ti anghel nga agparang kada Alma ken dagiti lallaki nga annak ni Mosiah

Pannakapasurot ni Alma nga Ub-ubing, ni Gary L. Kapp

Mayo 18–24

Mosiah 25–28

“Naawaganda iti Tattao ti Dios”

Ammo ti Nailangitan nga Ama no ania ti kasapulan dagiti ubbing iti klasem tapno agsursuro ken no kasano a matulongan ida. Agkalikagum a manggun-od iti pannarabayna bayat ti panangbasam iti Mosiah 25–28 ken irebyum daytoy a balabala.

Isuratmo dagiti Impresionmo

icon iti panagbibinninglay

Yawis ti Panagbibinninglay

Ipakitam ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ken kiddawem kadagiti ubbing a mangiladawan no ania ti mapaspasamak iti ladawan. No pamiliar kadagiti ubbing ti estoria ni Alma nga Ub-ubing ken dagiti lallaki nga annak ni Mosiah, paibinglaymo kadakuada no ania ti ammoda.

icon iti panangisuro

Isuro ti Doktrina: In-inaudi nga Ubbing

Mosiah 26:30–31

Kayat ti Apo a mamakawanak.

Insuro ti Apo ni Alma a siwawaya Isuna a mamakawan kadagiti agbabawi. Nasken a surotentayo ti pagwadanna babaen iti panangpakawan kadagiti nakabasol kadatayo.

Dagiti Mabalin nga Aktibidad

• Ibasam kadagiti ubbing daytoy a ragup ti balikas manipud iti Mosiah 26:31: “Pakawanenyonto met ti naglabsingan ti tunggal maysa kadakayo.” Pagpraktisem dagiti ubbing a mangibaga ti “Pakawanenka” ti sumagmamano a daras, ket kitaem no ammoda no ania ti kaipapanan ti mamakawan. Ibinglay ti maysa a padas manipud iti biagmo idi pinakawanmo ti maysa a tao wenno pinakawannaka ti maysa a tao.

• Tulongam dagiti ubbing a mangyakem iti panangpakawan iti tunggal maysa. Kiddawem ti maysa nga ubing nga agpamarang a nakaaramid iti maysa a banag a mangdangran wenno mangpasakit iti sabali pay nga ubing. Ania ti mabalin a sawen wenno aramiden ti sabali nga ubing a mangipakita iti pammaakawan?

• Awisem dagiti ubbing a mangidrowing iti naliday a rupa iti maysa a bangir ti papel ken maysa a naragsak a rupa iti sabali pay a bangir. Kiddawem kadakuada a mangitag-ay iti naliday a rupa bayat ti panangisaritada maipapan iti padas idi inupay ida ti maysa a kabsat wenno gayyemda. Kiddawem kadakuada a mangitag-ay iti naragsak a rupa bayat ti panangisaritada maipapan iti no kasano a pinakawanda wenno pakawanendanto dayta a tao.

Mosiah 27:8–37

Tulongan ti ebanghelio dagiti tao nga agbalbaliw ken agbalin nga ad-adda pay a kas ken ni Jesus.

Iladawan ti pannakapasurot ni Alma nga Ub-ubing ken dagiti lallaki nga annak ni Mosiah a gapu ken ni Jesucristo ken ti ebangheliona, mabalin nga agbalbaliw ti asino man ken agbalin nga ad-adda pay a kas ken ni Jesus.

Dagiti Mabalin nga Aktibidad

• Isaritam biit ti maipapan iti pannakapasurot ni Alma nga Ub-ubing ken dagiti lallaki nga annak ni Mosiah, kas nailadawan iti Mosiah 27:8–37. Para iti tulong, kitaen iti “Kapitulo 18: Agbabawi ni Alma nga Ub-ubing” (Dagiti Estoria iti Libro ni Mormon, 49–52 ). Kalpasanna isaritam manen ti estoria, a palubosam dagiti ubbing a mangibinglay kadagiti detalye a malagipda. Payakem kadakuada ti estoria, ken tulongam ida a mangkita no ania ti paggidiatan da Alma ken dagiti lallaki nga annak ni Mosiah sakbay a nagbabawida ken kalpasanna.

• Tulongam dagiti ubbing a mangusar iti panid ti aktibidad iti daytoy a lawas tapno mangisarita iti estoria ni Alma ken dagiti lallaki nga annak ni Mosiah. Basaem ti Mosiah 27:24, ken tulongam dagiti ubbing a makaawat a nagbalbaliw ni Alma ken dagiti annak a lallaki ni Mosiah gapu ta nagbabawida kadagiti basolda ken inawatda ti ebanghelio ni Jesucristo.

  Ni Alma nga Ub-ubing a mabagbagkat iti balay ti amana

  Nagrag-o ti Amana, ni Walter Rane

Mosiah 28:1–8

Maibinglayko ti ebanghelio.

Kalpasan ti pannakapasurotda, magagaran dagiti annak a lallaki ni Mosiah a mangibinglay iti ebanghelio iti tunggal maysa, a pakairamanan dagiti kabusorda, dagiti Lamanite.

Dagiti Mabalin nga Aktibidad

• Usarem ti Mosiah 28:1–8 a mangibaga kadagiti ubbing maipapan kadagiti annak a lallaki ni Mosiah nga agkeddeng a mangikasaba iti ebanghelio kadagiti Lamanite. Para iti tulong, kitaen iti “Kapitulo 19: Nagbalin a Misionario dagiti Annak a Lallaki ni Mosiah” (Dagiti Estoria iti Libro ni Mormon 53 ). Apay a kinayatda nga ibinglay ti ebanghelio? (kitaen iti bersikulo 3).

• Tulongam ti tunggal ubing nga agpanunot iti maysa a tao nga agkasapulan a mangammo iti ad-adu pay maipapan iti ebanghelio. Tulongam dagiti ubbing nga agplano no anianto ti ibagada kadagiti tao a napanunotda.

• Aggigiddan nga agkansion iti maysa a kanta maipapan iti panangibinglay iti ebanghelio “I Want to Be a Missionary Now” (Children’s Songbook, 168). Ilawlawagmo dagiti ragup ti balikas iti kanta a mangisingasing iti no kasano a maibinglaytayo ti ebanghelio kadagiti dadduma.

icon iti panangisuro

Isuro ti Doktrina: In-inauna nga Ubbing

Mosiah 26:22–23, 29–30; 27:8–37

Siwawaya a pakawanen ti Dios dagiti agbabawi.

No asino man iti klasem ti masddaaw no pudno a mapakawan isuna, makatulong dagiti balikas ti Dios ken ni Alma a Laklakay ken ti padas ni Alma nga Ub-ubing.

Dagiti Mabalin nga Aktibidad

• Kiddawem kadagiti ubbing nga agpammarang a makisarsaritada iti maysa a tao a mangipagarup a dinto kaano man pakawanen ti Dios isuna. Awisen ida a mangrebyu kadagiti balikas ti Dios ken ni Alma a Laklakay iti Mosiah 26:22–23, 29–30. Ania ti masarakanda a makatulong iti dayta a tao?

• Sakbay iti klase, kiddawem ti maysa kadagiti ubbing nga basaen ti maipapan iti pannakapasurot ni Alma nga Ub-ubing, a masarakan iti Mosiah 27:8–37, ken umay a nakasagana a mangisarita iti estoria iti klase a kasla isu ni Alma nga Ub-ubing. (No kasapulan, isingasingmo kenkuana nga agkiddaw iti tulong ti maysa a nagannak.) Bayat ti panangisaritana iti estoria, agsaludsod kas iti “Kasano ti nariknam idi … ?” wenno “Ania ti simmaruno a napasamak?”

• Awisem dagiti ubbing nga agaramid iti listaan dagiti balikas manipud iti Mosiah 27:8–10 a mangiladawan no ania ti langa da Alma ken dagiti annak a lallaki ni Mosiah sakbay ti pannakapasurot wenno kumbersionda. Kiddawen ida nga agaramid iti sabali pay a listaan manipud iti Mosiah 27: 32–37 a mangiladawan no ania ti langada kalpasan ti pannakapasurot wenno kumbersionda. Segun iti bersikulo 24–29, ania ti gapu daytoy naindaklan a panagbalbaliw ken ni Alma?

Mosiah 26:29–31

Tapno mapakawan, nasken a mamakawanak.

Tulongam dagiti ubbing a mangkita iti pakainaigan ti pammakawan nga ipaayda kadagiti dadduma ken ti pammakawan a namnamaenda para iti bagbagida.

Dagiti Mabalin nga Aktibidad

• Awisem dagiti ubbing a mangbasa iti Mosiah 26: 29–31 ken mangbilang no namin-ano a nagparang ti balikas a “pakawan.” Ania ti isuro kadatayo dagitoy nga bersikulo maipapan iti panangpakawan kadagiti dadduma? Kasano nga agpada a makatulong iti maysa a tao a nakaaramid iti biddut ken iti tao a mamakawan?

• Kiddawem ti maysa nga ubing a mangidrowing iti maysa a rangtay iti pisara, ket ibinglay daytoy a palawag nga inadaw ni Presidente Thomas S. Monson: “Siasino man ti saan a mamakawan kadagiti dadduma ket mangdadael iti rangtay a nasken a pagballasiwanna mismo no ragpatenna ti langit, gapu ta kasapulan ti tunggal maysa ti “pammakawan” (George Herbert, nadaw iti “Hidden Wedges,” Ensign, Mayo 2002, 19). Pugasen ti paset ti rangtay, ket kiddawem kadagiti ubbing a mangtulong kenka a mangulit a mangbangon iti daytoy, iti kada pedaso, bayat ti panangibinglayda kadagiti wagas a mabalinda a pangipaayan iti pammakawan kadagiti dadduma. Awisem ida a mangpanunot iti maysa a tao a nasken a pakawanenda.

Mosiah 27:8–24

Makapagkararag ken makapagayunoak para iti Dios a mangbendision kadagiti ay-ayatek.

Ibilangmo no kasano a makatulong kenka dagiti ubbing a makaawat a ti panagayuno ket mangpapigsa kadagiti pammatida bayat ti panagkararagda para kadagiti tao nga ay-ayatenda.

Dagiti Mabalin nga Aktibidad

• Aggigiddan a mangbasa iti Mosiah 27:8–24, ket kiddawem kadagiti ubbing a mangilasin no ania ti inaramid ni Alma ken dagiti taona a makatulong ken ni Alma nga Ub-ubing. Ibinglay ti maysa a padas a nakapagayuno ken nakapagkararagka para iti maysa a tao, ken allukoyem dagiti ubbing a mangibinglay kadagiti bukodda a padas.

• Awisem dagiti ubbing a mangpanunot iti maysa a tao nga am-ammoda nga agkasapulan iti tulong ti Dios iti biagna. Ibinglay ti pammaneknekmo a mabalin dagiti ubbing ti agkararag ken agayuno nga addaan iti pammati iti Dios tapno mangbendision iti daytoy a tao. Awisem dagiti ubbing nga agkararag para iti tao a nalagipda ken, no kabaelanda, agayunoda met para kadakuada.

icon iti panagsursuro

Yallukoy ti Panagsursuro iti Pagtaengan

Kiddawen kadagiti ubbing a pumili iti maysa a banag a nasursuroda manipud iti padas ni Alma nga Ub-ubing ken dagiti lallaki nga annak ni Mosiah a kayatda nga ibinglay kadagiti pamiliada.

Panangpadur-as iti Panangisurotayo

Suportaran dagiti nagannak. “Dagiti nagannak ti kapatgan a mannursuro iti ebanghelio para kadagiti annakda—agpadada nga addaan iti kangrunaan a pagrebbengan ken kaindaklan a bileg a makaimpluensia kadagiti annakda (kitaen iti Deuteronomio 6:6–7 Bayat ti panangisurom kadagiti ubbing iti simbaan, sikakararag a mangsapul kadagiti wagas a mangtulong kadagiti nagannakda” (Panangisuro iti Wagas ti Mangisalakan, 25).

panid ti aktibidad: makatulong kadatayo ti ebanghelio nga agbalin a kas ken ni Jesucristo