Pannakapasurot ni Alma nga Ub-ubing, ni Gary L. Kapp Kapp

Mayo 18–24

Mosiah 25–28

“Naawaganda iti Tattao ti Dios”

Kalpasan nga “immay ti timek ti Apo ken [Alma],” insuratna dagiti banag nga imbaga kenkuana ti Apo “tapno maalana ida” (Mosiah 26:13, 33). Kasano ti panangsurotmonto iti pagwadan ni Alma?

Isuratmo dagiti Impresionmo

Kalpasan ti dumani tallo a kaputotan a nagnanaed kadagiti nagsisina a pagilian, nagkaykaysa manen a tattao dagiti Nephite. Dagiti tao ni Limhi, dagiti tao ni Alma, ken dagiti tao ni Mosiah—uray pay dagiti tao ni Zarahemla, a saan a naggapu ken ni Nephi—ket “maibilang a Nephite” amin itan (Mosiah 25:13). Adu met kadakuada dagiti agtarigagay nga agbalin a miembro ti Simbaan nga impasdek ni Alma. Kasta met a dagiti amin a “nagtarigagay nga umawat iti nagan ni Cristo” ket nabuniaganda, “ket naawaganda iti tattao ti Dios” (Mosiah 25:23–24). Kalpasan dagiti tawen ti panagririri ken pannakabalud, kasla agragragsak dagiti Nephite iti kamaudiananna iti panawen ti kappia.

Ngem idi agangay, nangrugi dagiti saan a mamatpati a mangidadanes kadagiti Santo. No ania ti namagbalin daytoy a makasugat unay iti puso ket adu kadagitoy a saan a mamatpati ti mismo nga annak dagiti mamatpati dagiti “tumantanor a kaputotan” (Mosiah 26:1 agraman dagiti lallaki nga annak ni Mosiah ken maysa a lalaki nga anak ni Alma. Ngarud napasamak ti maysa a milagro, ket ti pakaammuan dayta a milagro ti nangted iti namnama kadagiti agladladingit a nagannak para kadagiti kaputotan. Ngem ti estoria maipapan iti pannakapasurot [kumbersion] ni Alma ket saan laeng a para kadagiti nagannak dagiti nasukir nga annak. Ti pudno a pannakapasurot [kumbersion] ket maysa a milagro nga, iti maysa a wagas wenno sabali, nasken a mapasamak iti amin kadatayo.

Dagiti Kapanunotan para iti Bukod a Panagadal iti Nasantuan a Kasuratan

Mosiah 26:1–6

Siak ti akinrebbeng iti bukodko a pammati ken pammaneknek.

Napadasan dagiti nakangngeg iti sermon ni Ari Benjamin ti nakaskasdaaw a pannakapasurot [kumbersion] (kitaen iti Mosiah 5:1–7), ngem ti pannakapasurot [kumbersion] ket bukod a padas a a mabalin nga ipasa a kas maysa a tawid ti asino man a nagannak kadagiti annakda. Nasken a mapadasantayo amin ti bukodtayo a pannakapasurot [kumbersion] iti ebanghelio ni Jesucristo. Bayat ti panangbasam iti Mosiah 26:1–6 maipapan iti “tumantanor a kaputotan” dagiti di mamatpati a Nephite, kitaen dagiti bunga ti kinaawan ti pammatida. Mabalin met a panunotem ti maipapan kadagiti tao a tarigagayam a a mayasideg ken ni Cristo. Idinto a saanmo mabalin nga ited ti pannakapasurot [kumbersionmo], mabalin a yarasaas ti Espiritu dagiti banag a mabalinmo nga aramiden a makatulong kadakuada a mangsapul iti pammati. Bayat ti panangbasam iti Mosiah 25–28 maipapan iti no kasano a tinulongan da Alma ken dagiti dadduma pay a miembro ti Simbaan ti tumantanor a kaputotan, mabalin nga umay kenka dagiti nayon pay a kapanunotan.

Kitaen met iti Doktrina ken Katulagan 68:25–29.

Mosiah 26:6–39

Kalikaguman dagiti napudno a katulongan ti Dios ti mangaramid iti pagayatanna.

No dadduma mabalin nga ipagaruptayo a kanayon nga ammo ti maysa a lider ti Simbaan kas ken ni Alma ti umno a banag nga aramiden. Iti Mosiah 26 mabasatayo ti maipapan iti maysa a parikut iti Simbaan nga iti kaano man saan a nakaipasanguan ni Alma, ket “amkenna a makaaramid iti biddut iti imatang ti Dios” (Mosiah 26:13). Ania ti inaramid ni Alma iti daytoy a kasasaad? (kitaen iti Mosiah 26:13–14, 33–34, 38–39). Ania ti isingasing ti padas ni Alma maipapan iti no kasano a sanguem dagiti narigat a parikut iti pamiliam wenno iti panagserbim iti Simbaan?

Mabalin met a makaay-ayo nga ilistam dagiti kinapudno nga impalgak ti Dios ken ni Alma, a masarakan iti Mosiah 26:15–32. Kitaen a sumagmamano kadagitoy a kinapudno ket saan a direkta a sungbat iti saludsod ni Alma. Ania ti isingasing daytoy kenka maipapan iti kararag ken panangawat iti bukod a paltiing?

Mosiah 27:8–37

Masapul a mayanak a mabaliwan ti amin a lallaki ken babbai.

Madlaw a nagkasapulan ni Alma nga Ub-ubing iti naespirituan a pannakayanak manen, gapu ta isu ken dagiti lallaki nga annak ni Mosiah “ti karugitan kadagiti managbasol,” a napan “mangdadael iti simbaan ti Dios” (Mosiah 28:4; 27:10). Ngem saan a nabayag kalpasan ti pannakapasurot [kumbersionna], pinaneknekan ni Alma a sidadaan a magun-od ti kumbersion —ken kasapulan—para iti tunggal maysa: “Dika masdaaw,” kinunana, “nga amin a sangkataw-an … nasken a maipasngay manen” (Mosiah 27:25; nainayon ti panangyunay-unay). Kinaagpaysona, iramannaka dayta.

Bayat ti panangbasam maipapan iti padas ni Alma, a masarakan iti Mosiah 27:8–37, mabalinmo a padasen nga ikabil ti bagim iti lugarna. Saanmo a padpadasen a dadaelen ti Simbaan, ngem awan duadua a mapanunotmo dagiti banag maipapan iti bagim a masapul a balbaliwan. Asino, kas iti ama ni Alma, ti mangtultulong kenka ken mangikarkararagan kenka a “napnuan iti pammati”? Ania dagiti padas a nakatulong “tapno maallukoy[ka] iti bileg ken turay ti Dios”?? (MMosiah 27:14). Ania dagiti “napintas a banag” nga inaramid ti Apo kenka wenno iti pamiliam a nasken a “laglagipem”? (Mosiah 27:16). Ania ti masursurom manipud kadagiti balikas ken tignay ni Alma nga Ub-ubing maipapan iti no ania ti kayat a sawen ti agbalin a mayanak manen? Dagiti saludsod kas kadagitoy ket mabalin a makatulong kenka a mangamiris iti progresom iti proseso ti pannakayanak manen.

Kitaen met iti Mosiah 5:6–9; Alma 36; “Conversion”,” (Gospel Topics, topics.ChurchofJesusChrist.org).

Nagrag-o ti Amana, ni Walter Rane

Mosiah 27:14,19–24

Denggen ti Dios dagiti kararagko ket sungbatanna ida a mayannurot iti pagayatanna.

Mabalin nga am-ammom ti maysa a naganak iti situasion ni Alma a Laklakay, a ti anakna a lalaki wenno anakna a babai ket agar-aramid iti makadadael a pili. Wenno mabalin a sika dayta a naganak. Ania ti masarakam iti Mosiah 27:14, 19–24 a makangted kenka iti namnama? Kasano a makaimpluensia dagitoy a bersikulo kadagiti kararagmo nga agpaay kadagiti dadduma?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

Mosiah 25:5–11

Kasano ti narikna dagiti tao ni Mosiah kalpasan nga imbasana kadakuada dagiti kasuratan ti tattao ni Zeniff ken tattao ni Alma? Nangpatalinaed kadin ti pamiliam kadagiti ania man a kasuratan a mabalin a basaem? Nalabit a makainayonka kadagiti kasuratam wenno mangirugi iti panangpatalinaedmo iti bukodmo a kasuratan. Ania ti iramanmo a mabalin a makatulong iti pamiliam (agraman dagiti masakbayan a kaputotan) a “napno iti aglaplapusanan a rag-o” ket adalem ti maipapan “ti madagdagus a kinamanangngaasi ti Dios”?? (MMosiah 25:8,10).

Mosiah 25:16

Apay a napateg para iti tattao ni Limhi a manglagip a ti Apo ti nangwayawaya kadakuada manipud iti pannakaadipen? Ania ti inaramid ti Apo para kadatayo a rumbeng a laglagipentayo?

Mosiah 26:29–31; 27:35

Segun kadagitoy a bersikulo, ania ti rumbeng nga aramiden ti maysa a tao tapno makaawat iti pammakawan?

Mosiah 27:21–24

Bayat ti panangbasam kadagitoy a bersikulo, ibilang ti maysa a tao nga ikararagan ken pagayunuan ti pamiliam.

Mosiah 27–28

Tapno matulongam ti pamiliam a mangiladawan iti panunotda dagiti pakaammuan kadagitoy a kapitulo, mabalinmo nga awisen ida a mangidrowing kadagiti ladawan ti tattao a nairaman ket usaren dagiti ladawan a mangisarita manen iti estoria. Wenno mabalin a magustuanda a yakem ti estoria; kasano a mayakemda ti panagbalbaliw a napadasan da Alma ken dagiti lallaki nga annak ni Mosiah?

Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Panangisurotayo

Usarem ti arte. “Ti Libro ti Arte ti Ebanghelio ken iti LDS Media Library iti ChurchofJesusChrist.org ket naglaon iti adu a ladawan ken video a makatulong [iti pamiliam] a mangiladawan iti panunotda kadagiti konsepto wenno pasamak” (Panangisuro iti Wagas ti Mangisalakan, 22).

Ladawan ti maysa nga anghel nga agparparang ken ni Alma nga Ub-ubing ken dagiti annak a lallaki ni Mosiah ni Kevin Keele