Minerva K. Teichert (1888-1976), Ni Ammon iti sango ni Ari Limhi, 1949-1951, oil on masonite, 35 15/16 x 48 inches. Brigham Young University Museum of Art, 1969.

Abril 27–Mayo 3

Mosiah 7–10

“Babaen ti Bileg ti Apo”

Bayat ti panagbasam, mayawis ti Espiritu ti imatangmo dagiti masinunuo a ragup dagiti balikas wenno binatog iti nasantuan a kasuratan. Isuratmo no kasano ti riknam a dagita a binatog ket mayaplikar kenka.

Isuratmo dagiti Impresionmo

Kabayatan ti panangsagrap dagiti tao ni Ari Mosiah iti “agtultuloy a kappia” iti Zarahemla (Mosiah 7:1), naiturong dagiti kapanunotanda iti sabali pay a grupo dagiti Nephite, a sakbay ti adu a tawen pimmanaw tapno agindeg iti daga ti Lehi-Nephi. Naglabas dagiti kaputotan, ket awanen ti damag dagiti tao ni Mosiah manipud kadakuada. Isu nga indawat ni Mosiah ken ni Ammon a mangidaulo iti grupo dagiti agsuksukisok tapno mangsapul kadagiti pimmanaw a Nephite. Natakuatan ti grupo dagiti agsuksukisok a “gapu iti basol” dagiti Nephite (Mosiah 7:24), inadipen ida dagiti Lamanite. Ngem iti isasangpet ni Ammon ken dagiti kabsatna, kellaat a naddaanda iti namnama para iti pannakaisalakan.

No dadduma kaslatayo dagitoy adipen a Nephite, nga agsagsagaba gapu kadagiti basbasoltayo, agpangpangngadua no kasano a masarakantayo manen ti talna. No dadduma kaslatayo ni Ammon, makarikna iti pannakatignay a tumulong kadagiti dadduma ket iti kamaudiananna matakuatan a dagiti panagkagumaantayo ti nangparegta kadakuada nga “itag-ay[da] dagiti ulo[da], ken agrag-o[da], ket agtalek[da ] iti Dios” (Mosiah 7:19). Ania man dagiti kasasaadtayo, kasapulantayo amin ti agbabawi ken “agsubli iti Apo a naimpusuan ti panggep,” addaan iti pammati nga “wayawayaanna[tayo]” (Mosiah 7:33).

Dagiti Kapanunotan para iti Bukod a Panagadal iti Nasantuan a Kasuratan

Mosiah 7:14–33

No agsubliak iti Apo, agtalek Kenkuana, ket agserbi Kenkuana, isalakannakto.

Iti pannakaam-ammona ken ni Ammon, a maysa a Nephite manipud iti Zarahemla, ti nangted ken ni Ari Limhi iti namnama, ket kayatna nga ited dayta a namnama iti tattaona. Bayat ti panangbasam iti Mosiah 7:14–33, kitaem no ania ti kinuna ni Limhi kadagiti taona a mangallukoy kadakuada, mangpapigsa iti pammatida, ket mangted kadakuada iti namnama a tulongan ida ti Dios. Nupay saanka a nakaaramid kadagiti basol a kapada dagiti basol dagiti tao ni Limhi, kasano a matulongannaka dagiti balikasna nga agsubli iti Apo? Makitamto, kas pagarigan, nga impalagip ni Limhi kadagiti taona maipapan kadagiti napalabas a pakaammuan ti panangisalakan ti Dios (kitaen dagiti bersikulo 18–20). Kasano a dagitoy a pakaammuan, kasta met dagiti dadduma pay a pakaammuan iti nasantuan a kasuratan wenno bukod a padpadas, ket makatulong kenka nga agtalek iti Dios?

Mosiah 8:5–12

Ania dagiti 24 a  pinanid a nasarakan dagiti tao ni Limhi ?

Kabayatan ti bassit a grupo dagiti tao ni Limhi di nagballigi a nagsapsapul para iti daga a Zarahemla, nasarakanda dagiti 24 a  pinanid a balitok a nakitikitan iti saan a pamiliar a pagsasao. Dagitoy a pinanid, nga idi agangay impatarus ni Ari Mosiah, imbagana dagiti tattao a maawagan dagiti Jaredite, nga immay iti naikari a daga nanipud iti Torre ti Babel, ket iti agangay nadadael (kitaen iti Mosiah 28:11–19). Idi mabaybayag nagaramid ni Moroni iti nakayababaan dagitoy a pinanid (kitaen iti Ether 1:1–2), a nagbalin ti libro ni Ether. Kitaen iti Mosiah 28:18 ti epekto daytoy a kasuratan dagiti tao ni Mosiah.

Mosiah 8:12–19

Mangted ti Apo kadagiti propeta, mammadto ken mammaltiing, a pagsayaatan ti sangkataw-an.

Ket idi mangngeg ni Limhi ti pammaneknek ni Ammon a nangpatanor ti Apo iti maysa a mammadto, “nalaus ti rag-o[na] ket nagyaman iti Dios” ni Limhi (Mosiah 8:19). Apay nga ipapanmo a nariknana ti kasdiay? Ania ti masursurom maipapan kadagiti mammadto manipud kadagiti balikas ni Ammon iti Mosiah 8:13–19? Iti aldawtayo, “kanunongantayo dagiti Umuna a Panguluen ken ti Konseho ti Sangapulo-ket-dua kas dagiti propeta, mammadto ken mammaltiing ” (Pangiwanwan ti Nasantuan a Kasuratan, “Mammadto”). Kaano ti naudi a gundaway nga inutobmo ti bendision ti kaadda dagiti propeta, mammadto ken mammaltiing iti rabaw ti daga? Nalabit a maisuratmo no kasano a dagiti propeta, mammadto, ken mammaltiing a “pangnamnamaan” kenka (Mosiah 8:18).

Ni Propeta Joseph Smith ti naindaklan a mammadto nga agtakder iti ulo ti dispensasiontayo (kitaen iti D&K 21:1124:125; Joseph Smith—Pakasaritaan 1:62). Kasano nga impagwadanna ti panangiladawan ni Ammon iti maysa a mammadto kabayatan ti panagministrona?

Mosiah 9–10

Mabalinko a sanguen dagiti karitko “babaen ti bileg ti Apo.”

Inannugot ni Zeniff a nakaaramid kadagiti biddut. No dadduma kasta unay ti kinapasnekna , ket impasangona dagiti taona—dagiti kapuonan dagiti tao ni Limhi—iti narikut a kasasaad babaen ti panangaramidna iti saan a nasayaat a pannakitulag ken ni Ari Laman. Ngem idi agangay, idi napan nakidangadang maibusor kadagiti Lamanite, tinulonganna dagiti taona a mangsango kadagiti karitda nga addaan iti pammati. Bayat ti panangbasam iti Mosiah 2:9–10, sarakem no ania ti inaramid dagiti tao ni Zeniff a nangipakita iti pammatida. Kasano a pinapigsa ida ti Dios? Ania ti kayat a sawen kenka ti agtultuloy “babaen ti bileg ti Apo”? (Mosiah 9:17; 10:10–11).).

Mosiah 10:11–17

Makaimpluensia dagiti pilik kadagiti kaputotan.

Segun iti Mosiah 10:11–17, kasano a dagiti tignay ken ugali dagiti kapuonan dagiti Lamanite ket nanglapped kadagiti Lamanite manipud iti pannakaammo iti kinapudno? Kasano nga inaringan dagiti pili dagiti kapuonan dagiti Lamanite kadagiti masakbayan a kaputotan? Panunotem maipapan kadagiti tao a mabalin a maimpluensiaan dagiti pammati ken pilim; ania ti ar-aramidem a mangtulong kadakuada nga ad-adda pay a maaddaanda iti naan-anay a pammati ken ni Cristo?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

Mosiah 7:19–20

Kitaen dagiti pagwadan nga intudo ni Limhi tapno mangallukoy kadagiti taona a maaddaan iti pammati. Ania dagiti pagarigan manipud kadagiti nasantuan a kasuratan a mangparegta kadatayo nga “agtalek iti Dios”? Ania ti kayat a sawen ti agtalek iti Dios? (kitaen iti Mosiah 9:17; 10:19). Ania dagiti estoria manipud iti biagtayo wenno iti biag dagiti kapuonantayo a mabalintayo nga iburay a mangparegta ti dakdakkel a panagtalek iti Dios?

Mosiah 7:26–27

Ania ti masursurotayo maipapan iti Mangisalakan manipud kadagitoy a bersikulo? (kitaen met iti D&K 130:22). Apay nga agyamantayo a mangammo kadagitoy a banag?

Mosiah 8:13–18

Tapno makatulong kadagiti miembro ti pamilia a maawatanda no ania ti mammadto, nalabit a mabalinmo nga ipakita kadakuada dagiti ladawan ti ramramit a mangtulong kadatayo a makakita kadagiti banag a ditayo makita, kas kadagiti binocular, telescope wenno microscope. Kasano a maipada dagitoy a ramit iti maysa a mammadto? (kitaen iti Moises 6:35–36). Ania ti makita dagiti mammadto a saantayo a makita? Ania ti pakakitaan nga adda kadatayo a maysa a mammadto ni Joseph Smith?

Mabalin a mangipakitaka kadagiti ladawan dagiti sibibiag a propeta, mammadto, ken mammaltiingtayo ket kiddawem iti pamiliam no ania ti ammoda maipapan kadakuada. Kasano a sursurotentayo ida?

Mosiah 9:14–18; 10:1–10

Idi dumarup dagiti Lamanite, nakasaganan iti bagi ken espiritu dagiti tao ni Zeniff. Ania ti masursurotayo manipud ken ni Zeniff ken dagiti taona maipapan iti panagsagana para kadagiti karit?

Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Bukod a Panagadal

Kalikagumam a gun-oden dagiti bukodmo a naespirituan a nalawag a pannakammo ken pannakaawat [insights]. Isingasing daytoy a balabala dagiti binatog ken pagbatayan nga ipamaysa, ngem saan koma a dagitoy a singasing ti manglimitar iti panagadalmo. Mabalin a maaawisnaka dagiti bersikulo wenno takuatem dagiti pagbatayan a di nadakamat ditoy. Agpatarabayka iti Espiritu.

Ti Parmata ken ni Joseph Smith, ni Clark Kelley Price