Iti Panagserbi iti Diosmo, ni Walter Rane

Abril 20–26

Mosiah 4–6

“Naindaklan a Panagbalbaliw”

Bayat ti panagbasam ken panagutobmo iti Mosiah 4–6 ikasom dagiti parikna ti Espiritu Santo. Ania dagiti nasayaat a banag a nangparegta kenka nga aramidem? (kitaen iti Mosiah 5:2).

Isuratmo dagiti Impresionmo

Nanggegam kadin ti maysa a tao a nagsao ken nakarikna a naparegta a mangbalbaliw iti biagmo? Nalabit nga inkeddengmo, gapu iti nangngegmo, ti agbiag a naidumduma bassit—wenno naidumduma unay. Kasta ti kita ti mensahe nga inted ni Ari Benjamin, ket addaan dagiti kinapudno nga insurona iti kasta a kita ti epekto kadagiti tao a nakangngeg kadagitoy. Imbinglay ni Ari Benjamin kadagiti taona no ania ti insuro dagiti anghel kenkuana—a mapasamak dagiti nakaskasdaaw a bendision babaen ti “panangsubbot a dara ni Cristo” (Mosiah 4:2). Binalbaliwan ti mensahena ti sibubukel a panagkitada iti bagbagida (kitaen iti Mosiah 4:2), binalbaliwanna dagiti tarigagayda (kitaen iti Mosiah 5:2), ket pinaregtana ida a makitulag iti Dios a kanayon nga aramidenda ti pagayatanna (kitaen iti Mosiah 5:5). Daytoy ti no kasano nga inaringan ti balikas ni Ari Benjamin dagiti taona. Kasano nga aringannakanto daytoy?

Dagiti Kapanunotan para iti Bukod a Panagadal iti Nasantuan a Kasuratan

Mosiah 4

Babaen ken ni Jesucristo, maawatko ket mapagtalinaedko ti pannakaugas dagiti basolko.

Saan a nalaka ti panangparmek iti nailubongan a tao. Kasapulan daytoy iti dakkel a panagkagumaan nga agbalin a “maysa a santo babaen ti pannubbot ni Cristo nga Apo” (Mosiah 3:19). No dadduma, uray no nariknamon a napakawanen dagiti basolmo, mabalin a marigatanka a mangpatalinaed iti dayta a rikna ket agtalinaed iti dana ti kinalinteg. Insuro ni Ari Benjamin kadagiti taona no kasano nga agpada nga awaten ken pagtalinaeden ti pannakaugas dagiti basol ken agbiag iti agtultuloy a kas maysa a santo. Bayat ti panangadalmo iti kapitulo 4 ti Mosiah, mabalinmo a saludsoden ti bagim kas dagitoy a saludsod:

Dagiti bersikulo 1–12:Ania dagiti bendision nga insangbay ti pannakaugas dagiti basbasol kadagiti tao ni Ari Benjamin ? Ania ti insuro ni Ari Benjamin a nangtulong kadakuada a nangpatalinaed iti pannakaugas dagiti basbasolda? Ania ti insurona maipapan iti no kasano nga awatentayo ti pannakaisalakan? Kitaen no ania ti kinuna ni Ari Benjamin a nasken a “kanayon a laglagipenyo” (bersikulo 11). Ania ti mariknam a makaparegta nga aramidem a manglagip kadagitoy a banag?

Dagiti bersikulo 12–16:Segun kadagitoy a bersikulo, ania ti mapasamak iti biagtayo no aramidentayo dagiti banag a nailadawan kadagiti bersikulo 11? Napadasanyo kadin dagitoy a panagbalbaliw iti biagyo? Kasano a mainaigda kadagiti panagbalbaliw a nailadawan iti Mosiah 3:19?

Dagiti bersikulo 16–30:Kasano a tulongannatayo ti panangibinglay kadagiti marigrigat a mangpatalinaed ti pannakaugas dagiti basoltayo? Kasano a mayaplikarmo ti bersikulo 27 kadagiti panagkagumaanmo nga agbalin a kas ken ni Cristo?

Kitaen met iti David A. Bednar, “Always Retain a Remission of Your Sins,” Ensign wenno Liahona, Mayo 2016, 59–62; Dale G. Renlund, “Preserving the Heart’s Mighty Change,” Ensign wenno Liahona, Nob. 2009, 97–99.

Mosiah 5:1–7

Ti Espiritu ti Apo ti makaigapu iti naindaklan a panagbalbaliw iti pusok.

Saan a karkarna nga isao dagiti tao ti, “Diak makapagbalbaliw. Daytan ti ugalik.” Iti kasupadina, ti padas dagiti tao ni Ari Benjamin ket mangipakita kadatayo no kasano a sipupudno a mapagbalbaliw ti Espiritu ti Apo ti puspusotayo. Insuro ni Presidente Russell M. Nelson a: “Mabalintayo a balbaliwan ti ugalitayo. Makapagbalbaliw dagiti mismo a tarigagaytayo. … Ti pudno a panagbalbaliw—manayon a panagbalbaliw—ket mabalin a sumangbay laeng babaen iti panangagas, panangdalus, ken pangpabael a bileg ti Pannubbot ni Jesucristo. … Ti ebanghelio ni Jesucristo ket ebanghelio ti panagbalbaliw!” (“Decisions for Eternity,” Ensign wenno Liahona, Nob. 2013, 108).

Bayat ti panangbasam maipapan iti panagbalbaliw a napadasan dagiti tao ni Ari Benjamin, panunotem no kasano a napasamak ti “naindaklan a panagbalbaliw” nga agturong iti pudno a kumbersion—wenno mabalin a mapasamak—iti biagmo. Maaddaan iti sumagmamano a “naindaklan” a kanito nga agturong iti panagbalbaliw ti puso, wenno ad-adda nga in-inut a napasamak ti kumbesionmo?

Kitaen met iti Ezekiel 36:26–27; Alma 5:14; David A. Bednar, “Converted unto the Lord,” Ensign wenno Liahona, Nob. 2012, 106–9.

Mabalbaliwan ti Mangisalakan dagiti puso ken biagtayo. Dagiti Mangag-agas nga Ima, ni Adam Abram

Mosiah 5:5–15

Awatek iti bagik ti nagan ni Cristo no agaramidak kadagiti katulagan.

Adda maysa a gapu no apay a tinarigagayan ni Ari Benjamin a mangted iti mensahe kadagiti taona ket tapno “mangted iti daytoy a tao iti naganna.” Sumagmamano dagiti Nephite ken dagiti dadduma ti an-annabo ni Mulek, ngem saan a dagitoy dagiti nagan nga adda iti panunotna. Inawisna dagiti tao nga awatenda iti bagina ti “ti nagan ni Cristo” kas paset ti panagtungpal kadagiti katulagan iti Dios (Mosiah 1:11; 5:10). Ania ti masursurom manipud iti Mosiah 5:7–9 maipapan iti no ania ti kaipapanan ti awatem iti bagim ti nagan ni Cristo?

Kinuna ni Elder D. Todd Christofferson, “Ti Dios ti paggapuan[ti bileg a mainaig iti kinadalus ti dayaw ken naespirituan a bileg]. Ti pannakagun-odtayo iti dayta a bileg ket babaen kadagiti katulagantayo Kenkuana” (“The Power of Covenants,” Ensign wenno Liahona, Mayo 2009, 20). Bayat ti panangbasam iti Mosiah 5:5–15, agaramidka iti listaan dagiti bendision a sumangbayto iti biagmo bayat ti panagtungpalmo kadagiti katulagan nga inaramidmo iti Dios. Kasano a ti panagtungpalmo kadagiti katulagam ket tulongannaka a mangpatalinaed iti “naindaklan a panagbalbaliw” a naaramid kenka babaen ken ni Jesucristo ken ti Pannubbotna?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

Mosiah 4:9–12

Kasano nga ad-adda a naan-anay “a mamati iti Dios” ti pamiliam (Mosiah 4:9) ken “kanayon a laglagipen[da] ti kinaindaklan ti Dios,”? (Mosiah 4:11). Nalabit a mabalin a basaen dagiti miembro ti pamilia ti Mosiah 4:9–12 ket lasinenda dagiti ragup ti balikas a makatulong a mangpapigsa iti pammatida iti Dios. Kalpasanna mabalin nga isuratda dagitoy a ragup dagiti balikas ket ikabil dagitoy iti lawlaw ti pagtaengan kas panglaglagip. Kasano a ti pananglaglagip kadagitoy a banag ket mangtulong kadatayo a “kanayon nga agragsak” ket “pagtalinaeden ti pannakaugas dagiti basol[tayo]”? (Mosiah 4:12).

Mosiah 4:14–15

Ania ti masursurotayo maipapan iti panagkakabil ken panagaapa manipud kadagitoy a bersikulo?

Mosiah 4:16–26

Ania ti kaipapanan ti makilimlimostayo kadi amin? Segun kadagitoy a bersikulo, kasano a tratuentayo ti amin nga annak ti Dios? (Mosiah 4:26). Asino ti agkasapulan iti tulongtayo?

Mosiah 4:27

Agtartaray kadi a naparpardas ti pamiliam ngem iti kabaelam? Nalabit mabalinmo nga awisen dagiti miembro ti pamilia nga amirisenda dagiti aktibidadda tapno sigurado a naregtada ngem masiribda pay.

Mosiah 5:5–15

Ania ti isingasing ti panangusar iti nagan ni Cristo kadatayo maipapan iti pakainaigantayo Kenkuana? Mabalin a makatulong ti panagsasarita maipapan iti no apay nga isurat dagiti tattao no dadduma dagiti naganda kadagiti sanikuada. Kasano a maipakitatayo nga “agkamengtayo” iti Mangisalakan?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Panangisurotayo

Mangpatanor iti maysa a naayat nga aglawlaw. Ti wagas a panangtratotayo dagiti miembro ti pamilia iti tunggal maysa ket mabalin a mangimpluensia unay iti espiritu iti pagtaenganyo. Tulongam amin dagiti miembro ti pamilia nga aramidenda ti pagrebbenganda a mangipasdek iti naayat, madaydayaw a pagtaengan tapno mariknanto ti tunggal maysa a natalged a mangibinglay kadagiti padas, saludsod, ken pammaneknek. (Kitaen ti Panangisuro iti Wagas ti Mangisalakan, 15.)

Iti Agtultuloy a Panangaywanna, ni Greg K. Olsen