“Disiembre 30–Enero 5. Dagiti pakauna a panid ti Libro ni Mormon: ‘Mainayon a Pammaneknek ken ni Jesucristo,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Disiembre 30–Enero 5. Dagiti pakauna a panid ti Libro ni Mormon,” Umaykayo, Sumurot Kaniak—Para kadagiti Indibidual ken Pamilia: 2020
Disiembre 30–Enero 5
Dagiti pakauna a panid ti Libro ni Mormon
“Mainayon a Pammaneknek ken ni Jesucristo”
Mapabaknang ti panagadalmo iti Libro ni Mormon no irugim a basaen dagiti panid a sakbay ti 1 Nephi. Ania dagiti mabirokam a mangpatibker iti pammaneknekmo?
Isuratmo dagiti Impresionmo
Sakbay a madanonmo ti 1 Nephi kapitulo 1, nalawag a ti Libro ni Mormon ket saan a gagangay a libro. Iladawan ti pakauna a panid ti pakasaritaan ti napalabas daytoy nga awan iti dadduma—pakairamanan dagiti panagbisita dagiti anghel, maysa a kadaanan a kasuratan dagiti naikali iti adu a siglo iti igid ti turod, ken maysa a di am-ammo a mannalon nga agipatpatarus iti kasuratan babaen iti bileg ti Dios. Ti Libro ni Mormon ket saan laeng a pakasaritaan dagiti nagkauna a sibilisasion ti America. Linaonna ti “pakabuklan ti agnanayon nga ebanghelio” (pakauna iti Libro ni Mormon), ket ti Dios a Mismo ti nangiturong iti yaayna—no kasano a naisurat, kasano a nataginayon, ken no kasano a nagbalin a sidadaan a magun-od iti panawentayo. Bayat ti panagbasam iti Libro ni Mormon iti daytoy a tawen, ikararagam daytoy, ket ipakatmo iti biagmo dagiti pannursursurona, awisem ti bilegna iti biagmo, ket mariknam a sawen, kas iti inaramid dagiti Tallo a Saksi iti pammaneknekda, “Nakaskasdaaw iti imatang[ko].”
Dagiti Kapanunotan para iti Bukod a Panagadal iti Nasantuan a Kasuratan
Panid ti paulo ti Libro ni Mormon
Mabalin a patibkeren ti Libro ni Mormon ti pammatik ken ni Jesucristo.
Mangipaay ti panid ti paulo ti Libro ni Mormon iti ad-adu pay ngem iti paulo laeng. Malaksid kadagiti dadduma pay a bambanag, ilistana dagiti sumagmamano a panggep iti daytoy sagrado a kasuratan. Sapulem dagitoy a panggep, ket kalpasanna bayat ti panagadalmo iti Libro ni Mormon itoy a tawen, isuratmo dagiti binatog a mariknam a makaipatungpal kadagitoy a panggep. Kas pagarigan, ania dagiti binatog a makatulong tapno maallukoyka “a ni Jesus isu ti Cristo, ti Agnanayon a Dios”?
Ti Libro ni Mormon “balabalaenna ti plano ti pannakaisalakan.”
Ti plano ti pannakaisalakan isu ti plano ti Nailangitan nga Ama a mangtulong kadagiti annakna nga agbalin a naitan-ok, kas Kenkuana, ket mapadasanda ti rag-o a marikriknana (kitaen iti 2 Nephi 2:25–26). Aramiden a posible daytoy plano ti Pannubbot ni Jesucristo, ken tunggal doktrina, ordinansa, katulagan, ken bilin nga inted ti Dios ket nairanta a mangtulong tapno maipatungpal daytoy a plano.
No kayatmo a mawatan ti plano ti pannakaisalakan, awanen ti sabali pay a nasaysayaat a libro a basaen no saan a ti Libro ni Mormon. Maipapan daytoy iti plano ti Dios—nga agar-aramat iti nadumaduma a nagnagan—nasurok a 20 a daras. Bayat ti panagadalmo iti daytoy a tawen, kitaem no kaano a nadakamat wenno naiparangarang ti plano ti Dios ken no ania ti sasawen ti Libro ni Mormon maipanggep iti daytoy.
Ditoy ti maysa nga aktibidad a pangrugiam. Basaem dagiti sumaganad a binatog, ket ilista dagiti agduduma a nagan a naited iti plano ti Dios: 2 Nephi 9:13; 11:5; ken Alma 12:32–34;24:14; 41:2; 42:15–16. Ania ti isingasing kenka ti tunggal maysa kadagitoy a nagan maipanggep iti plano ti Ama?
“Ti Pammaneknek dagiti Tallo a Saksi”; “Ti Pammaneknek dagiti Walo a Saksi”
Makapagbalinak a saksi ti Libro ni Mormon.
Ipaneknek kenka ti Espiritu Santo a pudno ti Libro ni Mormon, uray no saanmo pay a nakita dagiti balitok a pinanid kas iti pannakakita dagiti Tallo a Saksi ken Walo a Saksi. Kasano a pinatibker dagiti pammaneknekda ti pammaneknekmo? Kasano a “maitedmo ti [naganmo] iti lubong, a mangsaksi iti lubong” no ania ti ammom maipanggep iti Libro ni Mormon? (“Ti Pammaneknek dagiti Walo a Saksi”).
“Ti Pammaneknek ni Propeta Joseph Smith”
Maysa a milagro ti idadateng ti Libro ni Mormon.
No adda maysa nga agdamag kenka no naggapuan ti Libro ni Mormon, ania ti makunam? Kasano nga iladawam ti aramid ti Dios iti panagyegna ti Libro ni Mormon? Kasano nga inladawan ni Joseph Smith ti isasangbay ti Libro ni Mormon?
“Ti Pammaneknek ni Propeta Joseph Smith”
Kasano a naipatarus ti Libro ni Mormon?
Naipatarus ti Libro ni Mormon babaen iti “sagut ken bileg ti Dios.” Saantayo nga ammo dagiti adu a detalye maipanggep iti namilagruan a proseso ti panagipatarus, ngem ammotayo a ni Joseph Smith ket maysa a mammadto, a tinulongan dagiti instrumento nga insagana ti Dios: dua a nalitnaw a bato a maawagan iti Urim ken Tummim ken sabali pay a bato a maawagan iti bato a pagipadto. Nakita ni Joseph kadagitoy a bato ti Ingles a patarus dagiti kitikit iti pinanid, napigsa a binasana ti patarus kabayatan nga inrekord daytoy ti para surat. Pinaneknekan dagiti tunggal para surat ni Joseph nga adda ti bileg ti Dios iti pannakaipatarus daytoy sagrado nga aramid.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan a kaduam ti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Panid ti paulo ti Libro ni Mormon
Nalabit nga irugi ti pamiliam ti listaan dagiti bersikulo manipud iti Libro ni Mormon a nangpatibker iti pammatim “a ni Jesus ti Cristo” ket nayonam dayta iti makatawen. Mabalin a naimbag pay daytoy nga oras a mangaramid iti plano ti pamilia a mangbasa iti Libro ni Mormon: Kaano ken sadino ti pagummonganyonto nga agbasa? Kasano a makiramanto ti tunggal miembro ti pamilia? Para iti nayon a tulong, kitaen iti “Dagiti Kapanunotan a Mangpadur-as iti Sangapamiliaan a Panagadal iti Nasantuan a Kasuratan” iti rugi daytoy a resource.
Pakauna iti Libro ni Mormon
Ti pagbatayan a bato ket maysa a bato a naporma a kasla sinsil iti rabaw ti arko a mangseggep a sangkamaysa kadagiti dadduma pay a bato. Tapno matulongam ti pamiliam a maawatanda no kasano a ti Libro ni Mormon ti “pagbatayan a bato ti relihiontayo,” mabalinmo ti agaramid wenno agdrowing iti arko nga adda pagbatayan a bato iti rabawna. Ania ti mapasamak no maikkat ti pagbatayan a bato? Ania ti mapasamak no awan kadatayo ti Libro ni Mormon? Kasano a mapagbalintayo ti Libro ni Mormon a pagbatayan a bato ti pammatitayo ken ni Jesucristo?
Ti Libro ni Mormon ti pagbatayan a bato ti relihiontayo.
“Ti Pammaneknek dagiti Tallo a Saksi”; “Ti Pammaneknek dagiti Walo a Saksi”
Mabalin nga isurat dagiti miembro ti pamiliam dagiti bukodda a pammaneknek maipanggep iti Libro ni Mormon, ipirmada dagiti naganda sadiay, ken agpanunot kadagiti wagas a mangibinglay kadagiti pammaneknekda kadagiti dadduma.
“Ti Pammaneknek ni Propeta Joseph Smith”
Iti pakaammuan ni Joseph Smith, ania dagiti pakakitaan a mabirokantayo a nairaman ti Dios iti idadateng ti Libro ni Mormon?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Maysa a naipadto a kari. Imbaga ni Presidente Russell M. Nelson, “Ikarik a bayat ti panangutobyo iti maadalyo [iti Libro ni Mormon], maluktanto dagiti tawa ti langit, ket maawatyonto dagiti sungbat kadagiti saludsodyo ken pannakaiwanwan ti bukodyo a biag” (“The Book of Mormon: What Would Your Life Be Like without It?” Ensign wenno Liahona, Nob. 2017, 62–63).
Iyawat ni Moroni dagiti Balitok a Pinanid, ni Gary L. Kapp