“Enero 13–19. 1 Nephi 8–10: ‘Umay ken Mairanud iti Bunga,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Enero 13–19. 1 Nephi 8–10,” Umaykayo, Sumurot Kaniak—Para kadagiti Indibidual ken Pamilia: 2020
Tagtagainep ni Lehi, ni Steven Lloyd Neal
Enero 13–19
1 Nephi 8–10
“Umay ken Mairanud iti Bunga”
Bayat ti panangbasam iti 1 Nephi 8–10 ibilang no ania dagiti nalawag a mensahe manipud iti parmata ni Lehi ti maiyaplikar kenka. Isuratmo dagiti naespirituan nga impresion a maawatmo kadagiti nasantuan a kasuratam, maysa a kuaderno wenno daytoy a resource.
Isuratmo dagiti Impresionmo
Ti tagtagainep ni Lehi—nga adda ti landok a pagkaptan, ti angep ti sipnget, nalawa a pasdek, ken kayo nga addaan iti “nalaus a sam-itna” a bunga—ket maysa a makaparegta nga awis nga umawat kadagiti bendision ti ayat ken pangsubbot a sakripisio ti Mangisalakan. Para ken ni Lehi, nupay kasta, daytoy a parmata ket maipapan met iti pamiliana: “Ket adtoy, gapu iti banag a nakitak, adda kalintegak nga agrag-o iti Apo gapu ken ni Nephi ken kasta met ni Sam. … Ngem adtoy, Laman ken Lemuel, madanaganak unay gapu kadakayo” (1 Nephi 8:3–4). Idi nalpas ni Lehi iti panangiladawanna ti parmatana, nagpakaasi isuna kada Laman ken Lemuel a “tapno imdenganda dagiti balikasna, ta bareng kaasian ida ti Apo” (1 Nephi 8:37). Uray no naadalmon iti namin-adu ti parmata ni Lehi, ita a panawen panunotem ti maipapan iti daytoy iti wagas nga inaramid ni Lehi—panunoten ti maysa a tao nga ay-ayatem. Bayat ti panangaramidmo, ti pagtalgedan ti landok a pagkaptan, ti peggad iti nalawa a pasdek, ken ti nalaus a sam-it ti bunga ti maaddaan iti baro a kaipapanan. Ket maawatamto a nasaysayaat ti “amin a rikna ti naasi a nagannak” a nakaawat iti daytoy a nakallalagip a parmata.
Dagiti Kapanunotan para iti Bukod a Panagadal iti Nasantuan a Kasuratan
Iturongnak ti balikas ti Dios iti Mangisalakan ket tulongannak a makarikna iti ayatna.
Idiaya ti parmata ni Lehi ti awis tapno makita no sadino ti ayanmo—ken no sadino ti papanam—iti bukodmo a panagdaliasat a mangammo iti Mangisalakan ken makarikna iti ayatna. Insuro ni Presidente Boyd K. Packer: “Mabalin a pampanunotem nga awan ti naisangayan a kaipapanan para kadakayo ti tagtagainep wenno parmata ni Lehi, ngem adda. Addaka iti dayta; addatayo amin iti dayta (kitaen iti 1 Nephi 19:23). Ti tagtagainep wenno parmata ni Lehi iti landok a pagkaptan [iron rod] ket ipaayna ti amin … a kasapulan ti maysa a Santo iti Ud-udina nga aldaw tapno maawatan ti pannubok ti biag” (“Lehi’s Dream and You,” New Era, Enero. 2015, 2).
Maysa a wagas a mangadal iti 1 Nephi 8 ket mabalin a mangpunno iti maysa a tsart kas iti maysa a naipakita ditoy. Tapno maawatan ti kaipapanan dagiti simbolo, makatulong ti panangitudo ti parmata ni Nephi idi nagkararag tapno maawatanna ti parmata ti amana—nangnangruna a kitaen iti 1 Nephi 11:4–25, 32–36; 12:16–18; ken 15:21–33, 36. Bayat ti panangadalmo iti parmata ni Lehi, ibilangmo no ania ti kayat ti Apo a sursuruem.
|
Simbolo manipud iti parmata ni Lehi |
Dagiti kaipapanan |
Dagiti saludsod nga utoben |
|---|---|---|
Simbolo manipud iti parmata ni Lehi Kayo ken ti bungana (1 Nephi 8:10–) | Dagiti kaipapanan | Dagiti saludsod nga utoben Ania ti ar-aramidek a mangawis kadagiti dadduma a makiranud iti ayat ti Dios? |
Simbolo manipud iti parmata ni Lehi Karayan (1 Nephi 8:13) | Dagiti kaipapanan | Dagiti saludsod nga utoben |
Simbolo manipud iti parmata ni Lehi Landok a pagkaptan (1 Nephi 8:19–20, 30) | Dagiti kaipapanan | Dagiti saludsod nga utoben |
Simbolo manipud iti parmata ni Lehi Nangisit nga angep (1 Nephi 8:23) | Dagiti kaipapanan | Dagiti saludsod nga utoben |
Simbolo manipud iti parmata ni Lehi Dakkel ken nalawa a pasdek (1 Nephi 8:26–27, 33) | Dagiti kaipapanan | Dagiti saludsod nga utoben |
Simbolo manipud iti parmata ni Lehi | Dagiti kaipapanan | Dagiti saludsod nga utoben |
Kitaen met iti David A. Bednar, “Lehi’s Dream: Holding Fast to the Rod,” Ensign wenno Liahona, Okt. 2011, 33–37.
Ni Lehi a mangmangan iti bunga ti kayo ti biag. Kayo ti Biag, ni Marcus Alan Vincent
Apay a nangaramid ni Nephi iti dua nga asmang a pinanid?
Idi agangay nagbalin a nalawag kalpasan iti maysa a siglo ti “nainsiriban a panggep” ti Apo a panangpaaramidna ken ni Nephi iti dua a kasuratan. Kalpasan ti panangipatarus ni Joseph Smith ti umuna a 116 a panid ti manuskrito ti Libro ni Mormon, intedna dagiti panid ken ni Martin Harris, a nangpukaw kadagitoy (kitaen iti DkK 10:1–2). Ngem nairaman ti maikadua nga asmang dagiti pinanid ni Nephi iti isu met la a panawen, ket binilin ti Apo ni Joseph Smith a mangipatarus kadagitoy a pinanid imbes nga ulitenna nga ipatarus no ania dagiti napukaw (kitaen iti DkK 10:38–45).
Para iti ad-adu pay maipapan kadagiti pinanid a nadakamat iti 1 Nephi 9, kitaen iti “Ti Ababa a Pannakailawlawag maipapan iti Libro ni Mormon”; 1 Nephi 19:1–5; 2 Nephi 5:29–32; ken Dagiti Balikas ni Mormon 1:3–9.
Ammo dagiti nagkauna a propeta ti maipapan iti mision ni Jesucristo ket nagpaneknekda maipapan Kenkuana.
Awan duadua a nakaipaay iti impresion iti pamiliana maipapan iti pakaammuan ti parmata ni Lehi ngem addaan pay isuna kadagiti agnanayon a kinapudno a mangisuro kadakuada maipapan iti mision ti Mangisalakan. Bayat ti panangbasam iti 1 Nephi 10:2–16, panunotem no apay a kayat ti Apo a maammuan ti kaamaan ni Lehi—ken datayo amin—dagitoy a kinapudno. Ibilangmo no ania ti mabalinmo nga ibaga kadagiti ipatpategmo tapno awisen ida nga umasideg iti Mangisalakan. Kalpasan ti panangadalmo iti parmata ni Lehi ken dagiti pannusurona, kas ken ni Nephi, ania ti nangparegta kenka a sursuruem “babaen ti bileg ti Espiritu Santo”? (1 Nephi 10:17).
Ipalgakto ti Dios ti kinapudno kaniak no naanepak a mangbiruk iti daytoy.
Kasano nga agrespondeka no maipasangoka iti maysa a pagbatayan ti ebanghelio a dimo maawatan? Kitaen dagiti paggidiatan ti wagas a panagresponde ni Nephi iti parmata ni Lehi (kitaen iti (1 Nephi 10:17–19; 11:1) ken ti wagas a panagresponde da Laman ken Lemuel (kitaen iti 1 Nephi 15:1–10). Apay a nagrespondeda kadagitoy a wagas, ken no ania dagiti resulta ti panagrespondeda?
Ibilangmo nga agsurat maipapan iti maysa a panawen idi tinarigagayam a maammuan no pudno ti panangisuro iti ebanghelio. Kasano a maipadis ti proseso a sinurotmo iti inaramid ni Nephi?
Kitaen met iti 1 Nephi 2:11–19;Doktrina ken Katulagan 8:1–3.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
1 Nephi 8
Nalabit a naragsak dagiti miembro ti pamilia a mangyakem ti parmata ni Lehi wenno agdrowing kadagiti ladawan ket aramatenda dagiti drowingda a mangibaga maipapan iti daytoy. Wenno mabalinmo nga ipakita ti panangiladawan ti pintor ti parmata ni Lehi a naipasurot itoy a leksion ket awisem dagiti miembro ti pamilia a mangitudo kadagiti detalye ket sapulem dagiti nasantuan a kasuratan a mangiladawan no ania ti ibagi dagitoy a bambanag. Ti himno a “The Iron Rod” (Hymns, num. 274) ket maibagay a nasayaat iti daytoy a kapitulo.
1 Nephi 8:10–16
Asino ti maawistayo nga umas-asideg ken ni Jesucristo ket mariknana ti kinasam-it ti ayatna? Ania ti maaramidtayo a “[mangawis]kadakuada”?
1 Nephi 9:5-6
Kaano a sinurottayo ti maysa a bilin a ditayo naan-anay a naawatan dagiti gapu para iti daytoy? Kasano a nabendisionantayo?
1 Nephi 10:20–22
Kasano a maipada ti pisikal a kinarugit iti naespirituan a kinarugit? Ania ti mabalintayo nga aramiden tapno mapennek nga agtalinaedtayo a naespirituan a nadalus?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Kasano a mayaplikar dagiti nasantuan a kasuratan iti biagtayo? Kalpasan ti panangbasam iti maysa a binatog ti nasantuan a kasuratan, mangawis kadagiti miembro ti pamiliam a mangiburay no kasano a mayaplikar ti binatog kadakuada. Kas pagarigan, no basaen dagiti miembro ti pamiliam ti 1 Nephi 8:33, mabalin a pagsasaritaanda maipapan iti no kasano a dida dumngeg kadagitay “mangitudo ti ramay ti kinaunget.”
Ti Kayo ti Biag, ni Avon Oakeson