Disiembre 30–Enero 5

Dagiti pakauna a panid ti Libro ni Mormon

“Mainayon a Pammaneknek ken ni Jesucristo”

Irugim ti panagsagana a mangisuro babaen ti panagbasam iti panid ti paulo ken pakauna iti Libro ni Mormon; ti pammaneknek dagiti Tallo a Saksi, ti Walo a Saksi, ken ni Propeta Joseph Smith; ken “Ababa a Panangilawlawag maipapan iti Libro ni Mormon.” Utobem no kasano a maparegtam dagiti ubbing nga agsursuro manipud iti Libro ni Mormon.

Isuratmo Dagiti Impresionmo

Yawis ti Panagbibinninglay

Awisem dagiti ubbing a mangibinglay kadagiti estoria nga ammoda manipud iti Libro ni Mormon, nga usaren dagiti ladawan 67–86 iti Libro ti Arte ti Ebanghelio wenno dadduma pay a ladawan nga adda kenka.

Isuro ti Doktrina: In-inaudi nga Ubbing

Panid ti paulo ti Libro ni Mormon

Makatulong kaniak ti Libro ni Mormon a maaddaan iti pammaneknek ken ni Jesucristo.

Tulongam dagiti ubbing a makaawat a ti panggep iti Libro ni Mormon ket mangipaneknek ti maipapan ken ni Jesucristo.

Dagiti Mabalin nga Aktibidad

• Ingatom ti maysa a kopia ti Libro ni Mormon, ken itudom ti subtitulo, Mainayon a Pammaneknek ken ni Jesucristo. Pagsisinublatem dagiti ubbing a mangisao iti, “Mainayon a pammaneknek ken ni Jesucristo.” Isaritambiit kadagiti ubbing no kasano a pinapigsa ti Libro ni Mormon ti pammatim ken ni Jesucristo.

• Isaritam ti maysa nga estoria manipud iti Libro ni Mormon a mangisuro maipapan ken ni Jesucristo, kas iti pakaammuan maipapan ken ni Samuel a Lamanite a mangipadpadto ken ni Cristo (kitaen iti Helaman 14–16), ti Mangisalakan a mangbembendision kadagiti ubbing (kitaen iti 3 Nephi 17), wenno ti Kabsat ni Jared a kumitkita ken ni Jesucristo (kitaen iti Ether 2–3). Makatulong dagiti kapitulo manipud iti Dagiti Estoria iti Libro ni Mormon. Ilawlawag kadagiti ubbing no ania ti nasursuroda maipapan ken ni Jesus manipud kadagitoy nga estoria. Ibagam kadakuada a makasursurodanto ti adu a banag maipapan ken ni Jesucristo manipud iti Libro ni Mormon daytoy a tawen.

• Agkansion iti kanta maipapan iti Libro ni Mormon, a kas iti “Book of Mormon Stories” (Children’s Songbook, 118). Aggigiddan nga agkansion iti daytoy a kanta iti sumagmamano a daras, ken pagsisinublatem dagiti ubbing nga agiggem iti maysa a ladawan ti Mangisalakan bayat ti panagkantayo.

Pakauna iti Libro ni Mormon

Ti Libro ni Mormon ti pagbatayan a bato [keystone] ti relihiontayo.

Inlawlawag ni Presidente Thomas S. Monson a: “No pudno [ti Libro ni Mormon]—ket sipapasnek a paneknekak nga isu— ni Joseph Smith ti propeta iti dayta a panawen … , Ti Simbaan ni Jesucristo dagiti Santo iti Ud-udina nga Aldaw ti Simbaan ti Apo iti rabaw ti daga, ken naisublin ti nasantuan a priesthood ti Dios” (“The Power of the Book of Mormon,” Ensign wenno Liahona, Mayo 2017, 86–87).

Dagiti Mabalin nga Aktibidad

• Ibasam kadagiti ubbing ti sumaganad a palawag ni Joseph Smith iti pakauna iti Libro ni Mormon: “Ti Libro ni Mormon [isu] ti pagbatayan a bato [keystone] ti relihiontayo.” Ilawlawag a kas maysa a pagbatayan a bato a mangtengngel iti dadduma pay a paset ti maysa nga arko, ti pammaneknektayo maipapan iti Libro ni Mormon ti mangtengngel ken mangpatibker iti pammaneknektayo maipapan iti dadduma pay a banag, a kas ken ni Joseph Smith ken ti ebanghelio.

• Awisem ti maysa a naganak ti maysa kadagiti ubbing tapno mangibinglay no kasano a nagun-odna ti pammaneknekna iti Libro ni Mormon. Basaem a kaduam dagiti ubbing ti awis iti gibus ti pakauna iti Libro ni mormon, ken tulongam ida a mangyakem kadagiti banag a mabalinda nga aramiden a manggun-od ti bukodda a pammaneknek.

“Ti Pammaneknek ni Propeta Joseph Smith”

Naited kadatayo ti Libro ni Mormon babaen iti bileg ti Dios.

Makatulong kadagiti ubbing ti pammaneknek ni Joseph Smith tapno maawatanda ti nadiosan a panggep ti Libro ni Mormon.

Dagiti Mabalin nga Aktibidad

• Isaritam biit kadagiti ubbing ti estoria ti idadateng ti Libro ni Mormon kas nailadawan iti “Ti Pammaneknek ni Propeta Joseph Smith.” Mabalin nga usarem ti “Kapitulo 1: No Kasano a Naalatayo ti Libro ni Mormon” (Dagiti Estoria iti Libro ni Mormon, 2–4 ). Tulongam dagiti ubbing a mangyakem iti estoria iti sumagmamano a daras bayat iti panangisaritam manen iti daytoy.

• Ipakitam kadagiti ubbing ti maysa a ladawan ti kitikit manipud kadagiti balitok a pinanid. Ilawlawag a tinulongan ti Dios ni Joseph a mangipatarus kadagitoy a kitikit iti balikas a mabasaken maawatantayo.

  

  Impatarus ni Joseph Smith dagiti kitikit a naisurat kadagiti balitok a pinanid.

Isuro ti Doktrina: In-inauna nga Ubbing

Panid ti paulo ti Libro ni Mormon

Tulongannak ti Libro ni Mormon a maadaan iti pammati ken ni Jesucristo.

Laglagipem a ti panggepmo iti panangisuro kadagiti ubbing maipapan iti Libro ni Mormon isu ti mangbangon iti pammatida iti Mangisalakan.

Dagiti Mabalin nga Aktibidad

• Bingayem ti klase iti sumagmamano a paris. Awisem ti tunggal paris a magbasa iti maikadua a parapo ti panid ti paulo ti Libro ni Mormon, a mangsapsapul iti maysa a banag a mangibaga kadakuada no ania ti panggep nga aramiden ti Libro ni Mormon. Kalpasanna awisem iti tunggal paris a mangibinglay iti klase.

• Tulongam dagiti ubbing a mangsapul iti panid ti paulo ti ragup dagiti balikas a “iti pannakaguyugoydagiti Hudio ken Gentil a ni Jesus isu ti Cristo.” Kasano a maguyugoynatayo ti Libro ni Mormon a ni Jesus isu ti Cristo? Awisem ida a mangibinglay iti maysa nga estoria manipud iti Libro ni Mormon a nangpapigsa iti pammatida ken ni Cristo, wenno ibinglaymo ti maysa a bukodmo.

Pakauna iti Libro ni Mormon

Ti Libro ni Mormon ti pagbatayan a bato [keystone] ti relihiontayo.

Ti pananggun-od iti pammaneknek maipapan iti Libro ni Mormon ket mangtulongto kadagiti ubbing a mangammo a ti Simbaan ni Jesucristo dagiti Santo iti Ud-udina nga Aldaw ti pudno a Simbaan ti Dios.

Dagiti Mabalin nga Aktibidad

• Kiddawem kadagiti ubbing nga agpammarang a saanmo pay pulos idi a nangngeg ti maipapan iti Libro ni Mormon. Awisem ida nga agtinnulong iti maysa a kapareha tapno mangpanunot kadagiti wagas a pangilawlawaganda kenka no ania daytoy ken no sadino ti naggapuanna, babaen iti panangusar kadagiti detalye manipud iti pakauna. Kalpasanna pagsisinnublatem ti tunggal paris a iti panangisuro kenka. Makattulong met ti ladawan iti The Bible and the Book of Mormon Testify of Christ (ChurchofJesusChrist.org).

• Awisem ti maysa nga ubing a mangbasa iti palawag ni Joseph Smith iti maikanem a parapo ti pakauna. Babaen iti panangusar iti panid ti aktibidad itoy a lawas, ilawlawagmo no kasano a tenglen ti pagbatayan a bato ti maysa nga arko. Maibatay iti maudi a parapo iti pakauna, ania dagiti sumagmamano a dadduma pay a banag nga ammotayo no addaantayon iti pammaneknek a pudno ti Libro ni Mormon?

“Ti Pammaneknek dagiti Tallo a Saksi”; “Ti Pammaneknek dagiti Walo a Saksi”

Makapagbalinak a saksi iti Libro ni Mormon.

Kasano a matulongam dagiti ubbing a manggun-od ken mangibinglay kadagiti bukkodda a pamaneknek maipapan iti Libro ni Mormon?

Dagiti Mabalin nga Aktibidad

• Awisem dagiti ubbing a mangiladawan iti maysa a banag a nakitadan nga awan pay iti sabali a nakakita iti klase. Ilawlawag a linaon ti Libro ni Mormon dagiti pammaneknek ti 11 a tattao malaksid ken ni Joseph Smith a nakakita kadagiti balitok a pinanid a nakaipatarusan ti Libro ni Mormon. Aggigiddankayo a mangbasa kadagiti pammaneknek. Apay a kayat dagiti saksi a maammuan dagiti dadduma a tao maipapan kadagiti pammaneknekda?

• Saludsodem no asino man kadagiti ubbing ti mangayat a mangibinglay no kasano a naammuanda a pudno ti Libro ni Mormon. Aggigiddankayo a mangbasa iti Moroni 10:3–5, ket awisem ti tunggal ubing a mangbasa iti Libro ni Mormon iti daytoy a tawen ken manggun-od wenno mangpapigsa iti pammaneknekna a pudno daytoy. Isaritam kadagiti ubbing no kasano ti pannakagun-odmo iti pammaneknekmo maipapan iti Libro ni Mormon.

Yallukoy ti Panagsursuro iti Pagtaengan

No mabalin, siguraduem nga addaan ti tunggal ubing iti kopia ti Libro ni Mormon, ket awisem ida a mangrugi iti panangbasa iti daytoy iti bukodda ken kadua dagiti pamiliada.

Panangpadur-as iti Panangisurotayo

Agkalikagumka a manggun-od iti bukkodmo a pammaregta. Imbes a panangkitam kadagitoy a balabala a kas pangiturong a nasken a surotem bayat ti panangisurom, usarem dagitoy kas maysa a paggapuan dagiti kapanunotan a mangpataud iti bukodmo nga inspirasion bayat ti panangutobmo kadagiti kasapulan dagiti ubbing a sursuruam.