Dagiti Kari ti Propeta

Balbaliwannakanto ti panagadal iti Libro ni Mormon. Mabalbaliwannanto ti pamiliam. Nagkari dagiti propeta ti ud-udina nga aldaw maipapan iti bileg ti Libro ni Mormon manipud idi naisubli ti Ti Simbaan ni Jesucristo dagiti Santo iti Ud-udina nga Aldaw. Utoben dagiti sumaganad a palawag ket irebyu dagitoy a masansan. Ania kadagitoy dua a bendision ti kayatmo nga awaten? Bayat ti panangbasam iti Libro ni Mormon, ibilangmo ti panangisurat ken panangibinglay iti dadduma no kasano a maipatungpal dagitoy a bendision a iti biagmo.

Ni Propeta Joseph Smith: “Imbagak kadagiti kakabsat a ti Libro ni Mormon ti kalintegan a libro ditoy daga ket isu ti pagbatayan ti pammatitayo, ket as-asideg ti tao iti Dios babaen ti panangsurotna kadagiti linaonna, ngem iti sabali a libro” (Teachings of Presidents of the Church: Joseph Smith [2007], 64).

Presidente Ezra Taft Benson: “Saan la nga isuro kadatayo ti Libro ni Mormon ti kinapudno, nupay pudno nga aramidenna dayta. Saan laeng nga ipaneknek ti Libro ni Mormon ti maipapan ken ni Cristo, nupay pudno nga aramidenna met dayta. Ngem adda pay maysa a banag. Addanto bileg iti libro nga agayus iti biagyo iti kanito a rugianyo ti napasnek a panagadal iti libro. Makitayonto ti bileg a mangkedked iti sulisog. Makitayonto ti bileg a magliklik iti pannakaallilaw. Makitayonto ti bileg nga agtalinaed iti nailet ken akikid a dalan. Maawagan dagiti nasantuan a kasuratan iti ‘dagiti balikas ti biag’ (DK 84:85), ken awan iti sadino man ti napudpudno pay ngem iti Libro ni Mormon. No mangrugika nga agbisin ken mawaw kadagitoy a balikas, masarakamto ti biag nga aglaplapunosan iti kinawadwad” (Teachings of Presidents of the Church: Ezra Taft Benson [2014], 141).

Presidente Gordon B. Hinckley: “Kakabsat, awan panagduadua nga ikarik a no nainkararagan a basaenyo ti Libro ni Mormon, uray no kasano ti kasansan ti pannakabasayon iti daytoy, sumangbayto kadagiti pusoyo ti nayon pay nga impluensia ti Espiritu ti Apo. Addanto sumangbay a natibker a pangngeddeng a magna a managtungpal kadagiti bilinna, ken sumangbayto ti natibtibker a pammaneknek iti sibibiag a kinapudno ti Anak ti Dios” (Teachings of Presidents of the Church: Gordon B. Hinckley [2016], 233).

Presidente Russell M. Nelson: “Patpatgek a kakabsatko, ikarik a bayat iti nainkararagan a panagadalyo iti Libro ni Mormon iti inaldaw, makaaramidkayo kadagiti nasaysayaat a desision—iti innaldaw. Ikarik a bayat ti panangutobyo iti no ania ti adalenyo, maluktanto dagiti tawa ti langit, ket maawatyonto dagiti sungbat kadagiti bukodyo a saludsod ken pangiturong para iti bukodyo a biag. Ikarik a bayat iti inaldaw a panagbasayo iti Libro ni Mormon, masalaknibankayo a maibusor kadagiti dakes iti aldaw, uray pay ti di malapdan a sarot ti pornograpia ken dadduma pay a pakailuodan a mangyadayo kadatayo iti espiritu” (“The Book of Mormon: What Would Your Life Be Like without It?” Ensign wenno Liahona, Nob. 2017, 62–63).