“Mayo 11–17. Mosiah 18–24: ‘Simrektayon iti maysa a Katulagan Kenkuana,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Mayo 11–17. Mosiah 18–24,” Umaykayo, Sumurot Kaniak—Para kadagiti Indibidual ken Pamilia: 2020
Minerva K. Teichert(1888-1976), Panaglibas ni Ari Limhi ken dagiti Taona,1949-1951, oil on masonite, 35 7/8 x 48 inches. Brigham Young University Museum of Art, 1969.
Mayo 11–17
Mosiah 18–24
Simrektayon iti maysa a Katulagan Kenkuana
Insouro ni Presidente Thomas S. Monson, “Bayat ti panagbasa ken panagutobtayo kadagiti nasantuan a kasuratan, mapadasantayonto dagiti nasam-it nga arasaas ti Espiritu kadagiti kararuatayo” (“We Never Walk AloneEnsign wenno Liahona, Nob. 2013, 122).
Isuratmo Dagiti Impresionmo
Ti pakaammuan ni Alma ken dagiti taona iti Mosiah 18; 23–24 ket mangipakita no ania ti kayat a sawen ti “umay iti salinong ti Dios” (Mosiah 18:8). Idi nabuniaganda, nakitulagda iti Dios nga “agpaay kenkuana ken salimetmetan dagiti bilinna” (Mosiah 18:10). Idinto a napasnek a bukod a panagkumit daytoy, kasta met nga adda pakainaiganna iti no kasano a trinatoda ti tunggal maysa. Wen, ti panagdaliasat nga agsubli iti Nailangitan nga Ama ket bukod ken indibidual, ket awan ti makalapped kadagiti katulagantayo para kadatayo, ngem saan a kayat a sawen dayta nga agmaymaysatayo. Kasapulantayo ti tunggal maysa. Kas miembro ti Simbaan ni Cristo, makitulagtayo nga agserbi iti Dios babaen ti panangtulong ken panagserbi iti maysa ken maysa iti panagdaliasattayo iti dalan, “pannakipagbaklay iti imet ti tunggal maysa” (Mosiah 18:8–10). Pudno nga adda dagiti imet a binaklay dagiti tao ni Alma, kas met laeng iti ar-aramiden ti amin kadatayo. Ket maysa a wagas a pakatulongan ti Apo kadatayo a “lumag-an dagiti dagensen a naipabaklay [kadatayo]” (Mosiah 24:15 ket babaen ti pannangtedna kadatayo iti maysa a purok dagiti Santo a nagkari a makipagladingit kadatayo ken mangliwliwa kadatayo, kas iti inkaritayon nga aramiden para kadakuada.
Dagiti Kapanunotan para iti Bukod a Panagadal iti Nasantuan a Kasuratan
Iraman ti panagbuniag ti katulagan nga agserbi iti Dios ket agtakder a kas maysa a saksi Kenkuana.
Naglaon tiMosiah 18:8–10 kadagiti pannursuro ni Alma maipapan iti katulagan ti panagbuniag, wenno ti kari nga aramidentayo iti Dios iti panagbuniag. Bayat ti panangadalmo kadagitoy a bersikulo, utobem dagiti sumaganad a saludsod:
-
Ania ti masursurom manipud kadagitoy a bersikulo maipapan kadagiti kari nga inaramidmo iti panagbuniag? Ania ti inkari kenka ti Dios?
-
Kasano a mainaig ti katulagan nga agserbi iti Dios (kitaen iti bersikulo 10) kadagiti panagkagumaantayo nga agserbi iti tunggal maysa?(kitaen kadagiti bersikulo 8–9).
-
Ania ti ar-aramidem a mangtungpal kadagiti karim?
-
Kasano a ti panangtungpal iti katulagam iti panagbuniag ket matulongannaka a “mapno iti Espiritu”? ( Mosiah 18:14). Kasano a tulongannaka ti Espiritu nga agtungpal iti katulagam?
No agaramidak kadagiti katulagan iti Dios, awatek dagiti bendisionna.
Ipalgak pay daytoy a pakaammuan ti umno a wagas ti panagbuniag. Ania ti masursurom kadagiti bersikulo 14–17 maipapan iti no kasano a nasken nga aramiden ti panagbuniag? Ania pay ti masursurom maipapan iti panagbuniag manipud iti Mateo 3:16; Taga Roma 6:3–5; 3 Nephi 11:21–28; ken Doktrina ken Katulagan 20:72–74?
Kitaen met iti Doktrina ken Katulagan 20:37, 77 79.
Nasken nga agkaykaysa dagiti tao ti Dios.
Iti pannakatakuat da Alma ken dagiti taona, a mangsursurot ken ni Jesucristo no dadduma kaipapananna ti panangpanaw iti ammo a wagas ti panagbiag para iti maysa a banag a baro ken maigiddiat. Ngem nakagun-od iti pigsa dagiti tao ni Alma manipud iti tunggal maysa a kas paset ti “simbaan ni Cristo” (Mosiah 18:17). Kasano paregtaennaka dagiti pannursuro iti Mosiah 18:17–30 nga agbalin a nasaysayaat a miembro ti Simbaan? Ania ti maaramidmo a mangtulong kadagiti miembro iti ward wenno branchmo tapno “agrereppeng ti puspusoda iti panagkaykaysa ken ayat”?? (Mosiah 18:21).
Kitaen met iti Henry B. Eyring, “Our Hearts Knit as One,” Ensign wenno Liahona, Nob. 2008, 68–71.
Matungpalto dagiti balikas dagiti propeta.
Nagaramid ni Abinadi iti sumagmamano a nalawag a pammadto maipapan iti no ania ti mapasamak ken ni Ari Noe ken dagiti taona no nagkedkedda nga agbabawi. Nupay kasta, sumagmamano kadagitoy a pammadto ti kasla di nakappapati (kitaen iti Mosiah 12:1–8, 14–15), nangnangruna manipud idi naballigian a sinalakniban dagiti Nephite ti bagbagida a maibusor kadagiti Lamanite iti dumani 50 a tawen (kitaen iti Mosiah 9:16–18; 11:19). Ngem maipatungpalto amin dagiti balikas dagiti propeta—iti aldawtayo kas kadagidi aldaw ni Abinadi.
Ania ti masarakam iti Mosiah 19–20 a nangiturong ken ni Gideon tapno mangipakdaar a naipatungpalen dagiti pammadto ni Abinadi? (kitaen iti Mosiah 20:21). Kasano a papigsaen daytoy a pakaammuan ti pammatim kadagiti ballaag ken pammagbaga dagiti propeta ti Dios ken ti panagkumitmo a mangsurot kadagiti balikasda? Kaano a naimatangamon dagiti balikas ti maysa a propeta a naipatungpalen iti panawentayo?
Mapalag-an ti Dios dagiti dagensenko.
Agpadpada a natnag iti pannakaadipen dagiti tao da Limhi ken Alma, nupay iti nadumaduma a gapu ken agduduma a kasasaad. Ania ti masursurom babaen iti panangyarig kadagiti pakaammuan dagiti tao ni Limhi iti Mosiah 19–22 ken dagiti tao ni Alma iti Mosiah 18; 23–24? Mabalinmo a kitaen no kasano a nagresponde ti tunggal maysa kadagitoy a grupo iti pannakaadipen wenno no kasano a naisalakan ti tunggal maysa iti agangay. Bayat ti panangaramidmo, sapulem dagiti mensahe a mayaplikar iti biagmo. Kas pagarigan, ania ti masursurom manipud kadagitoy a pakaammuan a makatulong kenka a mangibaklay kadagiti dagensenmo?
Makapagtalekak iti Apo.
Nupay nagbabawida kadagiti basolda, nakita latta ni Alma ken dagiti taona ti bagbagida iti pannakaadipen. Ipakita ti padasda a ti panagtalek iti Apo ken panagbiag kadagiti katulagantayo ket saan a kanayon a manglapped kadagiti rigat, ngem daytoy ti mangtulong kadatayo a mangparmek kadagitoy. Bayat ti panangbasam iti Mosiah 23:21–24 ken 24:8–17, kitaem dagiti balikas ken ragup dagiti balikas a makatulong kenka a makasursuro nga agtalek iti Dios, iti baet dagiti kasasaadmo.
Kiten met iti Thomas S. Monson, “I Will Not Fail Thee, nor Forsake Thee,” Ensign wenno Liahona, Nob. 2013, 85–87.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Mosiah 18:1–4
Adda maysa a pagsasao a a mabilangmo dagiti bukel iti maysa a mansanas, ngem dimo mabilang dagiti mansanas nga aggapu iti maysa a bukel. Maysa laeng a tao ti nakasagana nga umawat iti pammaneknek ni Abinadi, ngem dayta a maysa a tao—ni Alma—ti nangimpluensia kadagiti kaputotan dagiti Nephite. Nalabit a mausarmo ti maysa a bunga nga addaan kadagiti bukel a pangipakita iti daytoy a pagbatayan. Kasano a mayaplikar daytoy a mensahe iti pamiliatayo? Ania ti mabalin nga aramidentayo a mangiburay kadagiti pammaneknektayo kadagiti dadduma?
Mosiah 18:8–10
Ania ti masursurotayo maipapan iti katulagantayo iti panagbuniag manipud kadagitoy a bersikulo?(kitaen met iti D&K 20:73, 77–79). Ania ti ar-aramidentayo nga agsagana wenno agtungpal iti katulagantayo iti panagbuniag?
Mosiah 18:30
Ania dagiti lugar nga adda naisangsangayan a kaipapananna kadatayo gapu kadagiti naespirituan a padastayo sadiay?
Mosiah 21:11–16; 24:10–15
Ania ti masursurotayo babaen iti panamagdinnasig iti pannakaadipen dagiti tao ni Alma ken dagiti tao ni Limhi?
Mosiah 21:15; 24:11–15
Ania ti isuro kadatayo dagitoy a bersikulo maipapan kadagiti wagas a panangsungbat ti Apo kadagiti kararag?
Para kadagiti dadduma pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Mangsapul iti oras a mayannatup para kenka. Masansan a kalakaan ti agsursuro no makapagadalka kadagiti nasantuan a kasuratan a saanka a masingsinga. Mangsapul iti oras a mayannatup para kenka, ken aramidem ti amin a kabaelam nga agtultuloy nga agadal iti dayta nga oras iti tunggal aldaw.
Dandanum ti Mormon, ni Jorge Cocco