Ni Lehi nga Agdaldaliasat iti Asideg ti Nalabaga a Baybay, ni Gary Smith

Enero 6–12

1 Nephi 1–7

“Mapanak ket Aramidek”

Bayat ti panangbasam iti 1 Nephi 1–7, panunotem dagiti bersikulo, padas, saludsod, ken dadduma pay a resources a mariknam a naparegtaka nga usaren a mangisuro kadagiti ubbing. Mabalin nga ibagay dagiti aktibidad iti daytoy a balabala para kadagiti in-inauna nga ubbing wenno in-inaudi nga ubbing.

Isuratmo Dagiti Impresionmo

Yawis ti Panagbibinninglay

Mabalin a nangngeganen ti sumagmamano kadagiti ubbing iti klasem ti maipanggep wenno nabasadan dagiti padas ti pamilia ni Nephi iti 1 Nephi 1–7. Awisem ida a mangibinglay no ania ti ammoda. No saanda unay nga ammo ti maipapan kadagiti padas ni Nephi, ikkam ida ti gundaway iti gibus iti adalen a mangiburay no ania ti nasursuroda.

Isuro ti Doktrina: In-inaudi nga Ubbing

1 Nephi 2:16

Kasapulak ti bukodko a pammaneknek.

Namati ni Nephi kadagiti balikas ti amana gapu ta addaan isuna iti tarigagay a maammuan para iti bagina ken nagkararag isuna iti Apo. Tulongam dagiti ubbing a makasursuro manipud iti pagwadanna.

Dagiti Mabalin nga Aktibidad

• Mangitugot iti maysa a sarado a kahon nga addaan iti maysa a ladawan ti Mangisalakan iti uneg, ket ikkam ti tunggal ubing iti gundaway a mangtakuat mismo no ania ti adda iti uneg ti kahon. Ibagam kadagiti ubbing a tinarigagayan ni Nephi a maaddaan iti bukodna a pammaneknek a binilin ti Apo ti pamiliana a pumanaw iti Jerusalem. Kiddawen kadagiti ubbing a dumngeg no ania ti kinuna ni Nephi tapno magun-odna iti bukodna a pammaneknek bayat ti panangbasam iti 1 Nephi 2:16. Paneknekam a kas nasken a luktan ti tunggal maysa kadatayo ti kahon tapno maammuan no ania ti adda iti unegna, kasapulantayo amin a dumawat iti Dios tapno magun-od ti bukodtayo a pammaneknek.

• Mangitugotka kadagiti ladawan wenno banag a mangibagi kadagiti banag a mabalin a sapsapulen dagiti ubbing a paneknekan, kas iti maysa a ladawan ni Jesucristo, ti Libro ni Mormon, wenno maysa a ladawan ti sibibiag a propeta. Awisem dagiti ubbing nga agpili ti maysa a ladawan wenno banag ket ibinglayda dagiti pammaneknekda maipapan iti daytoy a banag iti klase.

1 Nephi 2:2–4; 3–4

Tulongannakto ti Dios a mangtungpal kadagiti bilinna.

Kasano a mausarmo dagitoy a pakaammuan a makatulong kadagiti ubbing a makaawat a tulongannatayo ti Dios a mangtungpal kadagiti bilinna, uray no kasla marigatanda nga agtungpal?

Dagiti Mabalin nga Aktibidad

• Ibasam ti 1 Nephi 2:2–4 kadagiti ubbing, ket iparang ti sumagmamano a ladawan dagiti aytem a mabalin nga intugot ti pamilia ni Lehi iti langalang, a kas iti tolda, dagiti ules, ken dagiti bai ken pana. Kiddawem kadakuada nga iladawanda iti panunotda no kasano ti mabalin a mariknada no nasken a panawanda ti pagtaenganda ken mapan iti langalang. Ania ti kiddawen ti Apo nga aramidentayo a mangtungpal Kenkuana ita nga agdama?

• Tulongam dagiti ubbing a mangkolor ken manggetteng kadagiti papel a ladawan iti panid ti aktibidad iti daytoy a lawas; kalpasanna kiddawem kadakuada nga usarenda dagiti papel a ladawan tapno manggupgop iti pakaammo ni Nephi ken dagiti kakabsatna iti panangalada kadagiti pinanid a gambang (kitaen iti 1 Nephi Nephi 3–4). Ti kanta a “Nephi’s Courage” (Children’s Songbook, 120–21) ken “Kapitulo 4: Dagiti Pinanid a Gambang” (Dagiti Estoria iti Libro ni Mormon, 8–12; kitaen met ti maitutop a video iti ChurchofJesusChrist.org) ket makatulong kenka a mangisarita iti daytoy nga estoria.

• Usarem dagiti ladawan 103–15 iti Libro ti Arte ti Ebanghelio tapno matulongan dagiti ubbing a mangpanunot kadagiti banag nga imbilin ti Apo nga aramidentayo. Kasano a mabendisionantayo no tungpalentayo Isuna? Tulongam ida a mangarkos kadagiti tsapa nga isuot nga agkuna iti Mapanak ken aramidek dagiti banag nga imbilin ti Apo (1 Nephi 3:7). Ulitenyo nga aggigiddan ti ragup ti balikas iti sumagmamano a daras.

1 Nephi 3:19–21; 5:19–22

Dakkel a gameng dagiti nasantuan a kasuratan.

Kasano a maparegtam dagiti ubbing a mangipateg kadagiti nasantuan a kasuratan, wenno ti balikas ti Dios?

Dagiti Mabalin nga Aktibidad

• Ipakita kadagiti ubbing ti maysa a banag (wenno maysa a ladawan ti maysa a banag) a napateg unay kenka. Pagsaritaan no kasano a tratuem daytoy ken mangaywan iti daytoy. Ilawlawag a para iti pamilia ni Lehi, napateg unay dagiti nasantuan a kasuratan, a kas maysa a gameng.

• Awisem dagiti ubbing a mangtulong kenka a mangisalaysay wenno mangyakem iti no ania ti inaramid ni Nephi ken dagiti kakabsatna tapno manggun-od kadagiti pinanid a gambang: nagbaniagada iti atiddog a distansia, pinanawanda dagiti balitok ken pirakda, ket naglemmengda iti kueba tapno maisalakan dagiti biagda. Basaen ti 1 Nephi 5:21. Apay a napateg unay dagiti nasantuan a kasuratan iti pamilia ni Lehi? Kasano ti panangtratotayo kadagiti nasantuan a kasuratan a kas maysa a gameng?

Ni Lehi nga Umaw-awat kadagiti Pinanid a Gambang, ni Clark Kelley Price

Isuro ti Doktrina: In-inauna nga Ubbing

1 Nephi 2:16, 19–20

Maaddaanak iti bukodko a pammaneknek.

Ania ti masursurom manipud iti pagwadan ni Nephi maipapan iti pananggun-od iti bukodmo a pammaneknek? Kasano a matulongam dagiti ubbing a makasursuro manipud iti pagwadanna?

Dagiti Mabalin nga Aktibidad

• Kiddawen kadagiti ubbing a mangsukisok iti 1 Nephi 2:16, 19 tapno maammuan no kasano a nagun-od ni Nephi ti pammaneknek kadagiti balikas ti amana. Awisem ida a mangisurat kadagiti inaramid ni Nephi kadagiti bloke wenno sabali pay a bambanag ket kalpasanna mangbukel iti maysa a banag babaen kadagitoy tapno mangibagi iti no kasano a makatulong kadatayo dagita a banag a mangpatibker iti maysa a pammaneknek.

• Isaritam kadagiti ubbing no kasano a nagun-odmo ti pammaneknekmo iti ebanghelio. Awisem ida a mangibinglay iti maipada a padas a napasarandan, ket allukoyem ida a mangsurot iti pagwadan ni Nephi tapno itultuloyda a mangpatibker kadagiti pammaneknekda. Kasano a makatulong kadatayo ti maaddaan iti bukodtayo a pammaneknek?

1 Nephi 3:1–8

Makapagtungpalak nga addaan iti pammati kadagiti bilin ti Apo.

Ti panangpadur-as iti maysa nga ugali kas ken ni Nephi ket makatulongto kadagiti ubbing no kiddawen ti Apo kadakuada a mangaramid iti maysa a banag a kasla narigat.

Dagiti Mabalin nga Aktibidad

• Bingayem ti klase iti dua a grupo. Awisem ti maysa a grupo a mangbasa iti sungbat da Laman ken Lemuel ken ni Lehi (kitaen iti 1 Nephi 3:2–5) ken ti sabali pay a grupo a mangbasa iti sungbat ni Nephi (kitaen iti 1 Nephi 3:2–4, 7). Awisem ti maysa nga ubing nga agpammarang a ni Lehi ket kiddawem kadagiti dadduma nga ubbing nga agpammarang nga agsubli iti Jerusalem tapno alaen dagiti pinanid a gambang. Awisen ti tunggal grupo a sumungbat iti bukodda a balikas a kas isuda dagiti tao a basbasaenda. Ania dagiti dadduma pay a banag nga imbilin ti Dios nga aramidentayo? Kasano a makapagbalintayo a kas ken Nephi?

• Aggigiddan a mangkansion iti maysa a kanta maipapan iti panagtungpal, a kas iti “Nephi’s Courage” wenno “Keep the Commandments” (Children’s Songbook, 120–21, 146–47), ket kiddawen kadagiti ubbing a dumngegda kadagiti ragup ti balikas a mangisuro iti no kasano ti nasken a sungbattayo iti Apo.

1 Nephi 3–4

Iturongnakto ti Espiritu Santo bayat ti panagkalikagumko a mangaramid iti pagayatan ti Apo.

Sinurot ni Nephi ti Espiritu, “a dina ammo idi damo dagiti banag a rumbeng nga aramiden[na]” (1 Nephi 4:6). Kasano a matulongam dagiti ubbing a sursuruam nga agkalikagum a manggun-od iti pannarabay ti Espiritu Santo?

Dagiti Mabalin nga Aktibidad

• Awisem dagiti ubbing a mangyakem iti estoria ni Nephi ken dagiti kakabsatna a mangpadpadas a mangala kadagiti pinanid a gambang (kitaen iti 1 Nephi 3–4). Awisem ti maysa nga ubing a mangbasa i1 Nephi 4:6, ket kiddawem iti klase a dumngegda iti no ania ti inaramid ni Nephi a nangipalubos kadakuada nga agballigi.

• Ibinglaymo kadagiti ubbing ti sumagmamano a pagarigan dagiti banag a kayat ti Dios nga aramidenda, a kas iti pannakigayyem iti maysa a tao iti eskuela a kasla malidlidayan, panangpakawan iti maysa a kabsat, wenno panangibaga iti pudno kalpasan ti panagaramid iti maysa a biddut. Kiddawen kadagiti ubbing a mangibinglay no kasano a makatulong ti Espiritu Santo kadakuada kadagita a kasasaad. Kasano a maawistayo ti Espiritu Santo a mangtulong kadatayo nga agtungpal iti Dios?

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti padas iti pamiliada idi nabendisionanda gapu iti panangtungpalda kadagiti bilin. Allukoyem ida a mangkiddaw kadagiti miembro ti pamiliada a mangibinglay kadagiti maipada a padas.

Panangpadur-as iti Panangisurotayo

Tulongam dagiti babassit nga ubbing a makasursuro manipud kadagiti nasantuan a kasuratan. Tapno matulongan dagiti babassit nga ubbing a makasursuro manipud kadagiti nasantuan a kasuratan, agpokuska iti maysa a bersikulo iti nasantuan a kasuratan wenno uray maysa laeng a kangrunaan a ragup ti balikas. Mabalinmo nga awisen dagiti ubbing a tumakder wenno ingato dagiti imada no mangngegda daytoy a balikas wenno ragup ti balikas. (Kitaen met iti Panangisuro iti Wagas ti Mangisalakan, 21.)