“Mayo 4–10. Mosiah 11–17: ‘Ti Silaw … a Saan a Pulos a Mapasipnget,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Mayo 4–10. Mosiah 11–17,” Umaykayo, Sumurot Kaniak—Para kadagiti Indibidual ken Pamilia: 2020
Ni Abinadi iti sango ni Ari Noe, ni Andrew Bosley
Mayo 4–10
Mosiah 11–17
“Ti Silaw … A Saan a Pulos a Mapasipnget”
Dagiti balikas ni Abinadi ti nakaigapu iti naindaklan a panagbalbaliw iti uray maysa a miembro iti korte ni Ari Noe (kitaen iti Mosiah 17:2–4). Basaem ti Mosiah 11–17 nga addaan iti kararag iti pusom a maawatmo dagiti impresion maipapan iti no kasano a makapagbalbaliwka.
Isuratmo agiti Impresionmo
Mangrugi dagiti dadakkel nga apuy iti maysa a rissik. Ni Abinadi ti kakaisuna a maymaysa a tao a nagpampaneknek a maibusor iti maysa a nabileg nga ari ken ti kortena. Saan a naawat ti kaaduan a paset dagiti balikasna, ket nakedngan isuna a matay. Ngem ti pammaneknekna maipapan ken ni Jesucristo, nga isu ti “silaw … a saan a pulos a mapasipnget” (Mosiah 16:9), ket namagrissik iti maysa a banag iti kaunggan ti agtutubo a saserdote a ni Alma. Ket dayta a rissik ti kumbersion ket in-inut a dimmakkel bayat ti panangyeg ni Alma kadagiti adu a dadduma pay iti panagbabawi ken pammati ken ni Jesucristo. Dagiti gil-ayab ti apuy a nangpatay ken ni Abinadi ket in-inut a naiddep, ngem ti apuy ti pammati a pinarnuay dagiti balikasna ket nalabit nga adda napaut nga impluensiada kadagiti Nephite—ken kadagiti mangbasa kadagiti balikasna iti agdama. Kaaduan kadatayo ti saanto iti kaano man a naan-anay a mapasaran ti kas iti inaramid ni Abinadi gapu kadagiti pammaneknektayo, ngem addaantayo amin iti kanito no ti panangsurottayo ken ni Jesucristo ket maysa a pannubok ti tured ken pammatitayo. Nalabit a ti panangadal iti pammaneknek ni Abinadi ket mangrubrobto pay kadagiti gil-ayab ti pammaneknek ken tured iti pusom.
Dagiti Kapanunotan para iti Bukod a Panagadal iti Nasantuan a Kasuratan
Maitakderak ti kinapudno, uray no maymaysaak a tumakder.
Panunotem no kasano koma a nakaupay para ken ni Abinadi nga isangit ti panagbabawi kadagiti tao a kasla saanda a pulos nga interesado iti panangbalbaliw kadagiti nadangkes a wagasda. Saan a naawat manen ken manen ti mensahena. Nupay kasta saan a pulos a simmuko ni Abinadi.
Kaano ti pannakariknam a maymaysaka a nangitakder a mangsalaknib iti kinapudno? Bayat ti panangbasam iti Mosiah 11–13 ken 17, ania ti masursurom tapno makatulong kenka nga agbalin a nakasagana no kasapulannaka ti Apo a mangitakder iti ebangheliona? Ania dagiti dadduma pay a pagbatayan a masursurom manipud iti pagwadan ni Abinadi?
Masapul a yaplikarko iti pusok tapno maawatak dagiti balikas ti Dios.
Ammo dagiti saserdote ni Ari Noe ti balikas ti Dios—makaadawda kadagiti binatog ti nasantuan a kasuratan ket kinalikagumanda nga isuro dagiti bilin. Ngem dagitoy a bilin ket “saan a naisurat iti puspuso[da]”, ken saanda nga “inaramat ti puso[da] nga umawat” kadakuada (Mosiah 13:11; 12:27). Kas bungana, nagtalinaed a di nagbalbaliw ti biagda.
Bayat ti panangbasam iti Mosiah 12:19–30, utobem no ania ti kaipapanan ti aramatem iti pusom nga umawat iti balikas ti Dios. Maparegtanaka kadi daytoy nga agaramid iti ania man a panagbalbaliw iti wagas a yaasidegmo iti panangsursuro iti ebanghelio?
Kanunonganto ti Apo dagiti katulonganna iti aramidna.
Iti maysa a bangir, mangted iti adu a pagarigan ti padas ni Abinadi no kasano a suportaran ti Apo dagiti katulonganna—masarakam ti sumagmamano a kasta a pagarigan iti Mosiah 13:1–9. Iti sabali a bangir, impalubos pay ti Apo a maidadanes, maibalud, ken mapapatay ni Abinadi gapu iti pammaneknekna. Ania ti masarakam kadagitoy a bersikulo a mangipakita a nagtalek ni Abinadi iti Apo? Kasano nga aringan ti pagwadan ni Abinadi ti wagas a panangkitam kadagiti takemmo ken pagrebbengam?
Nagsagaba ni Jesucristo gapu kaniak.
Namati ni Ari Noe ken dagiti saserdotena a dimteng ti pannakaisalakan babaen ti paglintegan ni Moises. Tinarigagayan ni Abinadi a maammuanda nga umay ti pannakaisalakan babaen ti Mesias, a ni Jesucristo. Iti Mosiah 14–15, kitaem dagiti balikas ken ragup dagiti balikas a mangiladawan iti Mangisalakan ken no ania ti sinagabana para kenka. Ania dagiti bersikulo a makatulong a mangpauneg iti ayat ken panagyaman Kenkuana?
Kasano nga agpada a ti Ama ken ti Anak ni Jesucristo?
No dadduma makatikaw dagitoy a binatog gapu ta kasla isursuro ni Abinadi a ti Nailangitan nga Ama ken ni Jesucristo ket maymaysa a Kinatao, idinto nga ammotayo a nagsinada a Kinatao. Ania ti kayat a sawen ni Abinadi? Insurona a ti Dios nga Anak—ni Jehova—ket agbalin a Mannubbot (kitaen iti Mosiah 15:1), nga agnanaed iti lasag, nga agbalin a paset ti tao ket paset ti Dios (dagiti bersikulo 2–3) Naan-anay nga intedna ti Bagina iti pagayatan ti Dios nga Ama (dagiti bersikulo 5–9). Gapu iti daytoy, agpada a ni Jesucristo nga Anak ti Dios ken ti naan-anay a naindagaan a pannakabagi ti Dios nga Ama (kitaen iti Juan 14:6–10).
Intuloy ni Abinadi babaen ti panangilawlawagna a ni Jesucristo pay ti Ama a kayatna a sawen a no awatentayo ti pannakasubbotna, agbalintayo a “bukelna” (Mosiah 15:11–12). Iti sabali a pannao, agbalintayo a naespirituan a maipasngay manen babaen Kenkuana (kitaen iti Mosiah 5:7).
Kitaen met iti Juan 5:25–27; 8:28–29; 17:20–23; “The Father and the Son,” Ensign, Abr. 2002, 12–18.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Mosiah 11–13; 17
Makaparegta a pagwadan da Abinadi ken Alma iti panagtalinaedda a matalek iti kinapudno, uray pay no ti panangaramidda iti kastoy ket saan a nalatak. Mabalin a mapaspasaran dagiti miembro ti pamiliam ti pammilit iti kagimongan a mangikompromiso kadagiti pagrukodanda. Ania ti masursurotayo manipud kada Abinadi ken Alma maipapan iti panangitakder iti kinapudno? Makatulong ti aramid iti arte [artwork] a naipakuyog iti daytoy a balabala a makatulong iti pamiliam a mangiladawan iti panunotda iti pakaammuan. Kalpasan ti panangadal kadagitoy a kapitulo, ibilangmo ti panangyakem kadagiti pudno a pasamak iti biag tapno makapagpraktis dagiti miembro ti pamiliam iti panangresponde iti pammilit a mangikompromiso kadagiti pagrukodanda. Wenno mabalinyo nga iburay iti tunggal maysa dagiti dadduma pay a padasyo iti panangitakder iti kinapudno.
Mosiah 12:33–37; 13:11–24
Ania ti kayat a sawen ti maaddaan kadagiti bilin ti Dios a “naisurat iti puspuso[tayo]? (Mosiah 13:11). Mabalin nga isuratmo dagiti sumagmamano a kapanunotan (wenno mangidrowingka kadagiti ladawan dagiti kapanunotam) iti dakkel a sinanpuso a papel. Apay a napateg dagiti bilin kadatayo? Kasano nga isurattayo dagitoy iti puspusotayo?
Ti panagbasa kadagiti nasantuan a kasuratan ket matulongannatayo a mangisurat kadagiti bilin iti puspusotayo.
Mosiah 14
Iti daytoy a bersikulo masarakamto ti sumagmamano a balikas ken ragup dagiti balikas ia mangiladawan ken ni Jesucristo. Nalabit a mabalin nga ilista ti pamiliam dagitoy bayat no masapulam dagitoy. Kasano ti rikna dagiti miembro ti pamiliam maipapan iti Mangisalakan bayat ti panagsursuotayo kadagitoy a balikas ken ragup dagiti balikas?
Mosiah 3:26–7; 16:1–13
Iladawan dagitoy a bersikulo no ania koma ti mapasamak kadagiti annak ti Dios no “saan nga immay iti lubong” ni Jesus (Mosiah 16:6) wenno no saanda a simmurot Kenkuana. Ania dagiti nasayaat a banag a napasamak a gapu ta immay Isuna ket nangsubbot para kadatayo?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Agusar kadagiti estoria ken pagarigan a mangisuro kadagiti pagbatayan ti ebanghelio. Masansan a nangisuro ti Mangisalakan kadagiti pagbatayan ti ebanghelio babaen ti panangusarna kadagiti estoria ken pangngarig. Mangpanunot kadagiti pagarigan ken estoria manipud iti bukodmo a biag a mangparegta iti maysa a pagbatayan ti ebanghelio para iti pamiliam (kitaen iti Panangisuro iti Wagas ti Mangisalakan, 22).
Nagsilnag ti Rupana iti Aglaplapusanan a Rimat, ni Jeremy Winborg