Panangisuro kadagiti Inaudi nga Ubbing

No addaanka kadagiti inaudi nga ubbing iti pamiliam, dagitoy ti sumagmamano nga aktibidad a makatulong kadakuada nga agsursuro:

• Agkanta. Hymns ken dagiti kanta manipud iti Children’s Songbook ket mangisuro iti doktrina a sibibileg. Usarem ti topics index iti likud ti Children’s Songbook a mangsapul kadagiti kanta a mainaig kadagiti pagbatayan ti ebanghelio nga isursurom. Tulongam dagiti annakmo a manginaig kadagiti mensahe dagiti kanta iti biagda. Kas pagarigan, mabalinmo a damagen dagiti saludsod maipapan kadagiti balikas wenno ragup dagiti balikas iti kanta. Kas nayon iti panagkanta, mabalin a mangipabuya dagiti annakmo kadagiti tignay a maigiddan kadagiti kanta wenno dumngeg kadagiti kanta kas background a musika bayat ti panangaramidda kadagiti sabali pay nga aktibidad.

• Dumngeg wenno mangyakem iti estoria. Magustuan dagiti inaudi nga ubbing dagiti estoria maipapan iti ayat—manipud kadagiti nasantuan a kasuratan, manipud iti biagmo, manipud iti pakasaritaan ti Simbaan, wenno manipud kadagiti magasin ti Simbaan. Mangsarak kadagiti wagas a mangiraman kadakuada iti panangisarita iti estoria. Mabalinda ti agiggem kadagiti ladawan wenno banag, mangidrowing kadagiti ladawan iti no ania dagiti mangngegda, mangyakem ti estoria, wenno uray pay mangtulong a mangisarita iti estoria. Tulongam dagiti annakmo a mangbigbig kadagiti kinapudno ti ebanghelio kadagiti estoria nga ibinglaymo.

• Basaen ti maysa a nasantuan a kasuratan. Mabalin a saan unay a kabaelan dagiti inaudi nga ubbing ti agbasa, ngem mabalinmo latta nga iraman ida iti panagsursuro manipud kadagiti nasantuan a kasuratan. Mabalin a kasapulam ti mangipamaysa iti maysa a bersikulo, ti kangrunaan a ragup dagiti balikas, wenno balikas. Mabalin a kabaelanda pay ti mangikabesa iti ababa a ragup dagiti balikas manipud kadagiti nasantuan a kasuratan no ulitenda dagitoy iti sumagmamano a gundaway. Bayat ti pannakangngegda iti balikas ti Dios, mariknada ti Espiritu.

• Kumita iti maysa a ladawan wenno agbuya iti video. No ipakitam kadagiti annakmo ti maysa a ladawan wenno ipabuyam ti video a mainaig iti maysa a pagbatayan ti ebanghelio wenno estoria iti nasantuan a kasuratan, agdamagka kadakuada kadagiti saludsod a mangtulong kadakuada a masursuruan manipud iti no ania dagiti makitkitada. Kas pagarigan, mabalinmo a saludsoden, “Ania ti mapaspasamak iti daytoy a ladawan wenno video? Kasano nga iparikna daytoy kenka?” Ti Gospel Library app, medialibrary.ChurchofJesusChrist.org, ken children.ChurchofJesusChrist.org ket nasayaat a lugar a pakasarakan kadagiti ladawan ken video.

• Agpartuat. Mabalin dagiti ubbing ti agaramid, agdrowing, wenno agkolor iti maysa a banag a mainaig iti estoria wenno pagbatayan a sursuruenda.

• Makiraman kadagiti adalen a banag [object lesson]. Makatulong ti simple a banag nga adalen [object lesson] kadagiti annakyo tapno maawatanda dagiti pagbatayan ti ebanghelio a narigat a maawatan. No agus-usarka kadagiti banag nga adalen wenno object lesson, mangsapulka kadagiti wagas a makapagpartisipar dagiti annakmo. Ad-adunto ti masursuroda manipud iti padas iti pannakipulapol ngem iti panangbuybuya laeng iti maysa a demonstrasion.

• Yakem [role-play]. No yakem dagiti ubbing ti maysa situasion nalabit a makapadasdsnto iti pudno a biag, nasaysayaat ti pannakaawatda no kasano a mayaplikarda dagiti pagbatayan ti ebanghelio iti biagda.

• Uliten dagiti aktibidad. Mabalin a kasapulan dagiti ubbing ti dumngeg kadagiti konsepto iti mamin-adu a gundaway tapno maawatan dagitoy. Saanka nga agamak a mangulit kadagiti estoria wenno aktibidad a masansan. Kas pagarigan, mabalinmo nga ibinglay ti maysa nga estoria iti nasantuan a kasuratan iti sumagmamano a daras iti nadumaduma a wagas—panagbasa manipud kadagiti nasantuan a kasuratan, pananggupgop iti bukodmo a balikas, panangipabuya iti maysa a video, panagpatulong kadagiti annakmo nga agisalaysay iti estoria, panangawis kadakuada a mangyakem iti estoria, ken dadduma pay.