Ni Alma nga Ub-ubing a mangaskasaba, ni Gary L. Kapp

Mayo 25–31

Mosiah 29–Alma 4

“Natibkerda ken Saan a Maisin”

Ti panagbasa kadagiti nasantuan a kasuratan ket mangyawis iti paltiing. Agbalinka a nakasagana kadagiti mensahe a kayat ti Apo nga ited kenka.

Isuratmo dagiti Impresionmo

Nalabit a makita ti sumagmamano ti singasing ni Ari Mosiah a mangsukat kadagiti ari kadagiti nabutosan nga ukom ket maysa laeng nainsiriban a reporma iti pulitika. Ngem kadagiti Nephite, nangnangruna kadagitay nagbiag iti panangituray ni nadangkes nga Ari Noe, addaan pay daytoy a pannakabalbaliw iti naespirituan a kinapateg. Naimatanganda no kasano a ti maysa a nadangkes nga ari ket nakaigapu iti “basol” ken “anian a pannakadadael” kadagiti taona (Mosiah 29:17), ket “kasta unay ti gagarda” a mawayawayaan manipud iti kasta nga impluensia. Daytoy a pannakabalbaliw ti mangpalugod kadakuada nga agbalin a responsable para iti bukodda a kinalinteg ken “mangsungbat iti bukod[da] a basol” (Mosiah 29:38; kitaen met iti DkK 101:78).

Kinaagpaysona, ti gibus ti panagturay dagiti ari ket saanna a kayat a sawen ti gibus dagiti parikut iti kagimongan iti Nephite. Dagiti nasikap a tattao a kas kada Nehor ken Amlici ket nangitandudo kadagiti palso a kapanunotan, indadanes dagiti saan a mamati dagiti Santo, ket nagbalin a napannakkel ken natnag iti basol dagiti adu a miembro ti Simbaan. Ngem nagtalinaed a “natibker ken saan a maisin” “dagiti napakumbaba a pasurot ti Dios” iti laksid ti napasamak kadakuada (Alma 1:25). Ket gapu iti panagbalbaliw nga inlungalong ni Mosiah, tapno “ipukkawda [ti timekda]” a mangimpluensia iti gimongda para iti pagimbagan (Alma 2:6).

Dagiti Kapanunotan para iti Bukod a Panagadal iti Nasantuan a Kasuratan

Mosiah 29:11–27; Alma 2:1–7

Makapagbalinak a nasayaat nga impluensia iti komunidadko.

Lima laeng a tawen iti panagturay dagiti ukom, rimsua ti krisis a mangsubok iti imbaga ni Mosiah a ti timek dagiti tattao ket gagangay a pumili no ania ti umno (kitaen iti Mosiah 29:26). Nairaman ti isyu ti kinawaya ti relihion: pinanggep ti tao nga agnagan iti Amlici nga “ipaidamna [kadagiti tao] dagiti kalintegan ken gundawayda iti simbaan” (Alma 2:4). Nadlawmo kadin a maipaspasango iti pagpeggadan dagiti kalintegan iti relihion iti pagiliam wenno komunidadmo? Ania ti masursurom manipud iti wagas a panagresponde dagiti Nephites iti daytoy a pagpeggadan? (kitaen iti Alma 2:1–7).

Nalabit nga adu dagiti napateg nga isyu a sangsanguen ti komunidadmo. Kasano a masiguradom, kas kadagiti Nephite, a mairaman ti timekmo iti “timek dagiti tao”? Nalabit agindegka iti maysa a lugar a ti timek dagiti tao ket limitado ti impluensiana iti gobierno; no kasta, adda kadi dagiti sabali a wagas a pakapagbalinam a a nasayaat nga impluensia iti komunidadmo?

Alma 1

Mabigbigko ken mapagkedkedak ti palso a doktrina.

Nupay idi agangay impudno ni Nehor a palso dayta nga insurona, nagtultuloy nga inimpluensiaan dagiti pannursurona dagiti Nephite iti uneg ti adu a tawen (kitaen iti Alma 1:15–16; 2:1–2; 14:14–18; 15:15; 21:4; 24:28). Apay a mabalin a matakuatan dagiti tao a makasulisog dagiti pannursuro ni Nehor? Bayat ti panangbasam iti Alma 1:2–4, kitaem no mabalinmo nga ilasin dagiti kinapalso dagiti pannursuro ni Nehor; nalabit a madlawmonto a naisuroda a naikadua kadagiti pakpakuna a kinapudno.

Nadaeran ni Gideon ni Nehor “kadagiti balikas ti Dios” (Alma 1:7, 9). Mapanunotmo kadi dagiti nasantuan a kasuratan a mangtubngar kadagiti kinaulbod ni Nehor? Dagitoy ti sumagmamano a pagarigan, ngem adu dagiti dadduma pay: Mateo 7:21–23; 2 Nephi 26:29–31; Mosiah 18:24–26; ken Helaman 12:25–26. Kasano a makatulong kenka dagitoy a nasantuan a kasuratan a mangtubngar kadagiti kinaulbod a maisursuro iti agdama?

Sabali pay a wagas iti panagadal iti Alma 1 ket ti panangidilig ken ni Nehor ken dagiti pasurotna (bersikulo 3–9, 16–20) ken “dagiti tao ti Dios” (bersikulo 25–30; kitaen met iti 2 Nephi 26:29–31). Kasano nga agbalinka nga ad-adda a kas kadagiti tao ti Dios? Madlawmo kadi ti ania man a “panaginsasaserdote” iti bukodmo a panagserbi?

Alma 1:27–31; 4:6–15

Saan nga iturong dagiti pudno a disipulo ni Jesucristo dagiti puspusoda iti kinabaknang.

Agpada nga iladawan dagiti kapitulo 1 ken 4 ti Alma dagiti panawen idi rimmang-ay ti Simbaan, ngem nagduduma iti tunggal kasasaad ti panagresponde dagiti miembro ti Simbaan iti panagrang-ayna. Ania ti madlawmo a pagdudumaan? Maibatay iti no ania ti naammuam, kasano nga iladawam ti galad a “napakumbaba a pasurot ti Dios” (Alma 4:15) iti kinabaknang ken panagrang-ay? Ania ti naparegta a nariknam a mangbaliw maipanggep iti bukodmo a galad?

Alma 4

Ti “balikas ti Dios” ken “natarnaw a pammaneknek” ket makapagbalbaliw kadagiti puso.

Ania ti namangbalin ken ni Alma “a napnuan ladingit” (Alma 4:15) iti Alma 4? Mabalin nga adda agkuna a ti saad ti pangulo nga ukom ket mangipatugaw koma ken ni Alma iti kasayaatan a posision tapno mangrisut kadagiti problema a nakitana kadagiti taona. Ngem narikna ni Alma nga adda nasaysayaat a wagas. Ania ti makaparegta kenka maipapan iti yaasidegna a panangtulong kadagiti taona? Paregtaen ti panagsursurom dagiti kapanunotan maipapan iti no kasano a sililinteg a maimpluensiaam dagiti adda iti aglawlawmo; no kasta, agtignay kadagita a kapanunotan.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

Alma 1:19–25

Mabalin a pagimbagan ti pamiliam manipud iti panangbigbigda kadagiti nadumaduma a wagas a panagresponde dagiti miembro ti Simbaan iti pannakaidadanes kadagitoy a bersikulo. Nalabit a mabalinmo a sanayen dagiti wagas ti umno a panagresponde no batikusen dagiti dadduma dagiti pammatitayo.

Alma 3:4

Ania ti mensahe a kayat nga ipakaammo dagiti Amlicite idi “minarkaanda ti bagbagida”? (kitaen iti Alma 3:4, 13). Ania dagiti mensahe a mabalin nga ipakaammotayo—nairanta wenno di nairanta—babaen iti langatayo? Mabalin a nasayaat daytoy a kanito a a panangrebyu iti “Kawes ken Langa” iti Para iti Pigsa dagiti Agtutubo (2011), 6–8.

Alma 4:2–3

Ania dagiti banag wenno padas a ”nangriing [kadatayo] a nanglagip ti pagrebbengan[tayo]” iti Dios? (Alma 4:3). Mabalin pay a nasamay a mangibinglay kadagitoy a bersikulo kalpasan ti panangriing iti pamiliam iti agsapa. Kalpasanna mabalinyo a paglilinnawagan no kasano a dagiti karit ti pisikal a panagriing ket makatulong a maawatantayo dagiti karit ti panagriing a naespirituan.

Alma 4:10–11

Kasano a maliklikantayo ti panagbalin a “a lapped kadagiti a saan a kameng ti simbaan”? (Alma 4:10). Mabalin met a pakairanudan nga isarita maipapan ti no kasano a mapagbalintayo a sigurado dagiti tignay dagiti dadduma, nangnangruna kadagiti pada a miembro ti Simbaan, nga agbalin a saan a lapped para iti naespirituan a panagdur-astayo.

Alma 4:19

Tapno matulongam ti pamiliam a maawatanda ti bileg ti pammaneknek, mabalinmo nga idawat kadakuada a mangpanunot iti maysa a panawen idi nakaaring unay kadakuada ti idedengngeg iti pammaneknek ti maysa a tao. Apay a mabalin a pilien ni Alma nga aramaten ti pammaneknek ken ti balikas ti Dios a mangsagid iti puspuso dagiti tao? (kitaen met iti Alma 31:5). Apay a nasamsamay daytoy ngem iti sabali a wagas a mabalin nga aramaten ti tattao a mangallukoy kadagiti dadduma nga agbalbaliw? Adda kadi tattao a mabalintayo a mapapigsa ti pammatida babaen ti panangiburay iti pammaneknektayo kadakuada?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Bukod a Panagadal

Aramatem (wenno yarigmo) iti bagim kadagiti nasantuan a kasuratan. Ibilangmo no kasano a mayaplikar iti biagmo dagiti estoria ken pannursuro iti nasantuan a kasuratan. Kas pagarigan, mabalin matakuatam dagiti pagpadaan iti nagbaetan ti lubong kadagitoy nga al-aldaw ken dagiti problema iti sosiodad a naipasango kadagiti Nephites iti Alma 1–4.

Da Alma ken Amlici, niScott M. Snow