Ni Lehi ken ti Liahona, ni Joseph Brickey

Enero 27–Pebrero 2

1 Nephi 16–22

“Isaganakto ti Dalan a Pagnaanyo”

Mangisuro kadagiti kinapudno dagiti makaparegta nga estoria iti 1 Nephi 16–22 a mabalin a mangbendision kadagiti ubbing iti klasem. Basaem dagitoy a kapitulo ket isuratmo dagiti impresion a maawatmo.

Isuratmo dagiti Impresionmo

Yawis ti Panagbibinninglay

Isuratmo dagiti sumaganad a balikas iti pisarra, wenno mangipakita kadagiti ladawan dagitoy: ti Liahona, ti bai, ken ti bilog. Mangawis iti tallo nga ubbing a mangpidut iti maysa kadagiti balikas wenno ladawan ken mangbinglay iti paset ti estoria ni Nephi a mangitampok iti dayta a banag. Mangted iti tulong no kasapulan.

Isuro ti Doktrina: In-inaudi nga Ubbing

1 Nephi 16:10, 28–29; 18:8–13, 20–22

Matarabay ken maiturongnak ti Apo.

Isurom kadagiti ubing nga uray no maipasangoda kadagiti narigat a karit, matarabay ida ti Apo (kitaen iti 1 Nephi 16:29).

Dagiti Mabalin nga Aktibidad

• Mangipakita kadagiti ubbing iti maysa a kompas, maysa a mapa, wenno maysa a banag a mangtulong kadatayo a mangsarak iti dalantayo, ket ilawlawagmo no kasano nga usaren dagitoy a ramit. Idilig dagitoy a ramit iti Liahona bayat ti pananggupgopmo iti estoria iti 1 Nephi 16:10, 28–29 ken 18:9–13, 20–22. Ilawlawag nga idi saan a nagtungpal ti pamilia ni Lehi, saan a gimmana ti Liahona (kitaen met iti 1 Nephi 18:9–12, 20–22). Ania ti mangtulong kadatayo ita nga agdama a mangsarak iti dalantayo nga agsubli iti Nailangitan nga Ama?

• Mangitugot iti maysa a kahon a naglaon ti sumagmamano a pamugtuan [clue] a mangiladawan iti lokasion wenno iti lawlaw ti pasdek ti simbaan. Usarem ti kahon ken dagiti pamugtuan a mangibagi iti Liahona, ket pagsisinublatem dagiti ubbing a mangpili kadagiti pamugtuan ket pugtu anda no ania ti lokasion. Kalpasanna aggigiddan nga agdaliasat nga agturong iti lokasion. Ilawlawag a no ipakitatayo iti pammati ken surotentayo ti direksion nga ited ti Apo kadatayo, tulongannatayonto a makapagsubli Kenkuana (kitaen iti Alma 37:38–42). Kasano ti panangtarabay kadatayo ti Nailangitan nga Ama iti panangdaliasattayo nga agsubli Kenkuana?

1 Nephi 16:14–32

Makapagbalinak a nasayaat a pagwadan iti pamiliak.

Makatulong a makita dagiti ubbing ti pannakilangen ni Nephi iti pamiliana kabayatan ti narigat a panawen nga uray no ubbingda pay laeng, makapagbalinda a pagwadan kadagiti pamiliada.

Dagiti Mabalin nga Aktibidad

• Dutokan ti tunggal ubing a mangidrowing iti ladawan ti maysa a banag manipud iti estoria maipapan iti natukkol a bai ni Nephi (kitaen iti 1 Nephi 16:14–32), a kas ken ni Nephi, maysa a bai,wenno ti Liahona. Kalpasanna usarem dagiti ladawan a mangisarita iti estoria iti klase, ken pagsisinublatem dagiti ubbing a mangaramid iti kasta met laeng. Kasano a makapagbalintayo a kas ken ni Nephi no mapadpadasan dagiti pamiliatayo ti narigat a panawen?

• Awisem ti tunggal ubbing a manggetteng iti sirkulo a papel ken mangidrowingda ti naliday a rupa iti maysa a bangir ken ti naragsak a rupa iti sabali pay a bangir. Bayat ti panangisaritam maipanggep iti natukkol a bai ni Nephi, awisem ida a mangusar kadagiti rupa a mangipakita no kasano ti pannakarikna ti pamilia ni Nephi kabayatan ti nadumaduma a paset ti estoria. Kasano a tinulongan ni Nephi nga agbalin a naragsak ti pamiliana? Ania ti mabalin nga aramidentayo tapno agbalin a naragsak ti pamiliatayo?

1 Nephi 17:7–19; 18:1–4

Matulongannak ti Nailangitan nga Ama a mangaramid kadagiti naririgat a banag.

Kas ken ni Nephi, agsursuro dagiti ubbing a sursuruam nga agaramid kadagiti banag a kasla narigat. Makatulong kadakuada ti padas ni Nephi a mangammo a tulonganto ida ti Nailangitan nga Ama no agkiddawda.

Dagiti Mabalin nga Aktibidad

• Isaritam kadagiti ubbing ti estoria ni Nephi a mabilbilin a mangaramid iti bilog, babaen ti panangusar iti 1 Nephi 17:7–19 ken 18:1–4. Mabalinmo pay nga usaren ti “Kapitulo 7: Panangbangon iti Bapor” (Dagiti Estoria iti Libro ni Mormon, 21–22) . Mabalin a mangpatibker ti panid ti aktibidad iti daytoy a lawas iti pagbatayan a tinulongan ti Nailangitan Nga Ama ni Nephi, ket tulongannatayonto.

•   Ania ti nakatulong ken ni Nephi a maaddaan iti tured idi idi linais isuna dagiti kakabsatna iti panangpadasna a mangaramid iti bilog?

Isuro ti Doktrina: In-Inauna nga Ubbing

1 Nephi 16:10, 28–29; 17:13–15; 18:8–13, 20–22

No agtungpalak kadagiti bilin, tarabayennak ti Apo.

Usarem ti pakasaritaan ti pamilia ni Lehi a matartarabayda iti Liahona tapno maipakita kadagiti ubbing no kasano a tarabayento ti Dios ida bayat ti panangikarigatanda nga agaramid iti pagayatanna.

Dagiti Mabalin nga Aktibidad

• Mangpili iti maysa wenno ad-adu pay kadagiti sumaganad a binatog nga ibasa kadagiti ubbing: 1 Nephi 16:10, 28–29; 17:13–15; ket 18:8–13, 20–22. Kiddawem kadakuada a mangsapul iti no ania ti nasken nga aramidentayo tapno makagun-od iti pannarabay ken panangiturong manipud iti Dios ket paglilinnawagan no ania ti masursuroda.

• Kalpasan ti panangrebyu kadagiti estoria iti 1 Nephi 16–18, manginterbyu iti sumagmamano nga ubbing a kasla nakipagdaliasatda iti pamilia ni Lehi. Mabalinmo a saludsoden kas kadagitoy a saludsod: Apay nga agyamankayo iti Liahona? Ania ti kasapulan nga aramidenyo tapno aggunay ti Liahona? (kitaen iti 1 Nephi 16:28–29.) Awisem ti klase a pagsasaritaanda dagiti banag nga impaay ti Apo a mangiwanwan kadatayo iti panawentayo.

• Kiddawen kadagiti ubbing nga ibilangda no kasano a mabalinda nga usaren ti estoria ti Liahona tapno makatulong iti maysa a gayyem nga agkasapulan nga agaramid iti maysa a napateg a pangngeddeng. Isingasing a malaksid iti 1 Nephi 16:10, 26–31 ken 18:9–22, mabalinda pay nga agibasar iti Alma 37:38–44. Ibinglaymo ti maysa a padas a nangtulongan kenka ti Nailangitan nga Ama iti narigat a panawen, wenno kiddawem dagiti ubbing a mangibinglay iti maysa a padas. Ania ti nasken nga aramidentayo tapno umawat iti tulongna?

1 Nephi 16:14–39; 18:1–5

Makaipaay iti nasayaat nga impluensia ti ugalik ken dagiti pilik iti pamiliak.

Naindaklan a bendision iti pamilia ni Nephi ti pammatina idi maipasangoda kadagiti pannubok. Kasano a matulongam dagiti ubbing a makasursuro manipud iti pagwadanna?

Dagiti Mabalin nga Aktibidad

• Kiddawen dagiti ubbing a mangidrowing kadagiti ladawan wenno banag a mangiladawan iti estoria maipapan iti natukkol a bai ni Nephi (kitaen iti 1 Nephi 16:14–39). Irebyum ti estoria kadakuada, no kasapulan. Bayat ti panangibinglayda kadagiti drowingda, tulongam ida a mangilasin kadagiti wagas a nakabendisionan ti pamilia ni Nephi gapu iti napudno a pammatina. Awisem dagiti ubbing a mangutob kadagiti pannubok a pakaipaspasanguanda wenno dagiti pamiliada. Ania ti mabalinda nga aramiden tapno masurot ti pagwadan ni Nephi?

• Aggigiddan a mangbasa iti sumagmamano a bersikulo manipud iti 1 Nephi 16:21–32. Isaritam dagiti sumagmamano a panggep a tun-oyen a mabalin nga adda kadagiti pamilia dagiti ubbing, kas iti masansan a family home evening wenno sangapamiliaan a panagkararag. Kasano a makatulong dagiti ubbing iti pamiliada a mangragpat kadagitoy a panggep a tun-oyen? Awisem ida nga agplano nga agaramid iti maysa a banag a makatulong kadagiti pamiliada a mangragpat kadagiti panggep a tun-oyenda ita a lawas.

1 Nephi 19:22–24

Mayarigko dagiti nasantuan a kasuratan iti biagko.

Tulongam dagiti ubbing a mangkita a dagiti pakaammuan kadagiti nasantuan a kasuratan ket nangnangrunada pay ngem kadagiti estoria—naglaonda kadagiti pagbatayan a mangbendision kadagiti biagda.

Dagiti Mabalin nga Aktibidad

• Kiddawem iti maysa nga ubing a mangbasa iti 1 Nephi 19:22–24 iti napigsa, ket kiddawen kadagiti ubbing no ania iti panangkunadada ti kaipapanan ti “yarig amin a nasantuan a kasuratan” iti bagbagitayo. Tulongam ida a mangtakuat iti no kasano nga inyarig ni Nephi ti maysa a pakaammuan iti nasantuan a kasuratan iti padasna iti panangalana kadagiti pinanid a gambang (kitaen iti 1 Nephi 4:1–4, kitaen met iti Exodo 14). Kasano a nakatulong ken ni Nephi ken dagiti kakabsatna a lallaki ti pananglaglagip iti daytoy nga estoria?

• Irebyum ti sumagmamano kadagiti estoria a nasursuro dagiti ubbing maipanggep ken ni Lehi ken ti pamiliana manipud iti 1 Nephi, ket awisem ida a mangibinglay iti no ania ti nasursuroda manipud kadagitoy nga estoria. Tulongam ida a mangpanunot kadagiti kasasaad iti biagda a mabalin a maipada kadagitoy nga estoria. Kas pagarigan, mabalin a mangipalagip kadakuada ti panangkiddaw ti Apo ken ni Nephi nga agaramid iti barko maipapan kadagiti panawen idi kasapulanda nga aramiden ti maysa a banag a narigat ket kiniddawda ti tulong ti Apo.

Yallukoy ti Panagsursuro iti Pagtaengan

Awisem dagiti ubbing a pumilida iti maysa nga estoria manipud iti 1 Nephi 16–22 ken ibinglayda kadagiti pamiliada no kasano a mabalinda a “yarig” dayta nga estoria iti biagda.

Panangpadur-as iti Panangisurotayo

Agusar kadagiti estoria. Makatulong kadagiti ubbing dagiti estoria a makaawat kadagiti pagbatayan ti ebanghelio gapu ta maipakitada no kasano a tinungpal dagiti dadduma dagita a pagbatayan.