klase ti Primary nga agay-ayam

Panangusar iti Umaykayo, Sumurot Kaniak—Para iti Primary

Panagsagana a Mangisuro iti Primary

Iti bukod ken sangapamiliaan a panagadal iti pagtaengan ti nasken a sentro a pagsursuruan iti ebanghelio. Pudno daytoy para kenka ken para kadagiti ubbing a sursuruam. Bayat ti panagsaganam a mangisuro, rugiam babaen ti kaadda dagiti bukodmo a padas kadagiti nasantuan a kasuratan. Mapasamakto ti kapatgan a panagsaganam bayat ti panagsukisokmo kadagiti nasantuan a kasuratan ken panagkalikagummo a manggun-od iti inspirasion ti Espiritu Santo.

TiUmaykayo, Sumurot Kaniak—Para kadagiti Indibidual ken Pamilia ket maysa pay a napateg a paset ti bukodmo a panagadal ken panagsaganam a mangisuro. Makatulong daytoy kenka a manggun-od iti naun-uneg a pannakaawat kadagiti pagbatayan iti doktrina a masarakan kadagiti nasantuan a kasuratan.

Bayat ti panagsaganam, umayto kenka dagiti kapanunotan ken impresion maipapan kadagiti ubbing a sursuruam. Umawatkanto kadagiti nalawag a pannakaammo ken pannakaawat maipapan iti no kasano a mangbendisionto iti biagda dagiti pagbatayan iti nasantuan a kasuratan. Maiwanwankanto a mangparegta kadakuada a mangtakuat kadagitoy a pagbatayan bayat ti panangsursuroda manipud kadagiti nasantuan a kasuratan para iti bagida ken iti pamiliada. Laglagipem ti agbalin a managrikna kadagiti ubbing a dagiti kasasaad iti pamiliada ket saan a makasuporta iti kanayon a panagadal iti nasantuan a kasuratan kas pamilia ken ti family home evening.

Dagiti Kapanunotan iti Panangisuro

Bayat ti panagsaganam a mangisuro, mabalin a magun-odmo ti mainayon a pammaregta babaen ti panagsukisok kadagiti balabala iti panangisuro iti daytoy a resource. Saanmo nga ipagarup dagitoy a kapanunotan kas iti nagsasaruno nga addang a pangiturong no di ketdi kas singsingasing tapno mangirugi iti bukodmo nga inspirasion. Ammom dagitoy nga ubbing—ken maamammomto ida a nasaysayaat pay bayat iti panakikaduam kadakuada iti klase. Am-ammo met ida ti Apo, paregtaennakanto kadagiti kasayaatan a wagas a mangisuro ken mangbendision kadakuada.

Adu a dadduma pay a resources a sidadaan a magun-od nga aramatem bayat ti panagsaganam, pakairamanan dagiti kapanunotan iti Umaykayo, Sumurot Kaniak—Para kadagiti Indibidual ken Pamilia ken dagiti magasin iti Simbaan. Para iti ad-adu pay nga impormasion maipapan kadagitoy ken iti dadduma pay a resources, kitaen iti “Dagiti Nainayon a Resources para iti Panangisuro kadagiti Ubbing.” iti daytoy a resource.

Dagiti Sumagmamano a Banag a Laglagipen

• Addaan dagiti nagannak ti kangrunaan a responsabilidad a mangisuro kadagiti annakda. Kas maysa a mannursuro, addaanka iti napateg a responsibilidad a mangsuporta, mangallukoy, ken mangpadur-as iti panangisuro iti ebanghelio iti pagtaengan. Agbalinka a managrikna kadagiti ubbing a dagiti nagannak kadakuada ket saan a mangisusuro iti ebanghelio iti pagtaenganda. Iraman dagiti amin nga ubbing iti panaglilinnawag iti ebanghelio, ania man dagiti kasasaadda iti pagtaengan.

• Nasayaat ti panangulit-ulit. Ad-adda nga epektibo ti panagsursuro dagiti ubbing iti kinapudno ti ebanghelio no maulit-ulit a maisuro dagitoy a kinapudno babaen iti nadumaduma nga aktibidad. No masarakam nga epektibo a pakasursuruan dagiti ubbing ti maysa nga aktibidad, ibilangmo a mauli-ulit daytoy, nangnangruna no mangisursuroka kadagiti in-inaudi nga ubbing. Mabalin pay irebyum ti maysa nga aktibidad manipud iti napalabas nga adalen.

• Kayat ti Nailangitan nga Ama nga agballigika kas maysa a mannursuro. Impaayannaka iti adu a resources a makatulong kenka, a pakairamanan dagiti teacher council meeting. Kadagitoy a miting mabalinmo ti makiinnuman kadagiti dadduma pay a mannursuro maipapan kadagiti ania man a karit a pakaipasanguanyo. Mabalinmo pay nga ilawlawag ken yaplikar dagiti pagbatayan iti panangisuro a kas ken ni Cristo.

• No sursuruam dagiti in-inaudi nga ubbing ken agkasapulan iti nayon a tulong, kitaen iti “Panangipaay Kadagiti Kasapulan dagiti In-inaudi nga Ubbing” iti daytoy a resourse.

• Nairaman iti daytoy a resource dagiti balabala [outline] para iti tunggal lawas ti tawen malaksid iti dua a Domingo no maangay ti sapasap a komperensia. Kadagiti Domingo no saan a maangay ti Primary gapu iti komperensia ti stake wenno ania man a dadduma pay a rason, nasken nga itultuloy dagiti pamilia ti panagbasa iti Libro ni Mormon iti pagtaengan maibatay iti nabalabala nga iskediul. Tapno mapagtalinaed ti klasem iti Primary iti iskediul, mabalinmo a pilien a laktawan ti maysa nga adalen wenno pagkaduaen ti dua nga adalen. Tapno maliklikan ti pannakatikaw, mabalin a tarigagayan nga ibalakad dagiti presidente ti Primary kadagiti mannursuro maipapan kadagitoy a panagbalbaliw iti nasapsapa.

pamilia nga agad-adal a mangususar iti laptop