“Enero 20–26. 1 Nephi 11–15: ‘Naarmasan iti Kinalinteg ken Bileg ti Dios,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Enero 20–26. 1 Nephi 11–15,” Umaykayo, Sumurot Kaniak—Para kadagiti Indibidual ken Pamilia: 2020
Nasamsam-it Ngem ti Amin a Kinasam-it, ni Miguel Angel González Romero
Enero 20–26
1 Nephi 11–15
“Naarmasan iti Kinalinteg ken Bileg ti Dios”
Mabalinmo kadi a makita ti bagim iti 1 Nephi 11–15? Ania dagiti mensahe nga agbalinto a kapatgan kenka ken iti pamiliam?
Isuratmo dagiti Impresionmo
No addaan ti Dios iti napateg a trabaho nga agpaay iti propetana tapno aramidenna, masansan nga ikkanna dayta a propeta iti napateg a parmata a makatulong kenkuana a makaawat kadagiti panggep ti Dios para kadagiti annakna. Nakita ni Moises ti maysa a parmata iti “daytoy a daga, ken dagiti agindegna, ken kasta met dagiti langit” (Moises 1:36). Nakita ni Juan ti Apostol ti pakasaritaan ti lubong ken ti Maikadua a Yaay ti Mangisalakan (kitaen iti libro ti Apocalipsis). Nakita ni Joseph Smith ti Ama ken ti Anak (kitaen iti Joseph Smith—Pakasaritaan 1:17–18). Nakita ni Lehi ti parmata a mangiladawan ti panagdaliasat a nasken nga aramidentayo nga agturong iti Mangisalakan ken ti ayatna.
Kas nairekord iti 1 Nephi 11–14, nakita ni Nephi ti panagserbi ti Mangisalakan, ti masakbayan ti an-annabo ni Lehi iti naikari a daga, ken ti pagtungpalan dagiti aramid ti Dios.iti ud-udina nga aldaw. Nakatulong daytoy a parmata a mangisagana ken ni Nephi iti aramid a nangibaskag nga immun-una kenkuana, ken kasta met a makatulong daytoy a mangisagana kenka—ta adda trabaho ti Dios nga agpaay kenka nga aramidem iti pagarianna. Maysaka kadagiti “dagiti santo ti simbaan ti Kordero” a nakita ni Nephi, a “naiwaraswaras iti amin a rabaw ti daga; ket naarmasanda iti kinalinteg ken bileg ti Dios iti naindaklan a dayag” (1 Nephi 14:14).
Dagiti Kapanunotan para iti Bukod a Panagadal iti Nasantuan a Kasuratan
Imbaon ti Dios ni Jesucristo kas maysa a panangipeksa iti ayatna.
Tapno matulongan ni Nephi a maawatan ti kaipapanan ti kayo a nakita ti amana, maysa nga anghel ti nangipakitana kenkuana “ti Anak ti Agnanayon nga Ama” (1 Nephi 11:21). Daytoy ti nangiturong ken ni Nephi a mangigudo a ti kayo ket mangibagi ti ayat ti Dios. Ngem saan pay a nalpas ti parmata. Bayat ti panagbasam ken panagutobmo iti 1 Nephi 11, ania ti masarakam a makatulong kenka a maawatan no apay a ni Jesucristo ti kangrunaan a panangipeksa iti ayat ti Dios?
Tapno masursuro ti maipapan iti dadduma pay a simbolo iti tagtagainep ni Lehi, kitaen iti 1 Nephi 11:35–36; 12:16–18; ken 15:21–30.
Kitaen met iti Juan 3:16.
Insagana ti Apo ti dalan para ti Pannakaisubli.
Saan koma a pulos a nagbiag ni Nephi a mangsaksi a kasta unay iti no ania ti nakitana iti parmatana. Apay iti panagkunam a napateg ken ni Nephi a mangammo kadagitoy a banag? Apay a napateg para kenka a mangammo kadagitoy a banag? Nalabit mabalinmo a damagen daytoy a saludsod iti tunggal kanito a panangbasam maipapan iti maysa a banag a nakita ni Nephi ti parmatana.
Dagitoy ti sumagmamano kadagiti pasamak a nakita ni Nephi: ti masakbayan dagiti taona (kitaen iti kapitulo 12), ti pannakasakup ti kontinente ti America ken ti Rebolusion ti America (kitaen iti kapitulo 13:12–19), ti Dakkel nga Ikakalilis (kitaen ti kapitulo 13:20–29), ken ti Pannakaisubli ti ebanghelio (kitaen ti kapitulo 13:32–42).
Ania ti “nabileg ken makarimon a simbaan” a nakita ni Nephi?
Inlawlawag ni Elder Dallin H. Oaks a ti “nabileg ken makarimon a simbaan” nga inladawan ni Nephi ket mangibagi iti “ania man a pilosopia wenno organisasion a mangsupiat iti panamati iti Dios. Ket ti ‘pannakabalud’ nga ikalikagum daytoy a ‘simbaan’ a maisangbay kadagiti santo ket saanto unay a pisikal a pannakaipupok a kas ti pannakabalud dagiti palso a kapanunotan” (“Stand as Witnesses of God,” Ensign, Mar. 2015, 32).
Asino ti tao ti nakita ni Nephi a “timmulong” kenkuana ti Espiritu a anapan “iti adu a danum”?
Nakita ni Nephi a paregtaen ti Espiritu Santo ni Christopher Columbus tapno mapasamak ti nalatak a panagdaliasatna iti America. Idi Marso 14, 1493, insurat ni Columbus maipapan iti daytoy a panagdaliasat: “Dagitoy naindaklan ken nakaskasdaaw a resulta ket awan pakainaiganna iti ania man a napateg kaniak … ; gapu iti dayta a kinaawan ti pannarabay ti sirib ti tao dina maipagpannakkel, impaay ti Espiritu ti Dios dagiti panagkagumaan, agsipud ta sidadaan ti Dios a dumngeg kadagiti kararag dagiti katulonganna a mangipateg kadagiti pammilinna uray pay no ti pannakaannong dagitoy ket kasla imposible “(The Annals of America [Encyclopedia Britannica, Inc., 1976], 1:5).
Isubli ti nasantuan a kasuratan iti ud-udina nga aldaw “dagiti nalawag ken napateg a banag.”
Nakita ni Nephi iti parmata a ti Biblia—nga inladawanna kas “kasuratan dagiti Hudio”—maaddaan iti “adu ti nalawag ken napateg a bambanag a naikkat [ditoy]” (1 Nephi 13:23, 28). Nupay kasta, nakitana met nga isubli ti Dios dagitoy a bambanag babaen kadagiti “sabali a libro”—ti Libro ni Mormon ken dadduma pay a nasantuan a kasuratan iti ud-udina nga aldaw (kitaen iti 1 Nephi 13:39–40). Ania dagiti sumagmamano a napapateg a kinapudno nga itulong kadatayo ti Book of Mormon a nasaysayaat a maawatantayo? Kasano a maigiddiat ti biagmo gapu ta naisublin dagiti nalawlawag ken napatpateg?
Insubli ti Libro ni Mormon dagiti kinapudno ti ebanghelio a napukaw kabayatan ti Ikakalilis iti Kinapudno.
Kitaen met iti “Plain and Precious Truths,” Ensign, Mar. 2008, 68–73; Russell M. Nelson, “The Book of Mormon: What Would Your Life Be Like without It?” Ensign wenno Liahona, Nob. 2017, 60–63.
Sungbatannakto ti Apo no agdawatak a sipapammati nga addaan iti napakumbaba a puso.
Nariknam kadi a kasla dika umaw-awat idi iti bukodmo a paltiing—a di nakisarsarita ti Dios kenka? Ania a balakad ti inted ni Nephi kadagiti kakabsatna a lallaki idi nariknada ti kastoy? Kasano a mayaplikarmo ti balakad ni Nephi iti biagmo, ken no kasano a maaramatmo ti balakadna a mangtulong kadagiti dadduma?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panangbasayo kadagiti nasantuan a kasuratan a sangapamiliaan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno maipaay dagiti kasapulan ti pamiliam. Dagitoy ti sumagmamano a kapanunotan.
1 Nephi 11–14
Bayat ti panangbasa ti pamiliam dagitoy a kapitulo, sagpaminsan nga agsardeng ket agdamag kadagitoy a saludsod kas kadagitoy: Ania ti nakita ni Nephi iti parmatana anangparagsak kenkuana? Ania ti namagliday kenkuana? Apay?
1 Nephi 13:20–42
Tapno makatulong kadagiti miembro ti pamilia a makaawat iti pateg dagiti “nalawag ken napateg” a kinapudno iti Libro ni Mormon, idilig ti silalawag a naisurat a mensahe iti nawarwara a mensahe. Apay a mabalin a kayat ti Nailangitan nga Ama a maisuro a silalawag dagiti kinapudnona? Mabalin a mangiburay dagiti miembro ti pamilia iti pammaneknek maipapan kadagiti sumagmamano a “nalawag ken napateg” a kinapudno a nasursuroda manipud iti Libro ni Mormon.
1 Nephi 4:12–15
Apay a “naarmasan[tayo] iti kinalinteg ken bileg ti Dios” no agbiagtayo a napudno kadagiti katulagantayo iti Dios?
1 Nephi 15:8–11
Ania dagiti padas a mabalin nga ibinglay ti pamiliam no “nagsaludsod[da] iti Apo”? Ania ti masursurotayo manipud iti padas ni Nephi?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Usaren dagiti tulong iti panagadal. Mangted dagiti listababa [footnote], Topical Guide ken dagiti dadduma pay a tulong iti panagadal a kadagiti nalawag a pannakaammo ken pannakaawat [insights] kadagiti nasantuan a kasuratan. Kas pagarigan, ania ti maitulong dagiti footnote kenka tapno maawatam maipapan iti 1 Nephi 14:20–21?
Ti Parmata ni Nephi maipapan ken ni Maria, ni James Johnson