Nasamsam-it ngem iti Amin a Kinasam-it, ni Miguel Anghel González Romero

Enero 20-26

1 Nephi 11–15

“Naarmasan iti Kinalinteg ken Bileg ti Dios”

Basaem ti 1 Nephi 11–15 a pampanunotem dagiti ubbing a sursuruam, ket isuratmo dagiti ania man nga impresion a maawatmo.

Isuratmo Dagiti Impresionmo

Yawis ti Panagbibinninglay

Mangipakita iti ladawan ti parmata ni Lehi iti kayo ti biag, ket awisem dagiti ubbing a mangibinglay no ania ti malagipda a nasursuro maipapan iti daytoy a parmata iti napalabas a lawas. Saludsodem ida no ania man ti baro a nasursuroda maipapan iti daytoy manipud idin.

Isuro ti Doktrina: In-inaudi nga Ubbing

1 Nephi 11:16–33

Imbaon ti Nailangitan nga Ama ni Jesucristo iti daga gapu ta ay-ayatennak.

Nakita ni Nephi iti biag ken panagministro ni Jesucristo iti maysa a parmata. Utobem no ania ti masursuro dagiti ubbing iti klasem maipapan iti Mangisalakan manipud iti 1 Nephi 11.

Dagiti Mabalin nga Aktibidad

• Ikkam ti tunggal ubing iti maysa a ladawan a mangiladawan iti maysa kadagiti pasamak manipud iti biag ti Mangisalakan a naipadto iti 1 Nephi 11:20, 24, 27, 31, ken 33 (kitaen iti Libro ti Arte ti Ebanghelio, num. 30, 35, 39, 42, 57). Bayat ti panangbasam kadagitoy a bersikulo, kiddawen kadagiti ubbing a mangingato iti ladawanda no mangngeganda ti bersikulo a maipada iti daytoy.

• Isaritam kadagiti ubbing maipapan kadagiti sumagmamano a banag a nasursuro ni Nephi nga aramidento ni Jesucristo bayat ti panagbiagna (kitaen iti 1 Nephi 11:16–33), ken ipakitam kadakuada dagiti ladawan ti sumagmamano kadagitoy a pasamak (kitaen, kas pagarigan, iti Libro ti Arte ti Ebanghelio, num. 41, 46, 47, 49, 56, 57, 58, 59). Ibinglaymo no ania ti inaramid ti Mangisalakan para kenka. Mangipakita kadagiti ladawan a makatulong kadagiti ubbing a mangpanunot kadagiti wagas a pakaibinglayantayo iti ayat ti Dios (kitaen iti Libro ti Arte ti Ebanghelio, num. 109, 110, 115).

1 Nephi 13:26–29, 35–36, 40

Isuro ti Libro ni Mormon dagiti napateg a kinapudno.

Apay nga agyamyamanka iti Libro ni Mormon? Ibilangmo no kasano a maibinglaymo ti pammaneknekmo maipapan iti Libro ni Mormon kadagiti ubbing.

Dagiti Mabalin nga Aktibidad

• Mangidrowing ti maysa a ladawan iti pisarra, ken awisem dagiti ubbing a mangbaliw wenno mangikkat kadagiti paset ti ladawan tapno agbaliw ti kita daytoy. Tulongam ida a makaawat a, kas iti daytoy a ladawan, nabalbaliwan ken naikkatan dagiti sumagmamano a bambanag iti Biblia iti panaglabas ti panawen. Basaem dagiti paset iti 1 Nephi 13:40 a mangisuro no kasano a ti Libro ni Mormon (nga inawagan ni Nephi a “dagitoy maudi a kasuratan”) ket makatulong kadatayo a maawatan dagiti “nalawag ken napateg a banag” a napukaw manipud iti Biblia.

• Ilemmeng iti lawlaw ti siled dagiti ladawan a mangibagi kadagiti kinapudno ti ebanghelio a nailawlawag iti Libro ni Mormon, a kas iti panagbuniag, ti sakramento, ken ti panagungar. Awisem dagiti ubbing a mangsapul kadagitoy a ladawan. Ilawlawag nga insubli ti Libro ni Mormon dagiti kinapudno ti ebanghelio a napukaw.

1 Nephi 15:23–25

Mangted kaniak iti bileg dagiti balikas ti Dios.

Kasano a mausarmo ti imahe ti landok a pagkaptan [iron rod] a mangisuro kadagiti ubbing maipapan iti pigsa, talged, ken bileg ti balikas ti Dios?

Dagiti Mabalin nga Aktibidad

• Ipakita ti ladawan ti tagainep ni Lehi, kas iti maysa iti balabala iti napalabas a lawas iti Umaykayo, Sumurot Kaniak—Para kadagiti Indibidual ken Pamilia. Awisem dagiti ubbing a mangsapul iti landok a pagkaptan iti ladawan, ken tulongam ida a makaawat no kasano a masalaknibannatayo ti ikakapet iti balikas ti Dios (kitaen iti 1 Nephi 15:23–24). Ikkam dagiti ubbing ti maysa a banag a maipada iti landok a pagkaptan nga iggamanda, kas iti maysa a tubo wenno kayo, bayat ti panangbasam iti bersikulo 24. Sadino ti pakasarakantayo iti balikas ti Dios? Ania ti maaramidtayo tapno agbalin a paset ti inaldaw a panagbiagtayo ti balikas ti Dios?

• Tulongam dagiti ubbing a mangkolor ken mangileppas iti panid ti aktibidad iti daytoy a lawas. Kasanotayo a “kumpet a naimbag” iti balikas ti Dios? (1 Nephi 15:24).

Isuro ti Doktrina: In-inauna nga Ubbing

1 Nephi 11:16–33

Imbaon ti Nailangitan nga Ama ni Jesucristo iti daga gapu ta ay-ayatennak.

Naaddaan iti parmata ni Nephi a nakasaksianna iti plano ti Nailangitan nga Ama para kadatayo, ket kangrunaan a paset ni Jesucristo iti dayta a parmata.

Dagiti Mabalin nga Aktibidad

• Awisem dagiti ubbing a mangiparis kadagiti bersikulo manipud iti 1 Nephi 11:16–33 kadagiti ladawan a mangiladawan kadagiti iladawan dagiti bersikulo (a kas 1 Nephi 11:20, 24, 27, 29, 31, 33; kitaen iti Libro ti Arte ti Ebanghelio, num. 30, 35, 38, 39, 42, 57). Ania ti masursuro dagiti ubbing maipapan ken ni Cristo manipud kadagiti bersikulo ken ladawan?

• Kiddawen kadagiti ubbing no apay a napateg kadakuada ni Jesucristo. Agkansion iti kanta maipapan iti Mangisalakan,   ket saludsodem kadagiti ubbing no ania ti isuro daytoy a kanta maipapan ken ni Jesus. Awisem dagiti ubbing a maaddaan iti panawen kabayatan ti lawas a mangpanunotmaipapan ken ni Jesucristo ken mangibinglayda kadagiti padasda iti sumaruno a lawas iti klase.

Naglaon ti Libro ni Mormon iti ebanghelio ni Jesucristo.

1 Nephi 13:26–29, 35–36, 40

Isuro ti Libro ni Mormon dagiti napateg a kinapudno.

Ania ti ammo dagiti ubbing maipapan iti Ikakalilis iti Kinapudno? Kasano a matulongam ida a makaawat iti kinapateg ti Libro ni Mormon iti pannakaisubli dagiti kinapudno ti ebanghelio a napukaw kabayatan ti Ikakalilis iti Kinapudno?

Dagiti Mabalin nga Aktibidad

• Aggigidan a basaen ti 1 Nephi 13:26–29 ket awisem dagiti ubbing a mangsapul no ania ti mapasamak no awanan dagiti tao kadagiti “nalawag ken napateg” a kinapudno ti ebanghelio. Kasano nga insubli ti Apo dagiti napukaw a kinapudno? (kitaen kadagiti bersikulo 35–36, 40). Awisem dagiti ubbing a mangibinglay kadagiti pammaneknekda maipapan kadagiti kinapudno a nasursuroda manipud iti Libro ni Mormon, wenno ibinglaymo ti bukodmo.

• Apay a makatulong a maaddaan iti ad-adu ngem maysa a saksi? Mangidrowing iti maysa a tuldek [dot] iti pisarra, ket suratam daytoy iti Biblia, ket awisem ti tunggal ubing a mangidrowing iti nadumaduma a deretso a linia a lumabes iti tuldek a mangiladawan a dagiti pannursuro iti Biblia ket mabalin a maipatarus iti adu a wagas no awanen ti sabali a libro malaksid iti Biblia. Punasem dagiti linia, ket mangidrowing iti maikadua a tuldek [dot] a nasuratan iti Libro ni Mormon. Awisem ti maysa nga ubing a mangidrowing iti deretso a linia a lumabes iti agpada a tuldek [dot] a mangipakita nga adda maysa laeng a wagas a mangipatarus ti ebanghelio no aggiddan a mausar ti Biblia ken ti Libro ni Mormon.

• Tulongam dagiti ubbing a mangikabesa ti maikatlo a pagannurotan ti pammati.

1 Nephi 15:23–25

Ti balikas ti Dios ti mangted kaniak iti bileg a mangkedked iti sulisog.

Kasano a matulongam dagiti ubbing a sursuruam a mangpapigsa kadagiti pammaneknekda maipapan kadagiti nasantuan a kasuratan? Utobem daytoy a saludsod bayat ti panangbasam iti 1 Nephi 15:23–25, ket usarem dagiti aktibidad iti baba a mangsuplemento kadagiti bukodmo a kapanunotan.

Dagiti Mabalin nga Aktibidad

• Kiddawen kadagiti ubbinga manggupgop iti parmata maipapan iti kayo ti biag (kitaen iti 1 Nephi 8; 11). Ania ti nangigawid kadagiti tao a mangdanon iti kayo? Ania ti nangtulong kadakuada a mangdanon iti daytoy? Awisem dagiti ubbing a mangbasa iti 1 Nephi 15:23–25. Kasano a nakatulong ti landok a pagkaptan kadagiti tao tapno malasatanda dagiti nangisit nga angep? Kasano a makatulong kadatayo ti panagbasa iti balikas ti Dios a mangkedked iti sulisog ken kasipngetan ita nga agdama?

• Leppasen ti panid ti aktibidad a kadua dagiti ubbing. Idinto nga ar-aramidenda daytoy, kiddawem ida a pagsasaritaan maipapan kadagiti sumagmamano a sulisog a pakaipaspasanguanan dagiti ubbing. Kasano a malagipda ti kumpet iti landok a pagkaptan iti inaldaw?  

Yallukoy ti Panagsursuro iti Pagtaengan

Allukoyem dagiti ubbing a mangipakita kadagiti pamiliada dagiti “landok a pagkaptan” nga inaramidda manipud iti panid ti aktibidad ket ibinglay no kasano a kumpetda iti landok a pagkaptan babaen ti panangbasa kadagiti nasantuan a kasuratan.

Panangpadur-as iti Panangisurotayo

Agusar iti arte tapno maawis a makiraman dagiti agad-adal. No isurom kadagiti dagiti ubbing ti estoria iti nasantuan a kasuratan, mangsapulka kadagiti wagas a mangtulong kadakuada a mangiladawan iti panunotda iti daytoy. Mabalinmo nga usaren dagiti ladawan, video, puppet, costume, ken dadduma pay.