“Mayo 25–31. Mosiah 29–Alma 4: ‘Natibkerda ken Saan a Maisin,’” Umaykayo, Sumurot Kaniak—Para iti Primary: Libro ni Mormon 2020 (2020)
“Mayo 25–31. Mosiah 29–Alma 4,” Umaykayo, Sumurot Kaniak—Para iti Primary: 2020
Ni Alma nga Ub-ubing a Mangikaskasaba, ni Gary L. Kapp
Mayo 25–31
Mosiah 29–Alma 4
“Natibkerda ken Saan a Maisin”
Adu ti masursuro dagiti ubbing a sursuruam iti klasem, ngem ad-adunto pay ti masursuroda no ipaugalida ti panagadal kadagiti nasantuan a kasuratan iti pagtaengan. Ibilangmo no kasano a mayallukoymo ken masuportaram ti panagadal ti ebanghelio iti pagtaengan.
Isuratmo dagiti Impresionmo
Yawis ti Panagbibinninglay
Awisem dagiti ubbing a patimbukel nga agtugawda iti suelo, ket mangitulid ti bola iti maysa kadakuada. Kiddawem iti dayta nga ubing a mangibinglay ti maysa a banag a nasursurona itay nabiit pay maipapan iti ebanghelio iti pagtaengan wenno iti Primary. Kalpasanna awisem ti ubing a mangitulid ti bola iti sabali pay a tao. Uliten agingga a naaddaan ti tunggal ubing ti gundaway a mangibinglay iti maysa a banag.
Isuro ti Doktrina: In-inaudi nga Ubbing
Kas maysa a miembro ti Simbaan, nasken nga ayatek ken pagserbiak dagiti dadduma.
Mabalin nga saanmo a pilien nga isarita ti adu unay maipapan kadagiti pannursuro ni Nehor kadagiti ubbing, ngem mabalin a pakairanudanda ti pannakaammo nga iti Simbaan agserbitayo gapu ta ay-ayatentayo dagiti dadduma, saan a gapu ta kayattayo ti agbalin a nabaknang wenno nalatak.
Dagiti Mabalin nga Aktibidad
-
Ibinglay kadagiti ubbing, iti simple a balikas, ti estoria da Alma ken Nehor (kitaen iti Alma 1; “Kapitulo 20: Da Alma ken Nehor,” Dagiti Estoria iti Libro ni Mormon, 54–55, wenno ti maitutop a video iti ChurchofJesusChrist.org). Iyunay-unay a nupay natangsit dagiti pasurot ni Nehor kadagiti miembro ti Simbaan, adu kadagiti miembro ti Simbaan ti nagtalinaed a naimbag ken naayat.
-
Ibasam ti Alma 1:30 kadagiti ubbing, ken tulongam ida a makaawat nga imbinglay dagiti tao ti Simbaan no ania ti adda kadakuada kadagiti tao nga agkasapulan iti tulong. Tulongam dagiti ubbing a mangpanunot kadagiti banag a mabalinda nga ibinglay ken dagiti tao a pangibinglayanda kadagitoy. Allukoyem dagiti ubbing a mangidrowing kadagiti simple a ladawan dagiti planoda.
-
Aggigiddan nga agkansion iti kanta maipapan iti ayat ken panagserbi, kas iti “Kindness Begins with Me” (Children’s Songbook, 145), ken tulongam dagiti ubbing a mangpanunot kadagiti tignay a maigiddan iti kanta.
Sungbatanto ti Dios dagiti kararagko.
Idi narikna da Alma ken dagiti Nephite ti “nalaus a buteng” (Alma 2:23), nagkararagda para iti tulong ket napapigsada. Tulongam dagiti ubbing a makasursuro manipud iti pagwadanda.
Dagiti Mabalin nga Aktibidad
-
Iti panangusar kadagiti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia wenno iti “Kapitulo 21: Dagiti Amlicite” (Dagiti Estoria iti Libro ni Mormon, 56–57, wenno ti maitutop a video iti ChurchofJesusChrist.org), isaritam kadagiti ubbing no kasano a nakagun-od iti pigsa dagiti Nephite tapno abakenda dagiti Amlicite. Saludsodem kadagiti ubbing maipapan kadagiti banag a nakabutbuteng wenno narigat para kadakuada, ken paneknekam a makapagkararagda iti Nailangitan nga Ama para iti tulong kadagitoy a banag.
-
Ibinglay ti maysa a padasmo idi tinulongannaka ti Dios kalpasan a nagkararagka Kenkuana. Awisem dagiti ubbing a mangibinglay kadagiti padasda iti panagkararag.
Ti pammaneknekko ti mangpatibker kadagiti dadduma.
Masansan a ti “natarnaw a pammaneknek” (Alma 4:19) ti maysa nga ubing ti napigsa a makaimpluensia kadagiti dadduma. Kasano a matulongam dagiti ubbing a mangsarak kadagiti wagas a pangibinglayanda kadagiti pammaneknekda?
Dagiti Mabalin nga Aktibidad
-
Lukibem dagiti nasantuan a kasuratan iti Alma 4:19, ket ilawlawagmo nga idi nakita ni Alma no kasano ti kinadangkes dagiti tao, inkeddengna a ti kasayaatan a wagas a mangtulong kadakuada ket ti mangiburay iti “natarnaw a pammaneknek” kadakuada. Usarem ti panid ti aktibidad iti daytoy a lawas a mangisuro kadagiti ubbing no ania ti pammaneknek ken no ania ti iramanna. Allukoyem ida a mangibinglay kadagiti pammaneknekda.
-
Ibukbokmo ti sumagmamano a nadalus a danum iti nalitnaw a baso, ken ilawlawag a ti danum ket mayarig kadagiti pammaneknektayo gapu ta mabalintayo nga ibinglay daytoy kadagiti dadduma. Ibukbokmo ti danum iti baso iti bassit a tasa para iti tunggal ubing, ken ibagam kadagiti ubbing a no ibinglaytayo dagiti pammaneknektayo, matulongantayo dagiti dadduma a maaddaan met kadagiti napipigsa a pammaneknek.
-
No kayat dagiti ubbing, pagpraktisem ida a mangibinglay kadagiti pammaneknekda. Mangisingasing iti sumagmamano a wagas a pangipakitaanda nga ammoda a pudno ti ebanghelio, agraman dagiti tignayda.
Isuro ti Doktrina: In-inauna nga Ubbing
Masursurok ti mangbigbig kadagiti palso a pannursuro.
Iti sumagmamano a paset iti panagbiagtayo, nasken a maipasangotayo amin kadagiti tao a kas ken ni Nehor—dagiti mangpadas a mangallilaw kadatayo kadagiti mensahe a makaay-ayo ngem palso ken makadangranda. Makatulong kadagiti ubbing ti panangibinglay iti pakaammuan iti Alma 1:2–9 nga agsagana para kadagiti kasta a pannakisaranget iti biagda.
Dagiti Mabalin nga Aktibidad
-
Tulongam dagiti ubbing a mangbasa iti Alma 1:2–4 a mangrebyu iti sumagmamano kadagiti banag nga insuro ni Nehor, a maysa a palso a mannursuro. Tulongam ida a mangaramid iti maysa a pudno-wenno-palso a pannubok [true or false quiz] babaen ti panangusar kadagitoy a bersikulo. Apay a no dadduma itipon ni Satanas dagiti kinapudno kadagiti kinaulbod? Tulongam dagiti ubbing nga agpanunot iti sumagmamano a pagarigan.
-
Kalpasan ti aggigiddan a panangrebyu iti Alma 1:2–9 , kiddawem iti tunggal maysa kadagiti ubbing a mangbasa iti maysa kadagiti sumaganad a nasantuan a kasuratan: Mateo 7:21–23; 2 Nephi 26:29–31; Mosiah 18:24–26; ken Helaman 12:23–26. Kasano a sinupiat dagitoy nasantuan a kasuratan ti pannursuro ni Nehor? Kasano a mausartayo dagiti nasantuan a kasuratan a mangpatibker kadagiti bukodtayo a pammaneknek maipapan iti ebanghelio?
Kas maysa a miembro ti Simbaan, nasken nga ayatek ken pagserbiak dagiti dadduma.
No dadduma managparabur ket managited dagiti miembro ti Simbaan iti aldaw ni Alma, ket iti dadduma pay a panawen natangsit ken napannakkelda. Tulongam dagiti ubbing a sursuruam a makasursuro manipud kadagiti padasda.
Dagiti Mabalin nga Aktibidad
-
Tulongam dagiti ubbing a magbasa iti Alma 4:6–13, ken magilawlawag iti kayulogan dagiti balikas a kas iti “managpungtot,” “mangidadanes,” ken “panangumsi” (agusar ti maysa a diksionario no kasapulan). Kasano ti mariknatayo no tratuendatayo dagiti tao iti kakastoy a wagas? Awisem dagiti ubbing a mangsapul kadagiti balikas iti Alma 1:26–30 a mangiladawan no kasano ti kayat ti Nailangitan nga Ama a panangtratotayo iti tunggal maysa.
-
Kiddawem kadagiti ubbing a mangbasa iti Alma 1:27, 30 ken mangilista kadagiti kita ti tattao a natulongan dagiti miembro ti Simbaan. Awisem dagiti ubbing a mangpanunot kadagiti tao iti sangakaarrubaan wenno eskuelada a mabalin nga “[agtalinaed] nga agkasapulan” (Alma 1:30) iti ayat ken tulongda. Tapno mapatibker daytoy a pagbatayan, aggigiddan nga agkansion iti maysa a kanta maipapan iti kinamanangngaasi kas iti “I’ll Walk with You” (Children’s Songbook, 140–41).
Ti pammaneknekko ti mangpatibker kadagiti dadduma.
Inted ni Alma ti posisionna a kas pangulo nga ukom tapno mabalinna a bubosen iti ad-adu pay a panawen a mangibinglay iti pammaneknekna ken panangtulongna kadagiti tao nga agbabawi. Mabalin a ti pagwadanna ti mangparegta kadagiti ubbing a masansan a mangibinglay kadagiti pammaneknekda.
Dagiti Mabalin nga Aktibidad
-
Basaem ti Alma 4:8–12, 15 kadagiti ubbing, ken kiddawem kadakuada a mangilasin kadagiti parikut a mapaspasamak iti uneg ti Simbaan, kas nailadawan kadagitoy a bersikulo. Awisem dagiti ubbing a mangisingasing iti sumagmamano a banag a mabalin nga aramiden ni Alma tapno marisut dagitoy a problema. Tulongam ida a maammuan, iti Alma 4:16–20, no ania ti inkeddeng ni Alma nga aramiden. Apay a nabileg unay ti pammaneknek?
-
Tapno matulongam dagiti ubbing a makaawat no ania ti pammaneknek ken no ania ti iraman daytoy, ipabuyam ti video nga “Apostle Testimony Montage” (ChurchofJesusChrist.org); aggigiddan nga agkansion iti maysa a kanta maipapan ti topiko, kas iti “Testimony” (Hymns, no. 137); wenno usarem ti panid ti aktibidad iti daytoy a lawas. Kiddawen kadagiti ubbing a mangibinglay no ania ti nasursuroda manipud kadagitoy a resources.
Yallukoy ti Panagsursuro iti Pagtaengan
Tulongam dagiti ubbing nga agpanunot ti maysa a tao a mabalinda a pangibinglayan kadagiti pammaneknekda iti sumaruno a lawas. Allukoyem ida a mangisurat iti maysa a plano a makatulong kadakuada a mangipatungpal iti panggepda a tun-oyen.
Panangpadur-as iti Panangisurotayo
Agdamag kadagiti saludsod a mangyawis iti pammaneknek. “Ti panagdamag kadagiti saludsod a mangallukoy kadagiti agad-adal nga agpaneknek maipapan kadagiti pagbatayan a maisursuro ket mabalin a maysa a nabileg a wagas tapno maawis iti Espiritu” (Panangisuro iti Wagas ti Mangisalakan, 32). Tapno maawis dagiti ubbing a mangibinglay iti pammaneknek, agdamag kadagiti saludsod a mangiparikna kadakuada a mangpanunot ken mangibinglay no kasano ti panagriknada maipapan iti Mangisalakan wenno iti ebangheliona. Mabalinmo met nga agdamag maipapan kadagiti padasda iti kararag, serbisio, dagiti ordinansa kas iti panagbuniag, wenno pannakailiw ti impluensia ti Espiritu Santo.