Dagiti Kapanunotan tapno Mapadur-as ti Bukodmo a Panagadal iti Nasantuan a Kasuratan

Dagitoy ti sumagmamano a simple a wagas a mangpadur-as ti panagadalmo iti balikas ti Dios kadagiti nasantuan a kasuratan.

Sapulem dagiti Kinapudno maipapan ken ni Jesucristo

Isuronatayo dagiti nasantuan a kasuratan a mangpaneknek iti amin a banag maipapan ken ni Cristo (kitaen iti 2 Nephi 11:4; Moises 6:63), isu a sapulem Isuna kadagiti pasamak, estoria, ken pannursuro ti Libro ni Mormon. Ibilangmo ti panagsurat wenno panangmarka kadagiti bersikulo a mangisuro maipapan iti Mangisalakan ken no kasano ti mangsurot Kenkuana.

Sapulen dagiti Makaparegta a Balikas ken Ragup dagiti Balikas

Mabalin a makakitaka kadagiti sumagmamano a balikas ken ragup dagiti balikas kadagiti nasantuan a kasuratan a makaawis kenka, a kasla naipangpangruna a naisurat dagitoy a para kenka. Marikna dagitoy a personal ti pannakainaigna ken mangparegta ken mangguyugoy kenka. Ibilangmo ti panangmarka kadagitoy kadagiti nasantuan a kasuratam wenno panangisurat kadagitoy iti study journalmo.

Mangsapul kadagiti Kinapudno iti Ebanghelio

No dadduma dagiti kinapudno iti ebanghelio (masansan a maawagan iti doktrina wenno dagiti pagbatayan) ket direkta a madakamat, ken no dadduma mailadawanda babaen iti pagwadan wenno estoria. Saludsodem iti bagim, “Ania dagiti agnanayon a kinapudno a maisuro kadagitoy a bersikulo?”

Dumngeg iti Espiritu

Imdengam dagiti kapanunotan ken riknam, uray no awan pakainaiganna iti no ania ti basbasaem. Dagita nga impresion ket mabalin a dagiti mismo a banag a kayat ti Nailangitan nga Ama a masursurom.

Yarig dagiti Nasantuan a Kasuratan iti Biagmo

Ibilangmo no kasano a mayaplikar iti biagmo dagiti estoria ken pannursuro a basbasaem. Kas pagarigan, mabalin a saludsoden iti bagim, “Ania dagiti padasko a maipada iti basbasaek?” wenno “Kasano a masurotko ti pagwadan daytoy a tao kadagiti nasantuan a kasuratan?”

Agdamag kadagiti Saludsod bayat ti Panagadalmo

Bayat ti panagadalmo kadagiti nasantuan a kasuratan, mabalin a sumangbay dagiti saludsod iti panunotmo. Dagitoy a saludsod ket mabalin a mainaig iti no ania ti basbasaem wenno iti biagmo iti sapasap. Utobem dagitoy a saludsod ken sapulem dagiti sungbat bayat ti panagtultuloymo iti panagadal kadagiti nasantuan a kasuratan.

Usaren dagiti Tulong iti Panagadal iti Nasantuan a Kasuratan

Tapno magun-od dagiti nayon a nalawag a pannakaammo ken pannakaawat [insights] kadagitoy a bersikulo a basaem, usarem dagiti footnote, Topical Guide, Bible Dictionary, ti Pangiwanwan iti Nasantuan a Kasuratan (scriptures.ChurchofJesusChrist.org), ken dadduma pay a tulong iti panagadal.

Ibilang ti Konteksto dagiti Nasantuan a Kasuratan

Masarakam dagiiti napapateg a nauneg a pannakaammo ken pannakaawat maipapan iti nasantuan a kasuratan no ibilangmo ti konteksto daytoy—dagiti kasasaad wenno ti nakapasamakan ti nasantuan a kasuratan. Kas pagarigan, ti panangammo iti nagtaudan ken ti pammati dagiti tao a kinasao ti propetaket makatulong kenka a mangipaawat iti panggep dagiti balikasna.

Isuratmo dagiti Pampanunoten ken Marikriknam

Adu a wagas tapno maisurat dagiti impresion nga umay bayat ti panagadalmo. Kas pagarigan, mabalinmo a markaan ti maysa a napateg a balikas wenno ragup dagiti balikas ket isuratmo dagiti kapanunotam a kas maysa a palagip kadagiti nasantuan a kasuratam. Mabalinmo met nga isurat iti journal dagiti nalawag a pannakaammo ken pannakaawat [insights], rikna, ken impresion a maawatmo.

Adalem dagiti Balikas dagiti Propeta ken Apostol iti Ud-udina nga Aldaw

Basaem no ania ti insuro dagiti propeta ken apostol iti ud-udina nga aldaw maipapan kadagiti pagbatayan a masarakam kadagiti nasantuan a kasuratan (kas pagarigan, kitaen iti conference.ChurchofJesusChrist.org ken dagiti magasin iti Simbaan).

Ibinglay dagiti Nalawag a Pannakaammo ken Pannakaawat [Insights]

Ti panangilawlawag kadagiti nalawag a pannakaammo ken pannakaawat manipud iti bukodmo a panagadal ket saan laeng a nasayaat a wagas a pangisuruan kadagiti dadduma, ngem ketdi makatulong pay daytoy a mangpapigsa iti pannakaawatmo maipapan iti no ania ti nabasam.

Agbiag babaen iti no Ania ti Nasursurom

Ti panagadal iti nasantuan a kasuratan ket saan laeng koma a mangparegta kadatayo no di ketdi iturongnatayo koma a mangbalbaliw iti wagas ti panagbiagtayo. Dumngeg no ania ti iparikna kenka ti Espiritu nga aramidem bayat ti panagbasam, ken kalpasanna agkumit nga agtignay babaen kadagita a parikna.

Kinuna ni Presidente Russell M. Nelson: “No ‘agtultuloytayo, nga agpennek iti balikas ni Cristo, ken agibtur agingga iti panungpalan, adtoy, kuna ti Ama: … aaddaan[tayto] iti biag nga agnanayon’[2 Nephi 31:20].

“Ti agpennek ket kayatna a sawen ti ad-adda pay ngem iti panangraman. Ti agpennek ket kayatna a sawen ti mangraman. Ramanantayo dagiti nasantuan a kasuratan babaen ti panagadal kadagitoy iti espiritu ti naragsak a panangtakuat ken napudno a panagtungpal. No agpennektayo kadagiti balikas ni Cristo maisiglotda ‘iti taptapi a puspuso a naglasag’ [2 Taga Corinto 3:3]. Agbalinda a napateg a paset ti kinataotayo” (“Living by Scriptural Guidance,” Ensign, Nob. 2000, 17).