Ni Abinadi iti Sango ni Ari Noah, ni Andrew Bosley

Mayo 4–10

Mosiah 11–17

“Ti Silaw … A Saan a Pulos a Mapasipnget”

Agutob ken agkararag tapno maammuan no kasano a mausarmo iti estoria maipapan ken ni Abinadi ken dagiti pannursurona iti Mosiah 11–17 a makatulong kadagiti ubbing a sursuruam. Isuratmo dagiti impresion a maawatmo.

Isuratmo dagiti Impresionmo

Yawis ti Panagbibinninglay

Palugodam dagiti ubbing a mangibinglay no ania ti ammoda maipapan iti estoria da Abinadi ken Ari Noah. Makatulong ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia .

Isuro ti Doktrina: In-inaudi nga Ubbing

Mosiah 11–13; 17

Maitakderak ti kinapudno, uray no maymaysaak a mangitakder.

Agpada a natured da Abinadi ken ni Alma mangsaluad iti kinapudno. Kasano a mausarmo daytoy nga estoria a mangparnuay iti tured dagiti ubbing para kadagiti kanito no mabalin a nasken a saluadanda dagiti pammatida?

Dagiti Mabalin nga Aktibidad

• Gupgopem ti pakasaritaan da Abinadi, Ari Noah, ken Alma a masarakan iti Mosiah 11–13 ken 17. Mabalinmo nga usaren ti “Kapitulo 14: Da Abinadi ken Ari Noah” (Dagiti Estoria iti Libro ni Mormon, 38–42, ). Awisen dagiti ubbing a mangyakem iti pakasaritaan, ket pagsisinublatem ida a mangyakto iti nadumaduma nga akem.

• Makimartsa kadagiti ubbing bayat ti panagkansionda ti maysa a kanta a mangparegta iti tured kas iti “I Will Be Valiant” (Children’s Songbook, 162). Aggigiddan a basaen dagiti balikas ti kanta, ket tulongam dagiti ubbing a mangilasin no ania ti ar-aramiden ti maysa a maingel wenno natured a tao. Pumili iti sumagmamano a bersikulo manipud iti Mosiah 11–13 ken 17 tapno ibasa kadagiti ubbing a mangipakita no kasano ti kinatured da Abinadi ken Alma (kas pagarigan, kitaen iti Mosiah 13:1–4, 9).

Mosiah 12:33–36; 13:11–24

Nasken nga agtungpalak iti Sangapulo a Bilin.

Ammo dagiti saserdote ni Ari Noah dagiti bilin ngem saanda a sinurot dagitoy. Makatulong dagiti balikas ni Abinadi kadagiti ubbing a makaawat iti kinapateg ti panagtungpal kadagiti bilin.

Dagiti Mabalin nga Aktibidad

• Awisem dagiti ubbing nga agbilang agingga iti 10. Wenno ikkam ida iti 10 a nabilang a pedaso dagiti papel ken ipaurnosmo kadakuada dagiti papel. Ilawlawag a nangted ti Nailangitan nga Ama iti Sangapulo a Bilin tapno makatulong kadatayo nga agsubli a makipagnaed Kenkuana. Tulongam dagiti ubbing a mangyebkas kenka iti sumagmamano kadagiti Sangapulo a Bilin manipud iti Mosiah 12:33–36 ken 13:11–24.

• Ipakitam ti ladawan ni Moises nga iggemna dagiti Sangapulo a bilin (kas iti Libro ti Arte ti Ebanghelio,p. 14), ket ilawlawag biit no kasano nga inawat ni Moises dagiti bilin manipud iti Dios (kitaen iti Exodo 19–20). Kalpasanna ipakitam ti maysa a ladawan ni Abinadi (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia), ken ibagam kadagiti ubbing nga impalagip ni Abinadi ken ni Ari Noah ken dagiti saserdotena maipapan iti Sangapulo a Bilin. Pumili iti sumagmamano kadagiti bilin manipud iti Mosiah 12:33–36 ken 13:11–24 a mariknam a naipangpangruna a naipamaysa para kadagiti ubbing a sursuruam, ket ilawlawag kadakuada dagiti bendision a sumangbay iti panagtungpal kadagiti bilin.

• Aggigiddan nga agkansion iti maysa a kanta maipapan iti panagtungpal kas iti “Keep the Commandments” (Children’s Songbook, 146). Apay a tungpalentayo dagiti bilin?

Mosiah 14:5; 15:7–9

Natured nga agpaneknek dagiti propeta maipapan ken ni Jesucristo.

Insuro ni Abinadi ken ni Ari Noah ken dagiti dadduma pay maipapan ken ni Jesucristo, uray pay no napeggad daytoy. Kasano a mapapigsa ti pakasaritaan ni Abinadi dagiti pammaneknek dagiti ubbing kadagiti propeta?

Dagiti Mabalin nga Aktibidad

• Ibinglay kadagiti ubbing ti sumagmamano kadagiti banag nga insuro ni Abinadi maipapan ken Jesucristo iti Mosiah 14:5 ken 15:7–9. Tulongam dagiti ubbing a makaawat a kayat ni Abinadi a ni Ari Noah ken dagiti taona a surotenda ni Jesus tapno makapagragsakda. Iti panawentayo, isuronatayo dagiti sibibiag a propeta maipapan iti Mangisalakan. Basaem ti maysa nga adaw manipud iti sapasap a komperensia, wenno mangibinglay iti paset iti video ti maysa a sibibiag a propeta a mangibingbinglay iti pammaneknekna maipapan ken ni Jesucristo ).

• Mangipakita wenno mangidrowing kadagiti ladawan dagiti kawar, maysa a pagbaludan, ken maysa nga apuy. Isurom kadagiti ubbing a nagtallugod ni Abinadi a mapungo, maibalud, ken mapuoran iti apuy tapno ibinglayna ti pammaneknekna maipapan ken ni Jesucristo. Nupay nalabit a saantayo iti kaano man a maipasango kadagitoy a pagpeggadan, kasano nga agbalintayo a natured a kas ken ni Abinadi iti panagbinglay kadagiti pammaneknektayo iti agpada a balikas ken pilitayo?

Isuro ti Doktrina: In-inauna nga Ubbing

Mosiah 11–13; 17

Maitakderak ti umno, uray no maymaysaak nga agtakder.

Kasano a maisaganam dagiti ubbing a sursuruam a situtured a mangitakderda iti umno, uray pay no rumbeng nga aramidenda daytoy a maymaysa?

Dagiti Mabalin nga Aktibidad

• Awisem dagiti ubbing a mangidrowing kadagiti nadumaduma a paset ti pakasaritaan da Abinadi, Ari Noe, ken Alma a masarakan iti Mosiah 11–13 ken 17. Tulongan ida nga agusar kadagiti ladawanda tapno ulitenda nga isarita ti estoria wenno usaren ti “Kapitulo 14: Da Abinadi ken Ari Noah” (Dagiti Estoria iti Libro ni Mormon, 38–42, ). Kasano nga intakderan da Abinadi ken Alma ti umno? Apay a saan nga intakderan ni Ari Noah ti umno? (kitaen iti Mosiah 17:11–12). Tulongam dagiti ubbing nga agpanunot kadagiti panawen idi intakderanda no ania ti umno.

• Tulongam dagiti ubbing nga agpanunot kadagiti kasasaad a a nakaitakderandapara iti umno, ken awisem ida a mangyakem iti sumagmamano kadagitoy a kasasaad. Kas pagarigan, ania ti mabalin nga aramidenda no padasen ti maysa a tao a mangallukoy kadakuada nga agbuya iti maysa a saan a maitutop a pelikula wenno no saan a kayat dagiti gagayyemda a mangiraman iti maysa a tao iti maysa nga ay-ayam nga ay-ayamenda?

Mosiah 12:33–36; 13:11–24

Nasken nga agtungpalak iti Sangapulo a Bilin.

Insuro ni Abinadi ken ni Ari Noah ken dagiti nadangkes a saserdote maipapan iti Sangapulo a Bilin. Maawatan kadi dagiti ubbing a sursuruam no apay a nasken nga ayaten ken tungpalentayo dagiti bilin ti Dios?

Dagiti Mabalin nga Aktibidad

• Dutokam ti tunggal ubing a mangbasa iti maysa kadagiti bilin iti Mosiah 12:35 ken 13:11–24. Tulongam dagiti ubbing nga agpanunot kadagiti wagas a makatulong iti tunggal maysa a manglagip iti tunggal bilin (kas iti panaggaarngi iti ragup ti balikas, maysa a tignay, wenno maysa nga acronym).   Mangted dagiti ubbing kadagiti pedaso ti papel a sukog puso, ket awisem ida a mangisurat iti maysa wenno ad-addu pay kadagiti Sangapulo a bilin iti puspusoda (kitaen iti Mosiah 13:11)—nalabit maysa a mariknada a nasken a lalaingenda a tungpalen.

• Aggigiddan nga agkansion iti maysa a kanta maipapan kadagiti bilin.“Keep the Commandments” (Children’s Songbook, 146). Ania dagiti bendision a sumangbay iti panagtungpal kadagiti bilin?

Isuro kadatayo dagiti nasantuan a kasuratan dagiti bilin ti Dios.

Mosiah 14:6; 16:4–9

No agbasolak, mapukawak: gapu ken ni Jesucristo, masarakannak.

Tapno mangisuro maipapan ken ni Jesucristo, inadaw ni Abinadi ni propeta Isaias, nga indilignatayo iti napukaw a karnero. Kasano a mausarmo daytoy a panangidilig a mangisuro kadagiti ubbing maipapan iti Mangisalakan?

Dagiti Mabalin nga Aktibidad

• Awisem dagiti ubbing a mangibinglay kadagiti padas idi napukawanda iti maysa a banag wenno napukawda mismo. Kasano ti nariknada? Ania ti inaramidda? Aggigiddan a basaen ti Mosiah 14:6 ken 16:4–9. Kasano a no dadduma “maaw-awanantayo” manipud iti Dios? Kasano a timmulong ni Jesucristo nga agsublitayo?

• Awisem dagiti ubbing a mangiladawan iti maysa a pangen ti karnero. Ania dagiti sumagmamano a rason a mabalin a pakaapukawan ti maysa a karnero? Isurat dagiti sungbatda iti pisara. Kasano a maipadatayo iti mayaw-awan a karnero? Kasano ti mabalin a marikna ti Nailangitan nga Ama no datayo ket “masarakan” babaen ti panagbabawi ken Pannubbot ti Mangisalakan? (Kitaen ti DkK 18:10–13). Ibinglay ti pammaneknekmo maipapan iti Mangisalakan ken panagbabawi.

Yallukoy ti Panagsursuro iti Pagtaengan

Awisem dagiti ubbing a mangkiddaw kadagiti miembro ti pamiliada a mangibinglay kadagiti padas a nangitakderanda para iti kinapudno, wenno allukoyem dagiti ubbing a mangibinglay kadagiti bukodda a padas.

Panangpadur-as iti Panangisurotayo

Ti panangulit isu ti tulbek ti panagsursuro. Pagimbagan dagiti ubbing ti pannakangngegda iti maysa a pagbatayan ti ebanghelio wenno panangaramid iti maysa nga aktibidad iti mamin-adu pay ngem iti maminsan. Padasem ti panangulit kadagiti aktibidad iti nadumaduma a wagas.