Maysa a Pagtuladan para iti Panangisuro

Iti daytoy a resource masarakamto ti sumaganad a tallo nga addang a pagtuladan a naulit iti tunggal balabala: yawis ti panagbibinninglay, isuro ti doktrina, ken yallukoy ti panagsursuro iti pagtaengan. Iti adu a gundaway, bayat ti panangisurom, mabalin a pagsusukoten dagiti elemento daytoy a pagtuladan wenno aramiden iti sabali nga urnos. Kas pagarigan, ibilang a ti panangbinglay ket maysa a gundaway a mangisuro iti doktrina, ken ti panangisuro iti doktrina ket nasken a mangiraman kadagiti awis a mangibinglay. Kasta met, a ti panangyallukoy iti panangisuro iti pagtaengan ket mabalin a mapasamak iti unos ti panaglilinnawag iti klase. Ipalubos a gagangay a mapasamak daytoy a pannakabalbaliw, babaen ti panangsurot kadagiti parikna ti Espiritu tapno maipaay dagiti kasapulan dagiti ubbing a sursuruam.

Yawis ti Panagbibinninglay

Kas paset ti tunggal klase, awisem dagiti ubbing a mangibinglay kadagiti riknada, nalawag a pannakaammo ken pannakaawat, ken dagiti padas maipapan kadagiti pagbatayan nga isursurom. Mabalin a maiiraman kadagiti komentarioda dagiti padas iti panagsursuro iti pagtaengan. Mabalinmo pay nga irebyu no ania ti nasursuroda iti napalabas a lawas ken saludsodem no kasano nga inimpluensiaan daytoy ti biagda.

Isuro ti Doktrina

TiUmaykayo, Sumurot Kaniak—Para kadagiti Indibidual ken Pamilia ketmakatulong kenka a nasaysayaat a maawatan ti doktrina nga isuromto kadagiti ubbing. Ibilang no ania kadagiti bersikulo iti nasantuan a kasuratan, adaw, padas, saludsod, ken dadduma pay a resources a maibinglaymo tapno matulongan dagiti ubbing a makasursuro ken agtignay a mayannurot kadagiti pagbatayan ti ebanghelio. Agsapulka kadagiti wagas a makatulong kadakuada nga aggagar maipapan iti no ania ti masursuroda.

Yallukoy ti Panagsursuro iti Pagtaengan

Gapu ta ti pagtaengan ti sentro a pagsursuruan iti ebanghelio, maysa kadagiti panggepmo kas maysa a mannursuro iti Primary ket ti panangyallukoy iti panagsursuro iti pagtaengan. Kasano a matulongam dagiti ubbing a mangibinglay kadagiti pamiliada no ania ti nasursuroda iti klase? Kasano a maallukoymo dagiti ubbing ken dagiti nagannak kadakuada a mangituloy nga agsursuro manipud iti Libro ni Mormon iti pagtaengan?