti maudi a mensahe a kayatmo nga ibinglay kadagiti kangrunaan nga ay-ayatem? Idi narikna ni propeta Lehi nga asidegen ti panaggibus ti biagna, inummongna dagiti annakna iti maysa a maudi a gundaway tapno agipadto ken mangibinglay kadagiti kinapudno ti ebanghelio nga ipatpategna kadagiti tao nga ipatpategna. Insurona ti wayawaya, panagtulnog, ti Pannakatnag da Adan ken Eva, ti pannakasubbot babaen ken ni Jesucristo, ken rag-o. Saan nga inawat ti amin nga annakna ti maudi a pammaneknekna, ngem kadagiti nangawat a pakairamanan ti minilmilion nga agbasbasa iti agdama—masarakanda iti pammaneknekna dagiti pagbatayan para iti panagbiag “iti wagas a naragsak” (2 Nephi 5:27).

Dagiti Kapanunotan para iti Bukod a Panagadal iti Nasantuan a Kasuratan

2 Nephi 2

Nawayaak a mangpili iti biag nga agnanayon.

Kinuna ni Elder D.Todd Christofferson: “Panggep ti Dios a rumbeng nga agtignay dagiti annakna a mayannurot iti kinawaya nga agpili mainaig iti kinadalus ti dayaw nga intedna kadakuada. … Planona ken pagayatanna a maaddaantayo iti pagrebbengan iti kangrunaan a panangeddeng iti bukodtayo nga akem iti biag” (“Free Forever, to Act for Themselves,” Ensign wenno Liahona, Nob. 2014, 16). Kadagiti pannursurona maipapan iti karbengan nga agpili, nabigbig ni Lehi dagiti napapateg unay a kasasaad a mangaramid a posible ti karbengan nga agpili ken mangragpat iti nadiosan a potensialtayo, agraman dagiti sumaganad:

1. Pannakaammo iti naimbag ken dakes (2 Nephi 2:5)

2. Paglintegan a naited iti sangkataw-an (2 Nephi 2:5)

3. Panangsupadi, dagiti makasulisog a pili (2 Nephi 2:11)

4. Ti bileg nga agtignay (2 Nephi 2:16)

Bayat ti panangbasam iti 2 Nephi 2, ania ti masursurom maipapan iti tunggal maysa kadagitoy a kasasaad ti karbengan a panagpili ken ti pakainaiganda iti tunggal maysa? Ania ti mapasamak iti karbengantayo nga agpili no napukaw ti maysa wenno ad-adu pay kadagitoy a kasasaad? Ania pay ti masursurotayo manipud kadagiti balikas ni Lehi?

2 Nephi 2:22–29

Ti Pannakatnag ken ti Pannubbot ni Jesucristo ket napategda a paset ti plano ti Nailangitan nga Ama.

Ibilang ti adu a tao a maysa a nakaam-ames a pasamak ti Pannakatnag da Adan ken Eva. Nupay kasta, dagiti pannursuro ni Lehi maipapan iti Pannakatnag ti mangipalgak no apay a napateg daytoy a paset ti plano ti Ama para iti agnanayon a panagdur-astayo. Bayat ti panangbasam kadagitoy a bersikulo, kitaem no apay a kasapulan a mapasamak ti Pannakatnag para kadatayo—annak ti Nailangitan nga Ama—tapno dumur-as. Kasano a sinubbotnatayo ti pangsubbot a sakripisio ti Mangisalakan manipud iti Pannakatnag?

Kitaen met iti Moises 5:9–12; 6:51–62; “Fall of Adam and Eve,” Gospel Topics, topics.ChurchofJesusChrist.org

2 Nephi 3:6–24

Naordenan sakbay a nayanak ni Joseph Smith a mangisubli iti ebanghelio.

Linaon ti maudi a paset ti 2 Nephi 3 ti padto nga inted ni Jose ti Egipto maipapan iti maysa a masakbayan a mammadto a mangibinglay iti naganna (kitaen kadagiti bersikulo 14–15)—Joseph Smith. Adu pay ti ibaga daytoy maipapan iti mision ni Joseph Smith. Ania ti ibaga dagiti bersikulo 6–24 nga aramiden ni Joseph Smith, maysa a “napili a mammadto,” a mangbendision kadagiti tao ti Dios? Kasano a nagbalin ti aramid ni Joseph Smith a “dakkel ti pategna” kenka?

Maysa a napateg a paset ti mision ni Joseph Smith ket ti pannakayeg dagiti sinurat dagiti bukel ni Jose, a linaon ti Libro ni Mormon. Ania ti masursurom manipud iti daytoy a bersikulo maipapan ti kinapateg ti Libro ni Mormon?

Kitaen met iti Patarus ni Joseph Smith, Genesis 50:24–38 (iti Pangiwanwan iti Nasantuan a Kasuratan).

Propeta ti Apo, ni David Lindsley

2 Nephi 4:15–35

Makaasidegak iti Dios iti pagkapsutak.

Napukaw ni Nephi ti amana iti nabiit. Naisaad itan kenkuana ti pagrebbengan a mangidaulo iti pamiliana. Nariknana a napalawlawan iti pannulisog ket napukawan iti namnama gapu kadagiti basolna. Uray no maiduma ken ni Nephi dagiti kasasaadmo, mabalin a mainaig ti sumagmamano kadagiti kapanunotan ken riknana a naisurat iti 2 Nephi 4:15–35. Ania ti nakatulong ken ni Nephi kadagiti rigrigatna? Kasano a makatulong kenka dagiti sungbat ni Nephi kadagiti karitna a mangsango kadagiti panagkarigatam?

2 Nephi 5

Masarakan ti ragsak iti panagbiag iti ebanghelio.

Kasano nga ilawlawagmo ti kaipapanan ti ragsak? Insurat ni Nephi a nagbiag dagiti taona “iti wagas a naragsak” (2 Nephi 5:27). Mabalin nga agsapulka kadagiti pili nga inaramid ni Nephi ken dagiti taona a nangiturong iti kinaragsak—dagiti wagas a nangsuporta iti tunggal maysa ken dagiti pamiliada, no ania ti impategda iti komunidadda, ken dadduma pay. Ania ti masursurom a makatulong kenka a mangbangon iti biag nga addaan iti ragsak, kas iti inaramid dagiti tao ni Nephi?

2 Nephi 5:20–21

Ania ti lunod nga immay kadagiti Lamanite?

Iti aldaw ni Nephi ti lunod dagiti Lamanite ket “naisinada iti imatang [ti Apo] … gapu iti kinamanagbasolda” (2 Nephi 5:20–21). Kaipapananna a ti Espiritu ti Apo ket naisina iti biagda. Idi inawat dagiti Lamanite ti ebanghelio ni Jesucristo iti kamaudiananna, “saanen a sinurot ida ti lunod ti Dios (Alma 23:18).

Dinakamat pay ti Libro ni Mormon a dimteng ti marka ti nangisit a kudil kadagiti Lamanite kalpasan a simmina dagiti Nephite kadakuada. Saan a naan-anay a maawatan ti kasasaad ken itsura daytoy a marka. Idi daytoy a marka ti nangilasin kadagiti Lamanite manipud kadagiti Nephite. Idi agangay, gapu ta agpada a naipasango dagiti Nephite ken Lamanite kadagiti panawen ti kinadangkes ken kinalinteg, nagbalin nga awan pakainaiganna ti marka kas pakakitaan iti kasasaad dagiti Lamanite iti sango ti Dios.

Ipanamnama dagiti propeta iti aldawtayo a ti nangisit a kudil ket saan a tanda ti saan a panangparabur ti Dios wenno panangilunod. Awaten ti Simbaan ti pannursuro ni Nephi a ti Apo “awan ti idaddadumana kadagiti umasideg kenkuana, nangisit ken puraw, adipen ken nawaya, lalaki ken babai” (2 Nephi 26:33). Impakdaar ni Presidente Russell M. Nelson: “Inyunay-unay ti Apo ti napateg a doktrinana iti agpapada a gundaway para kadagiti annakna. … Dagiti pagdudumaan iti kultura, pagsasao, katatao, maris ti kudil, ken nasionalidad ket agbalin nga awan kaes-eskanna bayat ti iseserrek dagiti napudno iti dana ti katulagan ket umasideg iti patpatgentayo a Mannubbot” (“President Nelson Remarks at Worldwide Priesthood Celebration” [Hunio 1, 2018], newsroom.ChurchofJesusChrist.org).

Kitaen met iti “Till We All Come in the Unity of the Faith” (video, ChurchofJesusChrist.org).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

2 Nephi 1:13–25

Ania ti isuro dagitoy a bersikulo kadatayo maipapan kadagiti kadakkelan a tarigagay ti nalinteg a nagannak para kadagiti annakna?

2 Nephi 3:6

Basaen nga aggigiddan ti “Mammadto” iti Pangiwanwan iti Nasantuan a Kasuratan. Kasano a nagbalin ni Joseph Smith a mammadto? Apay nga agyamantayo para iti aramid nga impatungpal ni Joseph Smith? (kitaen met iti 2 Nephi 3:6–24).

2 Nephi 4:20–25

Bayat ti panangbasayo iti 2 Nephi 4:20–25 nga aggigiddan, agsardeng kalpasan ti tunggal bersikulo, ken awisem dagiti miembro ti pamilia a mangibinglay idi napadasan wenno nariknada no ania ti inladawan ni Nephi. Ania ti inaramid ti Dios para iti pamiliatayo?

2 Nephi 5

Ania ti sumagmamano a wagas a pagbibiagan ti pamiliam iti “wagas a naragsak”? Bayat ti panagbasa ti pamiliam iti 2 Nephi 5, mabalinyo a paglilinnawagan maipapan kadagiti banag nga impateg dagiti Nephite: pamilia (bersikulo 6), dagiti bilbilin (bersikulo 10), dagiti nasantuan a kasuratan (bersikulo 12), edukasion (bersikulo 15), dagiti templo (bersikulo 16), trabaho (bersikulo 17) ken dagiti takem wenno calling iti Simbaan (bersikulo 26). Maysa a wagas tapno maaramid daytoy ket ti panagsapul kadagiti banag a mangibagi iti sumagmamano kadagitoy a banag ket isaritam maipapan no kasano nga ipakitatayo a, kas kadagiti Nephite, ipategtayo dagitoy isu met laeng a bambanag.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Panangisurotayo

Agbalin a managpaliiw. No ikasom iti no ania ti mapaspasamak iti biag dagiti annakmo, masarakamto dagiti nasayaat a gundaway iti panangisuro. Dagiti masao nga aramiden dagiti annakmo wenno dagiti saludsod a damagenda ket gundaway pay a kanito para iti panagisuro. (Kitaen iti Panangisuro iti Wagas ti Mangisalakan, 16.)

Sumangpet ni Lehi ken dagiti Taona iti Baro a Lubong, ni Clark Kelley Price